SRI MAHARANJI SAHASRANAMA STHOTHRAM

 

 ശ്രീമഹാരാജ്ഞീസഹസ്രനാമസ്തോത്രം 

അഥവാ ശ്രീമഹാരാജ്ഞീ രാജരാജേശ്വരീസഹസ്രനാമസ്തോത്രം

പാർവത്യുവാച -
ഭഗവൻ വേദതത്ത്വജ്ഞ മന്ത്രതന്ത്രവിചക്ഷണ .
ശരണ്യ സർവലോകേശ ശരണാഗതവത്സല .. 1..

കഥം ശ്രിയമവാപ്നോതി ലോകേ ദാരിദ്ര്യദുഃഖഭാക് .
മാന്ത്രികോ ഭൈരവേശാന തന്മേ ഗദിതുമർഹസി .. 2..

ശ്രീശിവ ഉവാച - 
യാ ദേവീ നിഷ്കലാ രാജ്ഞീ ഭഗവത്യമലേശ്വരീ .
സാ സൃജത്യവതി വ്യക്തം സംഹരിഷ്യതി താമസീ .. 3..

തസ്യാ നാമസഹസ്രം തേ വക്ഷ്യേ സ്നേഹേന പാർവതി .
അവാച്യം ദുർലഭം ലോകേ ദുഃഖദാരിദ്ര്യനാശനം .. 4..

പരമാർഥപ്രദം നിത്യം പരമൈശ്വര്യകാരണം .
സർവാഗമരഹസ്യാഢ്യം സകലാർഥപ്രദീപകം .. 5..

സമസ്തശോകശമനം മഹാപാതകനാശനം .
സർവമന്ത്രമയം ദിവ്യം രാജ്ഞീനാമസഹസ്രകം .. 6..

ഓം അസ്യ ശ്രീമഹാരാജ്ഞീ രാജരാജേശ്വരീ നാമസഹസ്രസ്യ ബ്രഹ്മാ ഋഷിഃ .
ഗായത്രീ ഛന്ദഃ . സർവഭൂതേശ്വരീ മഹാരാജ്ഞീ ദേവതാ . ഹ്രീം ബീജം . 
സൗഃ ശക്തിഃ . ക്ലീം കീലകം . ശ്രീമഹാരാജ്ഞീസഹസ്രനാമജപേ വിനിയോഗഃ .
ഓം ഹ്രാം ഹ്രീം ഇത്യാദിനാ കര-ഹൃദയാദി ന്യാസഃ .


ബ്രഹ്മഋഷയേ നമഃ ശിരസി . ഗായത്രീച്ഛന്ദസേ നമഃ മുഖേ .
ശ്രീഭൂതേശ്വരീമഹ്രാരാജ്ഞീദേവതായൈ നമഃ ഹൃദി .
ഹ്രീംബീജായ നമഃ നാഭൗ . സൗഃ ശക്തയേ നമഃ ഗുഹ്യേ .
ക്ലീം കീലകായ നമഃ പാദയോഃ . വിനിയോഗായ നമഃ സർവാംഗേഷു .
ഓംഹ്രാമിത്യാദിനാ കരഷഡംഗന്യാസം വിധായ ധ്യാനം കുര്യാത് .

.. ധ്യാനം ..

യാ ദ്വാദശാർകപരിമണ്ഡിതമൂർതിരേകാ
സിംഹാസനസ്ഥിതിമതീ ഹ്യുരഗൈർവൃതാം ച .
ദേവീമനന്യഗതിരീശ്വരതാം പ്രപന്നാം var  ദേവീമനക്ഷഗതിമീശ്വരതാം
താം നൗമി ഭർഗവപുഷീം പരമാർഥരാജ്ഞീം .. 1..

ചതുർഭുജാം ചന്ദ്രകലാർധശേഖരാം സിംഹാസനസ്ഥാം 
ഭുജഗോപവീതിനീം പാശാങ്കുശാംഭോരുഹഖഡ്ഗധാരിണീം
രാജ്ഞീം ഭജേ ചേതസി രാജ്യദായിനീം .. 2..






ഓം ഹ്രീം ശ്രീം രാം മഹാരാജ്ഞീ ക്ലീം സൗഃ പഞ്ചദശാക്ഷരീ .
ഹ്രീം സ്വാഹാ ത്ര്യക്ഷരീ വിദ്യാ പരാ ഭഗവതീ വിഭാ .. 1..

ഓം ഭാസ്വതീ ഭദ്രികാ ഭീമാ ഭർഗരൂപാ മനസ്വിനീ .
മാനനീയാ മനീഷാ ച മനോജാ ച മനോജവാ .. 2..

മാനദാ മന്ത്രവിദ്യാ ച മഹാവിദ്യാ ഷഡക്ഷരീ .
ഷട്കൂടാ ച ത്രികൂടാ ച ത്രയീ വേദത്രയീ ശിവാ .. 3..

ശിവാകാരാ വിരൂപാക്ഷീ ശശിഖണ്ഡാവതംസിനീ .
മഹാലക്ഷ്മീർമഹോരസ്കാ മഹൗജസ്കാ മഹോദയാ .. 4..

മാതംഗീ മോദകാഹാരാ മദിരാരുണലോചനാ .
സാധ്വീ ശീലവതീ ശാലാ സുധാകലശധാരിണീ .. 5..

ഖഡ്ഗിനീ പദ്മിനീ പദ്മാ പദ്മകിഞ്ജൽകരഞ്ജിതാ .
ഹൃത്പദ്മവാസിനീ ഹൃദ്യാ പാനപാത്രധരാ പരാ .. 6..

ധരാധരേന്ദ്രതനയാ ദക്ഷിണാ ദശനാ ദയാ .   
ദയാവതീ മഹാമേധാ മോദിനീ ബോധിനീ സദാ .. 7..

ഗദാധരാർചിതാ ഗോധാ ഗംഗാ ഗോദാവരീ ഗയാ .
മഹാപ്രഭാവസഹിതാ മഹോരഗവിഭൂഷണാ .. 8..

മഹാമുനികൃതാതിഥ്യാ മാധ്വീ മാനവതീ മഘാ .
ബാലാ സരസ്വതീ ലക്ഷ്മീർദുർഗാ ദുർഗതിനാശിനീ .. 9..

