സൗന്ദര്യലഹര്യധിഷ്ഠിതാ ദേവീനാമാവലിഃ
(അവലംബഃ - ശ്രീ ആദിശങ്കരാചാര്യവിരചിതം
സൗന്ദര്യലഹരീസ്തോത്രം)
അമ്മേ നാരായണ ദേവി നാരായണ
ലക്ഷ്മിനാരായണ ഭദ്രേ നാരായണ .
ഓം
ഹരിഃ ശ്രീഗണപതയേ നമഃ .
ശ്രീമഹാസരസ്വത്യൈ നമഃ .
ഓം ശ്രീഗുരുഭ്യോ നമഃ .
ഓം ഐം ഹ്രീം ക്ലീം ചാമുണ്ഡായൈ വിച്ചേ .
ശ്രീഹേമാംബികായൈ നമഃ .
നമശ്ശിവായൈ ച നമശ്ശിവായ .
ഓം സർവചൈതന്യരൂപാം
താം ആദ്യാം
വിദ്യാം ച ധീമഹി
ബുദ്ധിം യാ നഃ പ്രചോദയാത് .
1. ശിവയുക്തായൈ ശക്ത്യൈ നമഃ . (1)
2. യസ്യാഃ വിയോഗേ ശിവഃ സ്പന്ദിതുമപി ശക്തോ ന ഭവതി
തസ്യൈ ശക്ത്യൈ നമഃ . (1)
3. ഹരിഹരവിരിഞ്ചാദിഭിരപ്യാരാധ്യായൈ മഹാദേവ്യൈ നമഃ . (1)
4. യാം പ്രണന്തും സ്തോതും ച അകൃതപുണ്യഃ ന പ്രഭവതി
തസ്യൈ മഹാദേവ്യൈ നമഃ . (1)
5. യസ്യാഃ ചരണപങ്കേരുഹഭവം തനീയാംസം പാംസും
സഞ്ചിന്വൻ വിരിഞ്ചിഃ ലോകാൻ വിരചയതി തസ്യൈ ശക്ത്യൈ നമഃ . (2)
6. യസ്യാഃ അനുഗ്രഹേണ ശൗരിഃ സഹസ്രേണ ശിരസാ
കഥമപി ലോകാൻ അവികലം വഹതി
തസ്യൈ ശക്ത്യൈ നമഃ . (2)
7. യസ്യാഃ ചരണപാംസും സങ്ക്ഷുദ്യ ഹരഃ ഭസ്മോദ്ധൂലനവിധിം ഭജതി
തസ്യൈ ശക്ത്യൈ നമഃ . (2)
8. അവിദ്യാനാം അന്തസ്തിമിരമിഹിരദ്വീപനഗര്യൈ
മഹാദേവ്യൈ നമഃ . (3)
9. ജഡാനാം ചൈതന്യസ്തബകമകരന്ദസ്രുതിഝര്യൈ
മഹാദേവ്യൈ നമഃ . (3)
10. ദരിദ്രാണാം ചിന്താമണിഗുണനികായൈ
മഹാദേവ്യൈ നമഃ . (3)
11. ജന്മജലധൗ നിമഗ്നാനാം മുരരിപുവരാഹസ്യ ദംഷ്ട്രായൈ
മഹാദേവ്യൈ നമഃ . (3)
12. ഭയാത്ത്രാതും വാഞ്ഛാസമധികം ഫലമപി ദാതുഞ്ച
പ്രകടിത വരാഭീത്യഭിനയാഭ്യാം
ദേവ്യാഃ നിപുണചരണാഭ്യാം നമഃ . (4)
13. ലോകാനാം ശരണ്യായൈ മഹാദേവ്യൈ നമഃ . (4)
14. പ്രണതജനസൗഭാഗ്യജനന്യൈ മഹാദേവ്യൈ നമഃ . (5)
15. യാം ആരാധ്യ ഹരിഃ പുരാ നാരീഭൂത്വാ പുരരിപുമപി ക്ഷോഭമനയത്
തസ്യൈ മഹാദേവ്യൈ നമഃ . (5)
16. യാം നത്വാ സ്മരോഽപി രതിനയനലേഹ്യേന വപുഷാ
മഹതാം മുനീനാമപി മോഹായ അന്തഃ പ്രഭവതി
തസ്യൈ മഹാദേവ്യൈ നമഃ . (5)
17. യസ്യാഃ കാമപി കൃപാം അപാംഗാത് ലബ്ധ്വാ അനംഗോ
ജഗദിദം വിജയതേ തസ്യൈ മഹാദേവ്യൈ നമഃ . (6)
18. ക്വണത്കാഞ്ചീദാമായൈ കരികളഭകുംഭസ്തനനതായൈ
മഹാദേവ്യൈ നമഃ . (7)
19. മധ്യേ പരിക്ഷീണായൈ പരിണതശരച്ചന്ദ്രവദനായൈ
മഹാദേവ്യൈ നമഃ . (7)
20. കരതലൈർധനുർബാണാൻ പാശം സൃണീമപി ദധാനായൈ
മഹാദേവ്യൈ നമഃ . (7)
21. പുരമഥിതുരാഹോപുരുഷികായൈ മഹാദേവ്യൈ നമഃ . (7)
22. സുധാസിന്ധോർമധ്യേ സുരവിടപിവാടീപരിവൃതേ
മണിദ്വീപേ നീപോപവനവതി
ചിന്താമണിഗൃഹേ ശിവാകാരേ മഞ്ചേ
പരമശിവപര്യങ്കനിലയായൈ
ചിദാനന്ദലഹര്യൈ മഹാദേവ്യൈ നമഃ . (8)
23. യാ മൂലാധാരേ മഹീം, മണിപൂരേ കം, സ്വാധിഷ്ഠാനേ സ്ഥിതം ഹുതവഹം,
ഹൃദി മരുതം, ഉപരി ആകാശം, ഭ്രൂമധ്യേ മനോഽപി സകലം കുളപഥം ഭിത്വാ
സഹസ്രാരേ പദ്മേ രഹസി പത്യാ സഹ വിഹരതി തസ്യൈ മഹാദേവ്യൈ നമഃ . (9)
24. ചരണയുഗളാന്തർവിഗളിതൈഃ സുധാധാരാസാരൈഃ പ്രപഞ്ചം സിഞ്ചന്ത്യൈ
മഹാദേവ്യൈ നമഃ . (10)
25. രസാമ്നായമഹസഃ സ്വാം ഭൂമിം അവാപ്യ സ്വമാത്മാനം ഭുജഗനിഭം അദ്ധ്യുഷ്ടവലയം
കൃത്വാ കുളകുണ്ഡേ കുഹരിണി സ്വപന്ത്യൈ മഹാദേവ്യൈ നമഃ . (10)
26. യസ്യാഃ ശരണകോണാഃ ചതുർഭിശ്ശ്രീകണ്ഠൈഃ, ശംഭോഃ പ്രഭിന്നാ പഞ്ചഭിഃ
ശിവയുവതിഭിഃ ഇതി നവഭിഃ മൂലപ്രകൃതിഭിരപി, വസുദളകലാശ്രത്രിവലയത്രിരേഖാഭിഃ
