ശ്രീ ഉച്ഛിഷ്ടഗണേശ സഹസ്രനാമ സ്തോത്രം
ധ്യാനം
ഓം അസ്യ ശ്രീഉച്ഛിഷ്ടഗണേശസഹസ്രനാമസ്തോത്രമന്ത്രസ്യ ശ്രീഭൈരവ ഋഷിഃ । ഗായത്രീ ഛന്ദഃ । ശ്രീമഹാഗണപതിർദേവതാ । ഗം ബീജം । ഹ്രീം ശക്തിഃ । കുരുകുരു കീലകം । മമ ധർമ്മാർത്ഥകാമമോക്ഷാർത്ഥേ ജപേ വിനിയോഗഃ ॥
ശ്രീ ഉച്ഛിഷ്ടഗണേശ ധ്യാനം
ചതുർഭുജം രക്തതനും ത്രിനേത്രം
പാശാങ്കുശൗ മോദകപാത്രദന്തൗ ।
കരൈർദധാനം സരസീരുഹസ്ഥ-
മുന്മത്തമുച്ഛിഷ്ടഗണേശമീഡേ ॥
ശ്രീഭൈരവ ഉവാച — ശൃണു ദേവി രഹസ്യം മേ യത്പുരാ സൂചിതം മയാ । തവ ഭക്ത്യാ ഗണേശസ്യ വക്ഷ്യേ നാമസഹസ്രകം ॥
ശ്രീദേവ്യുവാച — ഓം ഭഗവൻ ഗണനാഥസ്യ ഉച്ഛിഷ്ടസ്യ മഹാത്മനഃ । ശ്രോതും നാമസഹസ്രം മേ ഹൃദയം പ്രോത്സുകായതേ ॥
ശ്രീഭൈരവ ഉവാച — പ്രാങ്മുഖേ ത്രിപുരനാഥേ ജാതാ വിഘ്നകുലഃ ശിവേ । മോഹനേ മുച്യതേ ചേതസ്തൈഃ സർവൈർബലദർപിതൈഃ ॥
തദാ പ്രഭും ഗണാധ്യക്ഷം സ്തുത്വാ നാമസഹസ്രകൈഃ । വിഘ്നാ ദൂരാത് പലായന്തേ കാലരുദ്രാദിവ പ്രജാഃ ॥
തസ്യാനുഗ്രഹതോ ദേവി ജാതോഽഹം ത്രിപുരാന്തകഃ । തമദ്യാപി ഗണേശാനം സ്തൗമി നാമസഹസ്രകൈഃ ॥
തദദ്യ തവ ഭക്ത്യാഹം സാധകാനാം ഹിതായ ച । മഹാഗണപതേർവക്ഷ്യേ ദിവ്യം നാമസഹസ്രകം ॥ ശ്ലോകം
ഓം ഹ്രീം ശ്രീം ക്ലീം ഗണാധ്യക്ഷോ ഗ്ലൗം ഗം ഗണപതിർഗുണീ । ഗുണാഢ്യോ നിർഗുണോ ഗോപ്താ ഗജവക്ത്രോ വിഭാവസുഃ ॥
വിശ്വേശ്വരോ വിഭാദീപ്തോ ദീപനോ ധീവരോ ധനീ । സദാശാന്തോ ജഗത്രാതാ വിശ്വാവർത്തോ വിഭാകരഃ ॥
വിശ്രംഭീ വിജയോ വൈദ്യോ വാരാന്നിധിരനുത്തമഃ । അണിമാവിഭവഃ ശ്രേഷ്ഠോ ജ്യേഷ്ഠോ ഗാഥാപ്രിയോ ഗുരുഃ ॥
സൃഷ്ടികർത്താ ജഗദ്ധർത്താ വിശ്വഭർത്താ ജഗന്നിധിഃ । പതിഃ പീതവിഭൂഷാങ്കോ രക്താക്ഷോ ലോഹിതാംബരഃ ॥
വിരൂപാക്ഷോ വിമാനസ്ഥോ വിനീതഃ സദയഃ സുഖീ । സുരരൂപഃ സാത്ത്വികഃ സത്യഃ ശുദ്ധഃ ശങ്കരനന്ദനഃ ॥
നന്ദീശ്വരോ ജയാനന്ദീ വന്ദ്യഃ സ്തുത്യോ വിചക്ഷണഃ । ദൈത്യമർദ്ദീ സദാക്ഷീബോ മദിരാരുണലോചനഃ ॥
സാരാത്മാ വിശ്വസാരശ്ച വിശ്വസാരോ വിലേപനഃ । പരം ബ്രഹ്മ പരം ജ്യോതിഃ സാക്ഷീ ത്ര്യക്ഷോ വികഥനഃ ॥
