Vedasara Shiva Sahasranama Sthothram

ശങ്കരകവച ശ്ലോകാഃ 1-61

പദ്മപുരാണാന്തർഗതം വേദസാരാഖ്യം

.. ശ്രീഗണേശായ നമഃ ..

.. ശ്രീഉമാമഹേശ്വരാഭ്യാം നമഃ ..

ശുക്ലാംബരധരം വിഷ്ണും ശശിവർണം ചതുർഭുജം .

പ്രസന്നവദനം ധ്യായേത് സർവവിഘ്നോപശാന്തയേ .. 1..

ഈശ്വരം പരമം തത്ത്വമാദിമധ്യാന്തവർജിതം .

ആധാരം സർവഭൂതാനമനാധാരമവിക്രിയം .. 2..

അനന്താനന്ദബോധാംബുനിധിമദ്ഭുതവിക്രിയം .

അംബികാപതിമീശാനമനീശം പ്രണമാമ്യഹം .. 3..

ഈശമാദ്യന്തനിർമുക്തമതിശോഭനമാദരാത് .

നമാമി വിഗ്രഹം സാംബം സംസാരാമയഭേഷജം .. 4..

വ്യാസ ഉവാച .

ഏകദാ മുനയഃ സർവേ ദ്വാരകാം ദ്രഷ്ടുമാഗതാഃ .

വാസുദേവം ച സോത്കണ്ഠാഃ കൃഷ്ണദർശനലാലസാഃ .. 5..

തതഃ സ ഭഗവാൻപ്രീതഃ പൂജാം ചക്രേ യഥാവിധി .

തേഷാമാശീസ്തതോ ഗൃഹ്യ ബഹുമാനപുരഃസരം .. 6..

തൈഃ പൃഷ്ടഃ കഥയാമാസ കുമാരപ്രഭവം ച യത് .

ചരിതം ഭൂമിഭാരഘ്നം ലോകാനന്ദകരം പരം .. 7..

മാർകണ്ഡേയമുഖാഃ സർവേ മാധ്യാഹ്നികക്രിയോത്ഥിതാഃ .

കൃഷ്ണഃ സ്നാനമഥോ ചക്രേ മൃദക്ഷതകുശാദിഭിഃ .. 8..

പീതാംബരം ത്രിപുണ്ഡ്രം ച ധൃത്വാ രുദ്രാക്ഷമാലികാഃ .

സൂര്യോപസ്ഥാനം സന്ധ്യാം ച സ്മൃതിധർമമനുസ്മരൻ .. 9..

ശിവപൂജാം തതഃ കൃഷ്ണോ ഗന്ധപുഷ്പാക്ഷതാദിഭിഃ .

ചകാര വിധിവദ്ഭക്ത്യാ നമസ്കാരയുതാം ശുഭാം .. 10..

ജയ ശങ്കര സോമേശ രക്ഷ രക്ഷേതി ചാബ്രവീത് .

ജജാപ ശിവസാഹസ്രം ഭുക്തിമുക്തിപ്രദം വിഭോഃ .

അനന്യമാനസഃ ശാന്തഃ പദ്മാസനഗതഃ ശുചിഃ .. 11..

തതസ്തേ വിസ്മയാപന്നാ ദൃഷ്ട്വാ കൃഷ്ണവിചേഷ്ടിതം .

മാർകണ്ഡേയോഽവദത്കൃഷ്ണം ബഹുശോ മുനിസമ്മതം .. 12..

മാർകണ്ഡേയ ഉവാച

ത്വം വിഷ്ണുഃ കമലാകാന്തഃ പരമാത്മാ ജഗദ്ഗുരുഃ . (ത്വം കൃഷ്ണഃ)

ഭവത്പൂജ്യഃ കഥം ശംഭുരേതത്സർവം വദസ്വ മേ .. 13..

വ്യാസ ഉവാച

അഥ തേ മുനയഃ സർവേ മാർകണ്ഡേയം സമാർചയൻ .

വചോഭിർവാസുദേവശ്ച പൃഷ്ടഃ സാധു ത്വയേതി ച .. 14..

ശ്രീകൃഷ്ണ ഉവാച

സാധു സാധു മുനേ പൃഷ്ടം ഹിതായ സകലസ്യ ച .. 15..

അജ്ഞാതം തവ നാസ്ത്യേവ തഥാപി ച വദാമ്യഹം .

ദൈവതം സർവലോകാനാം സർവകാരണകാരണം .. 16.. (സർവദേവാനാം)

ജ്യോതിര്യത്പരമാനന്ദം സാവധാനമതിഃ ശൃണു .

വിശ്വപാവനമീശാനം ഗുണാതീതമജം പരം .. 17.. (വിശ്വസാധനമീശാനം)

ജഗതസ്തസ്ഥുഷോ ഹ്യാത്മാ മമ മൂലം മഹാമുനേ .

യോ ദേവഃ സർവദേവാനാം ധ്യേയഃ പൂജ്യഃ സദാശിവഃ .. 18..

സ ശിവഃ സ മഹാദേവഃ ശങ്കരശ്ച നിരഞ്ജനഃ .

തസ്മാന്നാന്യഃ പരോ ദേവസ്ത്രിഷു ലോകേഷു വിദ്യതേ .. 19..

സർവജ്ഞഃ സർവഗഃ ശക്തഃ സർവാത്മാ സർവതോമുഖഃ .

പഠ്യതേ സർവസിദ്ധാന്തൈർവേദാന്തൈര്യോ മുനീശ്വരാഃ .. 20..

തസ്മിൻഭക്തിർമഹാദേവേ മമ ധാതുശ്ച നിർമലാ .

മഹേശഃ പരമം ബ്രഹ്മ ശാന്തഃ സൂക്ഷ്മഃ പരാത്പരഃ .. 21..

സർവാന്തരഃ സർവസാക്ഷീ ചിന്മയസ്തമസഃ പരഃ .

നിർവികല്പോ നിരാഭാസോ നിഃസംഗോ നിരുപദ്രവഃ .. 22..

നിർലേപഃ സകലാധ്യക്ഷോ മഹാപുരുഷ ഈശ്വരഃ .

തസ്യ ചേച്ഛാഭവത്പൂർവം ജഗത്സ്ഥിത്യന്തകാരിണീ .. 23..

വാമാംഗാദഭവം തസ്യ സോഽഹം വിഷ്ണുരിതി സ്മൃതഃ .

ജനയാമാസ ധാതാരം ദക്ഷിണാംഗാത്സദാശിവഃ .. 24..

മധ്യതോ രുദ്രമീശാനം കാലാത്മാ പരമേശ്വരഃ .

തപഃ കുർവന്തു ഭോ വത്സാ അബ്രവീദിതി താൻ  ശിവഃ .. 25.. (തപസ്തപന്തു ഭോ)

തതസ്തേ ശിവമാത്മാനം പ്രോചുഃ സംയതമാനസാഃ .

സ്തുത്വാ തു വിധിവത്സ്തോത്രൈഃ പ്രണമ്യ ച പുനഃ പുനഃ .. 26..

ബ്രഹ്മവിഷ്ണുമഹേശ്വരാ ഊചുഃ

തപഃ കേന പ്രകാരേണ കർതവ്യം പരമേശ്വര .

ബ്രൂഹി സർവമശേഷേണ സ്വാത്മാനം വേത്സി നാപരഃ .. 27..

ശ്രീമഹാദേവ ഉവാച . (ശിവ ഉവാച)

കായേന മനസാ വാചാ ധ്യാനപൂജാജപാദിഭിഃ .

കാമക്രോധാദിരഹിതം തപഃ കുർവന്തു ഭോ സുരാഃ .. 28..

ദേവാ ഊചുഃ .

ത്വയാ യത്കഥിതം ശംഭോ ദുർജ്ഞേയമജിതാത്മഭിഃ .

സൗമ്യോപായമതോ ബ്രഹ്മന്വദ കാരുണ്യവാരിധേ .. 29..

ശ്രീശങ്കര ഉവാച . (ശിവ ഉവാച)

ശൃണുധ്വം സർവപാപഘ്നം ഭുക്തിമുക്തിപ്രദം നൃണാം .

സഹസ്രനാമസദ്വിദ്യാം ജപന്തു മമ സുവ്രതാഃ .. 30..

യയാ സംസാരമഗ്നാനാം മുക്തിർഭവതി ശാശ്വതീ .

ശൃണ്വന്തു തദ്വിധാനം ഹി മഹാപാതകനാശനം .. 31.. 