സാർദ്ധം പരിണതാഃചതുശ്ചത്വാരിംശത് ഭവന്തി തസ്യൈ മഹാദേവ്യൈ നമഃ . (11)
27. യസ്യാഃ സൗന്ദര്യം തുലയിതും വിരിഞ്ചിപ്രഭൃതയഃ കവീന്ദ്രാഽപി ന ശക്നുവന്തി
തസ്യൈ തുഹിനഗിരികന്യായൈ മഹാദേവ്യൈ നമഃ . (12)
28. യസ്യാഃ ആലോകൗത്സുക്യാദമരലലനാ തപോഭിഃ ദുഷ്പ്രാപാം ഗിരിശസായൂജ്യപദവീമപി
മനസാ യാന്തി തസ്യൈ മഹാദേവ്യൈ നമഃ . (12)
29. യസ്യാഃ അപാംഗാലോകേ പതിതം വർഷീയാംസം നയനവിരസം നർമസു ജഡം നരം
ശതശഃ ഗളദ്വേണീബന്ധാഃ കുചകലശവിസ്രസ്തസിചയാഃ ഹഠാത് ത്രുട്യത്കാഞ്ച്യഃ
വിഗളിതദുകൂലാഃ ശതശഃ യുവതയഃ അനുധാവന്തി തസ്യൈ മഹാദേവ്യൈ നമഃ . (13)
30. യസ്യാഃ പാദാംബുജയുഗം ക്ഷിതൗ ഷട്പഞ്ചാശത്, ഉദകേ ദ്വിസമധികപഞ്ചാശത്,
ഹുതാശേ ദ്വാഷഷ്ടിഃ, അനിലേ ചതുരധികപഞ്ചാശത്, ദിവി ദ്വിഃഷട്ത്രിംശത്, മനസി
ചതുഃഷഷ്ടി ച മയുഖാനാമുപരി വർതതേ തസ്യൈ മഹാദേവ്യൈ നമഃ . (14)
31. ശരജ്ജ്യോത്സ്നാശുഭ്രായൈ ശശിയുതജടാമകുടായൈ
വരത്രാസത്രാണസ്ഫടികഘുടികാപുസ്തകകരായൈ മഹാദേവ്യൈ നമഃ . (15)
32. യാം സകൃന്നത്വാ സതാം മധുക്ഷീരദ്രാക്ഷാമധുരിമധുരീണാ ഭണിതയഃ
സന്നിദധതേ തസ്യൈ മഹാദേവ്യൈ നമഃ . (15)
33. യാം കതിചിത് സന്തഃ കവീന്ദ്രാണാം ചേതഃകമലബാലാതപരുചിം അരുണാം ഏവ
ഭജന്തേ തസ്യൈ മഹാദേവ്യൈ നമഃ . (16)
34. സതാം രഞ്ജനം വിദധും തരുണതരശൃംഗാരലഹരീഗഭീരവാക്പ്രദായിന്യൈ
വിരിഞ്ചിപ്രേയസ്യൈ മഹാദേവ്യൈ നമഃ . (16)
35. വാചാം സവിത്രീഭിഃ ശശിമണിശിലാഭംഗരുചിഭിഃ വശിന്യാദിഭിഃ സഹ ജനന്യൈ
മഹാദേവ്യൈ നമഃ . (17)
36. മഹതാം ഭംഗിരുചിഭിഃ വാഗ്ദേവീവദനകമലാമോദമധുരൈഃ വചോഭിഃ കാവ്യാനാം
കർതൃത്വപടുത്വദായിന്യൈ മഹാദേവ്യൈ നമഃ . (17)
37. യസ്യാഃ തരുണതരണിശ്രീസരണിഭിഃ തനുച്ഛായാഭിഃ സർവാം ദിവം ഉർവീം ച
അരുണിമനിമഗ്നാം രൂപധ്യാനേന ഉർവശ്യാ സഹ ത്രസ്യദ്വനഹരിണശാലീനനയനാഃ
ഗീർവാണഗണികാഃ വശ്യാ ഭവന്തി തസ്യൈ മഹാദേവ്യൈ നമഃ . (18)
38. മുഖം ബിന്ദും കൃത്വാ തസ്യ അധഃ കുചയുഗം തദധഃ ഹരാർദ്ധം ഇതി യസ്യാഃ
മന്മഥകലാധ്യാനേന വനിതാഃ അതിലഘു സങ്ക്ഷോഭം നയതി പുനഃ ധ്യാനനിഷ്ഠയാ
രവീന്ദുസ്തനയുഗാം ത്രിലോകീമപ്യാശു ഭ്രമയതി തസ്യൈ മഹാദേവ്യൈ നമഃ . (19)
39. അംഗേഭ്യഃ കിരണനികുരുംബാമൃതരസം കിരന്തീം ഹിമകരശിലാമൂർത്തിമിവ
യാം ധ്യാത്വാ സർപാണാം ദർപശമകഃ ശകുന്താധിപഃ ഇവ, സുധാധാരസിരയാ ദൃഷ്ട്യാ,
ജ്വരശമനപ്രാപ്തിം ലഭതേ തസ്യൈ മഹാദേവ്യൈ നമഃ . (20)
40. തടില്ലേഖാതന്വീം തപനശശിവൈശ്വാനരമയീം ഷണ്ണാം കമലാനാമപ്യുപരി
മഹാപദ്മാടവ്യാം നിഷണ്ണാം ദേവീകലാം മൃദിതമലമായേന മനസാ പശ്യതാം മഹതാം
പരമാഹ്ളാദലഹരീപ്രദായിന്യൈ മഹാദേവ്യൈ നമഃ . (21)
41. ഭവാനി ത്വം ദാസേ മയി സകരുണാം ദൃഷ്ടിം വിതര ഇതി സ്തോതും വാഞ്ഛൻ
''ഭവാനി ത്വം'' ഇതി കഥനാദേവ മുകുന്ദബ്രഹ്മേന്ദ്രസ്ഫുടമകുടനീരാജിതപദനിജ-
സായുജ്യപദവീദായിന്യൈ മഹാദേവ്യൈ നമഃ . (22)
42. വാമം വപുഃ ഹൃത്വാ, അപരിതൃപ്തേന മനസാ, ശംഭോരപരമപി ദേവ്യാ ഹൃതമഭൂത്
ഇതി ശങ്കാകാരിണ്യൈ മഹാദേവ്യൈ നമഃ . (23)
43. സകലമരുണാഭാരൂപായൈ ത്രിണയനായൈ കുചാഭ്യാമാനമ്രായൈ കുടിലശശിമകുടായൈ
മഹാദേവ്യൈ നമഃ . (23)
44. യസ്യാഃ ക്ഷണചലിതയോഃ ഭ്രൂലതികയോഃ ആജ്ഞാമാലംബ്യ ധാതാ ജഗത്സൂതേ,
ഹരിരവതി, രുദ്രഃ ക്ഷപയതേ ഏതത് സർവം തിരസ്കുർവൻ സ്വം വപുരപി ഈശഃ