ശാരീ ശരീരമധ്യസ്ഥാ വൈഖരീ ഖേചരേശ്വരീ .
ശിവദാ ശിവവക്ഷഃസ്ഥാ കാലികാ ത്രിപുരേശ്വരീ .. 10.. 

പുരാരികുക്ഷിമധ്യസ്ഥാ മുരാരിഹൃദയേശ്വരീ .
ബലാരിരാജ്യദാ ചണ്ഡീ ചാമുണ്ഡാ മുണ്ഡധാരിണീ .. 11..

മുണ്ഡമാലാഞ്ചിതാ മുദ്രാ ക്ഷോഭണാകർഷണക്ഷമാ .
ബ്രാഹ്മീ നാരായണീ ദേവീ കൗമാരീ ചാപരാജിതാ .. 12..

രുദ്രാണീ ച ശചീന്ദ്രാണീ വാരാഹീ വീരസുന്ദരീ .
നാരസിംഹീ ഭൈരവേശീ ഭൈരവാകാരഭീഷണാ .. 13..

നാഗാലങ്കാരശോഭാഢ്യാ നാഗയജ്ഞോപവീതിനീ .
നാഗകങ്കണകേയൂരാ (100) നാഗഹാരാ സുരേശ്വരീ .. 14..

സുരാരിഘാതിനീ പൂതാ പൂതനാ ഡാകിനീ ക്രിയാ .
കൂർമാ ക്രിയാവതീ കൃത്യാ ഡാകിനീ ലാകിനീ ലയാ ..15..

 var ക്രിയാവതീ കുരീ കൃത്യാ, ശാകിനീ ലയാ
ലീലാവതീ രസാകീർണാ നാഗകന്യാ മനോഹരാ .
ഹാരകങ്കണശോഭാഢ്യാ സദാനന്ദാ ശുഭങ്കരീ .. 16..

മഹാസിനീ മധുമതീ സരസീ സ്മരമോഹിനീ .  
മഹോഗ്രവപുഷീ വാർതാ വാമാചാരപ്രിയാ സിരാ .. 17..

സുധാമയീ വേണുകരാ വൈരഘ്നീ വീരസുന്ദരീ .
വാരിമധ്യസ്ഥിതാ വാമാ വാമനേത്രാ ശശിപ്രഭാ .. 18..

ശങ്കരീ ശർമദാ സീതാ രവീന്ദുശിഖിലോചനാ .
മദിരാ വാരുണീ വീണാഗീതിജ്ഞാ മദിരാവതീ .. 19..

വടസ്ഥാ വാരുണീശക്തിഃ വടജാ വടവാസിനീ .
വടുകീ വീരസൂർവന്ദ്യാ സ്തംഭിനീ മോഹിനീ ചമൂഃ .. 20..

മുദ്ഗരാങ്കുശഹസ്താ ച വരാഭയകരാ കുടീ .
പാടീരദ്രുമവല്ലീ ച വടുകാ വടുകേശ്വരീ .. 21..

ഇഷ്ടദാ കൃഷിഭൂഃ കീരീ രേവതീ രമണപ്രിയാ .
രോഹിണീ രേവതീ രമ്യാ രമണാ രോമഹർഷിണീ .. 22..

രസോല്ലാസാ രസാസാരാ സാരിണീ താരിണീ തഡിത് .
തരീ തരിത്രഹസ്താ ച തോതുലാ തരണിപ്രഭാ .. 23..

രത്നാകരപ്രിയാ രംഭാ രത്നാലങ്കാരശോഭിതാ .
രുക്മാംഗദാ ഗദാഹസ്താ ഗദാധരവരപ്രദാ .. 24..

ഷഡ്രസാ ദ്വിരസാ മാലാ മാലാഭരണഭൂഷിതാ .
മാലതീ മല്ലികാമോദാ മോദകാഹാരവല്ലഭാ .. 25..

വല്ലഭീ മധുരാ മായാ കാശീ കാഞ്ചീ ലലന്തികാ .
ഹസന്തികാ ഹസന്തീ ച ഭ്രമന്തീ ച വസന്തികാ .. 26..

ക്ഷേമാ ക്ഷേമങ്കരീ ക്ഷാമാ ക്ഷൗമവസ്ത്രാ (200) ക്ഷണേശ്വരീ .
ക്ഷണദാ ക്ഷേമദാ സീരാ സീരപാണിസമർചിതാ .. 27..

ക്രീതാ ക്രീതാതപാ ക്രൂരാ കമനീയാ കുലേശ്വരീ .
കൂർചബീജാ കുഠാരാഢ്യാ കൂർമിർണീ കൂർമസുന്ദരീ .. 28..

കാരുണ്യാർദ്രാ ച കാശ്മീരീ ദൂതീ ദ്വാരവതീ ധ്രുവാ .  
ധ്രുവസ്തുതാ ധ്രുവഗതിഃ പീഠേശീ ബഗലാമുഖീ .. 29..

സുമുഖീ ശോഭനാ നീതിഃ രത്നജ്വാലാമുഖീ നതിഃ .
അലകോജ്ജയിനീ ഭോഗ്യാ ഭംഗീ ഭോഗാവതീ ബലാ .. 30..

ധർമരാജപുരീ പൂതാ പൂർണസത്ത്വാഽമരാവതീ .   
അയോധ്യാ ബോധനീയാ ച യുഗമാതാ ച യക്ഷിണീ .. 31.. 

യജ്ഞേശ്വരീ യോഗഗമ്യാ യോഗിധ്യേയാ യശസ്വിനീ .
യശോവതീ ച ചാർവംഗീ ചാരുഹാസാ ചലാചലാ .. 32..

ഹരീശ്വരീ ഹരേർമായാ ഭാമിനീ വായുവേഗിനീ .  
അംബാലികാഽമ്ബാ ഭർഗേശീ ഭൃഗുകൂടാ മഹാമതിഃ .. 33..

കോശേശ്വരീ ച കമലാ കീർതിദാ കീർതിവർധിനീ .
കഠോരവാക്കുഹൂമൂർതിഃ ചന്ദ്രബിംബസമാനനാ .. 34..