വിശ്വേശ്വരോ വീരഹർത്താ സൗഭാഗ്യോ ഭാഗ്യവർദ്ധനഃ । ഭൃംഗീരിതി ഭൃംഗമാലീ ഭൃംഗകൂജിതനാദിതഃ ॥
വിനർത്തകോ വിനീതോഽപി വിനതാനന്ദനാർചിതഃ । വൈനതേയോ വിനമ്രാംഗോ വിശ്വനായകനായകഃ ॥
വിരാടകോ വിരാടശ്ച വിദഗ്ധോ വിധുരാത്മഭൂഃ । പുഷ്പദന്തഃ പുഷ്പഹാരീ പുഷ്പമാലവിഭൂഷണഃ ॥
പുഷ്പേഷുമഥനഃ പുഷ്ടോ വിവർത്തഃ കർതരീകരഃ । അന്ത്യോഽന്തകശ്ചിത്തഗണാശ്ചിത്തചിന്താപഹാരകഃ ॥
അചിന്ത്യോധ്യചിന്ത്യരൂപശ്ച ചന്ദനാകുലമുണ്ഡകഃ । ലോഹിതോ ലിപിതോ ലുപ്തോ ലോഹിതാക്ഷോ വിലോഭകഃ ॥
ലബ്ധാശയോ ലോഭരതോ ലോഭദോഽലങ്ഘ്യഗർധകഃ । സുന്ദരഃ സുന്ദരീപുത്രഃ സമസ്താസുരഘാതകഃ ॥
നൂപുരാഢ്യോ വിഭവേന്ദ്രോ നരനാരായണോ രവിഃ । വിചാരോ വാന്തദോ വാഗ്മീ വിതർകീ വിജയീശ്വരഃ ॥
സുപ്തോ ബുദ്ധഃ സദാരൂപഃ സുഖദഃ സുഖസേവിതഃ । വികർത്തനോ വിയച്ചാരീ വിനതോ നടനർത്തകഃ ॥
നടോ നാട്യപ്രിയോ നാദോഽനന്തോഽനന്തഗുണാത്മകഃ । ഗംഗാജലപാനപ്രിയോ ഗംഗാതീരവിഹാരകൃത് ॥
ഗംഗാപ്രിയോ ഗംഗജശ്ച വാഹനാദിപുരഃസരഃ । ഗന്ധമാദനസംവാസോ ഗന്ധമാദനകേളികൃത് ॥
ഗന്ധാനുലിപ്തപൂർവാംഗഃ സർവദേവസ്മരഃ സദാ । ഗണഗന്ധർവരാജേഷോ ഗണഗന്ധർവസേവിതഃ ॥
ഗന്ധർവപൂജിതോ നിത്യം സർവരോഗവിനാശകഃ । ഗന്ധർവഗണസംസേവ്യോ ഗന്ധർവവരദായകഃ ॥
ഗന്ധർവോ ഗന്ധമാതംഗോ ഗന്ധർവകുലദൈവതഃ । ഗന്ധർവഗർവസംവേഗോ ഗന്ധർവവരദായകഃ ॥
ഗന്ധർവപ്രബലാർതിഘ്നോ ഗന്ധർവഗണസംയുതഃ । ഗന്ധർവാദിഗുണാനന്ദോ നന്ദോഽനന്തഗുണാത്മകഃ ॥
വിശ്വമൂർത്തിർവിശ്വധാതാ വിനതാസ്യോ വിനർത്തകഃ । കരാലഃ കാമദഃ കാന്തഃ കമനീയഃ കലാനിധിഃ ॥
കാരുണ്യരൂപഃ കുടിലഃ കുലചാരീ കുലേശ്വരഃ । വികാരോ രണശ്രേഷ്ഠഃ സംഹാരോ ഹാരഭൂഷണഃ ॥
ഉരുരമ്യമുഖോ രക്തോ ദേവതാദയിതൗരസഃ । മഹാകാലോ മഹാദംഷ്ട്രോ മഹോരഗഭയാനകഃ ॥
ഉന്മത്തരൂപഃ കാലാഗ്നിരഗ്നിസൂര്യേന്ദുലോചനഃ । സിതാസ്യഃ സിതമാല്യശ്ച സിതദന്തഃ സിതാംശുമാൻ ॥
അസിതാത്മാ ഭൈരവേഷോ ഭാഗ്യവാൻ ഭഗവാൻ ഭവഃ । ഗർഭാത്മജോ ഭഗാവാസോ ഭഗദോ ഭഗവദ്ധനഃ ॥