തിരയതി, സദാപൂർവഃ ശിവഃ തത് ഇദം സർവം അനുഗൃഹ്ണാതി ച തസ്യൈ
മഹാദേവ്യൈ നമഃ . (24)
45. യസ്യാഃ ചരണയോഃ യാ പൂജാഃ വിരചിതാ സാ ത്രിഗുണജനിതാനാം ത്രയാണാം
ദേവാനാം അപി പൂജാ ഭവതി തസ്യൈ മഹാദേവ്യൈ നമഃ . (25)
46. യസ്യാഃ പാദോദ്വഹനമണിപീഠസ്യ നികടേ ത്രയോ ദേവാഽപി
മുകുളിതകരോത്തംസമകുടാഃ ശശ്വത് സ്ഥിതാഃ ദൃശ്യതേ
തസ്യൈ മഹാദേവ്യൈ നമഃ . (25)
47. വിരിഞ്ചിഃ പഞ്ചത്വം വ്രജതി, ഹരിർവിരതിമാപ്നോതി, കീനാശോ വിനാശം ഭജതി,
ധനദഃ നാശം യാതി, മാഹേന്ദ്രീ വിതതിരപി സമ്മീലിതദൃശാ വിതന്ദ്രീ ഭവതി,
തദാപി അസ്മിൻ മഹാസംഹാരേ യസ്യാഃ പതിരേവ വിഹരതി
തസ്യൈ സത്യൈ മഹാദേവ്യൈ നമഃ . (26)
48. ആത്മാർപണദൃശാ മയാ കൃത ജല്പഃ ജപഃ, സകലം ശില്പമപി മുദ്രാവിരചനാ,
ഗതിഃ പ്രാദക്ഷിണ്യക്രമണം, അശനാദി ആഹുതിവിധിഃ, സംവേശഃ പ്രണാമഃ അഖിലം
സുഖം യത് മേ വിലസിതം ദേവീസപര്യാപര്യായോ ഭവതു ഇതി മയാ
പ്രാർഥ്യമാനായൈ മഹാദേവ്യൈ നമഃ . (27)
49. വിശ്വേ വിധിശതമഖാദ്യാ ദിവിഷദഃ പ്രതിഭയജരാമൃത്യുഹരിണീം സുധാം ആസ്വാദ്യാപി
വിപദ്യന്തേ, തഥാപി യസ്യാഃ താടങ്കമഹിമയാ കരാളം ക്ഷ്വേളം കബളിതവതഃ
ശംഭോഃ കാലകലനം നാസ്തി തസ്യൈ ജനന്യൈ മഹാദേവ്യൈ നമഃ . (28)
50. ഭവസ്യ ഭവനം ഉപയാതസ്യ യസ്യാഃ പ്രസഭം അഭ്യുത്ഥാനേ, ബ്രഹ്മവിഷ്ണ്വേന്ദ്രേഷു
പ്രണമ്രേഷു ''പുരോ വൈരിഞ്ചം കിരീടം പരിഹര, കൈടഭഭിദഃ കഠോരേ കോടീരേ
സ്ഖലസി, ജംഭാരിമകുടം പരിഹര'' ഇതി പരിജനോക്തിഃ ശ്രൂയതേ
തസ്യൈ മഹാദേവ്യൈ നമഃ . (29)
51. സ്വദേഹോത്ഭൂതാഭിഃ ഘൃണിഭിഃ അണിമാദ്യാഭിഃ അഭിതഃ ദേവീം അഹമിതി
സദാ ഭാവയതി യഃ, യസ്യാഃ കൃപയാ, തസ്യ ത്രിണയനസമൃദ്ധിം തൃണയതഃ,
മഹാസംവർതാഗ്നിഃ നീരാജനവിധിം വിരജയതി, തസ്യൈ നിത്യായൈ
നിഷേവ്യായൈ മഹാദേവ്യൈ നമഃ . (30)
52. പശുപതിഃ തത്തത്സിദ്ധിപ്രസവപരതന്ത്രൈഃ ചതുഃഷഷ്ട്യാ തന്ത്രൈഃ സകലം ഭുവനം
അതിസന്ധായ സ്ഥിതഃ പുനഃ യസ്യാഃ നിർബന്ധാത്
അഖിലപുരുഷാർത്ഥൈകഘടനാസ്വതന്ത്രം ഇദം ദേവ്യാഃ തന്ത്രം ക്ഷിതിതലം
അവാതീതരത് തസ്യൈ മഹാദേവ്യൈ നമഃ . (31)
53. ശിവഃ, ശക്തിഃ, കാമഃ, ക്ഷിതിഃ, രവിഃ, ശീതകിരണഃ, സ്മരഃ, ഹംസഃ, ശക്രഃ,
തദനു പരാ, മാരഃ, ഹരിഃ ഇതി അമീ വർണാഃ തിസൃഭിഃ ഹൃല്ലേഖാഭിഃ
അവസാനേഷു ഘടിതാഃ വർണാഃ യസ്യാഃ നാമാവയവതാം ഭജന്തേ
തസ്യൈ ജനന്യൈ മഹാദേവ്യൈ നമഃ . (32)
54. നിരവധിമഹാഭോഗരസികാഃ ആദൗ സ്മരം യോനിം ലക്ഷ്മീം ഇദം ത്രിതയം
മനോഃ നിധായ ചിന്താമണിഗുണനിബദ്ധാക്ഷവലയാഃ ശിവാഗ്നൗ
സുരഭിഘൃതധാരാഹുതിശതൈഃ ജുഹ്വന്തഃ യാം ഭജന്തി
തസ്യൈ നിത്യായൈ മഹാദേവ്യൈ നമഃ . (33)
55. ശംഭോഃ ശശിമിഹിരവക്ഷോരുഹയുഗശരീരായൈ ഭഗവത്യൈ മഹാദേവ്യൈ നമഃ . (34)
56. യസ്യാഃ ആത്മാനം അനഘം നവാത്മാനം മന്യതേ തസ്യൈ മഹാദേവ്യൈ നമഃ . (34)
57. യാഭ്യാം ശേഷശ്ശേഷീസംബന്ധഃ ഉഭയസാധാരണതയാ സ്ഥിതഃ താഭ്യാം
സമരസപരാനന്ദപരയോഃ മഹാദേവീദേവാഭ്യാം നമഃ . (34)
58. മനോവ്യോമമരുദ്മരുത്സാരഥിഃ ആപോഭൂമിഃ ഇത്യേവം പരിണതായൈ
യസ്യാഃ പരം നാസ്തി തസ്യൈ മഹാദേവ്യൈ നമഃ . (35)
59. യാ വിശ്വവപുഷാ പരിണമയിതും ശിവയുവതിഭാവേന സ്വാത്മാനം ചിദാനന്ദാകാരം
ബിഭൃഷേ തസ്യൈ മഹാദേവ്യൈ നമഃ . (35)
60. ആജ്ഞാചക്രസ്ഥസ്യ തപനകോടിദ്യുതിശശിധരസ്യ പരചിതാ പരിമിളിതപാർശ്വസ്ഥസ്യ
