DEVI MAHATHMYAM

 

 ദേവീ മാഹാത്മ്യം (ദുർഗാസപ്തശതീ) 
        .. ദേവീ മാഹാത്മ്യം ..

        .. ശ്രീ ..

     .. ശ്രീചണ്ഡികാധ്യാനം ..

ഓം ബന്ധൂകകുസുമാഭാസാം പഞ്ചമുണ്ഡാധിവാസിനീം .
സ്ഫുരച്ചന്ദ്രകലാരത്നമുകുടാം മുണ്ഡമാലിനീം ..

ത്രിനേത്രാം രക്തവസനാം പീനോന്നതഘടസ്തനീം .
പുസ്തകം ചാക്ഷമാലാം ച വരം ചാഭയകം ക്രമാത് ..

ദധതീം സംസ്മരേന്നിത്യമുത്തരാമ്നായമാനിതാം .

അഥവാ

യാ ചണ്ഡീ മധുകൈടഭാദിദൈത്യദലനീ യാ മാഹിഷോന്മൂലിനീ
        യാ ധൂമ്രേക്ഷണചണ്ഡമുണ്ഡമഥനീ യാ രക്തബീജാശനീ .
ശക്തിഃ ശുംഭനിശുംഭദൈത്യദലനീ യാ സിദ്ധിദാത്രീ പരാ
        സാ ദേവീ നവകോടിമൂർതിസഹിതാ മാം പാതു വിശ്വേശ്വരീ ..

.. അഥ അർഗലാസ്തോത്രം ..
ഓം അസ്യ ശ്രീഅർഗലാസ്തോത്രമന്ത്രസ്യ വിഷ്ണുരൃഷിഃ,
അനുഷ്ടുപ് ഛന്ദഃ, ശ്രീമഹാലക്ഷ്മീർദേവതാ,
ശ്രീജഗദംബാപ്രീതയേ സപ്തശതിപാഠാംഗത്വേന ജപേ വിനിയോഗഃ .

ഓം നമശ്ചണ്ഡികായൈ .

മാർകണ്ഡേയ ഉവാച .

ഓം ജയ ത്വം ദേവി ചാമുണ്ഡേ ജയ ഭൂതാപഹാരിണി .
ജയ സർവഗതേ ദേവി കാലരാത്രി നമോഽസ്തു തേ .. 1..

ജയന്തീ മംഗലാ കാലീ ഭദ്രകാലീ കപാലിനീ .
ദുർഗാ ശിവാ ക്ഷമാ ധാത്രീ സ്വാഹാ സ്വധാ നമോഽസ്തു തേ .. 2..

മധുകൈടഭവിധ്വംസി വിധാതൃവരദേ നമഃ .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 3..

മഹിഷാസുരനിർനാശി ഭക്താനാം സുഖദേ നമഃ .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 4..

ധൂമ്രനേത്രവധേ ദേവി ധർമകാമാർഥദായിനി .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 5..

രക്തബീജവധേ ദേവി ചണ്ഡമുണ്ഡവിനാശിനി .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 6..

നിശുംഭശുംഭനിർനാശി ത്രൈലോക്യശുഭദേ നമഃ .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 7..

വന്ദിതാംഘ്രിയുഗേ ദേവി സർവസൗഭാഗ്യദായിനി .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 8..

അചിന്ത്യരൂപചരിതേ സർവശത്രുവിനാശിനി .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 9..

നതേഭ്യഃ സർവദാ ഭക്ത്യാ ചാപർണേ ദുരിതാപഹേ .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 10..

സ്തുവദ്ഭ്യോ ഭക്തിപൂർവം ത്വാം ചണ്ഡികേ വ്യാധിനാശിനി .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 11..

ചണ്ഡികേ സതതം യുദ്ധേ ജയന്തി പാപനാശിനി .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 12..

ദേഹി സൗഭാഗ്യമാരോഗ്യം ദേഹി ദേവി പരം സുഖം .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 13..

വിധേഹി ദേവി കല്യാണം വിധേഹി വിപുലാം ശ്രിയം .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 14..

വിധേഹി ദ്വിഷതാം നാശം വിധേഹി ബലമുച്ചകൈഃ .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 15..

സുരാസുരശിരോരത്നനിഘൃഷ്ടചരണേഽമ്ബികേ .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 16..

വിദ്യാവന്തം യശസ്വന്തം ലക്ഷ്മീവന്തഞ്ച മാം കുരു .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 17..

ദേവി പ്രചണ്ഡദോർദണ്ഡദൈത്യദർപനിഷൂദിനി .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 18..

പ്രചണ്ഡദൈത്യദർപഘ്നേ ചണ്ഡികേ പ്രണതായ മേ .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 19..

ചതുർഭുജേ ചതുർവക്ത്രസംസ്തുതേ പരമേശ്വരി .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 20..

കൃഷ്ണേന സംസ്തുതേ ദേവി ശശ്വദ്ഭക്ത്യാ സദാംബികേ .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 21..

ഹിമാചലസുതാനാഥസംസ്തുതേ പരമേശ്വരി .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 22..

ഇന്ദ്രാണീപതിസദ്ഭാവപൂജിതേ പരമേശ്വരി .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 23..

ദേവി ഭക്തജനോദ്ദാമദത്താനന്ദോദയേഽമ്ബികേ .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 24..

ഭാര്യാം മനോരമാം ദേഹി മനോവൃത്താനുസാരിണീം .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 25..

താരിണി ദുർഗസംസാരസാഗരസ്യാചലോദ്ഭവേ .
രൂപം ദേഹി ജയം ദേഹി യശോ ദേഹി ദ്വിഷോ ജഹി .. 26..

ഇദം സ്തോത്രം പഠിത്വാ തു മഹാസ്തോത്രം പഠേന്നരഃ .
സപ്തശതീം സമാരാധ്യ വരമാപ്നോതി ദുർലഭം .. 27..

.. ഇതി ശ്രീമാർകണ്ഡേയപുരാണേ അർഗലാസ്തോത്രം സമാപ്തം ..

.. അഥ കീലകസ്തോത്രം ..
ഓം അസ്യ ശ്രീകീലകമന്ത്രസ്യ ശിവഋഷിഃ, അനുഷ്ടുപ് ഛന്ദഃ,
ശ്രീമഹാസരസ്വതീ ദേവതാ, ശ്രീജഗദംബാപ്രീത്യർഥം
സപ്തശതീപാഠാംഗത്വേന ജപേ വിനിയോഗഃ .
ഓം നമശ്ചണ്ഡികായൈ .
മാർകണ്ഡേയ ഉവാച .
ഓം വിശുദ്ധജ്ഞാനദേഹായ ത്രിവേദീദിവ്യചക്ഷുഷേ .
ശ്രേയഃപ്രാപ്തിനിമിത്തായ നമഃ സോമാർധധാരിണേ .. 1..

സർവമേതദ്വിജാനീയാന്മന്ത്രാണാമപി കീലകം .
സോഽപി ക്ഷേമമവാപ്നോതി സതതം ജപ്യതത്പരഃ .. 2..

സിദ്ധ്യന്ത്യുച്ചാടനാദീനി കർമാണി സകലാന്യപി .
ഏതേന സ്തുവതാം ദേവീം സ്തോത്രവൃന്ദേന ഭക്തിതഃ .. 3..

ന മന്ത്രോ നൗഷധം തസ്യ ന കിഞ്ചിദപി വിദ്യതേ .
വിനാ ജപ്യേന സിദ്ധ്യേത്തു സർവമുച്ചാടനാദികം .. 4..

സമഗ്രാണ്യപി സേത്സ്യന്തി ലോകശങ്കാമിമാം ഹരഃ .
കൃത്വാ നിമന്ത്രയാമാസ സർവമേവമിദം ശുഭം .. 5..

സ്തോത്രം വൈ ചണ്ഡികായാസ്തു തച്ച ഗുഹ്യം ചകാര സഃ .
സമാപ്നോതി സ പുണ്യേന താം യഥാവന്നിമന്ത്രണാം .. 6..

സോഽപി ക്ഷേമമവാപ്നോതി സർവമേവ ന സംശയഃ .
കൃഷ്ണായാം വാ ചതുർദശ്യാമഷ്ടമ്യാം വാ സമാഹിതഃ .. 7..

ദദാതി പ്രതിഗൃഹ്ണാതി നാന്യഥൈഷാ പ്രസീദതി .
ഇത്ഥം രൂപേണ കീലേന മഹാദേവേന കീലിതം .. 8..

യോ നിഷ്കീലാം വിധായൈനാം ചണ്ഡീം ജപതി നിത്യശഃ .
സ സിദ്ധഃ സ ഗണഃ സോഽഥ ഗന്ധർവോ ജായതേ ധ്രുവം .. 9..

ന ചൈവാപാടവം തസ്യ ഭയം ക്വാപി ന ജായതേ .
നാപമൃത്യുവശം യാതി മൃതേ ച മോക്ഷമാപ്നുയാത് .. 10..

ജ്ഞാത്വാ പ്രാരഭ്യ കുർവീത ഹ്യകുർവാണോ വിനശ്യതി .
തതോ ജ്ഞാത്വൈവ സമ്പൂർണമിദം പ്രാരഭ്യതേ ബുധൈഃ .. 11..

സൗഭാഗ്യാദി ച യത്കിഞ്ചിദ് ദൃശ്യതേ ലലനാജനേ .
തത്സർവം തത്പ്രസാദേന തേന ജപ്യമിദം ശുഭം .. 12..

ശനൈസ്തു ജപ്യമാനേഽസ്മിൻ സ്തോത്രേ സമ്പത്തിരുച്ചകൈഃ .
ഭവത്യേവ സമഗ്രാപി തതഃ പ്രാരഭ്യമേവ തത് .. 13..

ഐശ്വര്യം തത്പ്രസാദേന സൗഭാഗ്യാരോഗ്യമേവ ച .
ശത്രുഹാനിഃ പരോ മോക്ഷഃ സ്തൂയതേ സാ ന കിം ജനൈഃ .. 14..

ചണ്ഡികാം ഹൃദയേനാപി യഃ സ്മരേത് സതതം നരഃ .
ഹൃദ്യം കാമമവാപ്നോതി ഹൃദി ദേവീ സദാ വസേത് .. 15..

അഗ്രതോഽമും മഹാദേവകൃതം കീലകവാരണം .
നിഷ്കീലഞ്ച തഥാ കൃത്വാ പഠിതവ്യം സമാഹിതൈഃ .. 16..

        .. ഇതി ശ്രീഭഗവത്യാഃ കീലകസ്തോത്രം സമാപ്തം ..