ശുഭംകരഃ ശുചിഃ ശാന്തഃ ശ്രേഷ്ഠഃ ശ്രവ്യഃ ശശീപതിഃ । വേദാദ്യോ വേദകർത്താ ച വേദവേദ്യഃ സനാതനഃ ॥
വിദ്യാപ്രദോ വേദരസോ വൈദികോ വേദപാരഗഃ । വേദധ്വനിരതോ വീരോ വേദവിദ്യാഗമോഽർത്ഥവിത് ॥
തത്ത്വജ്ഞഃ സർവഗഃ സാധുഃ സദയഃ സദസന്മയഃ । ശിവങ്കരഃ ശിവസുതഃ ശിവാനന്ദവിവർദ്ധനഃ ॥
ശൈത്യഃ ശ്വേതഃ ശതമുഖീ മുഗ്ധോ മോദകഭൂഷണഃ । ദേവോ ദിനകരോ ധീരോ ധൃതിമാൻ ദ്യുതിമാൻ ധവഃ ॥
ശുദ്ധാത്മാ ശുദ്ധമതിമാൻ ശുദ്ധദീപ്തിഃ ശുചിവ്രതഃ । ശരണ്യഃ ശൗനകഃ ശൂരഃ ശരദംഭോജധാരകഃ ॥
ദാരകഃ ശിഖിവാഹേഷ്ടഃ സിതഃ ശങ്കരവല്ലഭഃ । ശങ്കരോ നിർഭയോ നിത്യോ ലയകൃല്ലാസ്യതത്പരഃ ॥
ലൂതോ ലീലാരസൊല്ലാസീ വിലാസീ വിഭ്രമോ ഭ്രമഃ ॥
ഭ്രമണഃ ശശിഭൃത്സൂര്യഃ ശനിർധരണിനന്ദനഃ । ബുധോ വിബുധസേവ്യശ്ച ബുധരാജോ ബലന്ധരഃ ॥
ജീവോ ജീവപ്രദോ ജേതാ സ്തുത്യോ നിത്യോ രതിപ്രിയഃ । ജനകോ ജനമാർഗജ്ഞോ ജനരക്ഷാതത്പരഃ ॥
ജനാനാം പ്രദാതാ ച ജനകാഹ്ലാദകാരകഃ । വിബുധോ ബുധമാന്യശ്ച ജൈനമാർഗനിവർത്തകഃ ॥
ഗച്ഛോ ഗണപതിർഗച്ഛനായകോ ഗച്ഛഗർവഹാ । ഗച്ഛരാജോഽഥ ഗച്ഛേഷോ ഗച്ഛരാജനമസ്കൃതഃ ॥
ഗച്ഛപ്രിയോ ഗച്ഛഗുരുർഗച്ഛഭൃത് കൃത്യമാതുരഃ । ഗച്ഛപ്രഭുർഗച്ഛചരോ ഗച്ഛപ്രിയകൃതോദ്യമഃ ॥
ഗച്ഛഗീതഗുണോ ഗർത്തോ മര്യാദാപ്രതിപാലകഃ । ഗീർവാണാഗമസാരസ്യ ഗർഭോ ഗീർവാണദേവതാ ॥
ഗൗരീസുതോ ഗുരുവരോ ഗൗരാംഗോ ഗണപൂജിതഃ । പരം പദം പരന്ധാമ പരമാത്മാ കവിഃ കുജഃ ॥
രാഹുർദൈത്യശിരശ്ഛേദീ കേതുഃ കനകകുണ്ഡലഃ । ഗ്രഹേന്ദ്രോ ഗ്രഹിതോ ഗ്രാഹ്യോഽഗ്രരണീർഘുർഘുരനാദിതഃ ॥
പർജന്യഃ പീവരഃ പത്രീ പീനവക്ഷഃ പരാക്രമീ । വനേചരോ വനസ്പതിർവനവാസീ സ്മരൂപമഃ ॥
പുണ്യഃ പൂതഃ പവിത്രശ്ച പരാത്മാ പൂർണ്ണവിഗ്രഹഃ । പൂർണ്ണേന്ദുസുകലാകാരോ മന്ത്രപൂർണ്ണമനോരഥഃ ॥
യുഗാത്മാ യുഗകൃദ്യജ്വാ യജ്ഞികോ യജ്ഞവത്സലഃ । യശസ്യോ യജമാനേഷ്ടോ വജ്രഭൃദ് വജ്രപഞ്ജരഃ ॥
മണിഭദ്രോ മണിമയോ മാന്യോ മീനധ്വജാശ്രിതഃ । മീനധ്വജോ മനോഹരീ യോഗിനാം യോഗവർദ്ധനഃ ॥
ദൃഷ്ടാ സ്രഷ്ടാ തപസ്വീ ച വിഗ്രഹീ താപസപ്രിയഃ । തപോമയസ്തപോമൂർത്തിസ്തപനശ്ച തപോധനഃ ॥