വന്ദ്യസ്യ ശംഭോഃ പത്ന്യൈ മഹാദേവ്യൈ നമഃ . (36)
61. യം ഭക്ത്യാ ആരാധ്യൻ രവിശശിശുചീനാം അവിഷയേ നിരാലോകേ അലോകേ
ഭാലോകഭുവനേ നിവാസഃ സാധ്യോ ഭവതി തസ്യ പരമേശ്വരസ്യ പത്ന്യൈ
മഹാദേവ്യൈ നമഃ . (36)
62. വിശുദ്ധൗ ശുദ്ധസ്ഫടികവിശദായ വ്യോമജനകായ ശിവായ മഹാദേവായ
ശിവസമാനവ്യവസിതായൈ മഹാദേവ്യൈ ച നമഃ . (37)
63. യയോഃ യാന്ത്യാഃ ശശികിരണസാരൂപ്യസരണേഃ കാന്ത്യാ വിധൂതാന്തർദ്ധ്വാന്താ
ജഗതീ ചകോരീ ഇവ വിലസതി താഭ്യാം മഹാദേവീമഹാദേവാഭ്യാം നമഃ . (37)
64. സമുന്മീലത്സംവിത്കമലമകരന്ദരസികാഭ്യാം മഹതാം മാനസചരാഭ്യാം കിമപി
ഹംസദ്വന്ദ്വായ മഹാദേവീമഹാദേവാഭ്യാം നമഃ . (38)
65. യാഭ്യാം ആലാപാത് അഷ്ടാദശഗുണിതവിദ്യാപരിണതിഃ അഭവത്, യോ ഹംസദ്വന്ദ്വം
ദോഷാത് അഖിലം ഗുണം അദ്ഭ്യഃ പയഃ ഇവ ആദത്തേ താഭ്യാം
മഹാദേവീമഹാദേവാഭ്യാം നമഃ . (38)
66. സ്വാധിഷ്ഠാനേ ഹുതവഹം സംവർത്തം നിരതം അധിഷ്ഠായ അനവരതം
സ്തൂയമാനായ മഹാദേവായ മഹതീം സമയായൈ മഹാദേവ്യൈ ച നമഃ . (39)
67. മഹതി ക്രോധകലിതേ രുദ്രാലോകേ ലോകാൻ ദഹതി സതി യാ ദയാർദ്രാ
ദൃഷ്ട്യാ ശിശിരം ഉപചാരം രചയതി തസ്യൈ മഹാദേവ്യൈ നമഃ . (39)
68. തിമിരപരിപന്ഥിസ്ഫുരണയാ ശക്ത്യാ തടിത്വന്തം
സ്ഫുരന്നാനാരത്നാഭരണപരിണദ്ധേന്ദ്രധനുഷേ ശ്യാമായ ഹരമിഹിരതപ്തം ത്രിഭുവനം
വർഷതേ കമപി മേഘരൂപായ മഹാദേവ്യാഃ മണിപൂരൈകശരണായ മഹാദേവായ നമഃ . (40)
69. മൂലേ ആധാരേ ലാസ്യപരയാ സമയയാ സഹ നവമഹാരസതാണ്ഡവനടായ
നവാത്മനേ മഹാദേവായ മഹാദേവ്യൈ ച നമഃ . (41)
70. ഉദയവിധിം ഉദ്ദിശ്യ ദയയാ സനാഥാഭ്യാം ഏതാഭ്യാം ഉഭാഭ്യാം ഇദം ജഗത്
ജനകജനനീമത് ജ്ഞായതേ താഭ്യാം മഹാദേവീമഹാദേവാഭ്യാം നമഃ . (41)
71. നീഡേ യച്ഛായാച്ഛുരണശബളം ധനുഃശൗനാസീരം ഇതി ദൃശ്യമാനം ചന്ദ്രശകലം
മാണിക്യത്വം ഗതൈഃ ഗഗനമണിഭിഃ സാന്ദ്രഘടിതഹൈമകിരീടം ച ധൃതവത്യൈ
ഹിമഗിരിസുതായൈ മഹാദേവ്യൈ നമഃ . (42)
72. യസ്യാഃ ദലിതേന്ദീവരവനതുലിതസ്യ ഘനസ്നിഗ്ധശ്ലക്ഷ്ണചികുരനികുരുംബസ്യ സഹജം
സൗരഭ്യം ഉപലബ്ധും വലമഥനവാടീവിടപിനാം സുമനസഃ യസ്മിൻ കേശഭാരേ വസന്തി
തസ്യൈ ധ്വാന്തനാശിന്യൈ ശിവായൈ മഹാദേവ്യൈ നമഃ . (43)
73. യസ്യാഃ വദനസൗന്ദര്യലഹരീപരീവാഹഃ സ്രോതസ്സരണീസമാനസീമന്തസരണിഃ
പ്രബലകബരീഭാരതിമിരദ്വിഷാം വൃന്ദൈഃ ബന്ദീകൃത നവീനാർകകിരണം ഇവ
ദൃശ്യതേ തസ്യൈ ക്ഷേമകാരിണ്യൈ മഹാദേവ്യൈ നമഃ . (44)
74. യസ്യാഃ ദശനകിഞ്ജൽകരുചിരേ, പങ്കേരുഹരുചിം പരിഹസതി ദരസ്മേരേ,
അരാളൈസ്സ്വാഭാവ്യാത് അളികളഭസശ്രീഭിഃ അളകൈഃ പരീതം സുഗന്ധൗ വക്ത്രേ
സ്മരദഹനചക്ഷുർമ്മധുലിഹഃ മാദ്യന്തി തസ്യൈ മഹാദേവ്യൈ നമഃ . (45)
75. യസ്യാഃ ലലാടം ലാവണ്യദ്യുതിവിമലം മകുടഘടിതം ദ്വിതീയം ചന്ദ്രശകലം
ഇവ ആഭാതി, തയോഃ വിപര്യാസന്യാസാത് ഉഭയമപി മിഥഃ സംഭൂയ സുധാലേപസ്യൂതിഃ
രാകാഹിമകരഃ ഇവ പരിണമതി തസ്യൈ മഹാദേവ്യൈ നമഃ . (46)
76. യസ്യാഃ കിഞ്ചിത് ഭുഗ്നേ ഭ്രുവൗ മധുകരരുചിഭ്യാം നേത്രാഭ്യാം ധൃതഗുണം
സവ്യേതരകരഗൃഹീതം പ്രകോഷ്ഠേ മുഷ്ടൗ ച സ്ഥഗയതി നിഗൂഢാന്തരം രതിപതേഃ
ധനുഷിവ ദൃശ്യതേ തസ്യൈ ഭുവനഭയഭംഗവ്യസനിന്യൈ ഉമായൈ മഹാദേവ്യൈ നമഃ . (47)
77. യസ്യാഃ സവ്യം നയനം അർകാത്മകതയാ അഹസ്സൂതേ, വാമം രജനീനായകതയാ
ത്രിയാമാം സൃജതി, തൃതീയാ ദൃഷ്ടിഃ ദിവനിശയോരന്തരചരീം