.. അഥ ദേവീ കവചം ..
അസ്യ ശ്രീചണ്ഡീകവചസ്യ ബ്രഹ്മാ ഋഷിഃ , അനുഷ്ടുപ് ഛന്ദഃ ,
ചാമുണ്ഡാ ദേവതാ , അംഗന്യാസോക്തമാതരോ ബീജം ,
ദിഗ്ബന്ധദേവതാസ്തത്വം , ശ്രീജഗദംബാപ്രീത്യർഥേ ജപേ വിനിയോഗഃ .
ഓം നമശ്ചണ്ഡികായൈ .
മാർകണ്ഡേയ ഉവാച .
ഓം യദ്ഗുഹ്യം പരമം ലോകേ സർവരക്ഷാകരം നൃണാം .
യന്ന കസ്യചിദാഖ്യാതം തന്മേ ബ്രൂഹി പിതാമഹ .. 1..

ബ്രഹ്മോവാച .
അസ്തി ഗുഹ്യതമം വിപ്ര സർവഭൂതോപകാരകം .
ദേവ്യാസ്തു കവചം പുണ്യം തച്ഛൃണുഷ്വ മഹാമുനേ .. 2..

പ്രഥമം ശൈലപുത്രീതി ദ്വിതീയം ബ്രഹ്മചാരിണീ .
തൃതീയം ചന്ദ്രഘണ്ടേതി കൂഷ്മാണ്ഡേതി ചതുർഥകം .. 3..

പഞ്ചമം സ്കന്ദമാതേതി ഷഷ്ഠം കാത്യായനീ തഥാ .
സപ്തമം കാലരാത്രിശ്ച മഹാഗൗരീതി ചാഷ്ടമം .. 4..

നവമം സിദ്ധിദാത്രീ ച നവദുർഗാഃ പ്രകീർതിതാഃ .
ഉക്താന്യേതാനി നാമാനി ബ്രഹ്മണൈവ മഹാത്മനാ .. 5..

അഗ്നിനാ ദഹ്യമാനാസ്തു ശത്രുമധ്യഗതാ രണേ .
വിഷമേ ദുർഗമേ ചൈവ ഭയാർതാഃ ശരണം ഗതാഃ .. 6.
ന തേഷാം ജായതേ കിഞ്ചിദശുഭം രണസങ്കടേ .
ആപദം ന ച പശ്യന്തി ശോകദുഃഖഭയങ്കരീം .. 7..

യൈസ്തു ഭക്ത്യാ സ്മൃതാ നിത്യം തേഷാം വൃദ്ധിഃ പ്രജായതേ .
യേ ത്വാം സ്മരന്തി ദേവേശി രക്ഷസി താന്ന സംശയഃ .. 8..

പ്രേതസംസ്ഥാ തു ചാമുണ്ഡാ വാരാഹീ മഹിഷാസനാ .
ഐന്ദ്രീ ഗജസമാരൂഢാ വൈഷ്ണവീ ഗരുഡാസനാ .. 9..

നാരസിംഹീ മഹാവീര്യാ ശിവദൂതീ മഹാബലാ .
മാഹേശ്വരീ വൃഷാരൂഢാ കൗമാരീ ശിഖിവാഹനാ .. 10..

ലക്ഷ്മീഃ പദ്മാസനാ ദേവീ പദ്മഹസ്താ ഹരിപ്രിയാ .
ശ്വേതരൂപധരാ ദേവീ ഈശ്വരീ വൃഷവാഹനാ .. 11..

ബ്രാഹ്മീ ഹംസസമാരൂഢാ സർവാഭരണഭൂഷിതാ .
ഇത്യേതാ മാതരഃ സർവാഃ സർവയോഗസമന്വിതാഃ .. 12..

നാനാഭരണശോഭാഢ്യാ നാനാരത്നോപശോഭിതാഃ .
ശ്രൈഷ്ഠൈശ്ച മൗക്തികൈഃ സർവാ ദിവ്യഹാരപ്രലംബിഭിഃ .. 13..

ഇന്ദ്രനീലൈർമഹാനീലൈഃ പദ്മരാഗൈഃ സുശോഭനൈഃ .
ദൃശ്യന്തേ രഥമാരൂഢാ ദേവ്യഃ ക്രോധസമാകുലാഃ .. 14..

ശംഖം ചക്രം ഗദാം ശക്തിം ഹലം ച മുസലായുധം .
ഖേടകം തോമരം ചൈവ പരശും പാശമേവ ച .. 15..

കുന്തായുധം ത്രിശൂലം ച ശാർങ്ഗമായുധമുത്തമം .
ദൈത്യാനാം ദേഹനാശായ ഭക്താനാമഭയായ ച .. 16..

ധാരയന്ത്യായുധാനീത്ഥം ദേവാനാം ച ഹിതായ വൈ .
നമസ്തേഽസ്തു മഹാരൗദ്രേ മഹാഘോരപരാക്രമേ .. 17..

മഹാബലേ മഹോത്സാഹേ മഹാഭയവിനാശിനി .
ത്രാഹി മാം ദേവി ദുഷ്പ്രേക്ഷ്യേ ശത്രൂണാം ഭയവർധിനി .. 18..

പ്രാച്യാം രക്ഷതു മാമൈന്ദ്രീ ആഗ്നേയ്യാമഗ്നിദേവതാ .
ദക്ഷിണേഽവതു വാരാഹീ നൈരൃത്യാം ഖഡ്ഗധാരിണീ .. 19..

പ്രതീച്യാം വാരുണീ രക്ഷേദ്വായവ്യാം മൃഗവാഹിനീ .
ഉദീച്യാം പാതു കൗബേരീ ഈശാന്യാം ശൂലധാരിണീ .. 20..

ഊർധ്വം ബ്രഹ്മാണീ മേ രക്ഷേദധസ്താദ്വൈഷ്ണവീ തഥാ .
ഏവം ദശ ദിശോ രക്ഷേച്ചാമുണ്ഡാ ശവവാഹനാ .. 21..

ജയാ മാമഗ്രതഃ പാതു വിജയാ പാതു പൃഷ്ഠതഃ .
അജിതാ വാമപാർശ്വേ തു ദക്ഷിണേ ചാപരാജിതാ .. 22..

ശിഖാം മേ ദ്യോതിനീ രക്ഷേദുമാ മൂർധ്നി വ്യവസ്ഥിതാ .
മാലാധരീ ലലാടേ ച ഭ്രുവൗ രക്ഷേദ്യശസ്വിനീ .. 23..

നേത്രയോശ്ചിത്രനേത്രാ ച യമഘണ്ടാ തു പാർശ്വകേ .
ത്രിനേത്രാ ച ത്രിശൂലേന ഭ്രുവോർമധ്യേ ച ചണ്ഡികാ .. 24..

ശംഖിനീ ചക്ഷുഷോർമധ്യേ ശ്രോത്രയോർദ്വാരവാസിനീ .
കപോലൗ കാലികാ രക്ഷേത് കർണമൂലേ തു ശങ്കരീ .. 25..

നാസികായാം സുഗന്ധാ ച ഉത്തരോഷ്ഠേ ച ചർചികാ .
അധരേ ചാമൃതാബാലാ ജിഹ്വായാം ച സരസ്വതീ .. 26..

ദന്താൻ രക്ഷതു കൗമാരീ കണ്ഠദേശേ തു ചണ്ഡികാ .
ഘണ്ടികാം ചിത്രഘണ്ടാ ച മഹാമായാ ച താലുകേ .. 27..

കാമാക്ഷീ ചിബുകം രക്ഷേദ്വാചം മേ സർവമംഗലാ .
ഗ്രീവായാം ഭദ്രകാലീ ച പൃഷ്ഠവംശേ ധനുർധരീ .. 28..

നീലഗ്രീവാ ബഹിഃ കണ്ഠേ നലികാം നലകൂബരീ .
സ്കന്ധയോഃ ഖഡ്ഗിനീ രക്ഷേദ് ബാഹൂ മേ വജ്രധാരിണീ .. 29..

ഹസ്തയോർദണ്ഡിനീ രക്ഷേദംബികാ ചാംഗുലീഷു ച .
നഖാഞ്ഛൂലേശ്വരീ രക്ഷേത് കുക്ഷൗ രക്ഷേന്നരേശ്വരീ .. 30..

സ്തനൗ രക്ഷേന്മഹാദേവീ മനഃശോകവിനാശിനീ .
ഹൃദയേ ലലിതാ ദേവീ ഉദരേ ശൂലധാരിണീ .. 31..

നാഭൗ ച കാമിനീ രക്ഷേദ് ഗുഹ്യം ഗുഹ്യേശ്വരീ തഥാ .
മേഢ്രം രക്ഷതു ദുർഗന്ധാ പായും മേ ഗുഹ്യവാഹിനീ .. 32..

കട്യാം ഭഗവതീ രക്ഷേദൂരൂ മേ മേഘവാഹനാ .
ജംഘേ മഹാബലാ രക്ഷേത് ജാനൂ മാധവനായികാ .. 33..

ഗുൽഫയോർനാരസിംഹീ ച പാദപൃഷ്ഠേ തു കൗശികീ .
പാദാംഗുലീഃ ശ്രീധരീ ച തലം പാതാലവാസിനീ .. 34..

നഖാൻ ദംഷ്ട്രകരാലീ ച കേശാംശ്ചൈവോർധ്വകേശിനീ .
രോമകൂപേഷു കൗമാരീ ത്വചം യോഗീശ്വരീ തഥാ .. 35..

രക്തമജ്ജാവസാമാംസാന്യസ്ഥിമേദാംസി പാർവതീ .
അന്ത്രാണി കാലരാത്രിശ്ച പിത്തം ച മുകുടേശ്വരീ .. 36..

പദ്മാവതീ പദ്മകോശേ കഫേ ചൂഡാമണിസ്തഥാ .
ജ്വാലാമുഖീ നഖജ്വാലാമഭേദ്യാ സർവസന്ധിഷു .. 37..

ശുക്രം ബ്രഹ്മാണീ മേ രക്ഷേച്ഛായാം ഛത്രേശ്വരീ തഥാ .
അഹങ്കാരം മനോ ബുദ്ധിം രക്ഷേന്മേ ധർമധാരിണീ .. 38..

പ്രാണാപാനൗ തഥാ വ്യാനമുദാനം ച സമാനകം .
വജ്രഹസ്താ ച മേ രക്ഷേത് പ്രാണാൻ കല്യാണശോഭനാ .. 39..

രസേ രൂപേ ച ഗന്ധേ ച ശബ്ദേ സ്പർശേ ച യോഗിനീ .
സത്ത്വം രജസ്തമശ്ചൈവ രക്ഷേന്നാരായണീ സദാ .. 40..

