NAGA SHANTHI STHOTHRAM

 

 നാഗശാന്തിസ്തോത്രം 

ശ്രീ ഗണേശായ നമഃ .
ശ്രീ ഹാടകേശ്വരായ നമഃ .
ആരക്തേന ശരീരേണ രക്താന്തായതലോചനഃ .
മഹാഭോഗകൃതാടോപഃ ശംഖാബ്ജകൃതലാഞ്ഛനഃ .. 1..

അനന്തോ നാഗരാജേന്ദ്രഃ ശിവപാദാർചനേ രതഃ .
മഹാപാപവിഷം ഹത്വാ ശാന്തിമാശു കരോതു മേ .. 2..

സുശ്വേതേന തു ദേഹേന സുശ്വേതോത്പലശേഖരഃ .
ചാരുഭോഗകൃതാടോപോ ഹാരചാരുവിഭൂഷണഃ .. 3..

വാസുകിർനാമ നാഗേന്ദ്രോ രുദ്രപൂജാപരോ മഹാൻ .
മഹാപാപം വിഷം ഹത്വാ ശാന്തിമാശു (ശാന്തിം ആശു) കരോതു മേ .. 4..

അതിപീതേന ദേഹേന വിസ്ഫുരദ്ഭോഗസമ്പദാ .
തേജസാചാഽതിദീപ്തേന കൃതഃ സ്വസ്തികലാഞ്ഛനഃ .. 5..

നാഗരാട് തക്ഷകഃ ശ്രീമാന്നാഗകോട്യാസമന്വിതഃ .
കരോതു മേ മഹാശാന്തിം സർവദോഷവിഷാവഹഃ .. 6..

അതികൃഷ്ണേന വർണേന സ്ഫുടോ വികടമസ്തകഃ .
കണ്ഠേ രേഖാത്രയോപേതോ ഘോരദംഷ്ട്രായുധോദ്യതഃ .. 7..

കർകോടകോ മഹാനാഗോ വിഷദർപബലാഽന്വിതഃ .
വിഷശസ്ത്രാഗ്നിസന്താപം ഹത്വാ ശാന്തിം കരോതു മേ .. 8..

പദ്മവർണേന ദേഹേന ചാരുപദ്മായതേക്ഷണഃ .
പഞ്ചബിന്ദുകൃതാഭാസോ ഗ്രീവായാം ശുഭലക്ഷണഃ .. 9..

ഖ്യാതഃ പദ്മോ മഹാനാഗോ ഹരപാദാർചനേ രതഃ .
കരോതു മേ മഹാശാന്തിം മഹാപാപം വിഷക്ഷയം .. 10..

പുണ്ഡരീകനിഭേനാഽപി ദേഹേനാഽമിതതേജസാ .
ശംഖശൂലാബ്ജരുചിരൈർഭൂഷിതോ മൂർധ്നി സർവദാ .. 11..

മഹാപദ്മോ മഹാനാഗോ നിത്യം പശുപതൗ രതഃ .
വിനിർധൂത(വിനിഹത്യ) വിഷം ഘോരം ശാന്തിമാശു കരോതു മേ .. 12..

ശ്യാമേന ദേഹഭാരേണ ശ്രീമത്കമലലോചനഃ .
വിഷദർപബലോന്മത്തോ ഗ്രീവായാമേകരേഖയാ .. 13..

ശംഖപാലഃ ശ്രിയാ ദീപ്തഃ ശിവപാദാബ്ജപൂജകഃ .
മഹാവിഷം മഹാപാപം ഹത്വാ ശാന്തിം കരോതു മേ .. 14..

അതിഗൗരേണ ദേഹേന ചന്ദ്രാർധകൃതമസ്തകഃ .
ദീപ്തഭോഗകൃതാടോപഃ ശുഭലക്ഷണലക്ഷിതഃ .. 15..

കുലികോ നാഗരാജേശോ നിത്യം ഹരപരായണഃ .
അപഹൃത്യ വിഷം ഘോരം കരോതു മമ ശാന്തികം .. 16..

അന്തരിക്ഷേ ച യേ നാഗാ യേ നാഗാഃ സ്വർഗസംസ്ഥിതാഃ .
ഗിരികന്ദരദുർഗേഷു യേ നാഗാ ഭൂമിസംസ്ഥിതാഃ .. 17..

പാതാലേ യേ സ്ഥിതാ നാഗാഃ സർവേപ്യന്യേ സമാഹിതാഃ .
രുദ്രപാദാർചനേ ശാന്താഃ കുർവന്തു മമ ശാന്തികം .. 18..

നാഗിന്യോ നാഗപത്ന്യശ്ച തഥാ കന്യാഃ കുമാരികാഃ .
ശിവഭക്താഃ സുമനസഃ ശാന്തിം കുർവന്തു മേ സദാ .. 19..

യദിദം നാഗസംസ്ഥാനം കീർതനാച്ഛ്രവണാദപി .
ന തം സർപാ വിഹിംസന്തി ന വിഷം ക്രമതേ സദാ .. 20..

ചിന്തിതം സിധ്യതേ(ലഭ്യതേ) നിത്യം തഥാ പാപപരിക്ഷയഃ .
സിദ്ധിമാശു പ്രയച്ഛന്തി സർവവിഘ്ന വിവർജിതാഃ .. 21..

ഇതി നാഗശാന്തിസ്തോത്രം സമ്പൂർണം