ദരദലിതഹേമാംബുജരുചിഃ സന്ധ്യാം സമാധത്തേ തസ്യൈ മഹാദേവ്യൈ നമഃ . (48)
78. യസ്യാഃ ദൃഷ്ടിഃ വിശാലാ കല്യാണീ സ്ഫുടരുചിഃ കുവലയൈഃ അയോധ്യാ
കൃപാധാരാധാരാ കിമപി മധുരാ ആഭോഗവതികാ അവന്തീ ഇതി
ബഹുനഗരവിസ്താരവിജയാ തത്തന്നാമവ്യവഹരണയോഗ്യാ വിജയതേ
തസ്യൈ മഹാദേവ്യൈ നമഃ . (49)
79. കവീനാം സന്ദർഭസ്തബകമകരന്ദൈകരസികം കർണയുഗളം
കടാക്ഷവ്യാക്ഷേപഭ്രമരകളഭൗ നവരസാസ്വാദതരളൗ അമുഞ്ചന്തൗ ദൃഷ്ട്വാ
യസ്യാഃ അളികനയനം അസൂയാസംസർഗാത് കിഞ്ചിദരുണം ദൃശ്യതേ
തസ്യൈ മഹാദേവ്യൈ നമഃ . (50)
80. യസ്യാഃ ദൃഷ്ടിഃ ശിവേ ശൃംഗാരാർദ്രാ, തദിതരജനേ കുത്സനപരാ, ഗംഗായാം സരോഷാ,
ഗിരിശചരിതേ വിസ്മയവതീ, ഹരാഹിഭ്യോ ഭീതാ, സരസിരുഹസൗഭാഗ്യജനനീ,
സഖീഷു സ്മേരാ, ഭക്തേഷു സകരുണാ വിദ്യതേ
തസ്യൈ ജനന്യൈ മഹാദേവ്യൈ നമഃ . (51)
81. യസ്യാഃ നേത്രേ കർണാഭ്യർണം ഗതേ, ഗരുത ഇവ പക്ഷ്മാണി ദധതീ, പുരാം ഭേത്തുഃ
ചിത്തപ്രശമരസവിദ്രാവണഫലേ ആകർണാകൃഷ്ടസ്മരശരവിലാസം കലയതേ
തസ്യൈ ഗോത്രാധരപതികുലോത്തംസകലികായൈ മഹാദേവ്യൈ നമഃ . (52)
82. യസ്യാഃനേത്രത്രിതയം ഉപരതാൻ ദ്രുഹിണഹരിരുദ്രാൻ ദേവാൻ പുനഃസ്രഷ്ടും
രജസ്സത്വം തമഃ ഇതി ത്രയം ഗുണാനാം ബിഭ്രത് ഇവ വിഭക്തത്രൈവർണ്യം
വ്യതികരിതലീലാഞ്ജനതയാ വിഭാതി തസ്യൈ ഈശാനദയിതായൈ
മഹാദേവ്യൈ നമഃ . (53)
83. യാ ജനാൻ പവിത്രീകർത്തും ദയാമിത്രൈഃ അരുണധവളശ്യാമരുചിഭിഃ നേത്രൈഃ
ശോണഃ, ഗംഗാ, തപനതനയാ ഇതി ത്രയാണാം അനഘം സംഭേദം ഉപനയതി ധ്രുവം
തസ്യൈ പശുപതിപരാധീനായൈ മഹാദേവ്യൈ നമഃ . (54)
84. യസ്യാഃ ഉന്മേഷനിമേഷാഭ്യാം ജഗതീ പ്രളയമുദയം യാതി തഥാ യസ്യാഃ
ഉന്മേഷാത് ജാതം ജഗദിദം പ്രളയതഃ പരിത്രാതും യസ്യാഃ ദൃശഃ പരിഹൃതനിമേഷാഃ
തസ്യൈ ധരണിധരരാജന്യതനയായൈ മഹാദേവ്യൈ നമഃ . (55)
85. യസ്യാഃ കർണജപനയനപൈശുന്യചകിതാഃ ശഫരികാഃ അനിമേഷാഃ നിയതം
തോയേ നിലീയന്തേ തഥാ ശ്രീഃ ബദ്ധച്ഛദപുടകവാടം കുവലയം പ്രത്യൂഷേ ജഹാതി
നിശി വിഘടയ്യ പ്രവിശതി ച തസ്യൈ അപർണായൈ മഹാദേവ്യൈ നമഃ . (56)
86. യാ വനേ വാ ഹർമ്യേ വാ സമകരനിപാതഃ ഹിമകരസദൃശാ ദ്രാഘീയസ്യാ
ദരദലിതനീലോല്പലരുചാ ദൃശാ ദവീയാംസം ദീനം ഭക്തം കൃപയാ ദൃശാ
സ്നാപയിത്വാ വിനാ ഹാനിം ധന്യോ ഭാവയതി തസ്യൈ ശിവായൈ മഹാദേവ്യൈ നമഃ . (57)
87. യസ്യാഃ അരാളം പാലീയുഗളം കുസുമശരകോദണ്ഡകുതുകം ആധത്തേ യത്ര
തിരശ്ചീനോ വിലസൻ അപാംഗവ്യാസംഗഃ ശ്രവണപഥമുല്ലംഘ്യ
ശരസന്ധാനധിഷണാം ദിശതി തസ്യൈ അഗരാജന്യതനയായൈ മഹാദേവ്യൈ നമഃ . (58)
88. യസ്യാഃ സ്ഫുരദ്ഗണ്ഡാഭോഗപ്രതിഫലിതതാടങ്കയുഗളം മുഖം, ചതുശ്ചക്രം
മന്മഥരഥം മന്യതേ, മഹാവീരോ മാരഃ യം ആരുഹ്യ അർകേന്ദുചരണം
അവനിരഥം സജ്ജിതവതേ പ്രമഥപതയേ ദ്രുഹ്യതി തസ്യൈ മഹാദേവ്യൈ നമഃ . (59)
89. യസ്യാഃ അമൃതലഹരീകൗശലഹരീഃ സൂക്തിഃ ശ്രവണചുലുകാഭ്യാം അവിരളം
പിബന്ത്യാഃ ചമത്കാരശ്ലാഘാചലിതശിരസഃ സരസ്വത്യാഃ കുണ്ഡലഗണഃ താരൈഃ
ഝണത്കാരൈഃ പ്രതിവചനം ആചഷ്ട ഇവ ശ്രൂയതേ
തസ്യൈ ശർവാണ്യൈ മഹാദേവ്യൈ നമഃ . (60)
90. യസ്യാഃ നാസാവംശഃ ജനാനാം ഉചിതം നേദീയഃ ഫലം ഫലതി, അന്തഃ മുക്താഃ
വഹതി, യത് താസാം സമൃദ്ധ്യാ ശിശിരകരനിശ്വാസഗളിതം ബഹിഃ അപി
മുക്താമണിധരോഽസ്തി തസ്യൈ തുഹിനഗിരിവംശധ്വജപട്യൈ മഹാദേവ്യൈ നമഃ . (61)
91. യസ്യാഃ പ്രകൃത്യാ ആരക്തായാഃ ദന്തച്ഛദരുചേഃ വിദ്രുമലതാഫലസദൃശാ