ചന്ദ്രകുങ്കുമലിപ്താംഗീ കനകാചലവാസിനീ .
മലയാചലസാനുസ്ഥാ ഹിമാദ്രിതനയാതനൂഃ .. 35..

ഹിമാദ്രികുക്ഷിദേശസ്ഥാ കുബ്ജികാ കോസലേശ്വരീ .
കാരൈകനിഗലാ ഗൂഢാ ഗൂഢഗുൽഫാഽതിവേഗിനീ .. 36..  

തനുജാ തനുരൂപാ ച ബാണചാപധരാ നുതിഃ .
ധുരീണാ ധൂമ്രവാരാഹീ ധൂമ്രകേശാഽരുണാനനാ .. 37..

അരുണേശീ ദ്യുതിഃ ഖ്യാതിഃ ഗരിഷ്ഠാ ച ഗരിയസീ .
മഹാനസീ മഹാകാരാ സുരാസുരഭയങ്കരീ .. 38..

അണുരൂപാ ബൃഹജ്ജ്യോതിരനിരുദ്ധാ സരസ്വതീ .
ശ്യാമാ ശ്യാമമുഖീ ശാന്താ ശ്രാന്തസന്താപഹാരിണീ .. 39..

ഗൗർഗണ്യാ ഗോമയീ ഗുഹ്യാ ഗോമതീ ഗരുവാഗ്രസാ .
ഗീതസന്തോഷസംസക്താ (300) ഗൃഹിണീ ഗ്രാഹിണീ ഗുഹാ .. 40..

ഗണപ്രിയാ ഗജഗതിർഗാന്ധാരീ ഗന്ധമോദിനീ . ഗന്ധമോഹിനീ
ഗന്ധമാദനസാനുസ്ഥാ സഹ്യാചലകൃതാലയാ .. 41..

ഗജാനനപ്രിയാ ഗമ്യാ ഗ്രാഹികാ ഗ്രാഹവാഹനാ .
ഗുഹപ്രസൂർഗുഹാവാസാ ഗൃഹമാലാവിഭൂഷണാ .. 42..

കൗബേരീ കുഹകാ ഭ്രന്തിസ്തർകവിദ്യാപ്രിയങ്കരീ .
പീതാംബരാ പടാകാരാ പതാകാ സൃഷ്ടിജാ സുധാ .. 43..

ദാക്ഷായണീ ദക്ഷസുതാ ദക്ഷയജ്ഞവിനാശിനീ .
താരാചക്രസ്ഥിതാ താരാ തുരീ തുര്യാ ത്രുടിസ്തുലാ .. 44..

സന്ധ്യാത്രയീ സന്ധിജരാ സന്ധ്യാ താരുണ്യലാലിതാ .
ലലിതാ ലോഹിതാ ലഭ്യാ ചമ്പാ കമ്പാകുലാ സൃണിഃ .. 49..

സൃതിഃ സത്യവതീ സ്വസ്ഥാഽസമാനാ മാനവർധിനീ .
മഹോമയീ മനസ്തുഷ്ടിഃ കാമധേനുഃ സനാതനീ .. 46..

സൂക്ഷ്മരൂപാ സൂക്ഷ്മമുഖീ സ്ഥൂലരൂപാ കലാവതീ .
തലാതലാശ്രയാ സിന്ധുഃ ത്ര്യംബികാ ലമ്പികാ ജയാ .. 47..

സൗദാമിനീ സുധാദേവീ സനകദിസമർചിതാ .
മന്ദാകിനീ ച യമുനാ വിപാശാ നർമദാനദീ .. 48..

ഗണ്ഡക്യൈരാവതീ സിപ്രാ വിതസ്താ ച സരസ്വതീ .
രേവാ ചേക്ഷുമതീ വേഗവതീ സാഗരവാസിനീ .. 49..

ദേവകീ ദേവമാതാ ച ദേവേശീ ദേവസുന്ദരീ .
ദൈത്യേശീ ദമനീ ദാത്രീ ദിതിർദിതിജസുന്ദരീ .. 50..  

വിദ്യാധരീ ച വിദ്യേശീ വിദ്യാധരജസുന്ദരീ .
മേനകാ ചിത്രലേഖാ ച ചിത്രിണീ ച തിലോത്തമാ .. 51..

ഉർവശീ മോഹിനീ രംഭാ ചാപ്സരോഗണസുന്ദരീ .
യക്ഷിണീ യക്ഷലോകേശീ യക്ഷനായകസുന്ദരീ .. 52..   

യക്ഷേന്ദ്രതനയാ യോഗ്യാ യക്ഷനായകസുന്ദരീ . 
ഗന്ധവത്യർചിതാ ഗന്ധാ സുഗന്ധാ ഗീതതത്പരാ .. 53..

ഗന്ധർവതനയാ നമ്രാ (400) ഗീതിർഗന്ധർവസുന്ദരീ .
മന്ദോദരീ കരാലാക്ഷീ മേഘനാദവരപ്രദാ .. 54..

മേഘവാഹനസന്തുഷ്ടാ മേഘമൂർതിശ്ച രാക്ഷസീ .
രക്ഷോഹർത്രീ കേകസീ ച രക്ഷോനായകസുന്ദരീ .. 55..

കിന്നരീ കംബുകണ്ഠീ ച കലകണ്ഠസ്വനാഽമൃതാ 
കിമ്മുഖീ ഹയവക്ത്രാ ച ഖേലാകിന്നരസുന്ദരീ .. 56..

വിപാശീ രാജമാതംഗീ ഉച്ഛിഷ്ടപദസംസ്ഥിതാ .
മഹാപിശാചിനീ ചാന്ദ്രീ പിശാചകുലസുന്ദരീ .. 57..

ഗുഹ്യേശ്വരീ ഗുഹ്യരൂപാ ഗുർവീ ഗുഹ്യകസുന്ദരീ .
സിദ്ധിപ്രദാ സിദ്ധവധൂഃ സിദ്ധേശീ സിദ്ധസുന്ദരീ .. 58..

ഭൂതേശ്വരീ ഭൂതലയാ ഭൂതധാത്രീ ഭയാപഹാ .
ഭൂതഭീതിഹരീ ഭവ്യാ ഭൂതജാ ഭൂതസുന്ദരീ .. 59..

