EKADASHA MUKHA HANUMATH KAVACHAM

 

 ഏകാദശമുഖഹനുമത്കവചം 
ശ്രീഗണേശായ നമഃ .

ലോപാമുദ്രാ ഉവാച .
കുംഭോദ്ഭവ ദയാസിന്ധോ ശ്രുതം ഹനുമതഃ പരം .
യന്ത്രമന്ത്രാദികം സർവം ത്വന്മുഖോദീരിതം മയാ .. 1..

ദയാം കുരു മയി പ്രാണനാഥ വേദിതുമുത്സഹേ .
കവചം വായുപുത്രസ്യ ഏകാദശമുഖാത്മനഃ .. 2..

ഇത്യേവം വചനം ശ്രുത്വാ പ്രിയായാഃ പ്രശ്രയാന്വിതം .
വക്തും പ്രചക്രമേ തത്ര ലോപാമുദ്രാം പ്രതി പ്രഭുഃ .. 3..

അഗസ്ത്യ ഉവാച .
നമസ്കൃത്വാ രാമദൂതാം ഹനുമന്തം മഹാമതിം .
ബ്രഹ്മപ്രോക്തം തു കവചം ശൃണു സുന്ദരി സാദരം .. 4..

സനന്ദനായ സുമഹച്ചതുരാനനഭാഷിതം .
കവചം കാമദം ദിവ്യം രക്ഷഃകുലനിബർഹണം .. 5..

സർവസമ്പത്പ്രദം പുണ്യം മർത്യാനാം മധുരസ്വരേ .
ഓം അസ്യ ശ്രീകവചസ്യൈകാദശവക്ത്രസ്യ ധീമതഃ .. 6..

ഹനുമത്സ്തുതിമന്ത്രസ്യ സനന്ദന ഋഷിഃ സ്മൃതഃ .
പ്രസന്നാത്മാ ഹനൂമാംശ്ച ദേവതാ പരികീർതിതാ .. 7..

ഛന്ദോഽനുഷ്ടുപ് സമാഖ്യാതം ബീജം വായുസുതസ്തഥാ .
മുഖ്യഃ പ്രാണഃ ശക്തിരിതി വിനിയോഗഃ പ്രകീർതിതഃ .. 8..

സർവകാമാർഥസിദ്ധ്യർഥം ജപ ഏവമുദീരയേത് .

ഓം സ്ഫ്രേം-ബീജം ശക്തിധൃക് പാതു ശിരോ മേ പവനാത്മജഃ .. 9..

ക്രൗം-ബീജാത്മാ നയനയോഃ പാതു മാം വാനരേശ്വരഃ .
ക്ഷം-ബീജരൂപഃ കർണൗ മേ സീതാശോകവിനാശനഃ .. 10..

ഗ്ലൗം-ബീജവാച്യോ നാസാം മേ ലക്ഷ്മണപ്രാണദായകഃ .
വം-ബീജാർഥശ്ച കണ്ഠം മേ പാതു ചാക്ഷയകാരകഃ .. 11..

ഐം-ബീജവാച്യോ ഹൃദയം പാതു മേ കപിനായകഃ .
വം-ബീജകീർതിതഃ പാതു ബാഹൂ മേ ചാഞ്ജനീസുതഃ .. 12..

ഹ്രാം-ബീജോ രാക്ഷസേന്ദ്രസ്യ ദർപഹാ പാതു ചോദരം .
ഹ്രസൗം-ബീജമയോ മധ്യം പാതു ലങ്കാവിദാഹകഃ .. 13..

ഹ്രീം-ബീജധരഃ പാതു ഗുഹ്യം ദേവേന്ദ്രവന്ദിതഃ .
രം-ബീജാത്മാ സദാ പാതു ചോരൂ വാർധിലംഘനഃ .. 14..

സുഗ്രീവസചിവഃ പാതു ജാനുനീ മേ മനോജവഃ .
പാദൗ പാദതലേ പാതു ദ്രോണാചലധരോ ഹരിഃ .. 15..

ആപാദമസ്തകം പാതു രാമദൂതോ മഹാബലഃ .
പൂർവേ വാനരവക്ത്രോ മാമാഗ്നേയ്യാം ക്ഷത്രിയാന്തകൃത് .. 16..

ദക്ഷിണേ നാരസിംഹസ്തു നൈരൃത്യാം ഗണനായകഃ .
വാരുണ്യാം ദിശി മാമവ്യാത്ഖഗവക്ത്രോ ഹരീശ്വരഃ .. 17..

വായവ്യാം ഭൈരവമുഖഃ കൗബേര്യാം പാതു മാം സദാ .
ക്രോഡാസ്യഃ പാതു മാം നിത്യമൈശാന്യാം രുദ്രരൂപധൃക് .. 18..

ഊർധ്വം ഹയാനനഃ പാതു ഗുഹ്യാധഃ സുമുഖസ്തഥാ .
രാമാസ്യഃ പാതു സർവത്ര സൗമ്യരൂപോ മഹാഭുജഃ .. 19..

ഇത്യേവം രാമദൂതസ്യ കവചം യഃ പഠേത്സദാ .
ഏകാദശമുഖസ്യൈതദ്ഗോപ്യം വൈ കീർതിതം മയാ .. 20..

രക്ഷോഘ്നം കാമദം സൗമ്യം സർവസമ്പദ്വിധായകം .
പുത്രദം ധനദം ചോഗ്രശത്രുസംഘവിമർദനം .. 21..

സ്വർഗാപവർഗദം ദിവ്യം ചിന്തിതാർഥപ്രദം ശുഭം .
ഏതത്കവചമജ്ഞാത്വാ മന്ത്രസിദ്ധിർന ജായതേ .. 22..

ചത്വാരിംശത്സഹസ്രാണി പഠേച്ഛുദ്ധാത്മകോ നരഃ .
ഏകവാരം പഠേന്നിത്യം കവചം സിദ്ധിദം പുമാൻ .. 23..

ദ്വിവാരം വാ ത്രിവാരം വാ പഠന്നായുഷ്യമാപ്നുയാത് .
ക്രമാദേകാദശാദേവമാവർതനജപാത്സുധീഃ .. 24..

വർഷാന്തേ ദർശനം സാക്ഷാല്ലഭതേ നാത്ര സംശയഃ .
യം യം ചിന്തയതേ ചാർഥം തം തം പ്രാപ്നോതി പൂരുഷഃ .. 25..

ബ്രഹ്മോദീരിതമേതദ്ധി തവാഗ്രേ കഥിതം മഹത് .. 26..

ഇത്യേവമുക്ത്വാ വചനം മഹർഷിസ്തൂഷ്ണീം ബഭൂവേന്ദുമുഖീം നിരീക്ഷ്യ .
സംഹൃഷ്ടചിത്താപി തദാ തദീയപാദൗ നനാമാതിമുദാ സ്വഭർതുഃ .. 27..

.. ഇത്യഗസ്ത്യസാരസംഹിതായാമേകാദശമുഖഹനുമത്കവചം സമ്പൂർണം ..