സമ്പത്തിസദനാകാരഃ സമ്പത്തിസുഖദായകഃ । സമ്പത്തിസുഖകർത്താ ച സമ്പത്തിസുഭഗാനനഃ ॥
സമ്പത്തിശുഭദോ നിത്യസമ്പത്തിശ്ച യശോധനഃ । രുചകോ മേചകസ്തുഷ്ടഃ പ്രഭുസ്തോമരഘാതകഃ ॥
ദണ്ഡീ ചണ്ഡാംശുരവ്യക്തഃ കമണ്ഡലുധരോഽനഘഃ । കാമീ കർമ്മരതഃ കാലഃ കോലഃ ക്രന്ദിതദിക്തതഃ ॥
ഭ്രമകോ ജാതിപൂജ്യശ്ച ജാഡ്യഹാ ജഡസൂദനഃ । ജാലന്ധരോ ജഗദ്വാസീ ഹാസ്യകൃദ്ഗഹനോ ഗുഹഃ ॥
ഹവിഷ്മാൻ ഹവ്യവാഹാക്ഷോ ഹാടകീ ഹാടകാംഗദഃ । സുമേരുർഹിമവാൻ ഹോതാ ഹരപുത്രോ ഹലങ്കഷഃ ॥
ഹാലാപ്രിയോ ഹൃദാശാന്തഃ കാന്താഹൃദയപോഷണഃ । ശോഷണഃ ക്ലേശഹാ ക്രൂരഃ കഠോരഃ കഠിനകൃതിഃ ॥
കുബേരോ ധീമയോ ധ്യാതാ ധ്യേയോ ധീമാൻ ദയാനിധിഃ । ദവിഷ്ഠോ ദമനോ ഹൃഷ്ടോ ദാതാ ത്രാതാ പിതാസമഃ ॥
നിർഗതോ നൈഗമോഽധ്യഗമ്യോ നിർജയോ ജടിലോഽജരഃ । ജനജീവോ ജിതാരാതിർജഗദ്വ്യാപീ ജഗന്മയഃ ॥
ചാമീകരനിഭോ നാഭ്യോ നലിനായതലോചനഃ । രോചനോ മോചകോ മന്ത്രി മന്ത്രകോടിസമാശ്രിതഃ ॥
പഞ്ചഭൂതാത്മകഃ പഞ്ചസായകഃ പഞ്ചവക്ത്രകഃ । പഞ്ചമഃ പശ്ചിമഃ പൂർവഃ പൂർണ്ണഃ കീർണാലകഃ കുണിഃ ॥
കഠോരഹൃദയോ ഗ്രീവാലങ്കൃതോ ലളിതാശയഃ । ലോലചിത്തോ ബൃഹന്നാസോ മാസപക്ഷർതുരൂപവാൻ ॥
ധ്രുവോ ദ്രുതഗതിർബന്ധോ ധർമ്മീ നാകിപ്രിയോഽനലഃ । അംഗുല്യഗ്രസ്ഥഭുവനോ ഭുവനൈകമലാപഹഃ ॥
സാഗരഃ സ്വർഗതിഃ സ്വക്ഷഃ സാനന്ദഃ സാധുപൂജിതഃ । സതീപതിഃ സമരസഃ സനകഃ സരലഃ സരഃ ॥
സുരപ്രിയോ വസുമതിർവാസവോ വസുപൂജിതഃ । വിത്തദോ വിത്തനാഥശ്ച ധനിനാം ധനദായകഃ ॥
രാജീവനയനഃ സ്മാർത്തഃ സ്മൃതിദഃ കൃത്തികാംബരഃ । അശ്വിനോഽശ്വമുഖഃ ശുഭ്രോ ഭരണോ ഭരണിപ്രിയഃ ॥
കൃത്തികാസനകഃ കോളോ രോഹിണീരമണോപമഃ । രൗഹിണേയപ്രേമകരീ രോഹിണീമോഹനോ മൃഗഃ ॥
മൃഗരാജോ മൃഗശിരാ മാധവോ മധുരധ്വനിഃ । ആർദ്രാനനോ മഹാബുദ്ധിർമഹോരഗവിഭൂഷണഃ ॥
ഭ്രൂക്ഷേപദത്തവിഭവോ ഭ്രൂകരാലഃ പുനർമയഃ । പുനർദേവഃ പുനർജേതാ പുനർജീവഃ പുനർവസുഃ ॥
തിമിരാസ്തിമികേതുശ്ച തിതിഷാസുരഘാതനഃ । തിഷ്യസ്തുലാധരോ ജൃംഭോ വിശ്ലേഷാശ്ലേഷദാനരാട് ॥