ആയൂ രക്ഷതു വാരാഹീ ധർമം രക്ഷതു പാർവതീ .
യശഃ കീർതിം ച ലക്ഷ്മീം ച സദാ രക്ഷതു വൈഷ്ണവീ .. 41..

ഗോത്രമിന്ദ്രാണീ മേ രക്ഷേത് പശൂൻ രക്ഷേച്ച ചണ്ഡികാ .
പുത്രാൻ രക്ഷേന്മഹാലക്ഷ്മീർഭാര്യാം രക്ഷതു ഭൈരവീ .. 42..

ധനേശ്വരീ ധനം രക്ഷേത് കൗമാരീ കന്യകാം തഥാ .
പന്ഥാനം സുപഥാ രക്ഷേന്മാർഗം ക്ഷേമങ്കരീ തഥാ .. 43..

രാജദ്വാരേ മഹാലക്ഷ്മീർവിജയാ സതത സ്ഥിതാ .
രക്ഷാഹീനം തു യത് സ്ഥാനം വർജിതം കവചേന തു .. 44..

തത്സർവം രക്ഷ മേ ദേവി ജയന്തീ പാപനാശിനീ .
സർവരക്ഷാകരം പുണ്യം കവചം സർവദാ ജപേത് .. 45..

ഇദം രഹസ്യം വിപ്രർഷേ ഭക്ത്യാ തവ മയോദിതം .
പാദമേകം ന ഗച്ഛേത് തു യദീച്ഛേച്ഛുഭമാത്മനഃ .. 46..

കവചേനാവൃതോ നിത്യം യത്ര യത്രൈവ ഗച്ഛതി .
തത്ര തത്രാർഥലാഭശ്വ വിജയഃ സാർവകാലികഃ .. 47..

യം യം ചിന്തയതേ കാമം തം തം പ്രാപ്നോതി നിശ്ചിതം .
പരമൈശ്വര്യമതുലം പ്രാപ്സ്യതേ ഭൂതലേ പുമാൻ .. 48..

നിർഭയോ ജായതേ മർത്യഃ സംഗ്രാമേഷ്വപരാജിതഃ .
ത്രൈലോക്യേ തു ഭവേത്പൂജ്യഃ കവചേനാവൃതഃ പുമാൻ .. 49..

ഇദം തു ദേവ്യാഃ കവചം ദേവാനാമപി ദുർലഭം .
യഃ പഠേത്പ്രയതോ നിത്യം ത്രിസന്ധ്യം ശ്രദ്ധയാന്വിതഃ .. 50..

ദൈവീകലാ ഭവേത്തസ്യ ത്രൈലോക്യേ ചാപരാജിതഃ .
ജീവേദ്വർഷശതം സാഗ്രമപമൃത്യുവിവർജിതഃ .. 51..

നശ്യന്തി വ്യാധയഃ സർവേ ലൂതാവിസ്ഫോടകാദയഃ .
സ്ഥാവരം ജംഗമം ചൈവ കൃത്രിമം ചൈവ യദ്വിഷം .. 52..

അഭിചാരാണി സർവാണി മന്ത്രയന്ത്രാണി ഭൂതലേ .
ഭൂചരാഃ ഖേചരാശ്ചൈവ കുലജാശ്ചൗപദേശികാഃ .. 53..

സഹജാ കുലജാ മാലാ ഡാകിനീ ശാകിനീ തഥാ .
അന്തരിക്ഷചരാ ഘോരാ ഡാകിന്യശ്ച മഹാരവാഃ .. 54..

ഗ്രഹഭൂതപിശാചാശ്ച യക്ഷഗന്ധർവരാക്ഷസാഃ .
ബ്രഹ്മരാക്ഷസവേതാലാഃ കൂഷ്മാണ്ഡാ ഭൈരവാദയഃ .. 55..

നശ്യന്തി ദർശനാത്തസ്യ കവചേനാവൃതോ ഹി യഃ .
മാനോന്നതിർഭവേദ്രാജ്ഞസ്തേജോവൃദ്ധിഃ പരാ ഭവേത് .. 56..

യശോവൃദ്ധിർഭവേത് പുംസാം കീർതിവൃദ്ധിശ്ച ജായതേ .
തസ്മാത് ജപേത് സദാ ഭക്തഃ കവചം കാമദം മുനേ .. 57..

ജപേത് സപ്തശതീം ചണ്ഡീം കൃത്വാ തു കവചം പുരാ .
നിർവിഘ്നേന ഭവേത് സിദ്ധിശ്ചണ്ഡീജപസമുദ്ഭവാ .. 58..

യാവദ്ഭൂമണ്ഡലം ധത്തേ സശൈലവനകാനനം .
താവത്തിഷ്ഠതി മേദിന്യാം സന്തതിഃ പുത്രപൗത്രികീ .. 59..

ദേഹാന്തേ പരമം സ്ഥാനം സുരൈരപി സുദുർലഭം .
പ്രാപ്നോതി പുരുഷോ നിത്യം മഹാമായാപ്രസാദതഃ .. 60..

തത്ര ഗച്ഛതി ഗത്വാസൗ പുനശ്ചാഗമനം നഹി .
ലഭതേ പരമം സ്ഥാനം ശിവേന സമതാം വ്രജേത് .. 61..

.. ഇതി ശ്രീമാർകണ്ഡേയപുരാണേ ഹരിഹരബ്രഹ്മവിരചിതം
ദേവീകവചം സമാപ്തം ..

.. ദേവീ മാഹാത്മ്യം ..

        .. ശ്രീദുർഗായൈ നമഃ ..

        .. അഥ ശ്രീദുർഗാസപ്തശതീ ..

.. 1. മധുകൈടഭവധോ നാമ പ്രഥമോഽധ്യായഃ ..
വിനിയോഗഃ
അസ്യ ശ്രീ പ്രഥമചരിത്രസ്യ . ബ്രഹ്മാ ഋഷിഃ .
മഹാകാലീ ദേവതാ . ഗായത്രീ ഛന്ദഃ . നന്ദാ ശക്തിഃ .
രക്തദന്തികാ ബീജം . അഗ്നിസ്തത്ത്വം .
ഋഗ്വേദഃ സ്വരൂപം . ശ്രീമഹാകാലീപ്രീത്യർഥേ
പ്രഥമചരിത്രജപേ വിനിയോഗഃ .

. ധ്യാനം .
ഓം ഖഡ്ഗം ചക്രഗദേഷുചാപപരിഘാഞ്ഛൂലം ഭുശുണ്ഡീം ശിരഃ
        ശംഖം സന്ദധതീം കരൈസ്ത്രിനയനാം സർവാംഗഭൂഷാവൃതാം .
നീലാശ്മദ്യുതിമാസ്യപാദദശകാം സേവേ മഹാകാലികാം
        യാമസ്തൗത്സ്വപിതേ ഹരൗ കമലജോ ഹന്തും മധും കൈടഭം ..

ഓം നമശ്ചണ്ഡികായൈ ..

ഓം ഐം മാർകണ്ഡേയ ഉവാച .. 1.1..

സാവർണിഃ സൂര്യതനയോ യോ മനുഃ കഥ്യതേഽഷ്ടമഃ .
നിശാമയ തദുത്പത്തിം വിസ്തരാദ്ഗദതോ മമ .. 1.2..

മഹാമായാനുഭാവേന യഥാ മന്വന്തരാധിപഃ .
സ ബഭൂവ മഹാഭാഗഃ സാവർണിസ്തനയോ രവേഃ .. 1.3..

സ്വാരോചിഷേഽന്തരേ പൂർവം ചൈത്രവംശസമുദ്ഭവഃ .
സുരഥോ നാമ രാജാഭൂത്സമസ്തേ ക്ഷിതിമണ്ഡലേ .. 1.4..

തസ്യ പാലയതഃ സമ്യക് പ്രജാഃ പുത്രാനിവൗരസാൻ .
ബഭൂവുഃ ശത്രവോ ഭൂപാഃ കോലാവിധ്വംസിനസ്തദാ .. 1.5..

തസ്യ തൈരഭവദ് യുദ്ധമതിപ്രബലദണ്ഡിനഃ .
ന്യൂനൈരപി സ തൈര്യുദ്ധേ കോലാവിധ്വംസിഭിർജിതഃ .. 1.6..

തതഃ സ്വപുരമായാതോ നിജദേശാധിപോഽഭവത് .
ആക്രാന്തഃ സ മഹാഭാഗസ്തൈസ്തദാ പ്രബലാരിഭിഃ .. 1.7..

അമാത്യൈർബലിഭിർദുഷ്ടൈർദുർബലസ്യ ദുരാത്മഭിഃ .
കോശോ ബലം ചാപഹൃതം തത്രാപി സ്വപുരേ തതഃ .. 1.8..

തതോ മൃഗയാവ്യാജേന ഹൃതസ്വാമ്യഃ സ ഭൂപതിഃ .
ഏകാകീ ഹയമാരുഹ്യ ജഗാമ ഗഹനം വനം .. 1.9..

സ തത്രാശ്രമമദ്രാക്ഷീദ്ദ്വിജവര്യസ്യ മേധസഃ .
പ്രശാന്തശ്വാപദാകീർണം മുനിശിഷ്യോപശോഭിതം .. 1.10..

തസ്ഥൗ കഞ്ചിത്സ കാലം ച മുനിനാ തേന സത്കൃതഃ .
ഇതശ്ചേതശ്ച വിചരംസ്തസ്മിൻ മുനിവരാശ്രമേ .. 1.11..

സോഽചിന്തയത്തദാ തത്ര മമത്വാകൃഷ്ടമാനസഃ .
മത്പൂർവൈഃ പാലിതം പൂർവം മയാ ഹീനം പുരം ഹി തത് .. 1.12..

മദ്ഭൃത്യൈസ്തൈരസദ്വൃത്തൈർധർമതഃ പാല്യതേ ന വാ .
ന ജാനേ സ പ്രധാനോ മേ ശൂരോ ഹസ്തീ സദാമദഃ .. 1.13..

മമ വൈരിവശം യാതഃ കാൻ ഭോഗാനുപലപ്സ്യതേ .
യേ മമാനുഗതാ നിത്യം പ്രസാദധനഭോജനൈഃ .. 1.14..

അനുവൃത്തിം ധ്രുവം തേഽദ്യ കുർവന്ത്യന്യമഹീഭൃതാം .
അസമ്യഗ്വ്യയശീലൈസ്തൈഃ കുർവദ്ഭിഃ സതതം വ്യയം .. 1.15..

സഞ്ചിതഃ സോഽതിദുഃഖേന ക്ഷയം കോശോ ഗമിഷ്യതി .
ഏതച്ചാന്യച്ച സതതം ചിന്തയാമാസ പാർഥിവഃ .. 1.16..