പഠതാം ശൃണ്വതാം സദ്യോ മുക്തിഃ സ്യാദനപായിനീ .

ബ്രഹ്മചാരീ കൃതസ്നാനഃ ശുക്ലവാസാ ജിതേന്ദ്രിയഃ .. 32..

ഭസ്മധാരീ മുനിർമൗനീ പദ്മാസനസമന്വിതഃ .

ധ്യാത്വാ മാം സകലാധീശം നിരാകാരം നിരീശ്വരം .. 33..

പാർവതീസഹിതം ശംഭും ജടാമുകുടമണ്ഡിതം .

ദധാനം ചർമ വൈയാഘ്രം ചന്ദ്രാർധകൃതശേഖരം .. 34.. (വസാനം ചർമ)

ത്ര്യംബകം വൃഷഭാരൂഢം കൃത്തിവാസസമുജ്ജ്വലം .

സുരാർചിതപദദ്വന്ദ്വം ദിവ്യഭോഗം സുസുന്ദരം .. 35..

ബിഭ്രാണം സുപ്രസന്നം ച കുഠാരവരദാഭയം .

ദുർദർശം കമലാസീനം നാഗയജ്ഞോപവീതിനം .. 36.. (ദുരന്തം)

വിശ്വകായം ചിദാനന്ദം ശുദ്ധമക്ഷരമവ്യയം .

സഹസ്രശിരസം ശർവമനന്തകരസംയുതം .. 37.. (ശംഭുമനന്തകരസംയുതം)

സഹസ്രചരണം ദിവ്യം സോമസൂര്യാഗ്നിലോചനം .

ജഗദ്യോനിമജം ബ്രഹ്മ ശിവമാദ്യം സനാതനം .. 38..

ദംഷ്ട്രാകരാലം ദുഷ്പ്രേക്ഷ്യം സൂര്യകോടിസമപ്രഭം .

നിശാകരകരാകാരം ഭേഷജം ഭവരോഗിണാം .. 39..

പിനാകിനം വിശാലാക്ഷം പശൂനാം പതിമീശ്വരം .

കാലാത്മാനം കാലകാലം ദേവദേവം മഹേശ്വരം .. 40..

ജ്ഞാനവൈരാഗ്യസമ്പന്നം യോഗാനന്ദകരം പരം . (യോഗാനന്ദമയം)

ശാശ്വതൈശ്വര്യസമ്പന്നം മഹായോഗീശ്വരേശ്വരം .. 41..

സമസ്തശക്തിസംയുക്തം പുണ്യകായം ദുരാസദം .

താരകം ബ്രഹ്മ സമ്പൂർണമണീയാംസം മഹത്തരം .. 42.. (മഹത്തമം)

യതീനാം പരമം ബ്രഹ്മ വ്രതിനാം തപസഃ ഫലം .

സംയമീഹൃത്സമാസീനം തപസ്വിജനസംവൃതം .. 43..

വിധീന്ദ്രവിഷ്ണുനമിതം മുനിസിദ്ധനിഷേവിതം .

മഹാദേവം മഹാത്മാനം ദേവാനാമപി ദൈവതം .. 44.. (മഹാനന്ദം)

ശാന്തം പവിത്രമോങ്കാരം ജ്യോതിഷാം ജ്യോതിമുത്തമം .

ഇതി ധ്യാത്വാ ശിവം ചിത്തേ രക്ഷാർഥം കവചം ന്യസേത് .. 45..

(തതഃ പഠേദ്ധി കവചം മമ സർവാഘനാശനം)

അഥ കവചം -

ശങ്കരോ മേ ശിരഃ പാതു ലലാടം ഭാലലോചനഃ .

വിശ്വചക്ഷുർദൃശൗ പാതു ഭ്രുവൗ രുദ്രോ മമാവതു .. 46.. 

(വിശ്വചക്ഷുർദൃശൗ പാതു രുദ്രഃ പാതു ഭ്രുവൗ മമ ..)

ഗണ്ഡൗ പാതു മഹേശാനഃ ശ്രുതീ രക്ഷതു പൂർവജഃ .

കപോലൗ മേ മഹാദേവഃ പാതു നാസാം സദാശിവഃ .. 47..

മുഖം പാതു ഹവിർഭോക്താ ഓഷ്ഠൗ പാതു മഹേശ്വരഃ .

ദന്താൻ രക്ഷതു ദേവേശസ്താലൂ സോമകലാധരഃ .. 48..

രസനാം പരമാനന്ദഃ പാതു ശംഖം ശിവാപ്രിയഃ .

ചുബുകം പാതു മേ ശംഭുഃ ശ്മശ്രും ശത്രുവിനാശാനഃ .. 49..

കൂർചം പാതു ഭവഃ കണ്ഠം നീലകണ്ഠോഽവതു ധ്രുവം .

സ്കന്ധൗ സ്കന്ദഗുരുഃ പാതു ബാഹൂ പാതു മഹാഭുജഃ .. 50.. (സ്കന്ധൗ സ്കന്ദപിതാ)

ഉപബാഹൂ മഹാവീര്യഃ കരൗ വിബുധസത്തമഃ .

അംഗുലീഃ പാതു പഞ്ചാസ്യഃ പർവാണി ച സഹസ്രപാത് .. 51..

ഹൃദയം പാതു സർവാത്മാ സ്തനൗ പാതു പിതാമഹഃ .

ഉദരം ഹുതഭുക്പാതു മധ്യം പാതു മധ്യമേശ്വരഃ .. 52..

കുക്ഷിം പാതു ഭവാനീശഃ പൃഷ്ഠം പാതു കുലേശ്വരഃ .

പ്രാണാന്മേ പ്രാണദഃ പാതു നാഭിം ഭീമഃ കടിം വിഭുഃ .. 53..

സക്ഥിനീ പാതു മേ ഭർഗോ ജാനുനീ ഭുവനാധിപഃ .

ജംഘേ പുരരിപുഃ പാതു ചരണൗ ഭവനാശനഃ .. 54..

ശരീരം പാതു മേ ശർവോ ബാഹ്യമാഭ്യന്തരം ശിവഃ .

ഇന്ദ്രിയാണി ഹരഃ പാതു സർവത്ര ജയവർധനഃ .. 55..

പ്രാച്യാം ദിശി മൃഡഃ പാതു ദക്ഷിണേ യമസൂദനഃ . (പൂർവേ മമ മൃഡഃ)

വാരുണ്യാം സലിലാധീശ ഉദീച്യാം മേ മഹീധരഃ .. 56..

ഈശാന്യാം പാതു ഭൂതേശ ആഗ്നേയ്യാം രവിലോചനഃ .

നൈരൃത്യാം ഭൂതഭൃത്പാതു വായവ്യാം ബലവർധനഃ .. 57..

ഊർധ്വം പാതു മഖദ്വേഷീ ഹ്യധഃ സംസാരനാശനഃ .

സർവതഃ സുഖദഃ പാതു ബുദ്ധിം പാതു സുലോചനഃ .. 58..

ഇതി കവചം .

ഏവം ന്യാസവിധിം കൃത്വാ സാക്ഷാച്ഛംഭുമയോ ഭവേത് .

നമോ ഹിരണ്യബാഹ്വാദി പഠേന്മന്ത്രം തു ഭക്തിതഃ .. 59..

സദ്യോജാതാദിഭിർമന്ത്രൈർനമസ്കുര്യാത്സദാശിവം .

തതഃ സഹസ്രനാമേദം പഠിതവ്യം മുമുക്ഷുഭിഃ .. 60..

സർവകാര്യകരം പുണ്യം മഹാപാതകനാശനം .

സർവഗുഹ്യതമം ദിവ്യം സർവലോകഹിതപ്രദം .. 61..

മന്ത്രാണാം പരമോ മന്ത്രോ ഭവദുഃഖഷഡൂർമിഹൃത് .

ഓം നമഃ ശംഭവേ ചേതി ഷഡ്ഭിർമന്ത്രൈഃ ഷഡംഗകം .

ന്യാസം കൃത്വാ തു വിധിവത്സമ്യഗ്ധ്യാനം തതശ്ചരേത് .. 62..

വിനിയോഗഃ (ന്യാസ)

ഓം അസ്യ ശ്രീവേദസാരാഖ്യപരമദിവ്യശിവസഹസ്രനാമസ്തോത്രമന്ത്രസ്യ

ശ്രീഭഗവാൻ നാരായണ ഋഷിഃ . അനുഷ്ടുപ് ഛന്ദഃ .