മാനദോ മാധവോ മാഘോ വാചാലോ മഘവോപമഃ । മധ്യോ മഹാപ്രിയോ മേഘോ മഹാശുണ്ഡോ മഹാഭുജഃ ॥
പൂർവഫാൽഗുനികഃ സ്ഫീതഃ ഫൽഗുരുത്തരഫാൽഗുനഃ । ഫേനിലോ ബ്രഹ്മദോ ബ്രഹ്മ സപ്തതന്തുസമാശ്രയഃ ॥
ഘോണാഹസ്തശ്ചതുർഹസ്തോ ഹസ്തിവക്ത്രോ ഹലായുധഃ । ചിത്രാംബരോഽര്യർചിതപദഃ സ്വസ്തിദഃ സ്വസ്തിവിഗ്രഹഃ ॥
വിശാഖഃ ശിഖിസേവ്യശ്ച ശിഖിധ്വജസഹോദരഃ । അനുരേണൂത്കരഃ സ്ഫാരോ രുരുരേണുസുതോ നരഃ ॥
അനുരാധാപ്രിയോ രാധഃ ശ്രീമാൻ ശുക്ലഃ ശുചിസ്മിതഃ । ജ്യേഷ്ഠഃ ശ്രേഷ്ഠാർചിതപദോ മൂലം ച ത്രിജഗദ്ഗുരുഃ ॥
ശുചിശ്ചൈവ പൂർവാഷാഢശ്ചോത്തരാഷാഢ ഈശ്വരഃ । ശ്രവ്യാഭിജിദനന്താത്മാ ശ്രവോ വേപിതദാനവഃ ॥
ശ്രാവണഃ ശ്രവണഃ ശ്രോതാ ധനീ ധന്യോ ധനിഷ്ഠകഃ । ശതാതപഃ ശതകുംഭഃ ശരജ്യോതിഃ ശതാഭിഷക് ॥
പൂർവാഭാദ്രപദോ ഭദ്രശ്ചോത്തരാഭാദ്രപാദിതഃ । രേണുകാതനയോ രാമോ രേവതീരമണോ രമീ ॥
ആശ്വയുക്കാർത്തികേയേഷ്ടോ മാർഗശീർഷോ മൃഗോത്തമഃ । പൗഷേശ്വരഃ ഫാൽഗുനാത്മാ വസന്തശ്ചൈത്രകോ മധുഃ ॥
രാജ്യദോഽഭിജിദാത്മീയസ്താരേശസ്താരകദ്യുതിഃ । പ്രതിതഃ പ്രോർജിതഃ പ്രീതഃ പരമഃ പരമോ ഹിതഃ ॥
പരാ പഞ്ചഭൂഃ പഞ്ചവായുപൂജ്യഃ പരിഗ്രഹഃ । പുരാണാഗമവിദ്യയോഗീ മഹിഷോ രസഭോഽഗ്രജഃ ॥
ഗ്രഹോ മേഷോ വൃഷോ മന്ദോ മന്മഥോ മിഥുനാകൃതിഃ । കൽപഭൃത് കടകോ ദീപോ മർക്കട്ടഃ കർക്കടോ ഘൃണിഃ ॥
കുക്കുടോ വനജോ ഹംസഃ പരമഹംസഃ സൃഗാലകഃ । സിംഹഃ സിംഹാസനഭൂഷ്യോ മദ്ഗുർമൂഷകവാഹനഃ ॥
പുത്രോ നരകത്രാതാ കന്യാപ്രിതഃ കുലോദ്വഹഃ । അതുല്യരൂപോ ബലദസ്തുല്യഭൃത്തുല്യസക്ഷികഃ ॥
അലിശ്ചാപധരോ ധന്വീ കച്ഛപോ മകരോ മണിഃ । കുംഭഭൃത് കലശഃ കുബ്ജോ മീനമാംസസുതർപിതഃ ॥
രാശിതാരാഗ്രഹമയസ്തിതിരൂപോ ജഗദ്വിഭുഃ । പ്രതാപി പ്രതിപത്പ്രേയോദ്വിതീയോഽദ്വൈതനിശ്ചിതഃ ॥
ത്രിരൂപശ്ച തൃതീയഗ്നിസ്ത്രയീരൂപസ്ത്രയീതനുഃ । ചതുർത്ഥീവല്ലഭോ ദേവോ പരാഗഃ പഞ്ചമീശ്വരഃ ॥
ഷഡ്രസാസ്വാദവിദ്യാനഃ ഷഷ്ഠീ ഷഷ്ഠികവത്സലഃ । സപ്താർണവഗതിഃ സാരഃ സപ്തമീശ്വര രോഹിതഃ ॥
അഷ്ടമീനന്ദനോത്തംസോ നവമീഭക്തിഭാവിതഃ । ദശദിക്പതിപൂജ്യശ്ച ദശമീദ്രുഹിണോ ദ്രുതഃ ॥