തത്ര വിപ്രാശ്രമാഭ്യാശേ വൈശ്യമേകം ദദർശ സഃ .
സ പൃഷ്ടസ്തേന കസ്ത്വം ഭോ ഹേതുശ്ചാഗമനേഽത്ര കഃ .. 1.17..

സശോക ഇവ കസ്മാത്ത്വം ദുർമനാ ഇവ ലക്ഷ്യസേ .
ഇത്യാകർണ്യ വചസ്തസ്യ ഭൂപതേഃ പ്രണയോദിതം .. 1.18..

പ്രത്യുവാച സ തം വൈശ്യഃ പ്രശ്രയാവനതോ നൃപം .. 1.19..

വൈശ്യ ഉവാച .. 1.20..

സമാധിർനാമ വൈശ്യോഽഹമുത്പന്നോ ധനിനാം കുലേ .. 1.21..

പുത്രദാരൈർനിരസ്തശ്ച ധനലോഭാദസാധുഭിഃ .
വിഹീനശ്ച ധനൈർദാരൈഃ പുത്രൈരാദായ മേ ധനം .. 1.22..

വനമഭ്യാഗതോ ദുഃഖീ നിരസ്തശ്ചാപ്തബന്ധുഭിഃ .
സോഽഹം ന വേദ്മി പുത്രാണാം കുശലാകുശലാത്മികാം .. 1.23..

പ്രവൃത്തിം സ്വജനാനാം ച ദാരാണാം ചാത്ര സംസ്ഥിതഃ .
കിം നു തേഷാം ഗൃഹേ ക്ഷേമമക്ഷേമം കിം നു സാമ്പ്രതം .. 1.24..

കഥം തേ കിം നു സദ്വൃത്താ ദുർവൃത്താഃ കിം നു മേ സുതാഃ .. 1.25..

രാജോവാച .. 1.26..

യൈർനിരസ്തോ ഭവാഁല്ലുബ്ധൈഃ പുത്രദാരാദിഭിർധനൈഃ .. 1.27..

തേഷു കിം ഭവതഃ സ്നേഹമനുബധ്നാതി മാനസം .. 1.28..

വൈശ്യ ഉവാച .. 1.29..

ഏവമേതദ്യഥാ പ്രാഹ ഭവാനസ്മദ്ഗതം വചഃ .. 1.30..

കിം കരോമി ന ബധ്നാതി മമ നിഷ്ഠുരതാം മനഃ .
യൈഃ സന്ത്യജ്യ പിതൃസ്നേഹം ധനലുബ്ധൈർനിരാകൃതഃ .. 1.31..

പതിസ്വജനഹാർദം ച ഹാർദിതേഷ്വേവ മേ മനഃ .
കിമേതന്നാഭിജാനാമി ജാനന്നപി മഹാമതേ .. 1.32..

യത്പ്രേമപ്രവണം ചിത്തം വിഗുണേഷ്വപി ബന്ധുഷു .
തേഷാം കൃതേ മേ നിഃശ്വാസോ ദൗർമനസ്യം ച ജായതേ .. 1.33..

കരോമി കിം യന്ന മനസ്തേഷ്വപ്രീതിഷു നിഷ്ഠുരം .. 1.34..

മാർകണ്ഡേയ ഉവാച .. 1.35..

തതസ്തൗ സഹിതൗ വിപ്ര തം മുനിം സമുപസ്ഥിതൗ .. 1.36..

സമാധിർനാമ വൈശ്യോഽസൗ സ ച പാർഥിവസത്തമഃ .
കൃത്വാ തു തൗ യഥാന്യായം യഥാർഹം തേന സംവിദം .. 1.37..

ഉപവിഷ്ടൗ കഥാഃ കാശ്ചിച്ചക്രതുർവൈശ്യപാർഥിവൗ .. 1.38..

രാജോവാച .. 1.39..

ഭഗവംസ്ത്വാമഹം പ്രഷ്ടുമിച്ഛാമ്യേകം വദസ്വ തത് .. 1.40..

ദുഃഖായ യന്മേ മനസഃ സ്വചിത്തായത്തതാം വിനാ .
മമത്വം ഗതരാജ്യസ്യ രാജ്യാംഗേഷ്വഖിലേഷ്വപി .. 1.41..

ജാനതോഽപി യഥാജ്ഞസ്യ കിമേതന്മുനിസത്തമ .
അയം ച നികൃതഃ പുത്രൈർദാരൈർഭൃത്യൈസ്തഥോജ്ഝിതഃ .. 1.42..

സ്വജനേന ച സന്ത്യക്തസ്തേഷു ഹാർദീ തഥാപ്യതി .
ഏവമേഷ തഥാഹം ച ദ്വാവപ്യത്യന്തദുഃഖിതൗ .. 1.43..

ദൃഷ്ടദോഷേഽപി വിഷയേ മമത്വാകൃഷ്ടമാനസൗ .
തത്കിമേതന്മഹാഭാഗ യന്മോഹോ ജ്ഞാനിനോരപി .. 1.44..

മമാസ്യ ച ഭവത്യേഷാ വിവേകാന്ധസ്യ മൂഢതാ .. 1.45..

ഋഷിരുവാച .. 1.46..

ജ്ഞാനമസ്തി സമസ്തസ്യ ജന്തോർവിഷയഗോചരേ .. 1.47..

വിഷയാശ്ച മഹാഭാഗ യാന്തി ചൈവം പൃഥക്പൃഥക് .
ദിവാന്ധാഃ പ്രാണിനഃ കേചിദ്രാത്രാവന്ധാസ്തഥാപരേ .. 1.48..

കേചിദ്ദിവാ തഥാ രാത്രൗ പ്രാണിനസ്തുല്യദൃഷ്ടയഃ .
ജ്ഞാനിനോ മനുജാഃ സത്യം കിം തു തേ ന ഹി കേവലം .. 1.49..

യതോ ഹി ജ്ഞാനിനഃ സർവേ പശുപക്ഷിമൃഗാദയഃ .
ജ്ഞാനം ച തന്മനുഷ്യാണാം യത്തേഷാം മൃഗപക്ഷിണാം .. 1.50..

മനുഷ്യാണാം ച യത്തേഷാം തുല്യമന്യത്തഥോഭയോഃ .
ജ്ഞാനേഽപി സതി പശ്യൈതാൻ പതംഗാഞ്ഛാവചഞ്ചുഷു .. 1.51..

കണമോക്ഷാദൃതാൻ മോഹാത്പീഡ്യമാനാനപി ക്ഷുധാ .
മാനുഷാ മനുജവ്യാഘ്ര സാഭിലാഷാഃ സുതാൻ പ്രതി .. 1.52..

ലോഭാത് പ്രത്യുപകാരായ നന്വേതാൻ കിം ന പശ്യസി .
തഥാപി മമതാവർത്തേ മോഹഗർതേ നിപാതിതാഃ .. 1.53..

മഹാമായാപ്രഭാവേണ സംസാരസ്ഥിതികാരിണാ .
തന്നാത്ര വിസ്മയഃ കാര്യോ യോഗനിദ്രാ ജഗത്പതേഃ .. 1.54..

മഹാമായാ ഹരേശ്ചൈഷാ തയാ സമ്മോഹ്യതേ ജഗത് .
ജ്ഞാനിനാമപി ചേതാംസി ദേവീ ഭഗവതീ ഹി സാ .. 1.55..

ബലാദാകൃഷ്യ മോഹായ മഹാമായാ പ്രയച്ഛതി .
തയാ വിസൃജ്യതേ വിശ്വം ജഗദേതച്ചരാചരം .. 1.56..

സൈഷാ പ്രസന്നാ വരദാ നൃണാം ഭവതി മുക്തയേ .
സാ വിദ്യാ പരമാ മുക്തേർഹേതുഭൂതാ സനാതനീ .. 1.57..

സംസാരബന്ധഹേതുശ്ച സൈവ സർവേശ്വരേശ്വരീ .. 1.58..

രാജോവാച .. 1.59..

ഭഗവൻ കാ ഹി സാ ദേവീ മഹാമായേതി യാം ഭവാൻ .. 1.60..

ബ്രവീതി കഥമുത്പന്നാ സാ കർമാസ്യാശ്ച കിം ദ്വിജ .
യത്പ്രഭാവാ ച സാ ദേവീ യത്സ്വരൂപാ യദുദ്ഭവാ .. 1.61..

തത്സർവം ശ്രോതുമിച്ഛാമി ത്വത്തോ ബ്രഹ്മവിദാം വര .. 1.62..

ഋഷിരുവാച .. 1.63..

നിത്യൈവ സാ ജഗന്മൂർതിസ്തയാ സർവമിദം തതം .. 1.64..

തഥാപി തത്സമുത്പത്തിർബഹുധാ ശ്രൂയതാം മമ .
ദേവാനാം കാര്യസിദ്ധ്യർഥമാവിർഭവതി സാ യദാ .. 1.65..

ഉത്പന്നേതി തദാ ലോകേ സാ നിത്യാപ്യഭിധീയതേ .
യോഗനിദ്രാം യദാ വിഷ്ണുർജഗത്യേകാർണവീകൃതേ .. 1.66..

ആസ്തീര്യ ശേഷമഭജത് കല്പാന്തേ ഭഗവാൻ പ്രഭുഃ .
തദാ ദ്വാവസുരൗ ഘോരൗ വിഖ്യാതൗ മധുകൈടഭൗ .. 1.67..

വിഷ്ണുകർണമലോദ്ഭൂതൗ ഹന്തും ബ്രഹ്മാണമുദ്യതൗ .
സ നാഭികമലേ വിഷ്ണോഃ സ്ഥിതോ ബ്രഹ്മാ പ്രജാപതിഃ .. 1.68..

ദൃഷ്ട്വാ താവസുരൗ ചോഗ്രൗ പ്രസുപ്തം ച ജനാർദനം .
തുഷ്ടാവ യോഗനിദ്രാം താമേകാഗ്രഹൃദയഃ സ്ഥിതഃ .. 1.69..

വിബോധനാർഥായ ഹരേർഹരിനേത്രകൃതാലയാം .
വിശ്വേശ്വരീം ജഗദ്ധാത്രീം സ്ഥിതിസംഹാരകാരിണീം .. 1.70..

നിദ്രാം ഭഗവതീം വിഷ്ണോരതുലാം തേജസഃ പ്രഭുഃ .. 1.71..

ബ്രഹ്മോവാച .. 1.72..

ത്വം സ്വാഹാ ത്വം സ്വധാ ത്വം ഹി വഷട്കാരഃ സ്വരാത്മികാ .. 1.73..

സുധാ ത്വമക്ഷരേ നിത്യേ ത്രിധാ മാത്രാത്മികാ സ്ഥിതാ .
അർധമാത്രാ സ്ഥിതാ നിത്യാ യാനുച്ചാര്യാവിശേഷതഃ .. 1.74..