പരമാത്മാ ശ്രീമഹാദേവോ ദേവതാ . നമഃ ഇതി ബീജം .

ശിവായേതി ശക്തിഃ . ചൈതന്യമിതി കീലകം .

ശ്രീമഹാദേവപ്രീത്യർഥേ ഏവം പ്രസാദസിദ്ധയർഥേ ജപേ വിനിയോഗഃ .

അഥ ന്യാസഃ .

.. അഥ കരന്യാസഃ ..

ഓം നമഃ ശംഭവേ ച അംഗുഷ്ഠാഭ്യാം നമഃ .

ഓം നമഃ മയോഭവേ ച തർജനീഭ്യാം നമഃ .

ഓം നമഃ ശങ്കരായ ച മധ്യമാഭ്യാം നമഃ .

ഓം നമഃ മയസ്കരായ ച അനാമികാഭ്യാം നമഃ .

ഓം നമഃ ശിവായ ച കനിഷ്ഠികാഭ്യാം നമഃ .

ഓം നമഃ ശിവതരായ ച കരതലകരപൃഷ്ഠാഭ്യാം നമഃ ..

.. അഥ ഹൃദയാദ്യംഗന്യാസഃ ..

ഓം നമഃ ശംഭവേ ച ഹൃദയായ നമഃ .

ഓം നമഃ മയോഭവേ ച ശിരസേ സ്വാഹാ .

ഓം നമഃ ശങ്കരായ ച ശിഖായൈ വഷട് .

ഓം നമഃ മയസ്കരായ ച കവചായ ഹും .

ഓം നമഃ ശിവായ ച നേത്രത്രയായ വൗഷട് .

ഓം നമഃ ശിവതരായ ച അസ്ത്രായ ഫട് ..

ഭൂർഭുവസ്സുവരോമിതി ദിഗ്ബന്ധഃ ..

. അഥ ധ്യാനം .

കൈലാസാദ്രിനിഭം ശശാങ്കകലയാ സ്ഫൂർജജ്ജടാമണ്ഡലം

നാസാലോകനതത്പരം ത്രിനയനം വീരാസനാധ്യാസിതം .

മുദ്രാടങ്കകുരംഗജാനുവിലസദ്ബാഹും പ്രസന്നാനനം

കക്ഷ്യാബദ്ധഭുജംഗമം മുനിവൃതം വന്ദേ മഹേശം പരം .. 1..

ശുദ്ധസ്ഫടികസങ്കാശം ത്രിനേത്രം ചേന്ദുശേഖരം .

പഞ്ചവക്ത്രം മഹാബാഹും ദശബാഹുസമന്വിതം .. 2..

ഭസ്മോദ്ധൂലിതസർവാംഗം നാഗാഭരണഭൂഷിതം .

പരിപൂർണം പരാനന്ദം പരം ജ്യോതിഃ പരാത്പരം .. 3..

പരാശക്ത്യാ ശ്രിയാ സാർധം പരമാനന്ദവിഗ്രഹം .

സൂര്യകോടിപ്രതീകാശം ചന്ദ്രകോടിസുശീതലം .

ശ്രീരുദ്രം സച്ചിദാനന്ദം ധ്യായേത് സർവാത്മസിദ്ധയേ .. 4..

.. അഥ ലമിത്യാദി പഞ്ചപൂജാ ..

ലം പൃഥിവ്യാത്മനേ ഗന്ധം സമർപയാമി .

ഹം ആകാശാത്മനേ പുഷ്പൈഃ പൂജയാമി .

യം വായ്വാത്മനേ ധൂപമാഘ്രാപയാമി .

രം അഗ്ന്യാത്മനേ ദീപം ദർശയാമി .

വം അമൃതാത്മനേ അമൃതം മഹാനൈവേദ്യം നിവേദയാമി .

സം സർവാത്മനേ സർവോപചാരപൂജാം സമർപയാമി ..

അഥ സഹസ്രനാമസ്തോത്രം ..

ഓം നമഃ പരായ ദേവായ ശങ്കരായ മഹാത്മനേ .

കാമിനേ നീലകണ്ഠായ നിർമലായ കപർദിനേ .. 1..

നിർവികല്പായ ശാന്തായ നിരഹങ്കാരിണേ നമഃ .

അനർഘ്യായ വിശാലായ സാലഹസ്തായ തേ നമഃ .. 2.. (അനർഘായ)

നിരഞ്ജനായ ശർവായ ശ്രുതായ ച പരാത്മനേ .

നമഃ ശിവായ ഭർഗായ ഗുണാതീതായ വേധസേ .. 3..

മഹാദേവായ പീതായ പാർവതീപതയേ നമഃ . (മഹാദേവായ വീതായ)

കേവലായ മഹേശായ വിശുദ്ധായ ബുധാത്മനേ .. 4..

കൈവല്യായ സുദേഹായ നിഃസ്പൃഹായ സ്വരൂപിണേ .

നമഃ സോമവിഭൂഷായ കാലായാമിതതേജസേ .. 5..

അജിരായ ജഗത്പിത്രേ ജനകായ പിനാകിനേ .

നിരാധാരായ സിംഹായ മായാതീതായ തേ നമഃ .. 6..

ബീജായ സർപഭൂഷായ പശൂനാം പതയേ നമഃ .

പുരന്ദരായ ഭദ്രായ പുരുഷായ മഹീയസേ .. 7..

മഹാസന്തോഷരൂപായ ജ്ഞാനിനേ ശുദ്ധബുദ്ധയേ .

നമോ വൃദ്ധസ്വരൂപായ തപസേ പരമാത്മനേ .. 8..

പൂർവജായ സുരേശായ ബ്രഹ്മണേഽനന്തമൂർതയേ .

നിരക്ഷരായ സൂക്ഷ്മായ കൈലാസപതയേ നമഃ .. 9..

നിരാമയായ കാന്തായ നിരാതങ്കായ തേ നമഃ .

നിരാലംബായ വിശ്വായ നിത്യായ യതയേ നമഃ .. 10..

ആത്മാരാമായ ഭവ്യായ പൂജ്യായ പരമേഷ്ഠിനേ .

വികർതനായ സൂർമ്യായ ശംഭവേ വിശ്വരൂപിണേ .. 11..

താരായ ഹംസനാഥായ പ്രതിസര്യായ തേ നമഃ .

പരാവരേശരുദ്രായ ഭവായാലംഘ്യശക്തയേ .. 12..

ഇന്ദ്രധ്വംസനിധീശായ കാലഹന്ത്രേ മനസ്വിനേ .

വിശ്വമാത്രേ ജഗദ്ധാത്രേ ജഗന്നേത്രേ നമോ നമഃ .. 13..

ജടിലായ വിരാഗായ പവിത്രായ മൃഡായ ച .

നിരവദ്യായ പാത്രായ സ്തേനാനാം പതയേ നമഃ .. 14..

നാദായ രവിനേത്രായ വ്യോമകേശായ തേ നമഃ .

ചതുർഭോഗായ സാരായ യോഗിനേഽനന്തമായിനേ  .. 15.. (യോഗിനേഽനന്തഗാമിനേ)

ധർമിഷ്ഠായ വരിഷ്ഠായ പുരത്രയവിഘാതിനേ .

ഗരിഷ്ഠായ ഗിരീശായ വരദായ നമോ നമഃ .. 16..

വ്യാഘ്രചർമാംബരായാഥ ദിശാവസ്ത്രായ തേ നമഃ . (ദിഗ്വസ്ത്രായ ച)

പരമപ്രേമമന്ത്രായ പ്രഥമായ സുചക്ഷുഷേ .. 17..

ആദ്യായ ശൂലഹസ്തായ ശിതികണ്ഠായ തേജസേ . (തേ നമഃ)

ഉഗ്രായ വാമദേവായ ശ്രീകണ്ഠായ നമോ നമഃ .. 18..

വിശ്വേശ്വരായ സൂര്യായ ഗൗരീശായ വരായ ച .

മൃത്യുഞ്ജയായ വീരായ വീരഭദ്രായ തേ നമഃ .. 19..

കാമനാശായ ഗുരവേ മുക്തിനാഥായ തേ നമഃ .

വിരൂപാക്ഷായ സൂതായ വഹ്നിനേത്രായ തേ നമഃ .. 20..

ജലന്ധരശിരച്ഛേത്രേ ഹവിഷേ ഹിതകാരിണേ .

മഹാകാലായ വൈദ്യായ സഘൃണേശായ തേ നമഃ .. 21..