പൃഥ്വീ പാർഥിവലോകേശീ പ്രഥാ വിഷ്ണുസമർചിതാ .
വസുന്ധരാ വസുനതാ പർഥിവീ ഭൂമിസുന്ദരീ .. 60..

അംഭോധിതനയാഽലുബ്ധാ ജലജാക്ഷീ ജലേശ്വരീ .
അമൂർതിരമ്മയീ മാരീ ജലസ്ഥാ ജലസുന്ദരീ .. 61..

തേജസ്വിനീ മഹോധാത്രീ തൈജസീ സൂര്യബിംബഗാ .
സൂര്യകാന്തിഃ സൂര്യതേജാഃ തേജോരൂപൈകസുന്ദരീ .. 62..

വായുവാഹാ വായുമുഖീ വായുലോകൈകസുന്ദരീ .
ഗഗനസ്ഥാ ഖേചരേശീ ശൂന്യരൂപാ നിരാകൃതിഃ .. 63.. 

നിരാഭാസാ ഭാസമാനാ ധൃതിരാകാശസുന്ദരീ .
ക്ഷിതിമൂർതിധരാഽനന്താ ക്ഷിതിഭൃല്ലോകസുന്ദരീ .. 64..

അബ്ധിയാനാ രത്നശോഭാ വരുണേശീ വരായുധാ .
പാശഹസ്താ പോഷണാ ച വരുണേശ്വരസുന്ദരീ .. 65..

അനലൈകരുചിർജ്യോതിഃ പഞ്ചാനിലമതിസ്ഥിതിഃ .
പ്രാണാപാനസമാനേച്ഛാ ചോദാനവ്യാനരൂപിണീ .. 66..

പഞ്ചവാതഗതിർനാഡീരൂപിണീ വാതസുന്ദരീ .
അഗ്നിരൂപാ വഹ്നിശിഖാ വഡവാനലസന്നിഭാ .. 67..

ഹേതിർഹവിർഹുതജ്യോതിരഗ്നിജാ വഹ്നിസുന്ദരീ .
സോമേശ്വരീ സോമകലാ സോമപാനപരായണാ .. 68..

സൗമ്യാനനാ സൗമ്യരൂപാ സോമസ്ഥാ സോമസുന്ദരീ .
സൂര്യപ്രഭാ സൂര്യമുഖീ സൂര്യജാ സൂര്യസുന്ദരീ .. 69..

യാജ്ഞികീ യജ്ഞഭാഗേച്ഛാ യജമാനവരപ്രദാ .
യാജകീ യജ്ഞവിദ്യാ ച യജമാനൈകസുന്ദരീ .. 70..

ആകാശഗാമിനീ വന്ദ്യാ ശബ്ദജാഽഽകാശസുന്ദരീ .
മീനാസ്യാ മീനനേത്രാ ച മീനാസ്ഥാ മീനസുന്ദരീ .. 71..


കൂർമപൃഷ്ഠഗതാ കൂർമീ കൂർമജാ കൂർമരൂപിണീ .  var  
വാരാഹീ വീരസൂർവന്ദ്യാ വരാരോഹാ മൃഗേക്ഷണാ .. 72..

വരാഹമൂർതിർവാചാലാ വശ്യാ വാരാഹസുന്ദരീ .  
നരസിംഹാകൃതിർദേവീ ദുഷ്ടദൈത്യനിഷൂദിനീ .. 73..

പ്രദ്യുമ്നവരദാ നാരീ നരസിംഹൈകസുന്ദരീ .
വാമജാ വാമനാകാരാ നാരായണപരായണാ .. 74..

ബലിദാനവദർപഘ്നീ വാമ്യാ വാമനസുന്ദരീ .
രാമപ്രിയാ രാമകീലിഃ ക്ഷത്രവംശക്ഷയങ്കരീ .. 75.. 


ഭൃഗുപുത്രീ രാജകന്യാ രാമാ പരശുധാരിണീ .  
ഭാർഗവീ ഭാർഗവേഷ്ടാ ച ജാമദഗ്ന്യവരപ്രദാ .. 76..

കുഠാരധാരിണീ രാത്രിർജാമദഗ്ന്യൈകസുന്ദരീ .
സീതാലക്ഷ്മണസേവ്യാ ച രക്ഷഃകുലവിനാശിനീ .. 77..

രാമപ്രിയാ ച ശത്രുഘ്നീ ശത്രുഘ്നഭരതേഷ്ടദാ .
ലാവണ്യാമൃതധാരാഢ്യാ ലവണാസുരഘാതിനീ .. 78..

ലോഹിതാസ്യാ പ്രസന്നാസ്യാ സ്വാത്മാരാമൈകസുന്ദരീ .  
കൃഷ്ണകേശാ കൃഷ്ണമുഖീ യാദവാന്തകരീ ലയാ .. 79..

യാദോഗണാർചിതാ യോജ്യാ രാധാ ശ്രീകൃഷ്ണസുന്ദരീ .
സിദ്ധപ്രസൂഃ സിദ്ധദേവീ ജിനമാർഗപരായണാ .. 80..  

ജിതക്രോധാ ജിതാലസ്യാ ജിനസേവ്യാ ജിതേന്ദ്രിയാ .
ജിനവംശധരോഗ്രാ ച നീലാന്താ ബുദ്ധസുന്ദരീ .. 81..

കാലീ കോലാഹലപ്രീതാ പ്രേതവാഹാ സുരേശ്വരീ .
കൽകിപ്രിയാ കംബുധരാ കലികാലൈകസുന്ദരീ .. 82..

വിഷ്ണുമായാ ബ്രഹ്മമായാ ശാംഭവീ ശിവവാഹനാ .
ഇന്ദ്രാവരജവക്ഷഃസ്ഥാ സ്ഥാണുപത്നീ പലാലിനീ .. 83..

ജൃംഭിണീ ജൃംഭഹർത്രീ ച ജൃംഭമാണാലകാകുലാ .  var  
കുലാകുലഫലേശാനീ പദദാനഫലപ്രദാ .. 84..

