SRI DHANWANTHRYASHTOTHARA SATHA NAMA STHOTHRAM

 

 ശ്രീധന്വന്തര്യഷ്ടോത്തരശതനാമസ്തോത്രം 

ധന്വന്തരിഃ സുധാപൂർണകലശഢ്യകരോ ഹരിഃ .
ജരാമൃതിത്രസ്തദേവപ്രാർഥനാസാധകഃ പ്രഭുഃ .. 1..

നിർവികല്പോ നിസ്സമാനോ മന്ദസ്മിതമുഖാംബുജഃ .
ആഞ്ജനേയപ്രാപിതാദ്രിഃ പാർശ്വസ്ഥവിനതാസുതഃ .. 2..

നിമഗ്നമന്ദരധരഃ കൂർമരൂപീ ബൃഹത്തനുഃ .
നീലകുഞ്ചിതകേശാന്തഃ പരമാദ്ഭുതരൂപധൃത് .. 3..

കടാക്ഷവീക്ഷണാശ്വസ്തവാസുകിഃ സിംഹവിക്രമഃ .
സ്മർതൃഹൃദ്രോഗഹരണോ മഹാവിഷ്ണ്വംശസംഭവഃ .. 4..

പ്രേക്ഷണീയോത്പലശ്യാമ ആയുർവേദാധിദൈവതം .
ഭേഷജഗ്രഹണാനേഹസ്സ്മരണീയപദാംബുജഃ .. 5..

നവയൗവനസമ്പന്നഃ കിരീടാന്വിതമസ്തകഃ .
നക്രകുണ്ഡലസംശോഭിശ്രവണദ്വയശഷ്കുലിഃ .. 6..

ദീർഘപീവരദോർദണ്ഡഃ കംബുഗ്രീവോഽമ്ബുജേക്ഷണഃ .
ചതുർഭുജഃ ശംഖധരശ്ചക്രഹസ്തോ വരപ്രദഃ .. 7..

സുധാപാത്രോപരിലസദാമ്രപത്രലസത്കരഃ .
ശതപദ്യാഢ്യഹസ്തശ്ച കസ്തൂരീതിലകാഞ്ചിതഃ .. 8..

സുകപോലസ്സുനാസശ്ച സുന്ദരഭ്രൂലതാഞ്ചിതഃ .
സ്വംഗുലീതലശോഭാഢ്യോ ഗൂഢജത്രുർമഹാഹനുഃ .. 9..

ദിവ്യാംഗദലസദ്ബാഹുഃ കേയൂരപരിശോഭിതഃ .
വിചിത്രരത്നഖചിതവലയദ്വയശോഭിതഃ .. 10..

സമോല്ലസത്സുജാതാംസശ്ചാംഗുലീയവിഭൂഷിതഃ .
സുധാഘന്ധരസാസ്വാദമിലദ്ഭൃംഗമനോഹരഃ .. 11..

ലക്ഷ്മീസമർപിതോത്ഫുല്ലകഞ്ജമാലാലസദ്ഗലഃ .
ലക്ഷ്മീശോഭിതവക്ഷസ്കോ വനമാലാവിരാജിതഃ .. 12..

നവരത്നമണീക്ലൃപ്തഹാരശോഭിതകന്ധരഃ .
ഹീരനക്ഷത്രമാലാദിശോഭാരഞ്ജിതദിങ്മുഖഃ .. 13..

വിരജോഽമ്ബരസംവീതോ വിശാലോരാഃ പൃഥുശ്രവാഃ .
നിമ്നനാഭിഃ സൂക്ഷ്മമധ്യഃ സ്ഥൂലജംഘോ നിരഞ്ജനഃ .. 14..

സുലക്ഷണപദാംഗുഷ്ഠഃ സർവസാമുദ്രികാന്വിതഃ .
അലക്തകാരക്തപാദോ മൂർതിമദ്വാധിപൂജിതഃ .. 15..

സുധാർഥാന്യോന്യസംയുധ്യദ്ദേവദൈതേയസാന്ത്വനഃ .
കോടിമന്മഥസങ്കാശഃ സർവാവയവസുന്ദരഃ .. 16..