ബിംബപ്രതിഫലനരാഗാത് അരുണിതം ബിംബം തുലാം അദ്ധ്യാരോഢും
വിലജ്ജതേ തസ്യൈ സുദത്യൈ മഹാദേവ്യൈ നമഃ . (62)
92. യസ്യാഃ വദനചന്ദ്രസ്യ സ്മിതജ്യോത്സ്നാജാലം പിബതാം ചകോരാണാം
അതിരസതയാ ചഞ്ചുജഡിമാ ആസീത്, അതസ്തേ ആമ്ളരുചയഃ നിശി നിശി
ശീതാംശോഃ അമൃതലഹരീം കാഞ്ചികധിയാ സ്വച്ഛന്ദം ഭൃശം പിബന്തി
തസ്യൈ മഹാദേവ്യൈ നമഃ . (63)
93. യസ്യാഃ ജിഹ്വാ പത്യുർഗുണഗണകഥാമ്രേഡനജപാ ജപാപുഷ്പച്ഛായാ വിദ്യതേ,
യദഗ്രാസീനായാഃ സ്ഫടികദൃഷദച്ഛച്ഛവിമയീ സരസ്വത്യാഃ മൂർത്തിഃ മാണിക്യവപുഷാ
പരിണമതി ച തസ്യൈ ജനന്യൈ മഹാദേവ്യൈ നമഃ . (64)
94. രണേ ദൈത്യാൻ ജിത്വാ നിവൃത്തൈഃ, അപഹൃതശിരസ്ത്രൈഃ കവചിഭിഃ
ചണ്ഡാംശത്രിപുരഹരനിർമാല്യവിമുഖൈഃ, വിശാഖേന്ദ്രോപേന്ദ്രൈഃ
യസ്യാഃ ശശിവിശദകർപൂരശകലാഃ വദനതാംബൂലകബളാഃ വിലീയന്തേ തസ്യൈ
മാത്രേ മഹാദേവ്യൈ നമഃ . (65)
95. പശുപതേഃ വിവിധമപദാനം ഗായന്തീ വാണീ യയാരബ്ധേ സാധുവചനേ
തദീയൈർമാധുര്യൈഃ അപലപിതതന്ത്രീകളരവാം നിജാം വീണാം ചോളേന
നിഭൃതം നിചുളയതി തസ്യൈ മഹാദേവ്യൈ നമഃ . (66)
96. തുഹിനഗിരിണാ വത്സലതയാ സ്പൃഷ്ടം, ഗിരിശേന അധരപാനാകുലതയാ
മുഹുരുദസ്തം, ശംഭോഃ കരഗ്രാഹ്യം, മുഖമുകുരവൃന്തം യസ്യാഃ ഔപമ്യരഹിതം
ചുബുകം അവർണനീയം വിദ്യതേ തസ്യൈ ഗിരിസുതായൈ മഹാദേവ്യൈ നമഃ . (67)
97. യസ്യാഃ ഗ്രീവാ നിത്യം പുരദമയിതുഃ ഭുജാശ്ളേഷാത് കണ്ടകവതീ
മുഖകമലനാളശ്രിയം ധത്തേ, അധഃ സ്വഭാവേന സ്വതഃ ശ്വേതാ യത്
കാലാഗരുബഹുലജംബാലമലിനാ ഹാരലതികാ മൃണാളീലാളിത്യം വഹതി
തസ്യൈ മഹാദേവ്യൈ നമഃ . (68)
98. യസ്യാഃ വിവാഹവ്യാനദ്ധപ്രഗുണഗുണസംഖ്യാപ്രതിഭുവഃ ഗളേ തിസ്രഃ രേഖാഃ
നാനാവിധമധുരരാഗാകരഭുവാം ത്രയാണാം ഗ്രാമാനാം സ്ഥിതിനിയമസീമാനഃ
ഇവ വിരാജന്തേ തസ്യൈ ഗതിഗമകഗീതൈകനിപുണായൈ മഹാദേവ്യൈ നമഃ . (69)
99. സരസിജഭവഃ പ്രമഥമഥനാത് അന്ധകരിപോഃ നഖേഭ്യഃ സന്ത്രസ്യൻ ചതുർണ്ണാം
ശീർഷാണാം സമം അഭയഹസ്താർപ്പണധിയാ ചതുർഭിഃ വദനൈഃ യസ്യാഃ
മൃണാളീമൃദ്വീനാം ചതസൃണാം ഭുജലതാനാം സൗന്ദര്യം സ്തൗതി
തസ്യൈ മഹാദേവ്യൈ നമഃ . (70)
100. യസ്യാഃ നഖാനാം ഉദ്യോതൈഃ നവനളിനരാഗം വിഹസതാം കരാണാം
കാന്തിഃ അവർണ്ണനീയമസ്തി യസ്യാഃ സാമ്യം കമലം
ക്രീഡല്ലക്ഷ്മീചരണതലലാക്ഷാരസചണം യദി ഭവേത് തദാ കയാചിദ്വാ
കലയാ ഭജേത് തസ്യൈ ഉമാദേവ്യൈ മഹാദേവ്യൈ നമഃ . (71)
101. യസ്യാഃ സമം സ്കന്ദദ്വിപവദനപീതം സതതം പ്രസ്നുതമുഖം സ്തനയുഗം
ആലോക്യ ഹേരംബഃ ആശങ്കാകുലിതഹൃദയഃ ഹാസജനകഃ ഹസ്തേന
സ്വകുംഭൗ ഝടിതി പരിമൃശതി തസ്യൈ ഭക്തഖേദഹാരിണ്യൈ മഹാദേവ്യൈ നമഃ . (72)
102. യസ്യാഃ അമൃതരസമാണിക്യകുതുപൗ വക്ഷോജൗ പിബന്തൗ
ദ്വിരദവദനക്രൗഞ്ചദലനൗ കുമാരൗ അദ്യാപി അവിദിതവധൂസംഗരസികൗ
ഭവതഃ തസ്യൈ നഗപതിപതാകായൈ മഹാദേവ്യൈ നമഃ . (73)
103. യസ്യാഃ കുചാഭോഗഃ സ്തംബേരമദനുജകുംഭപ്രകൃതിഭിഃ മുക്താമണിഭിഃ
സമാരബ്ധാം ബിംബാധരരുചിഭിഃ അന്തഃശബളിതാം അമലാം ഹാരലതികാം
പുരദമയിതുഃ പ്രതാപവ്യാമിശ്രാം കീർതിം ഇവ വഹതി തസ്യൈ അംബായൈ
മഹാദേവ്യൈ നമഃ . (74)
104. യസ്യാഃ സ്തന്യം ഹൃദയതഃ പയഃപാരാവാരഃ സാരസ്വതമിവ പരിവഹതി യയാ
ദയാവത്യാ ദത്തം സ്തന്യം ആസ്വാദ്യ ദ്രവിഡശിശുഃ പ്രൗഢാനാം കവീനാം
കമനീയഃ കവയിതാ അജനി തസ്യൈ ധരണിധരകന്യായൈ മഹാദേവ്യൈ നമഃ . (75)