കുലവാഗീശ്വരീ കുല്യാ കുലജാ കുലസുന്ദരീ .
പുരന്ദരേഡ്യാ താരുണ്യാലയാ പുണ്യജനേശ്വരീ .. 85..

പുണ്യോത്സാഹാ പാപഹന്ത്രീ പാകശാസനസുന്ദരീ .
സൂയർകോടിപ്രതീകാശാ സൂര്യതേജോമയീ മതിഃ .. 86..

ലേഖിനീ ഭ്രാജിനീ രജ്ജുരൂപിണീ സൂര്യസുന്ദരീ .
ചന്ദ്രികാ ച സുധാധാരാ ജ്യോത്സ്നാ ശീതാംശുസുന്ദരീ .. 87..

ലോലാക്ഷീ ച ശതാക്ഷീ ച സഹസ്രാക്ഷീ സഹസ്രപാത് .
സഹസ്രശീർഷാ ചേന്ദ്രാണീ സഹസ്രഭുജവല്ലികാ .. 88..

കോടിരത്നാംശുശോഭാ ച ശുഭ്രവസ്ത്രാ ശതാനനാ .
ശതാനന്ദാ ശ്രുതിധരാ പിംഗലാ ചോഗ്രനാദിനീ .. 89..

സുഷുമ്നാ ഹാരകേയൂരനൂപുരാരാവസങ്കുലാ .
ഘോരനാദാഽഘോരമുഖീ ചോന്മുഖീ ചോല്മൂകായുധാ .. 90..

ഗോപിതാ ഗൂർജരീ ഗോധാ ഗായത്രീ വേദവല്ലഭാ .
വല്ലകീസ്വനനാദാ ച നാദവിദ്യാ നദീതടീ .. 91..

ബിന്ദുരൂപാ ചക്രയോനിർബിന്ദുനാദസ്വരൂപിണീ .
ചക്രേശ്വരീ ഭൈരവേശീ മഹാഭൈരവവല്ലഭാ .. 92..

കാലഭൈരവഭാര്യാ ച കല്പാന്തേ രംഗനർതകീ .
പ്രലയാനലധൂമ്രാഭാ യോനിമധ്യകൃതാലയാ .. 93..

ഭൂചരീ ഖേചരീ മുദ്രാ നവമുദ്രാവിലാസിനീ .
വിയോഗിനീ ശ്മശാനസ്ഥാ ശ്മശാനാർചനതോഷിതാ .. 94..

ഭാസ്വരാംഗീ ഭർഗശിഖാ ഭർഗവാമാംഗവാസിനീ .
ഭദ്രകാലീ വിശ്വകാലീ ശ്രീകാലീ മേഘകാലികാ .. 95..

നീരകാലീ കാലരാത്രിഃ കാലീ കാമേശകാലികാ .
ഇന്ദ്രകാലീ പൂർവകാലീ പശ്ചിമാമ്നായകാലികാ .. 96..

ശ്മശാനകാലികാ ഭദ്രകാലീ ശ്രീകൃഷ്ണകാലികാ .   
ക്രീങ്കാരോത്തരകാലീ ശ്രീം ഹും ഹ്രീം ദക്ഷിണകാലികാ .. 97..

സുന്ദരീ ത്രിപുരേശാനീ ത്രികൂടാ ത്രിപുരാർചിതാ .
ത്രിനേത്രാ ത്രിപുരാധ്യക്ഷാ ത്രികൂടാ കൂടഭൈരവീ .. 98..  

ത്രിലോകജനനീ നേത്രീ മഹാത്രിപൂരസുന്ദരീ .
കാമേശ്വരീ കാമകലാ കാലകാമേശസുന്ദരീ .. 99..

ത്ര്യക്ഷര്യേകാക്ഷരീദേവീ ഭാവനാ ഭുവനേശ്വരീ .
ഏകാക്ഷരീ ചതുഷ്കൂടാ ത്രികൂടേശീ ലയേശ്വരീ .. 100..

ചതുർവർണാ ച വർണേശീ വർണാഢ്യാ ചതുരക്ഷരീ .
പഞ്ചാക്ഷരീ ച ഷഡ്വക്ത്രാ ഷട്കൂടാ ച ഷഡക്ഷരീ .. 101..

സപ്താക്ഷരീ നവാർണേശീ പരമാഷ്ടാക്ഷരേശ്വരീ .
നവമീ പഞ്ചമീ ഷഷ്ടിഃ നാഗേശീ ച നവാക്ഷരീ.. 102..  

ദശാക്ഷരീ ദശാസ്യേശീ ദേവികൈകാദശാക്ഷരീ .
ദ്വാദശാദിത്യസങ്കാശാ (700) ദ്വാദശീ ദ്വാദശാക്ഷരീ .. 103..

ത്രയോദശീ വേദഗർഭാ വാദ്യാ (ബ്രാഹ്മീ) ത്രയോദശാക്ഷരീ .
ചതുർദശാക്ഷരീ വിദ്യാ വിദ്യാപഞ്ചദശാക്ഷരീ .. 104..

ഷോഡശീ സർവവിദ്യേശീ മഹാശ്രീഷോഡശാക്ഷരീ .
മഹാശ്രീഷോഡശീരൂപാ ചിന്താമണിമനുപ്രിയാ .. 105..

ദ്വാവിംശത്യക്ഷരീ ശ്യാമാ മഹാകാലകുടുംബിനീ .
വജ്രതാരാ കാലതാരാ നാരീ താരോഗ്രതാരിണീ .. 106..

കാമതാരാ സ്പർശതാരാ ശബ്ദതാരാ രസാശ്രയാ .
രൂപതാരാ ഗന്ധതാരാ മഹാനീലസരസ്വതീ .. 107 ..

കാലജ്വാലാ വഹ്നിജ്വാലാ ബ്രഹ്മജ്വാലാ ജടാകുലാ .
വിഷ്ണുജ്വാലാ ജിഷ്ണുശിഖാ ഭദ്രജ്വാലാ കരാലിനീ .. 108.. 

വികരാലമുഖീ ദേവീ കരാലീ ഭൂതിഭൂഷണാ .
ചിതാശയാസനാ ചിന്ത്യാ ചിതാമണ്ഡലമധ്യഗാ .. 109..