ത്വമേവ സന്ധ്യാ സാവിത്രീ ത്വം ദേവി ജനനീ പരാ .
ത്വയൈതദ്ധാര്യതേ വിശ്വം ത്വയൈതത് സൃജ്യതേ ജഗത് .. 1.75..

ത്വയൈതത് പാല്യതേ ദേവി ത്വമത്സ്യന്തേ ച സർവദാ .
വിസൃഷ്ടൗ സൃഷ്ടിരൂപാ ത്വം സ്ഥിതിരൂപാ ച പാലനേ .. 1.76..

തഥാ സംഹൃതിരൂപാന്തേ ജഗതോഽസ്യ ജഗന്മയേ .
മഹാവിദ്യാ മഹാമായാ മഹാമേധാ മഹാസ്മൃതിഃ .. 1.77..

മഹാമോഹാ ച ഭവതീ മഹാദേവീ മഹേശ്വരീ .
പ്രകൃതിസ്ത്വം ച സർവസ്യ ഗുണത്രയവിഭാവിനീ .. 1.78..

കാലരാത്രിർമഹാരാത്രിർമോഹരാത്രിശ്ച ദാരുണാ .
ത്വം ശ്രീസ്ത്വമീശ്വരീ ത്വം ഹ്രീസ്ത്വം ബുദ്ധിർബോധലക്ഷണാ .. 1.79..

ലജ്ജാ പുഷ്ടിസ്തഥാ തുഷ്ടിസ്ത്വം ശാന്തിഃ ക്ഷാന്തിരേവ ച .
ഖഡ്ഗിനീ ശൂലിനീ ഘോരാ ഗദിനീ ചക്രിണീ തഥാ .. 1.80..

ശംഖിനീ ചാപിനീ ബാണഭുശുണ്ഡീപരിഘായുധാ .
സൗമ്യാ സൗമ്യതരാശേഷസൗമ്യേഭ്യസ്ത്വതിസുന്ദരീ .. 1.81..

പരാപരാണാം പരമാ ത്വമേവ പരമേശ്വരീ .
യച്ച കിഞ്ചിത്ക്വചിദ്വസ്തു സദസദ്വാഖിലാത്മികേ .. 1.82..

തസ്യ സർവസ്യ യാ ശക്തിഃ സാ ത്വം കിം സ്തൂയസേ മയാ .
യയാ ത്വയാ ജഗത്സ്രഷ്ടാ ജഗത്പാത്യത്തി യോ ജഗത് .. 1.83..

സോഽപി നിദ്രാവശം നീതഃ കസ്ത്വാം സ്തോതുമിഹേശ്വരഃ .
വിഷ്ണുഃ ശരീരഗ്രഹണമഹമീശാന ഏവ ച .. 1.84..

കാരിതാസ്തേ യതോഽതസ്ത്വാം കഃ സ്തോതും ശക്തിമാൻ ഭവേത് .
സാ ത്വമിത്ഥം പ്രഭാവൈഃ സ്വൈരുദാരൈർദേവി സംസ്തുതാ .. 1.85..

മോഹയൈതൗ ദുരാധർഷാവസുരൗ മധുകൈടഭൗ .
പ്രബോധം ച ജഗത്സ്വാമീ നീയതാമച്യുതോ ലഘു .. 1.86..

ബോധശ്ച ക്രിയതാമസ്യ ഹന്തുമേതൗ മഹാസുരൗ .. 1.87..

ഋഷിരുവാച .. 1.88..

ഏവം സ്തുതാ തദാ ദേവീ താമസീ തത്ര വേധസാ .. 1.89..

വിഷ്ണോഃ പ്രബോധനാർഥായ നിഹന്തും മധുകൈടഭൗ .
നേത്രാസ്യനാസികാബാഹുഹൃദയേഭ്യസ്തഥോരസഃ .. 1.90..

നിർഗമ്യ ദർശനേ തസ്ഥൗ ബ്രഹ്മണോഽവ്യക്തജന്മനഃ .
ഉത്തസ്ഥൗ ച ജഗന്നാഥസ്തയാ മുക്തോ ജനാർദനഃ .. 1.91..

ഏകാർണവേഽഹിശയനാത്തതഃ സ ദദൃശേ ച തൗ .
മധുകൈടഭൗ ദുരാത്മാനാവതിവീര്യപരാക്രമൗ .. 1.92..

ക്രോധരക്തേക്ഷണാവത്തും ബ്രഹ്മാണം ജനിതോദ്യമൗ .
സമുത്ഥായ തതസ്താഭ്യാം യുയുധേ ഭഗവാൻ ഹരിഃ .. 1.93..

പഞ്ചവർഷസഹസ്രാണി ബാഹുപ്രഹരണോ വിഭുഃ .
താവപ്യതിബലോന്മത്തൗ മഹാമായാവിമോഹിതൗ .. 1.94..

ഉക്തവന്തൗ വരോഽസ്മത്തോ വ്രിയതാമിതി കേശവം .. 1.95..

ശ്രീഭഗവാനുവാച .. 1.96..

ഭവേതാമദ്യ മേ തുഷ്ടൗ മമ വധ്യാവുഭാവപി .. 1.97..

കിമന്യേന വരേണാത്ര ഏതാവദ്ധി വൃതം മയാ .. 1.98..

ഋഷിരുവാച .. 1.99..

വഞ്ചിതാഭ്യാമിതി തദാ സർവമാപോമയം ജഗത് .. 1.100..

വിലോക്യ താഭ്യാം ഗദിതോ ഭഗവാൻ കമലേക്ഷണഃ .
ആവാം ജഹി ന യത്രോർവീ സലിലേന പരിപ്ലുതാ .. 1.101..

ഋഷിരുവാച .. 1.102..

തഥേത്യുക്ത്വാ ഭഗവതാ ശംഖചക്രഗദാഭൃതാ .
കൃത്വാ ചക്രേണ വൈ ഛിന്നേ ജഘനേ ശിരസീ തയോഃ .. 1.103..

ഏവമേഷാ സമുത്പന്നാ ബ്രഹ്മണാ സംസ്തുതാ സ്വയം .
പ്രഭാവമസ്യാ ദേവ്യാസ്തു ഭൂയഃ ശൃണു വദാമി തേ .. 1.104..

. ഐം ഓം .

.. സ്വസ്തി ശ്രീമാർകണ്ഡേയപുരാണേ സാവർണികേ മന്വന്തരേ ദേവീമാഹാത്മ്യേ
മധുകൈടഭവധോ നാമ പ്രഥമോഽധ്യായഃ .. 1..

ഉവാച 14, അർധശ്ലോകാഃ 24, ശ്ലോകാഃ 66, ഏവമാദിതഃ .. 104..

.. 2. മഹിഷാസുരസൈന്യവധോ നാമ ദ്വിതീയോഽധ്യായഃ ..
വിനിയോഗഃ
അസ്യ ശ്രീ മധ്യമചരിത്രസ്യ വിഷ്ണുരൃഷിഃ .
ശ്രീമഹാലക്ഷ്മീർദേവതാ .
ഉഷ്ണിക് ഛന്ദഃ . ശാകംഭരീ ശക്തിഃ . ദുർഗാ ബീജം .
വായുസ്തത്ത്വം .
യജുർവേദഃ സ്വരൂപം . ശ്രീമഹാലക്ഷ്മീപ്രീത്യർഥേ
മധ്യമചരിത്രജപേ വിനിയോഗഃ .

. ധ്യാനം .
ഓം അക്ഷസ്രക്പരശൂ ഗദേഷുകുലിശം പദ്മം ധനുഃ കുണ്ഡികാം
        ദണ്ഡം ശക്തിമസിം ച ചർമ ജലജം ഘണ്ടാം സുരാഭാജനം .
ശൂലം പാശസുദർശനേ ച ദധതീം ഹസ്തൈഃ പ്രവാലപ്രഭാം
        സേവേ സൈരിഭമർദിനീമിഹ മഹാലക്ഷ്മീം സരോജസ്ഥിതാം ..

ഓം ഹ്രീം ഋഷിരുവാച .. 2.1..

ദേവാസുരമഭൂദ്യുദ്ധം പൂർണമബ്ദശതം പുരാ .
മഹിഷേഽസുരാണാമധിപേ ദേവാനാം ച പുരന്ദരേ .. 2.2..

തത്രാസുരൈർമഹാവീര്യൈർദേവസൈന്യം പരാജിതം .
ജിത്വാ ച സകലാൻ ദേവാനിന്ദ്രോഽഭൂന്മഹിഷാസുരഃ .. 2.3..

തതഃ പരാജിതാ ദേവാഃ പദ്മയോനിം പ്രജാപതിം .
പുരസ്കൃത്യ ഗതാസ്തത്ര യത്രേശഗരുഡധ്വജൗ .. 2.4..

യഥാവൃത്തം തയോസ്തദ്വന്മഹിഷാസുരചേഷ്ടിതം .
ത്രിദശാഃ കഥയാമാസുർദേവാഭിഭവവിസ്തരം .. 2.5..

സൂര്യേന്ദ്രാഗ്ന്യനിലേന്ദൂനാം യമസ്യ വരുണസ്യ ച .
അന്യേഷാം ചാധികാരാൻസ സ്വയമേവാധിതിഷ്ഠതി .. 2.6..

സ്വർഗാന്നിരാകൃതാഃ സർവേ തേന ദേവഗണാ ഭുവി .
വിചരന്തി യഥാ മർത്യാ മഹിഷേണ ദുരാത്മനാ .. 2.7..

ഏതദ്വഃ കഥിതം സർവമമരാരിവിചേഷ്ടിതം .
ശരണം വഃ പ്രപന്നാഃ സ്മോ വധസ്തസ്യ വിചിന്ത്യതാം .. 2.8..

ഇത്ഥം നിശമ്യ ദേവാനാം വചാംസി മധുസൂദനഃ .
ചകാര കോപം ശംഭുശ്ച ഭ്രുകുടീകുടിലാനനൗ .. 2.9..

തതോഽതികോപപൂർണസ്യ ചക്രിണോ വദനാത്തതഃ .
നിശ്ചക്രാമ മഹത്തേജോ ബ്രഹ്മണഃ ശങ്കരസ്യ ച .. 2.10..

അന്യേഷാം ചൈവ ദേവാനാം ശക്രാദീനാം ശരീരതഃ .
നിർഗതം സുമഹത്തേജസ്തച്ചൈക്യം സമഗച്ഛത .. 2.11..

അതീവ തേജസഃ കൂടം ജ്വലന്തമിവ പർവതം .
ദദൃശുസ്തേ സുരാസ്തത്ര ജ്വാലാവ്യാപ്തദിഗന്തരം .. 2.12..