105. മനസിജഃ ഹരക്രോധജ്വാലാവലിഭിഃ അവലീഢേന വപുഷാ യസ്യാഃ നാഭീസരസി
കൃതസംഗഃ തസ്മാത് സമുത്തസ്ഥൗ ധൂമലതികാ ജനഃ യസ്യാഃ രോമാവലിഃ
ഇതി ജാനീതേ തസ്യൈ അചലതനയായൈ മഹാദേവ്യൈ നമഃ . (76)
106. യസ്യാഃ കൃശേ മധ്യേ കാളിന്ദീതനുതരതരംഗാകൃതി ഭാന്തം യദ്വസ്തു
കുചകലശയോഃ അന്യോന്യം വിമർദ്ദാത് അന്തരഗതം കുഹരിണീം നാഭിം
പ്രവിശത് വ്യോമ ഇവ സുധിയാം ഭാതി തസ്യൈ ജനന്യൈ ശിവായൈ
മഹാദേവ്യൈ നമഃ . (77)
107. യസ്യാഃ നാഭിഃ സ്ഥിരഃ ഗംഗാവർത്തഃ, സ്തനമുകുളരോമാവലിലതാകലാവാലം,
കുസുമശരതേജോഹുതഭുജഃ കുണ്ഡം, രതേഃ ലീലാഗാരം, ഗിരിശനയനാനാം
സിദ്ധേഃ ബിലദ്വാരം ഇതി കിമപി വിജയതേ തസ്യൈ ഗിരിസുതായൈ
മഹാദേവ്യൈ നമഃ . (78)
108. യസ്യാഃ നിസർഗക്ഷീണസ്യ സ്തനതടഭരേണ ക്ളമജുഷഃ നമന്മൂർത്തേഃ
ശനകൈഃ ത്രുട്യത ഇവ ത്രുടിതതടിനീതീരതരുണാ സമാവസ്ഥാസ്ഥേമ്നഃ
മധ്യഃ ചിരം കുശലോ ഭവതു ഇതി കവിനാ പ്രാർഥിതഃ തസ്യൈ
നാരീതിലകായൈ ശൈലതനയായൈ മഹാദേവ്യൈ നമഃ . (79)
109. യസ്യാഃ ദേവ്യാഃ സദ്യഃ സ്വിദ്യത്തടഘടിതകൂർപ്പാസഭിദുരൗ ദോർമ്മൂലേ
കഷന്തൗ കനകകലശാഭൗ കുചൗ കലയതാ തനുഭുവാ ഭംഗാത് ത്രാതും
അലം ഇതി വലഗ്നം ത്രിവലി ലവലീവല്ലിഭിഃ ത്രിധാ നദ്ധം പ്രതീയതേ
തസ്യൈ മഹാദേവ്യൈ നമഃ . (80)
110. ക്ഷിതിധരപതിഃ നിജാത് നിതംബാത് ഗുരുത്വം വിസ്താരം ഹരണരൂപേണ നിദധേ,
അതഃ യസ്യാഃ നിതംബപ്രാഗ്ഭാരഃ ഗുരുഃ വിസ്തീർണഃ സൻ അശേഷാം വസുമതീം
സ്ഥഗയതി, ലഘുത്വം പ്രാപയതി തസ്യൈ പാർവത്യൈ മഹാദേവ്യൈ നമഃ . (81)
111. യസ്യാഃ ഊരുയുഗ്മേന കരീന്ദ്രാണാം കനകകദലീകാണ്ഡപടലീം ഇതി ഉഭയം,
പത്യുഃ പ്രണതികഠിനാഭ്യാം സുവൃത്താഭ്യാം ജാനുഭ്യാം വിബുധകരികുംഭദ്വയം
അപി നിർജിത്യ ഭവതി തസ്യൈ വിധിജ്ഞായൈ ഗിരിസുതായൈ മഹാദേവ്യൈ നമഃ .(82)
112. വിഷമവിശിഖഃ രുദ്രം പരാജേതും യസ്യാഃ ജംഘേ ദ്വിഗുണശരഗർഭൗ നിഷംഗൗ
അകൃത, യദഗ്രേ സുരമകുടശാണൈകനിശിതാഃ പാദയുഗളീനഖാഗ്രച്ഛദ്മാനഃ
ദശശരഫലാഃ ദൃശ്യന്തേ തസ്യൈ ഗിരിസുതായൈ മഹാദേവ്യൈ നമഃ . (83)
113. യസ്യാഃ ചരണയുഗളം ശ്രുതീനാം മൂർദ്ധാനഃ ശേഖരതയാ ദധതി, യസ്യാഃ പാദ്യം
പാഥഃ പശുപതിജടാജൂടതടിനീ, യസ്യാഃ ലാക്ഷാലക്ഷ്മീഃ അരുണഹരിചൂഡാമണിരുചിഃ,
തസ്യൈ മാത്രേ മഹാദേവ്യൈ നമഃ . (84)
114. യസ്യാഃ സ്ഫുടരുചിരസാലക്തകവതഃ പദദ്വന്ദ്വം നയനരമണീയം ഭവതി, പശൂനാം
ഈശാനഃ യദഭിഹനനായ സ്പൃഹയതേ, പ്രമദവനകങ്കേളിതരവേ അത്യന്തം
അസൂയതി തസ്യൈ മഹാദേവ്യൈ നമഃ . (85)
115. മൃഷാ ഗോത്രസ്ഖലനം കൃത്വാ അഥ വൈലക്ഷ്യനമിതം ഭർതാരം യസ്യാഃ
ചരണകമലേ ലലാടേ താഡയതി സതി, ചിരാത് ദഹനകൃതം അന്തശ്ശല്യം
ഉന്മൂലിതവതാ ഈശാനരിപുണാ തുലാകോടിക്വാണൈഃ കിലികിലിതാ
തസ്യൈ മഹാദേവ്യൈ നമഃ . (86)
116. ഹിമഗിരിനിവാസൈകചതുരം നിശി ചരമഭാഗേ ച വിശദൗ സമയിനാം
ശ്രിയം അതിസൃജന്തം യസ്യാഃ പാദയുഗളം ഹിമാനീഹന്തവ്യം നിശായാം
നിദ്രാണാം വരം ലക്ഷ്മീപാത്രം സരോജം ജയതഃ തസ്യൈ മഹാദേവ്യൈ നമഃ . (87)
117. യസ്യാഃ കീർതീനാം പദം വിപദാം അപദം സദ്ഭിഃ കഠിനകമഠീകർപരതുലാം
നീതം പ്രപദം പുരഭിദാ ദയമാനേന മനസാ ബാഹുഭ്യാം ആദായ ദൃഷദി
ന്യസ്തം തസ്യൈ മഹാദേവ്യൈ നമഃ . (88)
118. യസ്യാഃ ചരണയുഗ്മം ദരിദ്രേഭ്യഃ ഭദ്രാം ശ്രിയം അനിശം അഹ്നായ ദദതം,
നാകസ്ത്രീണാം കരകമലസങ്കോചശശിഭിഃ നഖൈഃ കിസലയകരാഗ്രേണ