ഭൂതഭൈരവസേവ്യാ ച ഭൂതഭൈരവപാലിനീ .
ബന്ധകീ ബദ്ധസന്മുദ്രാ ഭവബന്ധവിനാശിനീ .. 110..

ഭവാനീ ദേവദേവേശീ ദീക്ഷാ ദീക്ഷിതപൂജിതാ .
സാധകേശീ സിദ്ധിദാത്രീ സാധകാനന്ദവർധിനീ .. 111..

സാധകാശ്രയഭൂതാ ച സാധകേഷ്ടഫലപ്രദാ .
രജോവതീ രാജസീ ച രജകീ ച രജസ്വലാ .. 112..

പുഷ്പപ്രിയാ പുഷ്പപൂർണാ സ്വയംഭൂപുഷ്പമാലികാ . 
സ്വയംഭൂപുഷ്പഗന്ധാഢ്യാ പുലസ്ത്യസുതനാശിനീ .. 113..  

പാത്രഹസ്താ പരാ പൗത്രീ പീതാസ്യാ പീതഭൂഷണാ .
പിംഗാനനാ പിംഗകേശീ പിംഗലാ പിംഗലേശ്വരീ .. 114..

മംഗലാ മംഗലേശാനീ സർവമംഗലമംഗലാ .
പുരൂരവേശ്വരീ പാശധരാ ചാപധരാഽധുരാ .. 115..

പുണ്യധാത്രീ പുണ്യമയീ പുണ്യലോകനിവാസിനീ .
ഹോതൃസേവ്യാ ഹകാരസ്ഥാ സകാരസ്ഥാ സുഖാവതീ .. 116..

സഖീ ശോഭാവതീ സത്യാ സത്യാചാരപരായണാ .
സാധ്വീശാനകലേശാനീ വാമദേവകലാശ്രിതാ .. 117..

സദ്യോജാതകലേശാനീ ശിവാഽഘോരകലാകൃതിഃ .  
ശർവരീ വീരസദൃശീ ക്ഷീരനീരവിവേചിനീ (800) .. 118..

വിതർകനിലയാ നിത്യാ നിത്യക്ലിന്നാ പരാംബികാ .
പുരാരിദയിതാ ദീർഘാ ദീർഘനാസാഽല്പഭാഷിണീ .. 119..

കാശികാ കൗശികീ കോശ്യാ കോശദാ രൂപവർധിനീ .
തുഷ്ടിഃ പുഷ്ടിഃ പ്രജാപ്രീതാ പ്രാജികാ പൂജകപ്രിയാ .. 120..  

പ്രജാവതീ ഗർഭവതീ ഗർഭപോഷണകാരിണീ .  
ശുക്രവാസാഃ ശുക്ലരൂപാ ശുചിവാസാ ജയാവഹാ .. 121..

ജാനകീ ജന്യജനകാ ജനതോഷണതത്പരാ .
വാദപ്രിയാ വാദ്യരതാ വാദിനീ വാദസുന്ദരീ .. 122..    

വാക്സ്തംഭിനീ കീരവാണീ ധീരാധീരാ ധുരന്ധരാ .    
സ്തനന്ധയീ സാമിധേനീ നിരാനന്ദാ നിരഞ്ജനാ .. 123..  

സമസ്തസുഖദാ സാരാ വാരാന്നിധിവരപ്രദാ .
വാലുകാ വീരപാനേഷ്ടാ വസുധാത്രീ വസുപ്രിയാ .. 124 .

ശുകാനാന്ദാ ശുക്രരസാ ശുക്രപൂജ്യാ ശുകപ്രിയാ .
ശുചിശ്ച ശുകഹസ്താ ച സമസ്തനരകാന്തകാ .. 125..  

സമസ്തതത്ത്വനിലയാ ഭഗരൂപാ ഭഗേശ്വരീ .
ഭഗബിംബാ ഭഗാഹൃദ്യാ ഭഗലിംഗസ്വരൂപിണീ .. 126..

ഭഗലിംഗേശ്വരീ ശ്രീദാ ഭഗലിംഗാമൃതസ്രവാ .
ക്ഷീരാശനാ ക്ഷീരരുചിഃ ആജ്യപാനപരായണാ .. 127..

മധുപാനപരാ പ്രൗഢാ പീവരാംസാ പരാവരാ .
പിലമ്പിലാ പടോലേശാ പാടലാരുണലോചനാ .. 128..

ക്ഷീരാംബുധിപ്രിയാ ക്ഷിപ്രാ സരലാ സരലായുധാ .
സംഗ്രാമാ സുനയാ സ്രസ്താ സംസൃതിഃ സനകേശ്വരീ .. 129..

കന്യാ കനകരേഖാ ച കാന്യകുബ്ജനിവാസിനീ .
കാഞ്ചനോഭതനുഃ കാഷ്ഠാ കുഷ്ഠരോഗനിവാരിണീ .. 130..

കഠോരമൂർധജാ കുന്തീ കൃന്തായുധധരാ ധൃതിഃ .
ചർമാംബരാ ക്രൂരനഖാ ചകോരാക്ഷീ ചതുർഭുജാ .. 131..

ചതുർവേദപ്രിയാ ചാദ്യാ ചതുർവർഗഫലപ്രദാ .
ബ്രഹ്മാണ്ഡചാരിണീ സ്ഫുർതിഃ ബ്രഹ്മാണീ ബ്രഹ്മസമ്മതാ .. 132..

സത്കാരകാരിണീ സൂതിഃ സൂതികാ ലതികാലയാ (900)
കല്പവല്ലീ കൃശാംഗീ ച കല്പപാദപവാസിനീ .. 133..

കല്പപാശാ മഹാവിദ്യാ വിദ്യാരാജ്ഞീ സുഖാശ്രയാ .
ഭൂതിരാജ്ഞീ വിശ്വരാജ്ഞീ ലോകരാജ്ഞീ ശിവാശ്രയാ .. 134..

ബ്രഹ്മരാജ്ഞീ വിഷ്ണുരാജ്ഞീ രുദ്രരാജ്ഞീ ജടാശ്രയാ .
നാഗരാജ്ഞീ വംശരാജ്ഞീ വീരരാജ്ഞീ രജഃപ്രിയാ .. 135..