നമ ഓങ്കാരരൂപായ സോമനാഥായ തേ നമഃ .

രാമേശ്വരായ ശുചയേ ഭൗമേശായ നമോ നമഃ .. 22..

ത്ര്യംബകായ നിരീഹായ കേദാരായ നമോ നമഃ .

ഗംഗാധരായ കവയേ നാഗനാഥായ തേ നമഃ .. 23..

ഭസ്മപ്രിയായ സൂദ്യായ ലക്ഷ്മീശായ നമോ നമഃ .

പൂർണായ ഭൂതപതയേ സർവജ്ഞായ ദയാലവേ .. 24..

ധർമായ ധനദേശായ ഗജചർമാംബരായ ച .

ഭാലനേത്രായ യജ്ഞായ ശ്രീശൈലപതയേ നമഃ .. 25..

കൃശാനുരേതസേ നീലലോഹിതായ നമോ നമഃ .

അന്ധകാസുരഹന്ത്രേ ച പാവനായ ബലായ ച .. 26..

ചൈതന്യായ ത്രിനേത്രായ ദക്ഷനാശകരായ ച .

നമഃ സഹസ്രശിരസേ ജയരൂപായ തേ നമഃ .. 27..

സഹസ്രചരണായാഥ യോഗിഹൃത്പദ്മവാസിനേ .

സദ്യോജാതായ വന്ദ്യായ സർവദേവമയായ ച .. 28..

ആമോദായ പ്രഗൽഭായ ഗായത്രീവല്ലഭായ ച .

വ്യോമാകാരായ വിപ്രായ നമോ വിപ്രപ്രിയായ ച .. 29..

അഘോരായ സുവേഷായ ശ്വേതരൂപായ തേ നമഃ .

വിദ്വത്തമായ ചിത്രായ വിശ്വഗ്രാസായ നന്ദിനേ .. 30..

അധർമശത്രുരൂപായ ദുന്ദുഭേർമർദനായ ച .

അജാതശത്രവേ തുഭ്യം ജഗത്പ്രാണായ തേ നമഃ .. 31..

നമോ ബ്രഹ്മശിരശ്ഛേത്രേ പഞ്ചവക്ത്രായ ഖഡ്ഗിനേ .

നമസ്തേ ഹരികേശായ പഞ്ചവർണായ വജ്രിണേ .. 32..

നമഃ പഞ്ചാക്ഷരായാഥ ഗോവർധനധരായ ച .

പ്രഭവേ സർവലോകാനാം കാലകൂടവിഷാദിനേ .. 33..

സിദ്ധേശ്വരായ സിദ്ധായ സഹസ്രവദനായ ച .

നമഃ സഹസ്രഹസ്തായ സഹസ്രനയനായ ച .. 34..

സഹസ്രമൂർതയേ തുഭ്യം ജിഷ്ണവേ ജിതശത്രവേ .

കാശീനാഥായ ഗേഹ്യായ നമസ്തേ വിശ്വസാക്ഷിണേ .. 35..

ഹേതവേ സർവജീവാനാം പാലകായ നമോ നമഃ .

ജഗത്സംഹാരകാരായ ത്രിധാവസ്ഥായ തേ നമഃ .. 36..

ഏകാദശസ്വരൂപായ നമസ്തേ വഹ്നിമൂർതയേ .

നരസിംഹമഹാദർപഘാതിനേ ശരഭായ ച .. 37..

ഭസ്മാഭ്യക്തായ തീർഥായ ജാഹ്നവീജനകായ ച . (വല്ലഭായ)

ദേവദാനവദൈത്യാനാം ഗുരവേ തേ നമോ നമഃ .. 38..

ദലിതാഞ്ജനഭാസായ നമോ വായുസ്വരൂപിണേ .

സ്വേച്ഛാമന്ത്രസ്വരൂപായ പ്രസിദ്ധായ നമോ നമഃ .. 39.. (പ്രസിദ്ധായാത്മനേ നമഃ)

വൃഷധ്വജായ ഗോഷ്ഠ്യായ ജഗദ്യന്ത്രപ്രവർതിനേ .

അനാഥായ പ്രജേശായ വിഷ്ണുഗർവഹരായ ച .. 40..

ഹരേർവിധാതൃകലഹനാശകായ തേ നമോ നമഃ . (ഹരിർവിധാതൃകലഹനാശകായ)

നമസ്തേ ദശഹസ്തായ ഗഗനായ നമോ നമഃ .. 41..

കൈവല്യഫലദാത്രേ ച പരമായ നമോ നമഃ .

ജ്ഞാനായ ജ്ഞാനഗമ്യായ ഘണ്ടാരവപ്രിയായ ച .. 42..

പദ്മാസനായ പുഷ്ടായ നിർവാണായ നമോ നമഃ .

അയോനയേ സുദേഹായ ഹ്യുത്തമായ നമോ നമഃ .. 43..

അന്തകാലാധിപതയേ വിശാലാക്ഷായ തേ നമഃ .

കുബേരബന്ധവേ തുഭ്യം സോമായ സുഖദായിനേ .. 44..

അമൃതേശ്വരരൂപായ കൗബേരായ ച ധന്വിനേ . (കൗബേരായ നമോ നമഃ)

പ്രിയമ്വദസമർഥായ വന്ദിനേ വിഭവായ ച .. 45..

ഗിരിശായ ഗിരിത്രായ ഗിരിശന്തായ തേ നമഃ .

പാരിജാതായ ബൃഹതേ പഞ്ചയജ്ഞായ തേ നമഃ .. 46..

തരുണായ വിശിഷ്ടായ ബാലരൂപധരായ ച .

ജീവിതേശായ തുഷ്ടായ പുഷ്ടാനാം പതയേ നമഃ .. 47..

ഭവഹേത്യൈ ഹിരണ്യായ കനിഷ്ഠായ നമോ നമഃ .

മധ്യമായ വിധാത്രേ ച തേ ശൂരായ സുഭഗായ ച .. 48..

ആദിത്യതാപനായാഥ നമസ്തേ രുദ്രമന്യവേ .

മഹാഹ്രദായ ഹ്രസ്വായ വാമനായ നമോ നമഃ .. 49..

നമസ്തത്പുരുഷായാഥ ചതുർഹസ്തായ മായിനേ . (ചതുർഹസ്തായ തേ നമഃ)

നമോ ധൂർജടയേ തുഭ്യം ജഗദീശായ തേ നമഃ .. 50..

ജഗന്നാഥസ്വരൂപായ ലീലാവിഗ്രഹരൂപിണേ .

അനഘായ നമസ്തുഭ്യമമരായ നമോ നമഃ .. 51..

അമൃതായ നമസ്തുഭ്യമച്ഛാത്രായ നമോ നമഃ .

ലോകാധ്യക്ഷായ വൈ തുഭ്യമനാദിനിധനായ ച .. 52..

വ്യക്തേതരായ വ്യക്തായ നമസ്തേ പരമാണവേ .

ലഘുസ്ഥൂലസ്വരൂപായ നമഃ പരശുധാരിണേ .. 53..

നമഃ ഖട്വാംഗഹസ്തായ നാഗഹസ്തായ തേ നമഃ .

വരദാഭയഹസ്തായ ഘണ്ടാഹസ്തായ തേ നമഃ .. 54..

ഘസ്മരായ നമസ്തുഭ്യമജിതായ നമോ നമഃ .

അണിമാദിഗുണേശായ പഞ്ചബ്രഹ്മമയായ ച .. 55..

പുരാതനായ ശുദ്ധായ ബലപ്രമഥനായ ച .

പുണ്യോദയായ പദ്മായ വിരക്തായ നമോ നമഃ .. 56..

ഉദാരായ വിചിത്രായ വിചിത്രഗതയേ നമഃ .

വാഗ്വിശുദ്ധായ ചിതയേ നിർഗുണായ നമോ നമഃ .. 57..

പരമേശായ ശേഷായ നമഃ പദ്മധരായ ച .

മഹേന്ദ്രായ സുശീലായ കരവീരപ്രിയായ ച .. 58..

മഹാപരാക്രമായാഥ നമസ്തേ കാലരൂപിണേ .

വിഷ്ടരശ്രവസേ ലോകചൂഡാരത്നായ തേ നമഃ .. 59..

സാമ്രാജ്യകല്പവൃക്ഷായ കരുണായ നടായ ച . (നമസ്തുഭ്യം ത്വിഷീമതേ)

അനർഘ്യായ വരേണ്യായ വജ്രരൂപായ തേ നമഃ .. 60.. (വരേണ്യായ നമസ്തുഭ്യം യജ്ഞരൂപായ തേ നമഃ)

പരമജ്യോതിഷേ പദ്മഗർഭായ സലിലായ ച .