ഏകാദശാത്മഗണപോ ദ്വാദശീയുഗചർച്ചിതഃ । ത്രയോദശമണിസ്തുത്യശ്ചതുർദശസ്വരപ്രിയഃ ॥
ചതുർദശേന്ദ്രസംസ്തുത്യഃ പൂർണിമാനന്ദവിഗ്രഹഃ । ദർശദർശോ ദർശനശ്ച വാനപ്രസ്ഥോ മഹേശ്വരഃ ॥
മൗർവീ മധുരവാങ്മൂലമൂർത്തിമാൻ മേഘവാഹനഃ । മഹാഗജോ ജിതക്രോധോ ജിതശത്രുർജയാശ്രയഃ ॥
രൗദ്രോ രുദ്രപ്രിയോ രുദ്രോ രുദ്രപുത്രോഽഘനാശനഃ । ഭവപ്രിയോ ഭവാനിഷ്ടോ ഭാരഭൃദ്ഭൂതഭാവനഃ ॥
ഗാന്ധർവകുശലോഽകുണ്ഠോ വൈകുണ്ഠോ വിഷ്ടരശ്രവാഃ । വൃത്രഹാ വിഘ്നഹാ സീരഃ സമസ്തദുഃഖതാപഹാ ॥
മഞ്ജുരോ മാർജരോ മത്തോ ദുർഗാപുത്രോ ദുരാലസഃ । അനന്തചിത്സുധാധാരോ വീരോ വീര്യകസാധകഃ ॥
ഭാസ്വൻ മുകുടമാണിക്യഃ കൂജത് കിങ്കിണിജാലകഃ । ശുണ്ഡാധാരീ തുണ്ഡചലഃ കുണ്ഡലീ മുണ്ഡമാലകഃ ॥
പദ്മാക്ഷഃ പദ്മഹസ്തശ്ച പദ്മനാഭസമർചിതഃ । ഉദ്ധൃതാധരദന്താഢ്യോ മാലാഭൂഷണഭൂഷിതഃ ॥
നാരദോ വാരണോ ലോലശ്രവണഃ ശൂർപ്പകർണകഃ । ബൃഹദുല്ലാസനാസാഢ്യോ വ്യാപ്തത്രൈലോക്യമണ്ഡലഃ ॥
രത്നമണ്ഡലമധ്യസ്ഥഃ കൃശാനുരൂപശീലഃ । ബൃഹത് കർണ്ണാഞ്ചലോദ്ഭൂതവായുവീജിതദിക്തതഃ ॥
ബൃഹദാസ്യരവാക്രാന്തഭീതബ്രഹ്മാണ്ഡഭാണ്ഡകഃ । ബൃഹത് പാദസമാക്രാന്തസപ്തപാതാലദീപിതഃ ॥
ബൃഹദ് ദന്തകൃതാത്യുഗ്രരണാനന്ദരസാലസഃ । ബൃഹദ്ധസ്തധൃതാശേഷായുധനിർജിതദാനവഃ ॥
സ്ഫുരത് സിന്ദൂരവദനഃ സ്ഫുരത്തേജോഽഗ്നിലോചനഃ । ഉദ്ദീപിതമണിസ്ഫൂർജൻ നൂപുരധ്വനിനാദിതഃ ॥
ചലത്തോയപ്രവാഹാഢ്യോ നദീജലകനാകരഃ । ഭ്രമത് കുഞ്ജരസംഘാതവന്ദിതാങ്ഘ്രിസരോരുഹഃ ॥
ബ്രഹ്മാച്യുതമഹാരുദ്രപുരസ്സരസുരാർചിതഃ । അശേഷപ്രഭൃതിവ്യാലജാലോപസേവിതഃ ॥
ഗർജത് പഞ്ചാനനാരാവവ്യാപ്താകാശധരാതലഃ । ഹാഹാഹൂഹൂഗതാത്യുഗ്രസ്വരവിഭ്രാന്തമാനസഃ ॥
പഞ്ചാശദ് വർണബീജാഖ്യമന്ത്രമന്ത്രിതവിഗ്രഹഃ । വേദാന്തശാസ്ത്രപീയൂഷധാരാപ്ലാവിതഭൂതലഃ ॥
ശംഖധ്വനിസമാക്രാന്തപാതാലാദിനഭസ്തലഃ । ചിന്താമണിർമഹാമല്ലോ ബല്ലഹസ്തോ ബലിഃ കവിഃ ॥
കൃതത്രേതായുഗോല്ലാസഭാസമാനജഗത്രയഃ । ദ്വാപരഃ പരലോകൈകഃ കർമ്മധ്വാന്തസുധാകരഃ ॥