സത്ത്വരാജ്ഞീ തമോരാജ്ഞീ ഗണരാജ്ഞീ ചലാചലാ .
വസുരാജ്ഞീ സത്യരാജ്ഞീ തപോരാജ്ഞീ ജപപ്രിയാ .. 136..

മന്ത്രരാജ്ഞീ വേദരാജ്ഞീ തന്ത്രരാജ്ഞീ ശ്രുതിപ്രിയാ .
വേദരാജ്ഞീ മന്ത്രിരാജ്ഞീ ദൈത്യരാജ്ഞീ ദയാകരാ .. 137..

കാലരാജ്ഞീ പ്രജാരാജ്ഞീ തേജോരാജ്ഞീ ഹരാശ്രയാ .
പൃഥ്വീരാജ്ഞീ പയോരാജ്ഞീ വായുരാജ്ഞീ മദാലസാ .. 138..

സുധാരാജ്ഞീ സുരാരാജ്ഞീ ഭീമരാജ്ഞീ ഭയോജ്ഝിതാ .
തഥ്യരാജ്ഞീ ജയാരാജ്ഞീ മഹാരാജ്ഞീ മഹാമത്തിഃ .. 139..  

വാമരാജ്ഞീ ചീനരാജ്ഞീ ഹരിരാജ്ഞീ ഹരീശ്വരീ .
പരാരാജ്ഞീ യക്ഷരാജ്ഞീ ഭൂതരാജ്ഞീ ശിവാശ്രയാ .. 140..  

വടുരാജ്ഞീ പ്രേതരാജ്ഞീ ശേഷരാജ്ഞീ ശമപ്രദാ .  var  
ആകാശരാജ്ഞീ രാജേശീ രാജരാജ്ഞീ രതിപ്രിയാ .. 141..

പാതാലരാജ്ഞീ ഭൂരാജ്ഞീ പ്രേതരാജ്ഞീ വിഷാപഹാ .
സിദ്ധരാജ്ഞീ വിഭാരാജ്ഞീ തേജോരാജ്ഞീ വിഭാമയീ .. 142..

ഭാസ്വദ്രാജ്ഞീ ചന്ദ്രരാജ്ഞീ താരാരാജ്ഞീ സുവാസിനീ .
ഗൃഹരാജ്ഞീ വൃക്ഷരാജ്ഞീ ലതാരാജ്ഞീ മതിപ്രദാ .. 143..

വീരരാജ്ഞീ മനോരാജ്ഞീ മനുരാജ്ഞീ ച കാശ്യപീ .    
മുനിരാജ്ഞീ രത്നരാജ്ഞീ മൃഗരാജ്ഞീ മണിപ്രഭാ .. 144..   

സിന്ധുരാജ്ഞീ നദീരാജ്ഞീ നദരാജ്ഞീ ദരീസ്ഥിതാ .
നാദരാജ്ഞീ ബിന്ദുരാജ്ഞീ ആത്മരാജ്ഞീ ച സദ്ഗതിഃ .. 145..

പുത്രരാജ്ഞീ ധ്യാനരാജ്ഞീ ലയരാജ്ഞീ സദേശ്വരീ .
ഈശാനരാജ്ഞീ രാജേശീ സ്വാഹാരാജ്ഞീ മഹത്തരാ .. 146..

വഹ്നിരാജ്ഞീ യോഗിരാജ്ഞീ യജ്ഞരാജ്ഞീ ചിദാകൃതിഃ .
ജഗദ്രാജ്ഞീ തത്ത്വരാജ്ഞീ വാഗ്രാജ്ഞീ വിശ്വരൂപിണീ .. 147..

പഞ്ചദശാക്ഷരീരാജ്ഞീ ഓം ഹ്രീം ഭൂതേശ്വരേശ്വരീ . 
ഇതീദം മന്ത്രസർവസ്വം രാജ്ഞീനാമസഹസ്രകം .. 148..







പഞ്ചദശാക്ഷരീതത്ത്വം മന്ത്രസാരം മനുപ്രിയം .
സർവതത്ത്വമയം പുണ്യം മഹാപാതകനാശനം .. 149..

സർവസിദ്ധിപ്രദം ലോകേ സർവരോഗനിബർഹണം .
സർവോത്പാതപ്രശമനം ഗ്രഹശാന്തികരം ശുഭം .. 150..

സർവദേവപ്രിയം പ്രാജ്യം സർവശത്രുഭയാപഹം .
സർവദുഃഖൗഘശമനം സർവശോകവിനാശനം .. 151..

പഠേദ്വാ പാഠയേത് നാമ്നാം സഹസ്രം ശക്തിസന്നിധൗ .
ദൂരാദേവ പലായന്തേ വിപദഃ ശത്രുഭീതയഃ .. 152..

രാക്ഷസാ ഭൂതവേതാലാഃ പന്നഗാ ഹരിണദ്വിഷഃ .
പഠനാദ്വിദ്രവന്ത്യാശു മഹാകാലാദിവ പ്രജാഃ .. 153..

ശ്രവണാത്പാതാകം നശ്യേച്ഛ്രാവയേദ്യഃ സ ഭാഗ്യവാൻ .
നാനാവിധാനി ഭോഗാനി സംഭൂയ പൃഥിവീതലേ.. 154..

ഗമിഷ്യതി പരാം ഭൂമിം ത്വരിതം നാത്ര സംശയഃ .


അശ്വമേധസഹസ്രസ്യ വാജിപേയസ്യ കോടയഃ .
ഗംഗാസ്നാനസഹസ്രസ്യ ചാന്ദ്രായണായുതസ്യ ച .. 155..

തപ്തകൃച്ഛേകലക്ഷസ്യ രാജസൂയസ്യ കോടയഃ .
സഹസ്രനാമപാഠസ്യ കലാം നാർഹന്തി ഷോഡശീം .. 156..

സർവസിദ്ധീശ്വരം സാധ്യം രാജ്ഞീനാമസഹസ്രകം .
മന്ത്രഗർഭം പഠേദ്യസ്തു രാജ്യകാമോ മഹേശ്വരി .. 157..