തത്ത്വാധികായ സർഗായ നമോ ദീർഘായ സ്രഗ്വിണേ .. 61..

നമസ്തേ പാണ്ഡുരംഗായ ഘോരായ ബ്രഹ്മരൂപിണേ .

നിഷ്കലായ നമസ്തുഭ്യം പ്രപഥ്യായ നമോ നമഃ .. 62.. (സാമഗാനപ്രിയായ ച)

നമോ ജയായ ക്ഷേത്രായ ക്ഷേത്രാണാം പതയേ നമഃ .

കലാധരായ പൂതായ പഞ്ചഭൂതാത്മനേ നമഃ .. 63..

അനിർവിണ്ണായ തഥ്യായ പാപനാശകരായ ച .

വിശ്വതശ്ചക്ഷുഷേ തുഭ്യം മന്ത്രിണേഽനന്തരൂപിണേ .. 64..

സിദ്ധസാധകരൂപായ മേദിനീരൂപിണേ നമഃ .

അഗണ്യായ പ്രതാപായ സുധാഹസ്തായ തേ നമഃ .. 65..

ശ്രീവല്ലഭായേധ്രിയായ സ്ഥാണവേ മധുരായ ച .

ഉപാധിരഹിതായാഥ നമഃ സുകൃതരാശയേ .. 66..

നമോ മുനീശ്വരായാഥ ശിവാനന്ദായ തേ നമഃ .

രിപുഘ്നായ നമസ്തേജോരാശയേഽനുത്തമായ ച .. 67..

ചതുർമൂർതിവപുഃസ്ഥായ നമോബുദ്ധീന്ദ്രിയാത്മനേ .

ഉപദ്രവഹരായാഥ പ്രിയസന്ദർശനായ ച .. 68..

ഭൂതനാഥായ മൂലായ വീതരാഗായ തേ നമഃ .

നൈഷ്കർമ്യായ വിരൂപായ ഷട്ചക്രായ വിശുദ്ധയേ .. 69..

കുലേശായാവനീഭർത്രേ ഭുവനേശായ തേ നമഃ .

ഹിരണ്യബാഹവേ ജീവവരദായ നമോ നമഃ .. 70..

ആദിദേവായ ഭാഗ്യായ ചന്ദ്രസഞ്ജീവനായ ച .

ഹരായ ബഹുരൂപായ പ്രസന്നായ നമോ നമഃ .. 71..

ആനന്ദപൂരിതായാഥ കൂടസ്ഥായ നമോ നമഃ .

നമോ മോക്ഷഫലായാഥ ശാശ്വതായ വിരാഗിണേ .. 72..

യജ്ഞഭോക്ത്രേ സുഷേണായ ദക്ഷയജ്ഞവിഘാതിനേ .

നമഃ സർവാത്മനേ തുഭ്യം വിശ്വപാലായ തേ നമഃ .. 73..

വിശ്വഗർഭായ ഗർഭായ ദേവഗർഭായ തേ നമഃ .

സംസാരാർണവമഗ്നാനാം സമുദ്ധരണഹേതവേ .. 74..

മുനിപ്രിയായ ഖല്യായ മൂലപ്രകൃതയേ നമഃ .

സമസ്തസിദ്ധയേ തേജോമൂർതയേ തേ നമോ നമഃ .. 75..

ആശ്രമസ്ഥാപകായാഥ വർണിനേ സുന്ദരായ ച .

മൃഗബാണാർപണായാഥ ശാരദാവല്ലഭായ ച .. 76..

വിചിത്രമായിനേ തുഭ്യമലങ്കരിഷ്ണവേ നമഃ .

ബർഹിർമുഖമഹാദർപമഥനായ നമോ നമഃ .. 77..

നമോഽഷ്ടമൂർതയേ തുഭ്യം നിഷ്കലങ്കായ തേ നമഃ .

നമോ ഹവ്യായ ഭോജ്യായ യജ്ഞനാഥായ തേ നമഃ .. 78..

നമോ മേധ്യായ മുഖ്യായ വിശിഷ്ടായ നമോ നമഃ .

അംബികാപതയേ തുഭ്യം മഹാദാന്തായ തേ നമഃ .. 79..

സത്യപ്രിയായ സത്യായ പ്രിയനിത്യായ തേ നമഃ .

നിത്യതൃപ്തായ വേദിത്രേ മൃദുഹസ്തായ തേ നമഃ .. 80..

അർധനാരീശ്വരായാഥ കുഠാരായുധപാണയേ .

വരാഹഭേദിനേ തുഭ്യം നമഃ കങ്കാലധാരിണേ .. 81..

മഹാർഥായ സുസത്ത്വായ കീർതിസ്തംഭായ തേ നമഃ .

നമഃ കൃതാഗമായാഥ വേദാന്തപഠിതായ ച .. 82..

അശ്രോത്രായ ശ്രുതിമതേ ബഹുശ്രുതിധരായ ച .

അഘ്രാണായ നമസ്തുഭ്യം ഗന്ധാവഘ്രാണകാരിണേ .. 83..

പാദഹീനായ വോഢ്രേ ച സർവത്രഗതയേ നമഃ .

ത്ര്യക്ഷായ ജനനേത്രായ നമസ്തുഭ്യം ചിദാത്മനേ .. 84..

രസജ്ഞായ നമസ്തുഭ്യം രസനാരഹിതായ ച .

അമൂർതായാഥ മൂർതായ സദസസ്പതയേ നമഃ .. 85..

ജിതേന്ദ്രിയായ തഥ്യായ പരഞ്ജ്യോതിഃസ്വരൂപിണേ .

നമസ്തേ സർവമർത്യാനാമാദികർത്രേ ഭുവന്തയേ .. 86..

സർഗസ്ഥിതിവിനാശാനാം കർത്രേ തേ പ്രേരകായ ച .

നമോഽന്തര്യാമിണേ സർവഹൃദിസ്ഥായ നമോ നമഃ .. 87..

ചക്രഭ്രമണകർത്രേ തേ പുരാണായ നമോ നമഃ .

വാമദക്ഷിണഹസ്തോത്ഥലോകേശ ഹരിശാലിനേ .. 88..

നമഃ സകലകല്യാണദായിനേ പ്രസവായ ച .

സ്വഭാവോദാരധീരായ സൂത്രകാരായ തേ നമഃ .. 89..

വിഷയാർണവമഗ്നാനാം സമുദ്ധരണസേതവേ .

അസ്നേഹസ്നേഹരൂപായ വാർതാതിക്രാന്തവർതിനേ .. 90..

യത്ര സർവം യതഃ സർവം സർവം യത്ര നമോ നമഃ .

നമോ മഹാർണവായാഥ ഭാസ്കരായ നമോ നമഃ .. 91..

ഭക്തിഗമ്യായ ഭക്താനാം സുലഭായ നമോ നമഃ .

ദുഷ്പ്രധർഷായ ദുഷ്ടാനാം വിജയായ വിവേകിനാം .. 92..

അതർകിതായ ലോകായ സുലോകായ നമോ നമഃ .

പൂരയിത്രേ വിശേഷായ ശുഭായ ച നമോ നമഃ .. 93..

നമഃ കർപൂരദേഹായ സർപഹാരായ തേ നമഃ .

നമഃ സംസാരപാരായ കമനീയായ തേ നമഃ .. 94..

വഹ്നിദർപവിഘാതായ വായുദർപവിഘാതിനേ .

ജരാതിഗായ വീര്യായ നമസ്തേ വിശ്വവ്യാപിനേ .. 95..

സൂര്യകോടിപ്രതീകാശ നിഷ്ക്രിയായ നമോ നമഃ .

ചന്ദ്രകോടിസുശീതായ വിമലായ നമോ നമഃ .. 96..

നമോ ഗൂഢസ്വരൂപായ ദിശാം ച പതയേ നമഃ .

നമഃ സത്യപ്രതിജ്ഞായ സമസ്തായ സമാധയേ .. 97..

ഏകരൂപായ ശൂന്യായ വിശ്വനാഭിഹ്രദായ ച .

സർവോത്തമായ കൂല്യായ പ്രാണിനാം സുഹൃദേ നമഃ .. 98.. (സർവോത്തമായ കാലായ)

അന്നാനാം പതയേ തുഭ്യം ചിന്മാത്രായ നമോ നമഃ .