അതുലം തത്ര തത്തേജഃ സർവദേവശരീരജം .
ഏകസ്ഥം തദഭൂന്നാരീ വ്യാപ്തലോകത്രയം ത്വിഷാ .. 2.13..

യദഭൂച്ഛാംഭവം തേജസ്തേനാജായത തന്മുഖം .
യാമ്യേന ചാഭവൻ കേശാ ബാഹവോ വിഷ്ണുതേജസാ .. 2.14..

സൗമ്യേന സ്തനയോര്യുഗ്മം മധ്യം ചൈന്ദ്രേണ ചാഭവത് .
വാരുണേന ച ജംഘോരൂ നിതംബസ്തേജസാ ഭുവഃ .. 2.15..

ബ്രഹ്മണസ്തേജസാ പാദൗ തദംഗുല്യോഽർകതേജസാ .
വസൂനാം ച കരാംഗുല്യഃ കൗബേരേണ ച നാസികാ .. 2.16..

തസ്യാസ്തു ദന്താഃ സംഭൂതാഃ പ്രാജാപത്യേന തേജസാ .
നയനത്രിതയം ജജ്ഞേ തഥാ പാവകതേജസാ .. 2.17..

ഭ്രുവൗ ച സന്ധ്യയോസ്തേജഃ ശ്രവണാവനിലസ്യ ച .
അന്യേഷാം ചൈവ ദേവാനാം സംഭവസ്തേജസാം ശിവാ .. 2.18..

തതഃ സമസ്തദേവാനാം തേജോരാശിസമുദ്ഭവാം .
താം വിലോക്യ മുദം പ്രാപുരമരാ മഹിഷാർദിതാഃ .
തതോ ദേവാ ദദുസ്തസ്യൈ സ്വാനി സ്വാന്യായുധാനി ച .. 2.19..

ശൂലം ശൂലാദ്വിനിഷ്കൃഷ്യ ദദൗ തസ്യൈ പിനാകധൃക് .
ചക്രം ച ദത്തവാൻ കൃഷ്ണഃ സമുത്പാട്യ സ്വചക്രതഃ .. 2.20..

ശംഖം ച വരുണഃ ശക്തിം ദദൗ തസ്യൈ ഹുതാശനഃ .
മാരുതോ ദത്തവാംശ്ചാപം ബാണപൂർണേ തഥേഷുധീ .. 2.21..

വജ്രമിന്ദ്രഃ സമുത്പാട്യ കുലിശാദമരാധിപഃ .
ദദൗ തസ്യൈ സഹസ്രാക്ഷോ ഘണ്ടാമൈരാവതാദ്ഗജാത് .. 2.22..

കാലദണ്ഡാദ്യമോ ദണ്ഡം പാശം ചാംബുപതിർദദൗ .
പ്രജാപതിശ്ചാക്ഷമാലാം ദദൗ ബ്രഹ്മാ കമണ്ഡലും .. 2.23..

സമസ്തരോമകൂപേഷു നിജരശ്മീൻ ദിവാകരഃ .
കാലശ്ച ദത്തവാൻ ഖഡ്ഗം തസ്യൈ ചർമ ച നിർമലം .. 2.24..

ക്ഷീരോദശ്ചാമലം ഹാരമജരേ ച തഥാംബരേ .
ചൂഡാമണിം തഥാ ദിവ്യം കുണ്ഡലേ കടകാനി ച .. 2.25..

അർധചന്ദ്രം തഥാ ശുഭ്രം കേയൂരാൻ സർവബാഹുഷു .
നൂപുരൗ വിമലൗ തദ്വദ് ഗ്രൈവേയകമനുത്തമം .. 2.26..

അംഗുലീയകരത്നാനി സമസ്താസ്വംഗുലീഷു ച .
വിശ്വകർമാ ദദൗ തസ്യൈ പരശും ചാതിനിർമലം .. 2.27..

അസ്ത്രാണ്യനേകരൂപാണി തഥാഭേദ്യം ച ദംശനം .
അമ്ലാനപങ്കജാം മാലാം ശിരസ്യുരസി ചാപരാം .. 2.28..

അദദജ്ജലധിസ്തസ്യൈ പങ്കജം ചാതിശോഭനം .
ഹിമവാൻ വാഹനം സിംഹം രത്നാനി വിവിധാനി ച .. 2.29..

ദദാവശൂന്യം സുരയാ പാനപാത്രം ധനാധിപഃ .
ശേഷശ്ച സർവനാഗേശോ മഹാമണിവിഭൂഷിതം .. 2.30..

നാഗഹാരം ദദൗ തസ്യൈ ധത്തേ യഃ പൃഥിവീമിമാം .
അന്യൈരപി സുരൈർദേവീ ഭൂഷണൈരായുധൈസ്തഥാ .. 2.31..

സമ്മാനിതാ നനാദോച്ചൈഃ സാട്ടഹാസം മുഹുർമുഹുഃ .
തസ്യാ നാദേന ഘോരേണ കൃത്സ്നമാപൂരിതം നഭഃ .. 2.32..

അമായതാതിമഹതാ പ്രതിശബ്ദോ മഹാനഭൂത് .
ചുക്ഷുഭുഃ സകലാ ലോകാഃ സമുദ്രാശ്ച ചകമ്പിരേ .. 2.33..

ചചാല വസുധാ ചേലുഃ സകലാശ്ച മഹീധരാഃ .
ജയേതി ദേവാശ്ച മുദാ താമൂചുഃ സിംഹവാഹിനീം .. 2.34..

തുഷ്ടുവുർമുനയശ്ചൈനാം ഭക്തിനമ്രാത്മമൂർതയഃ .
ദൃഷ്ട്വാ സമസ്തം സങ്ക്ഷുബ്ധം ത്രൈലോക്യമമരാരയഃ .. 2.35..

സന്നദ്ധാഖിലസൈന്യാസ്തേ സമുത്തസ്ഥുരുദായുധാഃ .
ആഃ കിമേതദിതി ക്രോധാദാഭാഷ്യ മഹിഷാസുരഃ .. 2.36..

അഭ്യധാവത തം ശബ്ദമശേഷൈരസുരൈർവൃതഃ .
സ ദദർശ തതോ ദേവീം വ്യാപ്തലോകത്രയാം ത്വിഷാ .. 2.37..

പാദാക്രാന്ത്യാ നതഭുവം കിരീടോല്ലിഖിതാംബരാം .
ക്ഷോഭിതാശേഷപാതാലാം ധനുർജ്യാനിഃസ്വനേന താം .. 2.38..

ദിശോ ഭുജസഹസ്രേണ സമന്താദ്വ്യാപ്യ സംസ്ഥിതാം .
തതഃ പ്രവവൃതേ യുദ്ധം തയാ ദേവ്യാ സുരദ്വിഷാം .. 2.39..

ശസ്ത്രാസ്ത്രൈർബഹുധാ മുക്തൈരാദീപിതദിഗന്തരം .
മഹിഷാസുരസേനാനീശ്ചിക്ഷുരാഖ്യോ മഹാസുരഃ .. 2.40..

യുയുധേ ചാമരശ്ചാന്യൈശ്ചതുരംഗബലാന്വിതഃ .
രഥാനാമയുതൈഃ ഷഡ്ഭിരുദഗ്രാഖ്യോ മഹാസുരഃ .. 2.41..

അയുധ്യതായുതാനാം ച സഹസ്രേണ മഹാഹനുഃ .
പഞ്ചാശദ്ഭിശ്ച നിയുതൈരസിലോമാ മഹാസുരഃ .. 2.42..

അയുതാനാം ശതൈഃ ഷഡ്ഭിർബാഷ്കലോ യുയുധേ രണേ .
ഗജവാജിസഹസ്രൗഘൈരനേകൈഃ പരിവാരിതഃ .. 2.43..

വൃതോ രഥാനാം കോട്യാ ച യുദ്ധേ തസ്മിന്നയുധ്യത .
ബിഡാലാഖ്യോഽയുതാനാം ച പഞ്ചാശദ്ഭിരഥായുതൈഃ .. 2.44..

യുയുധേ സംയുഗേ തത്ര രഥാനാം പരിവാരിതഃ .
അന്യേ ച തത്രായുതശോ രഥനാഗഹയൈർവൃതാഃ .. 2.45..

യുയുധുഃ സംയുഗേ ദേവ്യാ സഹ തത്ര മഹാസുരാഃ .
കോടികോടിസഹസ്രൈസ്തു രഥാനാം ദന്തിനാം തഥാ .. 2.46..

ഹയാനാം ച വൃതോ യുദ്ധേ തത്രാഭൂന്മഹിഷാസുരഃ .
തോമരൈർഭിന്ദിപാലൈശ്ച ശക്തിഭിർമുസലൈസ്തഥാ .. 2.47..

യുയുധുഃ സംയുഗേ ദേവ്യാ ഖഡ്ഗൈഃ പരശുപട്ടിശൈഃ .
കേചിച്ച ചിക്ഷിപുഃ ശക്തീഃ കേചിത് പാശാംസ്തഥാപരേ .. 2.48..

ദേവീം ഖഡ്ഗപ്രഹാരൈസ്തു തേ താം ഹന്തും പ്രചക്രമുഃ .
സാപി ദേവീ തതസ്താനി ശസ്ത്രാണ്യസ്ത്രാണി ചണ്ഡികാ .. 2.49..

ലീലയൈവ പ്രചിച്ഛേദ നിജശസ്ത്രാസ്ത്രവർഷിണീ .
അനായസ്താനനാ ദേവീ സ്തൂയമാനാ സുരർഷിഭിഃ .. 2.50..

മുമോചാസുരദേഹേഷു ശസ്ത്രാണ്യസ്ത്രാണി ചേശ്വരീ .
സോഽപി ക്രുദ്ധോ ധുതസടോ ദേവ്യാ വാഹനകേസരീ .. 2.51..

ചചാരാസുരസൈന്യേഷു വനേഷ്വിവ ഹുതാശനഃ .
നിഃശ്വാസാൻ മുമുചേ യാംശ്ച യുധ്യമാനാ രണേഽമ്ബികാ .. 2.52..

ത ഏവ സദ്യഃ സംഭൂതാ ഗണാഃ ശതസഹസ്രശഃ .
യുയുധുസ്തേ പരശുഭിർഭിന്ദിപാലാസിപട്ടിശൈഃ .. 2.53..

നാശയന്തോഽസുരഗണാൻ ദേവീശക്ത്യുപബൃംഹിതാഃ .
അവാദയന്ത പടഹാൻ ഗണാഃ ശംഖാംസ്തഥാപരേ .. 2.54..