സ്വഃസ്ഥേഭ്യഃ ഫലാനി ദദതാം ദിവ്യാനാം തരൂണാം ഹസതഃ ഇവ ദൃശ്യതേ
തസ്യൈ ചണ്ഡ്യൈ മഹാദേവ്യൈ നമഃ . (89)
119. ദീനേഭ്യഃ ആശാനുസദൃശീം ശ്രിയം അനിശം ദദാനേ സൗന്ദര്യപ്രകരമകരന്ദം
അമന്ദം വികിരതി, മന്ദാരസ്തബകസുഭഗേ യസ്യാഃ ചരണേ കരചരണഃ നിമജ്ജൻ
ഭക്തസ്യ ജീവഃ ഷട്ചരണതാം പ്രാപ്നോതി തസ്യൈ മഹാദേവ്യൈ നമഃ . (90)
120. സ്ഖലന്തഃ ഭവനകളഹംസാഃ പദന്യാസക്രീഡാപരിചയം ആരബ്ധുമനസഃ ഇവ
യസ്യാഃ ഖേലം ന ജഹതി, അതഃ യസ്യാഃ ചരണകമലം
സുഭഗമണിമഞ്ജീരരണിതച്ഛലാത് തേഷാം ശിക്ഷാം ആചക്ഷാണം ഇവ വിലസതി
തസ്യൈ ചാരുചരിതായൈ മഹാദേവ്യൈ നമഃ . (91)
121. ദ്രുഹിണഹരിരുദ്രേശ്വരഭൃതഃ യസ്യാഃ മഞ്ചത്വം ഗതാ, ശിവഃ
സ്വച്ഛച്ഛായാഘടിതകപടപ്രച്ഛദപടഃ യസ്യാഃ ഭാസാം ശരീരീ ശൃംഗാരരസഃ
ഇവ ദൃശാം കുതുകം ദോഗ്ദ്ധി തസ്യൈ മഹാദേവ്യൈ നമഃ . (92)
122. യാ കേശേഷു അരാളാ, മന്ദഹസിതേ പ്രകൃതിസരളാ, ചിത്തേ ശിരീഷാഭാ,
കുചതടേ ദൃഷദുപലശോഭാ, മധ്യേ ഭൃശം തന്വീ, ഉരസിജാരോഹവിഷയേ പൃഥുഃ,
ജഗത് ത്രാതും ശംഭോഃ കാചിത് കരുണാ ഇതി ജയതി തസ്യൈ അരുണായൈ
മഹാദേവ്യൈ നമഃ . (93)
123. കലങ്കം കസ്തൂരീ, രജനികരബിംബം കലാഭിഃ കർപൂരൈഃ നിബിഡിതം
മരകതകരണ്ഡം, അതഃ യസ്യാഃ ഭോഗേന പ്രതിദിനം രിക്തകുഹരം ഇദം വിധിഃ
ഭൂയഃ ഭൂയഃ യസ്യാഃ കൃതേ നൂനം നിബിഡയതി തസ്യൈ മഹാദേവ്യൈ നമഃ . (94)
124. യാ പുരാരാതേഃ അന്തപുരം, തതഃ യസ്യാഃ ചരണയുഗളേ സപര്യാമര്യാദാ
തരളകരണാനാം അസുലഭാ, തഥാ ഹി ശതമഖമുഖാഃ അമരാഃ യസ്യാഃ
ദ്വാരോപാന്തസ്ഥിതിഭിഃ അണിമാദ്യാഭിഃ അതുലാം സിദ്ധിം നീതാഃ
തസ്യൈ മഹാദേവ്യൈ നമഃ . (95)
125. കതി കതി കവയഃ വൈധാത്രം കളത്രം ന ഭജന്തേ? കൈഃ ധനൈഃ അപി കഃ
വാ ശ്രിയഃ ദേവ്യാഃ പതിഃ ന ഭവതി? യസ്യാഃ കുചാഭ്യാം ആസംഗഃ മഹാദേവം
ഹിത്വാ കുരവകതരോരപി അസുലഭഃ തസ്യൈ സതീനാമചരമായൈ
സത്യൈ മഹാദേവ്യൈ നമഃ . (96)
126. യാം ആഗമവിദഃ ദ്രുഹിണഗൃഹിണീം ഗിരാം ദേവീം, ഹരേഃ പത്നീം പദ്മാം,
ഹരസഹചരാം അദ്രിതനയാം ആഹുഃ, യാ തുരീയാ ദുരധിഗമനിസ്സീമമഹിമാ
കാപി മഹാമായാ അസി, യാ വിശ്വം ഭ്രമയസി തസ്യൈ പരബ്രഹ്മമഹിഷ്യൈ
മഹാദേവ്യൈ നമഃ . (97)
127. യസ്യാഃ കലിതാലക്തകരസം ചരണനിർണേജനജലം പ്രകൃത്യാ മൂകാനാമപി
കവിതാകാരണതയാ വാണീമുഖകമലതാംബൂലരസതാം ധത്തേ തസ്യൈ മാത്രേ
മഹാദേവ്യൈ നമഃ . (98)
128. യസ്യാഃ ഭജനവാൻ സരസ്വത്യാ, ലക്ഷ്മ്യാ, വിധിഹരിസപത്നഃ വിഹരതേ,
രമ്യേണ വപുഷാ രതേഃ പാതിവ്രത്യം ശിഥിലയതി, ക്ഷപിതപശുപാശവ്യതികരഃ
ചിരം ജീവന്നേവ പരാനന്ദാഭിഖ്യം രസം രസയതി തസ്യൈ മഹാദേവ്യൈ നമഃ . (99)
129. യഥാ സ്വകീയാഭിഃ പ്രദീപജ്വാലാഭിഃ ദിവസകരനീരാജനവിധിഃ, യഥാ സ്വകീയൈ
ചന്ദ്രോപലജലലവൈഃ സുധാസൂതേഃ അർഘ്യരചനാ, യഥാ സ്വകീയൈ അംഭോഭിഃ
സലിലനിധിസൗഹിത്യകരണം തഥാ ദേവീപ്രസാദേന ലബ്ധവാഗ്ഭിഃ
ശങ്കരഭഗവത്പാദാചാര്യേണ മഹാസ്തോത്രം കൃത്വാ സ്തുതായൈ മഹാദേവ്യൈ നമഃ . (100)
130. തഥാ ഗുരുപ്രസാദേന ലബ്ധവാഗ്ഭിഃ സ്തുത്വാ ഇയം നാമാവലിഃ
മഹാദേവീചരണയുഗളേ അനന്യഭക്ത്യാ സമർപയാമി .
ഓം തത് സത് .
ശുഭമസ്തു .
ഓം ശ്രീ മഹാദേവ്യൈ നമഃ .
സർവം ഖല്വിദമേവാഹം നാന്യദസ്തി സനാതനം ഇതി ദേവീവചനം .
അജ്ഞാനാത് വിസ്മൃതേർഭ്രാന്ത്യാ യന്ന്യൂനമധികം കൃതം തത്സർവം ക്ഷമ്യതാം
ദേവി പ്രസീദ പരമേശ്വരി .
ശ്രീ ഹേമാംബികായൈ നമഃ .
No comments:
Post a Comment