ധ്യേയായ ധ്യാനഗമ്യായ ധ്യാനരൂപായ തേ നമഃ .. 99..

നമസ്തേ ശാശ്വതൈശ്വര്യവിഭവായ നമോ നമഃ .

വരിഷ്ഠായ ധർമഗോപ്ത്രേ നിധനായാഗ്രജായ ച .. 100..

യോഗീശ്വരായ യോഗായ യോഗഗമ്യായ തേ നമഃ .

നമഃ പ്രാണേശ്വരായാഥ സർവശക്തിധരായ ച .. 101..

ധർമാധാരായ ധന്യായ പുഷ്കലായ നമോ നമഃ .

മഹേന്ദ്രോപേന്ദ്രചന്ദ്രാർകനമിതായ നമോ നമഃ .. 102..

മഹർഷിവന്ദിതായാഥ പ്രകാശായ സുധർമിണേ .

നമോ ഹിരണ്യഗർഭായ നമോ ഹിരണ്മയായ ച .. 103..

ജഗദ്ബീജായ ഹരയേ സേവ്യായ ക്രതവേ നമഃ .

ആധിപത്യായ കാമായ യശസേ തേ പ്രചേതസേ .. 104..

നമോ ബ്രഹ്മമയായാഥ സകലായ നമോ നമഃ .

നമസ്തേ രുക്മവർണായ നമസ്തേ ബ്രഹ്മയോനയേ .. 105..

യോഗാത്മനേ ത്വഭീതായ ദിവ്യനൃത്യായ തേ നമഃ .

ജഗതാമേകബീജായ മായാബീജായ തേ നമഃ .. 106..

സർവഹൃത്സന്നിവിഷ്ടായ ബ്രഹ്മചക്രഭ്രമായ ച .

ബ്രഹ്മാനന്ദായ മഹതേ ബ്രഹ്മണ്യായ നമോ നമഃ .. 107..

ഭൂമിഭാരാർതിസംഹർത്രേ വിധിസാരഥയേ നമഃ .

ഹിരണ്യഗർഭപുത്രാണാം പ്രാണസംരക്ഷണായ ച .. 108..

ദുർവാസസേ ഷഡ്വികാരരഹിതായ നമോ നമഃ .

നമോ ദേഹാർധകാന്തായ ഷഡൂർമിരഹിതായ ച .. 109..

പ്രകൃത്യൈ ഭവനാശായ താമ്രായ പരമേഷ്ഠിനേ .

അനന്തകോടിബ്രഹ്മാണ്ഡനായകായ നമോ നമഃ .. 110..

ഏകാകിനേ നിർമലായ ദ്രവിണായ ദമായ ച .

നമസ്ത്രിലോചനായാഥ ശിപിവിഷ്ടായ ബന്ധവേ .. 111..

ത്രിവിഷ്ടപേശ്വരായാഥ നമോ വ്യാഘ്രേശ്വരായ ച .

വിശ്വേശ്വരായ ദാത്രേ തേ നമശ്ചന്ദ്രേശ്വരായ ച .. 112..

വ്യാധേശ്വരായായുധിനേ യജ്ഞകേശായ തേ നമഃ . (വ്യാസേശ്വരായ )

ജൈഗീഷവ്യേശ്വരായാഥ ദിവോദാസേശ്വരായ ച .. 113..

നാഗേശ്വരായ ന്യായായ ന്യായനിർവാഹകായ ച .

ശരണ്യായ സുപാത്രായ കാലചക്രപ്രവർതിനേ .. 114..

വിചക്ഷണായ ദംഷ്ട്രായ വേദാശ്വായ നമോ നമഃ .

നീലജീമൂതദേഹായ പരാത്മജ്യോതിഷേ നമഃ .. 115..

ശരണാഗതപാലായ മഹാബലപരായ ച .

സർവപാപഹരായാഥ മഹാനാദായ തേ നമഃ .. 116..

കൃഷ്ണസ്യ ജയദാത്രേ തേ ബില്വകേശായ തേ നമഃ .

ദിവ്യഭോഗായ ദൂതായ കോവിദായ നമോ നമഃ .. 117..

കാമപാശായ ചിത്രായ ചിത്രാംഗായ നമോ നമഃ .

നമോ മാതാമഹായാഥ നമസ്തേ മാതരിശ്വനേ .. 118..

നിഃസംഗായ സുനേത്രായ വിദ്യേശായ ജയായ ച .

വ്യാഘ്രസമ്മർദനായാഥ മധ്യസ്ഥായ നമോ നമഃ .. 119..

അംഗുഷ്ഠശിരസാ ലങ്കാനാഥദർപഹരായ ച .

വൈയാഘ്രപുരവാസായ നമഃ സർവേശ്വരായ ച .. 120..

നമഃ പരാവരേശായ ജഗത്സ്ഥാവരമൂർതയേ .

നമോഽപ്യനുപമേശായ ശാർങ്ഗിണേ വിഷ്ണുമൂർതയേ .. 121..

നാരായണായ രാമായ സുദീപ്തായ നമോ നമഃ .

നമോ ബ്രഹ്മാണ്ഡമാലായ ഗോധരായ വരൂഥിനേ .. 122..

നമഃ സോമായ കൂപ്യായ നമഃ പാതാലവാസിനേ .

നമസ്താരാധിനാഥായ വാഗീശായ നമോ നമഃ .. 123..

സദാചാരായ ഗൗരായ സ്വായുധായ നമോ നമഃ .

അതർക്യായാപ്രമേയായ പ്രമാണായ നമോ നമഃ .. 124..

കലിഗ്രാസായ ഭക്താനാം ഭുക്തിമുക്തിപ്രദായിനേ .

സംസാരമോചനായാഥ വർണിനേ ലിംഗരൂപിണേ .. 125..

സച്ചിദാനന്ദരൂപായ പാപരാശിഹരായ ച .

ഗജാരയേ വിദേഹായ ത്രിലിംഗരഹിതായ ച .. 126..

അചിന്ത്യശക്തയേഽലംഘ്യശാസനായാച്യുതായ ച .

നമോ രാജാധിരാജായ ചൈതന്യവിഷയായ ച .. 127..

നമഃ ശുദ്ധാത്മനേ ബ്രഹ്മജ്യോതിഷേ സ്വസ്തിദായ ച .

മയോഭുവേ ച ദുർജ്ഞേയസാമർഥ്യായ ച യജ്വനേ .. 128..

ചക്രേശ്വരായ വൈ തുഭ്യം നമോ നക്ഷത്രമാലിനേ .

അനർഥനാശനായാഥ ഭസ്മലേപകരായ ച .. 129..

സദാനന്ദായ വിദുഷേ സഗുണായ വിരോധിനേ .

ദുർഗമായ ശുഭാംഗായ മൃഗവ്യാധായ തേ നമഃ .. 130..

പ്രിയായ ധർമധാമ്നേ തേ പ്രയോഗായ വിഭാഗിനേ .

നാദ്യായാമൃതപാനായ സോമപായ തപസ്വിനേ .. 131..

നമോ വിചിത്രവേഷായ പുഷ്ടിസംവർധനായ ച .

ചിരന്തനായ ധനുഷേ വൃക്ഷാണാം പതയേ നമഃ .. 132..

നിർമായായാഗ്രഗണ്യായ വ്യോമാതീതായ തേ നമഃ .

സംവത്സരായ ലോപ്യായ സ്ഥാനദായ സ്ഥവിഷ്ണവേ .. 133..

വ്യവസായഫലാന്തായ മഹാകർതൃപ്രിയായ ച .

ഗുണത്രയസ്വരൂപായ നമഃ സിദ്ധസ്വരൂപിണേ .. 134..

നമഃ സ്വരൂപരൂപായ സ്വേച്ഛായ പുരുഷായ ച .

കാലാത്പരായ വേദ്യായ നമോ ബ്രഹ്മാണ്ഡരൂപിണേ .. 135..

അനിത്യനിത്യരൂപായ തദന്തർവർതിനേ നമഃ .

നമസ്തീർഥ്യായ കൂല്യായ പൂർണായ വടവേ നമഃ .. 136..

പഞ്ചതന്മാത്രരൂപായ പഞ്ചകർമേന്ദ്രിയാത്മനേ .

വിശൃംഖലായ ദർപായ നമസ്തേ വിഷയാത്മനേ .. 137..

അനവദ്യായ ശാസ്ത്രായ സ്വതന്ത്രായാമൃതായ ച .