മൃദംഗാംശ്ച തഥൈവാന്യേ തസ്മിൻ യുദ്ധമഹോത്സവേ .
തതോ ദേവീ ത്രിശൂലേന ഗദയാ ശക്തിവൃഷ്ടിഭിഃ .. 2.55..

ഖഡ്ഗാദിഭിശ്ച ശതശോ നിജഘാന മഹാസുരാൻ .
പാതയാമാസ ചൈവാന്യാൻ ഘണ്ടാസ്വനവിമോഹിതാൻ .. 2.56..

അസുരാൻ ഭുവി പാശേന ബദ്ധ്വാ ചാന്യാനകർഷയത് .
കേചിദ് ദ്വിധാകൃതാസ്തീക്ഷ്ണൈഃ ഖഡ്ഗപാതൈസ്തഥാപരേ .. 2.57..

വിപോഥിതാ നിപാതേന ഗദയാ ഭുവി ശേരതേ .
വേമുശ്ച കേചിദ്രുധിരം മുസലേന ഭൃശം ഹതാഃ .. 2.58..

കേചിന്നിപതിതാ ഭൂമൗ ഭിന്നാഃ ശൂലേന വക്ഷസി .
നിരന്തരാഃ ശരൗഘേണ കൃതാഃ കേചിദ്രണാജിരേ .. 2.59..

ശ്യേനാനുകാരിണഃ പ്രാണാൻ മുമുചുസ്ത്രിദശാർദനാഃ .
കേഷാഞ്ചിദ് ബാഹവശ്ഛിന്നാശ്ഛിന്നഗ്രീവാസ്തഥാപരേ .. 2.60..

ശിരാംസി പേതുരന്യേഷാമന്യേ മധ്യേ വിദാരിതാഃ .
വിച്ഛിന്നജംഘാസ്ത്വപരേ പേതുരുർവ്യാം മഹാസുരാഃ .. 2.61..

ഏകബാഹ്വക്ഷിചരണാഃ കേചിദ്ദേവ്യാ ദ്വിധാകൃതാഃ .
ഛിന്നേഽപി ചാന്യേ ശിരസി പതിതാഃ പുനരുത്ഥിതാഃ .. 2.62..

കബന്ധാ യുയുധുർദേവ്യാ ഗൃഹീതപരമായുധാഃ .
നനൃതുശ്ചാപരേ തത്ര യുദ്ധേ തൂര്യലയാശ്രിതാഃ .. 2.63..

കബന്ധാശ്ഛിന്നശിരസഃ ഖഡ്ഗശക്ത്യൃഷ്ടിപാണയഃ .
തിഷ്ഠ തിഷ്ഠേതി ഭാഷന്തോ ദേവീമന്യേ മഹാസുരാഃ .. 2.64..

പാതിതൈ രഥനാഗാശ്വൈരസുരൈശ്ച വസുന്ധരാ .
അഗമ്യാ സാഭവത്തത്ര യത്രാഭൂത് സ മഹാരണഃ .. 2.65..

ശോണിതൗഘാ മഹാനദ്യഃ സദ്യസ്തത്ര പ്രസുസ്രുവുഃ .
മധ്യേ ചാസുരസൈന്യസ്യ വാരണാസുരവാജിനാം .. 2.66..

ക്ഷണേന തന്മഹാസൈന്യമസുരാണാം തഥാംബികാ .
നിന്യേ ക്ഷയം യഥാ വഹ്നിസ്തൃണദാരുമഹാചയം .. 2.67..

സ ച സിംഹോ മഹാനാദമുത്സൃജൻ ധുതകേസരഃ .
ശരീരേഭ്യോഽമരാരീണാമസൂനിവ വിചിന്വതി .. 2.68..

ദേവ്യാ ഗണൈശ്ച തൈസ്തത്ര കൃതം യുദ്ധം തഥാസുരൈഃ .
യഥൈഷാം തുതുഷുർദേവാഃ പുഷ്പവൃഷ്ടിമുചോ ദിവി .. 2.69..

.. സ്വസ്തി ശ്രീമാർകണ്ഡേയപുരാണേ സാവർണികേ മന്വന്തരേ ദേവീമാഹാത്മ്യേ
മഹിഷാസുരസൈന്യവധോ നാമ ദ്വിതീയോഽധ്യായഃ .. 2..

ഉവാച 1, അർധശ്ലോകാഃ 68, ശ്ലോകാഃ 69, ഏവമാദിതഃ .. 173..

.. 3. മഹിഷാസുരവധോ നാമ തൃതീയോഽധ്യായഃ ..
. ധ്യാനം .
ഓം ഉദ്യദ്ഭാനുസഹസ്രകാന്തിമരുണക്ഷൗമാം ശിരോമാലികാം
        രക്താലിപ്തപയോധരാം ജപവടീം വിദ്യാമഭീതിം വരം .
ഹസ്താബ്ജൈർദധതീം ത്രിനേത്രവിലസദ്വക്ത്രാരവിന്ദശ്രിയം
ദേവീം ബദ്ധഹിമാംശുരത്നമുകുടാം വന്ദേഽരവിന്ദസ്ഥിതാം .

ഓം ഋഷിരുവാച .. 3.1..

നിഹന്യമാനം തത്സൈന്യമവലോക്യ മഹാസുരഃ .
സേനാനീശ്ചിക്ഷുരഃ കോപാദ്യയൗ യോദ്ധുമഥാംബികാം .. 3.2..

സ ദേവീം ശരവർഷേണ വവർഷ സമരേഽസുരഃ .
യഥാ മേരുഗിരേഃ ശൃംഗം തോയവർഷേണ തോയദഃ .. 3.3..

തസ്യ ഛിത്വാ തതോ ദേവീ ലീലയൈവ ശരോത്കരാൻ .
ജഘാന തുരഗാൻബാണൈര്യന്താരം ചൈവ വാജിനാം .. 3.4..

ചിച്ഛേദ ച ധനുഃ സദ്യോ ധ്വജം ചാതിസമുച്ഛൃതം .
വിവ്യാധ ചൈവ ഗാത്രേഷു ഛിന്നധന്വാനമാശുഗൈഃ .. 3.5..

സച്ഛിന്നധന്വാ വിരഥോ ഹതാശ്വോ ഹതസാരഥിഃ .
അഭ്യധാവത താം ദേവീം ഖഡ്ഗചർമധരോഽസുരഃ .. 3.6..

സിംഹമാഹത്യ ഖഡ്ഗേന തീക്ഷ്ണധാരേണ മൂർധനി .
ആജഘാന ഭുജേ സവ്യേ ദേവീമപ്യതിവേഗവാൻ .. 3.7..

തസ്യാഃ ഖഡ്ഗോ ഭുജം പ്രാപ്യ പഫാല നൃപനന്ദന .
തതോ ജഗ്രാഹ ശൂലം സ കോപാദരുണലോചനഃ .. 3.8..

ചിക്ഷേപ ച തതസ്തത്തു ഭദ്രകാല്യാം മഹാസുരഃ .
ജാജ്വല്യമാനം തേജോഭീ രവിബിംബമിവാംബരാത് .. 3.9..

ദൃഷ്ട്വാ തദാപതച്ഛൂലം ദേവീ ശൂലമമുഞ്ചത .
തേന തച്ഛതധാ നീതം ശൂലം സ ച മഹാസുരഃ .. 3.10..

ഹതേ തസ്മിന്മഹാവീര്യേ മഹിഷസ്യ ചമൂപതൗ .
ആജഗാമ ഗജാരൂഢശ്ചാമരസ്ത്രിദശാർദനഃ .. 3.11..

സോഽപി ശക്തിം മുമോചാഥ ദേവ്യാസ്താമംബികാ ദ്രുതം .
ഹുങ്കാരാഭിഹതാം ഭൂമൗ പാതയാമാസ നിഷ്പ്രഭാം .. 3.12..

ഭഗ്നാം ശക്തിം നിപതിതാം ദൃഷ്ട്വാ ക്രോധസമന്വിതഃ .
ചിക്ഷേപ ചാമരഃ ശൂലം ബാണൈസ്തദപി സാച്ഛിനത് .. 3.13..

തതഃ സിംഹഃ സമുത്പത്യ ഗജകുംഭാന്തരേ സ്ഥിതഃ .
ബാഹുയുദ്ധേന യുയുധേ തേനോച്ചൈസ്ത്രിദശാരിണാ .. 3.14..

യുധ്യമാനൗ തതസ്തൗ തു തസ്മാന്നാഗാന്മഹീം ഗതൗ .
യുയുധാതേഽതിസംരബ്ധൗ പ്രഹാരൈരതിദാരുണൈഃ .. 3.15..

തതോ വേഗാത് ഖമുത്പത്യ നിപത്യ ച മൃഗാരിണാ .
കരപ്രഹാരേണ ശിരശ്ചാമരസ്യ പൃഥക് കൃതം .. 3.16..

ഉദഗ്രശ്ച രണേ ദേവ്യാ ശിലാവൃക്ഷാദിഭിർഹതഃ .
ദന്തമുഷ്ടിതലൈശ്ചൈവ കരാലശ്ച നിപാതിതഃ .. 3.17..

ദേവീ ക്രുദ്ധാ ഗദാപാതൈശ്ചൂർണയാമാസ ചോദ്ധതം .
ബാഷ്കലം ഭിന്ദിപാലേന ബാണൈസ്താമ്രം തഥാന്ധകം .. 3.18..

ഉഗ്രാസ്യമുഗ്രവീര്യം ച തഥൈവ ച മഹാഹനും .
ത്രിനേത്രാ ച ത്രിശൂലേന ജഘാന പരമേശ്വരീ .. 3.19..

ബിഡാലസ്യാസിനാ കായാത് പാതയാമാസ വൈ ശിരഃ .
ദുർധരം ദുർമുഖം ചോഭൗ ശരൈർനിന്യേ യമക്ഷയം .. 3.20..

ഏവം സങ്ക്ഷീയമാണേ തു സ്വസൈന്യേ മഹിഷാസുരഃ .
മാഹിഷേണ സ്വരൂപേണ ത്രാസയാമാസ താൻ ഗണാൻ .. 3.21..

കാംശ്ചിത്തുണ്ഡപ്രഹാരേണ ഖുരക്ഷേപൈസ്തഥാപരാൻ .
ലാംഗൂലതാഡിതാംശ്ചാന്യാൻ ശൃംഗാഭ്യാം ച വിദാരിതാൻ .. 3.22..

വേഗേന കാംശ്ചിദപരാന്നാദേന ഭ്രമണേന ച .
നിഃശ്വാസപവനേനാന്യാൻപാതയാമാസ ഭൂതലേ .. 3.23..