അമൃതാസ്വാദനോദ്യുക്തദേവസംഘപരിഷ്ടുതഃ .
പുഷ്പവർഷണസംയുക്തഗന്ധർവകുലസേവിതഃ .. 17..

ശംഖതൂര്യമൃദംഗാദിസുവാദിത്രാപ്സരോവൃതഃ .
വിഷ്വക്സേനാദിയുക്പാർശ്വഃ സനകാദിമുനിസ്തുതഃ .. 18..

സാശ്ചര്യസസ്മിതചതുർമുഖനേത്രസമീക്ഷിതഃ .
സാശങ്കസംഭ്രമദിതിദനുവംശ്യസമീഡിതഃ .. 19..

നമനോന്മുഖദേവാദിമൗലീരത്നലസത്പദഃ .
ദിവ്യതേജഃപുഞ്ജരൂപഃ സർവദേവഹിതോത്സുകഃ .. 20..

സ്വനിർഗമക്ഷുബ്ധദുഗ്ധവാരാശിർദുന്ദുഭിസ്വനഃ .
ഗന്ധർവഗീതാപദാനശ്രവണോത്കമഹാമനാഃ .. 21..

നിഷ്കിഞ്ചനജനപ്രീതോ ഭവസമ്പ്രാപ്തരോഗഹൃത് .
അന്തർഹിതസുധാപാത്രോ മഹാത്മാ മായികാഗ്രണീഃ .. 22..

ക്ഷണാർധമോഹിനീരൂപഃ സർവസ്ത്രീശുഭലക്ഷണഃ .
മദമത്തേഭഗമനഃ സർവലോകവിമോഹനഃ .. 23..

സ്രംസന്നീവീഗ്രന്ഥിബന്ധാസക്തദിവ്യകരാംഗുലിഃ .
രത്നദർവീലസദ്ധസ്തോ ദേവദൈത്യവിഭാഗകൃത് .. 24..

സംഖ്യാതദേവതാന്യാസോ ദൈത്യദാനവവഞ്ചകഃ .
ദേവാമൃതപ്രദാതാ ച പരിവേഷണഹൃഷ്ടധീഃ .. 25..

ഉന്മുഖോന്മുഖദൈത്യേന്ദ്രദന്തപങ്കിതവിഭാജകഃ .
പുഷ്പവത്സുവിനിർദിഷ്ടരാഹുരക്ഷഃശിരോഹരഃ .. 26..

രാഹുകേതുഗ്രഹസ്ഥാനപശ്ചാദ്ഗതിവിധായകഃ .
അമൃതാലാഭനിർവിണ്ണയുധ്യദ്ദേവാരിസൂദനഃ .. 27..

ഗരുത്മദ്വാഹനാരൂഢഃ സർവേശസ്തോത്രസംയുതഃ .
സ്വസ്വാധികാരസന്തുഷ്ടശക്രവഹ്ന്യാദിപൂജിതഃ .. 28..

മോഹിനീദർശനായാതസ്ഥാണുചിത്തവിമോഹകഃ .
ശചീസ്വാഹാദിദിക്പാലപത്നീമണ്ഡലസന്നുതഃ .. 29..

വേദാന്തവേദ്യമഹിമാ സർവലൗകൈകരക്ഷകഃ .
രാജരാജപ്രപൂജ്യാംഘ്രിഃ ചിന്തിതാർഥപ്രദായകഃ .. 30..

ധന്വന്തരേർഭഗവതോ നാമ്നാമഷ്ടോത്തരം ശതം .
യഃ പഠേത്സതതം ഭക്ത്യാ നീരോഗസ്സുഖഭാഗ്ഭവേത് .. 31..

ഇതി ബൃഹദ്ബ്രഹ്മാനന്ദോപനിഷദാന്തർഗതം
   ശ്രീധന്വന്തര്യഷ്ടോത്തരശതനാമസ്തോത്രം സമ്പൂർണം .