നമഃ പ്രൗഢായ പ്രാജ്ഞായ യോഗാരൂഢായ തേ നമഃ .. 138..

മന്ത്രജ്ഞായ പ്രഗൽഭായ പ്രദീപവിമലായ ച .

വിശ്വവാസായ ദക്ഷായ വേദനിഃശ്വസിതായ ച .. 139..

യജ്ഞാംഗായ സുവീരായ നാഗചൂഡായ തേ നമഃ .

വ്യാഘ്രായ ബാണഹസ്തായ സ്കന്ദായ ദക്ഷിണേ നമഃ .. 140..

ക്ഷേത്രജ്ഞായ രഹസ്യായ സ്വസ്ഥാനായ വരീയസേ .

ഗഹനായ വിരാമായ സിദ്ധാന്തായ നമോ നമഃ .. 141..

മഹീധരായ ഗൃഹ്യായ വടവൃക്ഷായ തേ നമഃ .

ജ്ഞാനദീപായ ദുർഗായ സിദ്ധാന്തൈർനിശ്ചിതായ ച .. 142..

ശ്രീമതേ മുക്തിബീജായ കുശലായ വിവാസിനേ .

പ്രേരകായ വിശോകായ ഹവിർധാനായ തേ നമഃ .. 143..

ഗംഭീരായ സഹായായ ഭോജനായ സുഭോഗിനേ .

മഹായജ്ഞായ തീക്ഷ്ണായ നമസ്തേ ഭൂതചാരിണേ .. 144..

നമഃ പ്രതിഷ്ഠിതായാഥ മഹോത്സാഹായ തേ നമഃ .

പരമാർഥായ ശിശവേ പ്രാംശവേ ച കപാലിനേ .. 145..

സഹജായ ഗൃഹസ്ഥായ സന്ധ്യാനാഥായ വിഷ്ണവേ .

സദ്ഭിഃ സമ്പൂജിതായാഥ വിതലാസുരഘാതിനേ .. 146..

ജനാധിപായ യോഗ്യായ കാമേശായ കിരീടിനേ .

അമോഘവിക്രമായാഥ നഗ്നായ ദലഘാതിനേ .. 147..

സംഗ്രാമായ നരേശായ നമസ്തേ ശുചിഭസ്മനേ .

ഭൂതിപ്രിയായ ഭൂമ്നേ തേ സേനായ ചതുരായ ച .. 148..

മനുഷ്യബാഹ്യഗതയേ കൃതജ്ഞായ ശിഖണ്ഡിനേ .

നിർലേപായ ജടാർദ്രായ മഹാകാലായ മേരവേ .. 149..

നമോ വിരൂപരൂപായ ശക്തിഗമ്യായ തേ നമഃ .

നമഃ സർവായ സദസത്സത്യായ സുവ്രതായ ച .. 150..

നമോ ഭക്തിപ്രിയായാഥ ശ്വേതരക്ഷാപരായ ച .

സുകുമാരമഹാപാപഹരായ രഥിനേ നമഃ .. 151..

നമസ്തേ ധർമരാജായ ധനാധ്യക്ഷായ സിദ്ധയേ .

മഹാഭൂതായ കല്പായ കല്പനാരഹിതായ ച .. 152..

ഖ്യാതായ ജിതവിശ്വായ ഗോകർണായ സുചാരവേ .

ശ്രോത്രിയായ വദാന്യായ ദുർലഭായ കുടുംബിനേ .. 153..

വിരജായ സുഗന്ധായ നമോ വിശ്വംഭരായ ച .

ഭവാതീതായ തിഷ്യായ നമസ്തേ സാമഗായ ച .. 154..

അദ്വൈതായ ദ്വിതീയായ കല്പരാജായ ഭോഗിനേ .

ചിന്മയായ നമഃ ശുക്ലജ്യോതിഷേ ക്ഷേത്രഗായ ച .. 155..

സർവഭോഗസമൃദ്ധായ സാമ്പരായായ തേ നമഃ .

നമസ്തേ സ്വപ്രകാശായ സ്വച്ഛന്ദായ സുതന്തവേ .. 156..

സർവജ്ഞമൂർതയേ തുഭ്യം ഗുഹ്യേശായ സുശാന്തയേ .

ശാരദായ സുശീലായ കൗശികായ ധനായ ച .. 157..

അഭിരാമായ തത്ത്വായ വ്യാലകല്പായ തേ നമഃ .

അരിഷ്ടമഥനായാഥ സുപ്രതീകായ തേ നമഃ .. 158..

ആശവേ ബ്രഹ്മഗർഭായ വരുണായാദ്രയേ നമഃ .

നമഃ കാലാഗ്നിരുദ്രായ ശ്യാമായ സുജനായ ച .. 159..

അഹിർബുധ്ന്യായ ജാരായ ദുഷ്ടാനാം പതയേ നമഃ .

നമഃ സമയനാഥായ സമയായ ഗുഹായ ച .. 160..

ദുർലംഘ്യായ നമസ്തുഭ്യം ഛന്ദഃസാരായ ദംഷ്ട്രിണേ .

ജ്യോതിർലിംഗായ മിത്രായ ജഗതാം ഹിതകാരിണേ .. 161..

നമഃ കാരുണ്യനിധയേ ശ്ലോകായ ജയശാലിനേ .

ജ്ഞാനോദയായ ബീജായ ജഗദ്വിഭ്രമഹേതവേ .. 162..

അവധൂതായ ശിഷ്ടായ ഛന്ദസാം പതയേ നമഃ .

നമഃ ഫേന്യായ ഗുഹ്യായ സർവബന്ധവിമോചിനേ .. 163..

ഉദാരകീർതയേ ശശ്വത്പ്രസന്നവദനായ ച .

വസവേ വേദകാരായ നമോ ഭ്രാജിഷ്ണുജിഷ്ണവേ .. 164..

ചക്രിണേ ദേവദേവായ ഗദാഹസ്തായ പുത്രിണേ .

പാരിജാതസുപുഷ്പായ ഗണാധിപതയേ നമഃ .. 165..

സർവശാഖാധിപതയേ പ്രജനേശായ തേ നമഃ .

സൂക്ഷ്മപ്രമാണഭൂതായ സുരപാർശ്വഗതായ ച .. 166..

അശരീരശരീരായ അപ്രഗൽഭായ തേ നമഃ .

സുകേശായ സുപുഷ്പായ ശ്രുതയേ പുഷ്പമാലിനേ .. 167..

മുനിധ്യേയായ മുനയേ ബീജസംസ്ഥമരീചയേ .

ചാമുണ്ഡാജനകായാഥ നമസ്തേ കൃത്തിവാസസേ .. 168..

വ്യുപ്തകേശായ യോഗ്യായ ധർമപീഠായ തേ നമഃ .

മഹാവീര്യായ ദീപ്തായ ബുദ്ധായാശനയേ നമഃ .. 169..

വിശിഷ്ടേഷ്ടായ സേനാന്യേ ദ്വിപദേ കാരണായ ച .

കാരണാനാം ഭഗവതേ ബാണദർപഹരായ ച .. 170..

അതീന്ദ്രിയായ രമ്യായ ജനാനന്ദകരായ ച .

സദാശിവായ സൗമ്യായ ചിന്ത്യായ ശശിമൗലയേ .. 171..

നമസ്തേ ജാതൂകർണ്യായ സൂര്യാധ്യക്ഷായ തേ നമഃ .

ജ്യോതിഷേ കുണ്ഡലീശസ്യ വരദായാഭയായ ച .. 172..

വസന്തായ സുരഭയേ ജയാരിമഥനായ ച .

പ്രേമ്ണേ പുരഞ്ജയായാഥ പൃഷദശ്വായ തേ നമഃ .. 173..

രോചിഷ്ണവേഽസുരജിതേ ശ്വേതപീതായ തേ നമഃ .

നമസ്തേ ചഞ്ചരീകായ തമിസ്രമഥനായ ച .. 174..

പ്രമാഥിനേ നിദാഘായ ചിത്രഗർഭായ തേ നമഃ .

ശിവാലയായ സ്തുത്യായ തീർഥദേവായ തേ നമഃ .. 175..

പത്തീനാം പതയേ തുഭ്യം വിചിത്രഗതയേ നമഃ . (വിചിത്രശക്തയേ)

നമോ നിസ്തുലരൂപായ സവിത്രേ തപസേ നമഃ .. 176..

അഹങ്കാരസ്വരൂപായ മേഘാധിപതയേ നമഃ .