സുധാത്യസിക്തവപുർവ്യാസോ ബ്രഹ്മാണ്ഡാദികബാഹുകഃ । അകാരാദിക്ഷകാരാന്തവർണപങ്ക്തിസമുജ്ജ്വലഃ ॥
അകാരാകാരപ്രോദ്ഗീതതാനനാദനിനാദിതഃ । ഇകാരേകാരമന്ത്രാഢ്യമാലഭ്രമണലാലസഃ ॥
ഉകാരോകാരപ്രോദ്ഗാരിഘോരനാഗോപവീതകഃ । ഓവർണാങ്കിതകാരിപദ്മദ്വയസമുജ്ജ്വലഃ ॥
ലൃകാരയുതലഃകാരശംഖപൂർണ്ണദിഗന്തരഃ । ഏകകാരഗിരിജാസ്തനപാനവിചക്ഷണഃ ॥
ഓകാരൗകാരവിശ്വാദികൃതസൃഷ്ടിക്രമാലസഃ । അണ്ഡവർണാവലീവ്യാപ്തപാദാദിശീർഷമണ്ഡലഃ ॥
കർണ്ണതാലകൃതാത്യുച്ചൈർവായുവീജിതനിർജരഃ । ഖഗേശധ്വജരത്നാങ്കകിരീടാരുണപാദകഃ ॥
ഗർവിതാശേഷഗന്ധർവഗീതതത്പരശ്രോത്രകഃ । ഘനവാഹനവാഗീശപുരസ്സരസുരാർചിതഃ ॥
കർണ്ണാമൃതധാരാധ്യശോഭമാനൈകദന്തകഃ । ചന്ദ്രകുങ്കുമജംബാലലിപ്തസിന്ദൂരവിഗ്രഹഃ ॥
ഛത്രചാമരരത്നാഢ്യമുകുടാലങ്കൃതാനനഃ । ജടാബദ്ധമഹാനർഘമണിപങ്ക്തിവിരാജിതഃ ॥
ഝങ്കാരിമധുപവ്രാതഗാനനാദവിനാദിതഃ । ഝവർണകൃതസംഹാരദൈത്യാസൃക്പർണ്ണമുദ്ഗരഃ ॥
ടകാരാഖ്യാഫലാസ്വാദവേപിതാശേഷമൂർധജഃ । തകാരാദ്യടകാരാങ്കഢകാരാനന്ദതോഷിതഃ ॥
ണവർണാമൃതപീയൂഷധാരാധാരസുധാകരഃ । താമ്രസിന്ദൂരപൂജാഢ്യലലാടഫലകച്ഛവിഃ ॥
തകാരധനപങ്ക്ത്യാതിസന്തോഷിതദ്വിജവ്രജഃ । ദയാമൃതഹൃദംഭോജധൃതത്രൈലോക്യമണ്ഡലഃ ॥
ധനദാദിമഹായക്ഷസംസേവിതപദാംബുജഃ । നമിതാശേഷദേവൗഘകിരീടമണിരഞ്ജിതഃ ॥
പരവർഗാപവർഗാദിഭോഗേച്ഛേദനദക്ഷകഃ । ഫണിചക്രസമാക്രാന്തഗലമണ്ഡലമണ്ഡിതഃ ॥
ബദ്ധഭ്രൂയുഗഭീമോഗ്രസന്തർജിതസുരാസുരഃ । ഭവാനിഹൃദയാനന്ദവർദ്ധനൈകനിശാകരഃ ॥
മദിരാകലശസ്ഫീതകരാലൈകകരാംബുജഃ । യജ്ഞാന്തരായസംഘാതസജ്ജീകൃതവരായുധഃ ॥
രത്നാകരസുതാകാന്തിക്രാന്തികീർത്തിവിവർദ്ധനഃ । ലംബോദരമഹാഭീമവപുർദീപ്തകൃതാസുരഃ ॥
വരുണാദിദിഗീശാനൈഃ സ്വർചിതാർച്ചനചർച്ചിതഃ । ശങ്കരൈകപ്രിയപ്രേമനയാനന്ദവർദ്ധനഃ ॥
ഷോഡശസ്വരിതാലാപഗീതഗാനവിചക്ഷണഃ । സമസ്തദുർഗതിസരിന്നതോത്തരനുകോടുപഃ ॥
ഹരാദിബ്രഹ്മവൈകുണ്ഠബ്രഹ്മഗീതാദിപാഠകഃ । ക്ഷമാപൂരിതഹൃത്പദ്മസംരക്ഷിതചരാചരഃ ॥
താരാങ്കമന്ത്രവർണൈകവിഗ്രഹോജ്ജ്വലവിഗ്രഹഃ । അകാരാദിക്ഷകാരാന്തവിദ്യാഭൂഷിതവിഗ്രഹഃ ॥