വർഷമേകം ശതാവർതം മഹാചീനക്രമാകുലഃ .
ശക്രിപൂജാപരോ രാത്രൗ സ ലഭേദ്രാജ്യമീശ്വരി .. 158..

പുത്രകാമീ പഠേത്സായം ചിതാഭസ്മാനുലേപനഃ .
ദിഗംബരോ മുക്തകേശഃ ശതാവർതം മഹേശ്വരി .. 159..

ശ്മശാനേ തു ലഭേത്പുത്രം സാക്ഷാദ്വൈശ്രവണോപമം .
പരദാരാർചനരതോ ഭഗബിംബം സ്മരൻ സുധീഃ .. 160..

പഠേന്നാമസഹസ്രം തു വസുകാമീ ലഭേദ്ധനം .
രവൗ വാരത്രയം ദേവി പഠേന്നാമസഹസ്രകം .. 161..

മൃദുവിഷ്ടരനിർവിഷ്ടഃ ക്ഷീരപാനപരായണഃ .
സ്വപ്നേ സിംഹാസനാം രാജ്ഞീം വരദാം ഭുവി പശ്യതി .. 162..

ക്ഷീരചർവണസന്തൃപ്തോ വീരപാനരസാകുലഃ .
യഃ പഠേത്പരയാ ഭക്ത്യാ രാജ്ഞീനാമസഹസ്രകം .. 163..

സ സദ്യോ മുച്യതേ ഘോരാന്മഹാപാതകജാദ്ഭയാത് .
യഃ പഠേത്സാധകോ ഭക്ത്യാ ശക്തിവക്ഷഃകൃതാസനഃ .. 164..

ശുക്രോത്തരണകാലേ തു തസ്യ ഹസ്തേഽഷ്ടസിദ്ധയഃ .
യഃ പഠേന്നിശി ചക്രാഗ്രേ പരസ്ത്രീധ്യാനതത്പരഃ .. 165..

സുരാസവരസാനന്ദീ സ ലഭേത്സംയുഗേ ജയം .
ഇദം നാമസഹസ്രം തു സർവമന്ത്രമയം ശിവേ .. 166..

ഭൂർജത്വചി ലിഖേദ്രാത്രൗ ചക്രാർചനസമാഗമേ .
അഷ്ടഗന്ധേന പൂതേന വേഷ്ടയേത് സ്വർണപത്രകേ .. 167..

ധാരയേത് കണ്ഠദേശേ തു സർവസിദ്ധിഃ പ്രജായതേ .
യോ ധാരയേന്മഹാരക്ഷാം സർവദേവാതിദുർലഭാം .. 168..

രണേ രാജകുലേ ദ്യൂതേ ചൗരരോഗാദ്യുപദ്രവേ .
സ പ്രാപ്നോതി ജയം സദ്യഃ സാധകോ വീരനായകഃ .. 169..

ശ്രീചക്രം പൂജയേദ്യസ്തു ധാരയേദ്വർമ മസ്തകേ .
പഠേന്നാമസഹസ്രം തു സ്തോത്രം മന്ത്രാത്മകം തഥാ .. 170..

കിം കിം ന ലഭതേ കാമം ദേവാനാമപി ദുർലഭം .
സുരാപാനം തതഃ സംവിച്ചർവണം മീനമാംസകം .. 171..

നവകന്യാസമായോഗോ മുദ്രാ വീണാരവഃ പ്രിയേ .
സത്സംഗോ ഗുരുസാന്നിധ്യം രാജ്ഞീശ്രീചക്രമഗ്രതഃ .. 172..

യസ്യ ദേവി സ ഏവ സ്യാദ്യോഗീ ബ്രഹ്മവിദീശ്വരഃ .
ഇദം രഹസ്യം പരമം ഭക്ത്യാ തവ മയോദിതം .. 172..

അപ്രകാശ്യമദാതവ്യം ന ദേയം യസ്യ കസ്യചിത് .
അന്യശിഷ്യായ ദുഷ്ടായ ദുർജനായ ദുരാത്മനേ .. 174..

ഗുരുഭക്തിവിഹീനായ സുരാസ്ത്രീനിന്ദകായ ച .
നാസ്തികായ കുശീലായ ന ദേയം തത്ത്വദർശിഭിഃ .. 175..


ദേയം ശിഷ്യായ ശാന്തായ ഭക്തായാദ്വൈതവാദിനേ .
ദീക്ഷിതായ കുലീനായ രാജ്ഞീഭക്തിരതായ ച .. 176..

ദത്ത്വാ ഭോഗാപവർഗേ ച ലഭേത്സാധകസത്തമഃ .
ഇതി നാമസഹസ്രം തു രാജ്ഞ്യാഃ ശിവമുഖോദിതം .
അത്യന്തദുർലഭം ഗോപ്യം ഗോപനീയം സ്വയോനിവത് .. 177..


അഷ്ടാവിംശതിനൈജമാന്യമുനിഭിഃ ഭാവ്യാം മഹായോഗിഭിഃ
     ശ്രീവാണീകരവീജിതാം സുമകുടാം ശ്രീചക്രബിന്ദുസ്ഥിതാം .
പഞ്ചബ്രഹ്മസുതത്വമഞ്ചനിലയാം സാമ്രാജ്യസിദ്ധിപ്രദാം
     ശ്രീസിംഹാസനസുന്ദരീം ഭഗവതീം രാജേശ്വരീമാശ്രയേ .. 1..

ശ്വേതഛത്രസുവാലവീജനനുതാ മാലാകിരീടോജ്ജ്വലാ
     സന്മന്ദസ്മിതസുന്ദരീ ശശിധരാ താംബൂലപൂർണാനനാ .
ശ്രീസിംഹാസനസംസ്ഥിതാ സുമശരാ ശ്രീവീരവര്യാസനാ
     സാമ്രാജ്ഞീ മനുഷോഡശീ ഭഗവതീ മാം പാതു രാജേശ്വരീ .. 2..

.. ഇതി ശ്രീരുദ്രയാമലേ തന്ത്രേ ദശവിദ്യാരഹസ്യേ
ശ്രീമഹാരാജ്ഞീസഹസ്രനാമസ്തോത്രം സമാപ്തം ..