അപാരായ തത്ത്വവിദേ ക്ഷയദ്വീരായ തേ നമഃ .. 177..

പഞ്ചാസ്യായാഗ്രഗണ്യായ വിഷ്ണുപ്രാണേശ്വരായ ച .

അഗോചരായ യാമ്യായ ക്ഷേമ്യായ വഡവാഗ്നയേ .. 178..

വിക്രമായ സ്വതന്ത്രായ സ്വതന്ത്രഗതയേ നമഃ ..

വനാനാം പതയേ തുഭ്യം നമസ്തേ ജമദഗ്നയേ .. 179..

അനാവൃതായ മുക്തായ മാതൃകാപതയേ നമഃ .

നമസ്തേ ബീജകോശായ ദിവ്യാനന്ദായ തേ നമഃ .. 180..

നമസ്തേ വിശ്വദേവായ ശാന്തരാഗായ തേ നമഃ .

വിലോചനസുദേവായ ഹേമഗർഭായ തേ നമഃ .. 181..

അനാദ്യന്തായ ചണ്ഡായ മനോനാഥായ തേ നമഃ .

ജ്ഞാനസ്കന്ദായ തുഷ്ടായ കപിലായ മഹർഷയേ .. 182..

നമസ്ത്രികാഗ്നികാലായ ദേവസിംഹായ തേ നമഃ .

നമസ്തേ മണിപൂരായ ചതുർവേദായ തേ നമഃ .. 183..

സ്വരൂപാണാം സ്വഭാവായ ഹ്യന്തര്യാഗായ തേ നമഃ .

നമഃ ശ്ലോക്യായ വന്യായ മഹാധർമായ തേ നമഃ .. 184..

പ്രസന്നായ നമസ്തുഭ്യം സർവാത്മജ്യോതിഷേ നമഃ .

സ്വയംഭുവേ ത്രിമൂർതീനാമധ്വാതീതായ തേ നമഃ .. 185..

സദാശിവ ഉവാച .

ജപന്തു മാമികാം ദേവാഃ നാമ്നാം ദശശതീമിമാം .

മമ ചാതിപ്രിയകരീം മഹാമോക്ഷപ്രദായിനീം .. 186..

സംഗ്രാമേ ജയദാത്രീം തു സർവസിദ്ധികരീം ശുഭാം .

യഃ പഠേച്ഛൃണുയാദ്വാപി സർവപാപൈഃ പ്രമുച്യതേ .. 187..

പുത്രകാമോ ലഭേത്പുത്രം രാജ്യകാമസ്തു രാജതാം .

പ്രാപ്നുയാത്പരയാ ഭക്ത്യാ ധനധാന്യാദികം ബഹു .. 188..

ശിവാലയേ നദീതീരേ ബില്വമൂലേ വിശേഷതഃ .

പ്രജപേത്സിദ്ധിദാം ദേവാഃ ശുചൗ ദേശേ ശമീതലേ .. 189..

ധനകാമസ്തു ജുഹുയാദ്ഘൃതാക്തൈർബില്വപത്രകൈഃ .

മോക്ഷകാമസ്തു ഗവ്യേന ഘൃതേന പ്രതിനാമതഃ .. 190..

ആയുഷ്കാമസ്തു ജുഹുയാദാജ്യേന മധുനാ തഥാ .

പുത്രകാമസ്തു ജുഹുയാത്തിലാക്തേന തഥാംഭസാ .. 191..

മത്സമീപേ പ്രദോഷേ ച നത്വാ ഭക്ത്യാ ജപേന്നരഃ .

ജീവൻസരൂപതാം പ്രാപ്യ സായുജ്യം മമ ചാപ്നുയാത് .. 192..

കാലോഽപി ജനശാസ്താ ഹി മമ ഭക്തം ന പശ്യതി .

അഹം പുരഃസരസ്തസ്യ നേഷ്യാമി ഗഗനസ്ഥലം .. 193..

ത്രിസന്ധ്യം യഃ പഠേദ്ഭക്ത്യാ വത്സരം നിയമാന്വിതഃ .

മച്ചിത്തോ മന്മനാ ഭൂത്വാ സാക്ഷാന്മോക്ഷമവാപ്നുയാത് .. 194..

രുദ്രപാഠേന യത്പുണ്യം യത്പുണ്യം വേദപാഠതഃ .

തത്പുണ്യം ലഭതേ യോഽസാവേകാവൃത്ത്യാ പഠേദിമാം .. 195..

കന്യാകോടിപ്രദാനേന യത്ഫലം ലഭതേ നരഃ .

തത്ഫലം ലഭതേ സമ്യങ്നാമ്നാം ദശശതം ജപൻ .. 196..

അശ്വമേധസഹസ്രസ്യ യത്ഫലം ലഭതേ നരഃ .

കപിലാശതദാനസ്യ തത്ഫലം പഠനാദ്ഭവേത് .. 197..

യഃ ശൃണോതി സദാ വിദ്യാം ശ്രാവയേദ്വാപി ഭക്തിതഃ .

സോഽപി മുക്തിമവാപ്നോതി യത്ര ഗത്വാ ന ശോചതി .. 198..

യക്ഷരാക്ഷസവേതാലഗ്രഹകൂഷ്മാണ്ഡഭൈരവാഃ .

പഠനാദസ്യ നശ്യന്തി ജീവേച്ച ശരദാം ശതം .. 199..

ബ്രഹ്മഹത്യാദിപാപാനാം നാശഃ സ്യാച്ഛ്രവണേന തു .

കിം പുനഃ പഠനാദസ്യ മുക്തിഃ സ്യാദനപായിനീ .. 200..

ഇത്യുക്ത്വാ സ മഹാദേവോ ഭഗവാൻപരമേശ്വരഃ .

പുനരപ്യാഹ ഭഗവാൻകൃപയാ പരയാ യുതഃ .. 201..

ദീയതാം മമ ഭക്തേഭ്യോ യദുക്തം ഭവഘാതകം .

ഇത്യുക്ത്വാന്തർദധേ ദേവഃ പരാനന്ദസ്വരൂപധൃക് .. 202..

ശ്രീകൃഷ്ണ ഉവാച

ഏതദേവ പുരാ രാമോ ലബ്ധവാൻ കുംഭസംഭവാത് .

അരണ്യേ ദണ്ഡകാഖ്യേ തു പ്രജജാപ രഘൂദ്വഹഃ .. 203..

നിത്യം ത്രിഷവണസ്നായീ ത്രിസന്ധ്യം സുസ്മരഞ്ശിവം .

തദാസൗ ദേവദേവോഽപി പ്രത്യക്ഷഃ പ്രാഹ രാഘവം .. 204..

മഹാപാശുപതം ദിവ്യം പ്രഗൃഹാണ രഘൂദ്വഹ .

ഏതദാസാദ്യ പൗലസ്ത്യം ജഹി മാ ശോകമർഹസി .. 205..

തദാപ്രഭൃതി ഭൂദേവാഃ പ്രജപന്തി സുഭക്തിതഃ .

ഗൃഹ്ണന്തു പരയാ ഭക്ത്യാ ഭവന്തഃ സർവ ഏവ ഹി .. 206..

ശ്രീവ്യാസ ഉവാച .

തതസ്തേ മുനയഃ സർവേ ജഗൃഹുർമുനിപുംഗവാഃ .

ഗൃഹ്ണന്തു മമ വാക്യം തു മുക്തിം പ്രാപ്സ്യഥ നിശ്ചിതാഃ .. 207..

ഭവദ്ഭിരാത്മശിഷ്യേഭ്യോ ദീയതാമിദമാദരാത് .

നാമ്നാം സഹസ്രമേതദ്ധി ലിഖിതം യന്നികേതനേ .. 208..

അവിമുക്തം തു തദ്ഗേഹം നിത്യം തിഷ്ഠതി ശങ്കരഃ .

അനേന മന്ത്രിതം ഭസ്മാഖിലദുഷ്ടവിനാശനം .. 209..

പിശാചസ്യ വിനാശായ ജപ്തവ്യമിദമുത്തമം .

നാമ്നാം സഹസ്രേണാനേന സമം കിഞ്ചിന്ന വിദ്യതേ .. 210..

.. ഇതി ശ്രീപദ്മപുരാണേ ബില്വകേശ്വരമാഹാത്മ്യേ ശ്രീകൃഷ്ണമാർകണ്ഡേയ

സംവാദേ വേദസാരശിവസഹസ്രനാമസ്തോത്രം സമ്പൂർണം .. ..