ഓം ശ്രീവിനായകോ ഓം ഹ്രീം വിഘ്നാധ്യക്ഷോ ഗണാധിപഃ । ഹേരംഭോ മോദകാഹാരോ വക്രതുണ്ഡോ വിധിഃ സ്മൃതഃ ॥
വേദാന്തഗീതോ വിദ്യാർത്ഥിസിദ്ധമന്ത്രഃ ഷഡക്ഷരഃ । ഗണേശോ വരദോ ദേവോ ദ്വാദശാക്ഷരമന്ത്രിതഃ ॥
സപ്തകോടിമഹാമന്ത്രമന്ത്രിതാശേഷവിഗ്രഹഃ । ഗാംഗേയോ ഗണസേവ്യശ്ച ഓം ശ്രീദ്വൈമാതുരഃ ശിവഃ ॥
ഓം ഹ്രീം ശ്രീം ക്ലീം ഗ്ലൗം ഗം ദേവോ മഹാഗണപതിഃ പ്രഭുഃ । ഇദം നാമസഹസ്രം തു മഹാഗണപതേഃ സ്മൃതം ॥
ഗുഹ്യം ഗോപ്യതമം സിദ്ധം സർവതന്ത്രേഷു ഗോപിതം । സർവമന്ത്രമയം ദിവ്യം സർവവിഘ്നവിനാശനം ॥
ഗ്രഹതാരാമയം രാശിവർണപങ്ക്തിസമന്വിതം । സർവവിദ്യാമയം ബ്രഹ്മസാധനം സാധകപ്രിയം ॥
ഗണേശസ്യ ച സർവസ്വം രഹസ്യം ത്രിദിവൗകസാം । യഥേഷ്ടഫലദം ലോകേ മനോരഥപ്രപൂരണം ॥
അഷ്ടസിദ്ധിമയം ശ്രേഷ്ഠം സാധകാനാം ജയപ്രദം । വിനാർച്ചനം വിനാ ഹോമം വിനാന്യാസം വിനാ ജപം ॥
അണിമാദ്യഷ്ടസിദ്ധീനാം സാധനം സ്മൃതിമാത്രതഃ । ചതുർത്ഥ്യാമർധരാത്രേ തു പഠേൻമന്ത്രി ചതുഷ്പഥേ ॥
ലിഖേദ് ഭൂർജേ മഹാദേവി ! പുണ്യം നാമസഹസ്രകം । ധാരയേത്തം ചതുർദശ്യാം മധ്യാഹ്നേ മൂർദ്ധ്നി വാ ഭുജേ ॥
യോഷിദ് വാമകരേ ചൈവ പുരുഷോ ദക്ഷിണേ ഭുജേ । സ്തംഭയേദപി ബ്രഹ്മാണം മോഹയേദപി ശങ്കരം ॥
വശയേദപി ത്രൈലോക്യം മാരയേദഖിലാൻ രിപൂൻ । ഉച്ചാടയേച്ച ഗീർവാണം ശമയേച്ച ധനഞ്ജയം ॥
വന്ധ്യാ പുത്രം ലഭേച്ഛീഘ്രം നിർധനോ ധനമാപ്നുയാത് । ത്രിവാരം യഃ പഠേദ്രാത്രൗ ഗണേശസ്യ പുരഃ ശിവേ ॥
നഗ്നഃ ശക്തിയുതോ ദേവി ഭുക്ത്വാ ഭോഗാന്യഥേപ്സിതാൻ । പ്രത്യക്ഷവരദം പശ്യേദ് ഗണേശം സാധകോത്തമഃ ॥
യ ഇദം പഠതേ നാംനാം സഹസ്രം ഭക്തിപൂർവകം । തസ്യ വിത്താദിവിഭവോദാരായുഃ സമ്പദഃ സദാ ॥
രണേ രാജഭയേ ദ്യൂതേ പഠേന്നാമസഹസ്രകം । സർവത്ര ജയമാപ്നോതി ഗണേശസ്യ പ്രസാദതഃ ॥
ഇത്ഥം പുണ്യസർവസ്വം മന്ത്രനാമസഹസ്രകം । മഹാഗണപതേഃ പുണ്യം ഗോപനീയം സ്വയോനിവത് ॥
॥ ഇതി ശ്രീരുദ്രയാമലതന്ത്രേ ശ്രീമദുച്ഛിഷ്ടഗണേശസഹസ്രനാമസ്തോത്രം സമ്പൂർണ്ണം ॥
No comments:
Post a Comment