നിപാത്യ പ്രമഥാനീകമഭ്യധാവത സോഽസുരഃ .
സിംഹം ഹന്തും മഹാദേവ്യാഃ കോപം ചക്രേ തതോഽമ്ബികാ .. 3.24..

സോഽപി കോപാന്മഹാവീര്യഃ ഖുരക്ഷുണ്ണമഹീതലഃ .
ശൃംഗാഭ്യാം പർവതാനുച്ചാംശ്ചിക്ഷേപ ച നനാദ ച .. 3.25..

വേഗഭ്രമണവിക്ഷുണ്ണാ മഹീ തസ്യ വ്യശീര്യത .
ലാംഗൂലേനാഹതശ്ചാബ്ധിഃ പ്ലാവയാമാസ സർവതഃ .. 3.26..

ധുതശൃംഗവിഭിന്നാശ്ച ഖണ്ഡം ഖണ്ഡം യയുർഘനാഃ .
ശ്വാസാനിലാസ്താഃ ശതശോ നിപേതുർനഭസോഽചലാഃ .. 3.27..

ഇതി ക്രോധസമാധ്മാതമാപതന്തം മഹാസുരം .
ദൃഷ്ട്വാ സാ ചണ്ഡികാ കോപം തദ്വധായ തദാകരോത് .. 3.28..

സാ ക്ഷിപ്ത്വാ തസ്യ വൈ പാശം തം ബബന്ധ മഹാസുരം .
തത്യാജ മാഹിഷം രൂപം സോഽപി ബദ്ധോ മഹാമൃധേ .. 3.29..

തതഃ സിംഹോഽഭവത്സദ്യോ യാവത്തസ്യാംബികാ ശിരഃ .
ഛിനത്തി താവത് പുരുഷഃ ഖഡ്ഗപാണിരദൃശ്യത .. 3.30..

തത ഏവാശു പുരുഷം ദേവീ ചിച്ഛേദ സായകൈഃ .
തം ഖഡ്ഗചർമണാ സാർധം തതഃ സോഽഭൂന്മഹാഗജഃ .. 3.31..

കരേണ ച മഹാസിംഹം തം ചകർഷ ജഗർജ ച .
കർഷതസ്തു കരം ദേവീ ഖഡ്ഗേന നിരകൃന്തത .. 3.32..

തതോ മഹാസുരോ ഭൂയോ മാഹിഷം വപുരാസ്ഥിതഃ .
തഥൈവ ക്ഷോഭയാമാസ ത്രൈലോക്യം സചരാചരം .. 3.33..

തതഃ ക്രുദ്ധാ ജഗന്മാതാ ചണ്ഡികാ പാനമുത്തമം .
പപൗ പുനഃ പുനശ്ചൈവ ജഹാസാരുണലോചനാ .. 3.34..

നനർദ ചാസുരഃ സോഽപി ബലവീര്യമദോദ്ധതഃ .
വിഷാണാഭ്യാം ച ചിക്ഷേപ ചണ്ഡികാം പ്രതി ഭൂധരാൻ .. 3.35..

സാ ച താൻപ്രഹിതാംസ്തേന ചൂർണയന്തീ ശരോത്കരൈഃ .
ഉവാച തം മദോദ്ധൂതമുഖരാഗാകുലാക്ഷരം .. 3.36..

ദേവ്യുവാച .. 3.37..

ഗർജ ഗർജ ക്ഷണം മൂഢ മധു യാവത്പിബാമ്യഹം .
മയാ ത്വയി ഹതേഽത്രൈവ ഗർജിഷ്യന്ത്യാശു ദേവതാഃ .. 3.38..

ഋഷിരുവാച .. 3.39..

ഏവമുക്ത്വാ സമുത്പത്യ സാരൂഢാ തം മഹാസുരം .
പാദേനാക്രമ്യ കണ്ഠേ ച ശൂലേനൈനമതാഡയത് .. 3.40..

തതഃ സോഽപി പദാക്രാന്തസ്തയാ നിജമുഖാത്തദാ .
അർധനിഷ്ക്രാന്ത ഏവാസീദ്ദേവ്യാ വീര്യേണ സംവൃതഃ .. 3.41..

അർധനിഷ്ക്രാന്ത ഏവാസൗ യുധ്യമാനോ മഹാസുരഃ .
തയാ മഹാസിനാ ദേവ്യാ ശിരശ്ഛിത്ത്വാ നിപാതിതഃ .. 3.42..

തതോ ഹാഹാകൃതം സർവം ദൈത്യസൈന്യം നനാശ തത് .
പ്രഹർഷം ച പരം ജഗ്മുഃ സകലാ ദേവതാഗണാഃ .. 3.43..

തുഷ്ടുവുസ്താം സുരാ ദേവീം സഹദിവ്യൈർമഹർഷിഭിഃ .
ജഗുർഗന്ധർവപതയോ നനൃതുശ്ചാപ്സരോഗണാഃ .. 3.44..

.. സ്വസ്തി ശ്രീമാർകണ്ഡേയപുരാണേ സാവർണികേ മന്വന്തരേ ദേവീമാഹാത്മ്യേ
മഹിഷാസുരവധോ നാമ തൃതീയോഽധ്യായഃ .. 3..

ഉവാച 3, അർധശ്ലോകാഃ 41, ശ്ലോകാഃ 44, ഏവമാദിതഃ .. 217..

.. 4. ശക്രാദിസ്തുതിർനാമ ചതുർഥോഽധ്യായഃ ..
. ധ്യാനം .
ഓം കാലാഭ്രാഭാം കടാക്ഷൈരരികുലഭയദാം മൗലിബദ്ധേന്ദുരേഖാം
        ശംഖം ചക്രം കൃപാണം ത്രിശിഖമപി കരൈരുദ്വഹന്തീം ത്രിനേത്രാം .
സിംഹസ്കന്ധാധിരൂഢാം ത്രിഭുവനമഖിലം തേജസാ പൂരയന്തീം
        ധ്യായേദ്ദുർഗാം ജയാഖ്യാം ത്രിദശപരിവൃതാം സേവിതാം സിദ്ധികാമൈഃ ..

ഓം ഋഷിരുവാച .. 4.1..

ശക്രാദയഃ സുരഗണാ നിഹതേഽതിവീര്യേ
തസ്മിന്ദുരാത്മനി സുരാരിബലേ ച ദേവ്യാ .
താം തുഷ്ടുവുഃ പ്രണതിനമ്രശിരോധരാംസാ
വാഗ്ഭിഃ പ്രഹർഷപുലകോദ്ഗമചാരുദേഹാഃ .. 4.2..

ദേവ്യാ യയാ തതമിദം ജഗദാത്മശക്ത്യാ
നിഃശേഷദേവഗണശക്തിസമൂഹമൂർത്യാ .
താമംബികാമഖിലദേവമഹർഷിപൂജ്യാം
ഭക്ത്യാ നതാഃ സ്മ വിദധാതു ശുഭാനി സാ നഃ .. 4.3..

യസ്യാഃ പ്രഭാവമതുലം ഭഗവാനനന്തോ
ബ്രഹ്മാ ഹരശ്ച ന ഹി വക്തുമലം ബലം ച .
സാ ചണ്ഡികാഖിലജഗത്പരിപാലനായ
നാശായ ചാശുഭഭയസ്യ മതിം കരോതു .. 4.4..

യാ ശ്രീഃ സ്വയം സുകൃതിനാം ഭവനേഷ്വലക്ഷ്മീഃ
പാപാത്മനാം കൃതധിയാം ഹൃദയേഷു ബുദ്ധിഃ .
ശ്രദ്ധാ സതാം കുലജനപ്രഭവസ്യ ലജ്ജാ
താം ത്വാം നതാഃ സ്മ പരിപാലയ ദേവി വിശ്വം .. 4.5..

കിം വർണയാമ തവ രൂപമചിന്ത്യമേതത്
കിഞ്ചാതിവീര്യമസുരക്ഷയകാരി ഭൂരി .
കിം ചാഹവേഷു ചരിതാനി തവാതി യാനി
സർവേഷു ദേവ്യസുരദേവഗണാദികേഷു .. 4.6..

ഹേതുഃ സമസ്തജഗതാം ത്രിഗുണാപി ദോഷൈ-
ര്ന ജ്ഞായസേ ഹരിഹരാദിഭിരപ്യപാരാ .
സർവാശ്രയാഖിലമിദം ജഗദംശഭൂത-
മവ്യാകൃതാ ഹി പരമാ പ്രകൃതിസ്ത്വമാദ്യാ .. 4.7..

യസ്യാഃ സമസ്തസുരതാ സമുദീരണേന
തൃപ്തിം പ്രയാതി സകലേഷു മഖേഷു ദേവി .
സ്വാഹാസി വൈ പിതൃഗണസ്യ ച തൃപ്തിഹേതു-
രുച്ചാര്യസേ ത്വമത ഏവ ജനൈഃ സ്വധാ ച .. 4.8..

യാ മുക്തിഹേതുരവിചിന്ത്യമഹാവ്രതാ ത്വം
അഭ്യസ്യസേ സുനിയതേന്ദ്രിയതത്ത്വസാരൈഃ .
മോക്ഷാർഥിഭിർമുനിഭിരസ്തസമസ്തദോഷൈ-
ര്വിദ്യാസി സാ ഭഗവതീ പരമാ ഹി ദേവി .. 4.9..

ശബ്ദാത്മികാ സുവിമലർഗ്യജുഷാം നിധാന-
മുദ്ഗീഥരമ്യപദപാഠവതാം ച സാമ്നാം .
ദേവി ത്രയീ ഭഗവതീ ഭവഭാവനായ
വാർതാസി സർവജഗതാം പരമാർതിഹന്ത്രീ .. 4.10..

മേധാസി ദേവി വിദിതാഖിലശാസ്ത്രസാരാ
ദുർഗാസി ദുർഗഭവസാഗരനൗരസംഗാ .
ശ്രീഃ കൈടഭാരിഹൃദയൈകകൃതാധിവാസാ
ഗൗരീ ത്വമേവ ശശിമൗലികൃതപ്രതിഷ്ഠാ .. 4.11..

ഈഷത്സഹാസമമലം പരിപൂർണചന്ദ്ര-
ബിംബാനുകാരി കനകോത്തമകാന്തികാന്തം .
അത്യദ്ഭുതം പ്രഹൃതമാത്തരുഷാ തഥാപി
വക്ത്രം വിലോക്യ സഹസാ മഹിഷാസുരേണ .. 4.12..

ദൃഷ്ട്വാ തു ദേവി കുപിതം ഭ്രുകുടീകരാല-
മുദ്യച്ഛശാങ്കസദൃശച്ഛവി യന്ന സദ്യഃ .
പ്രാണാൻ മുമോച മഹിഷസ്തദതീവ ചിത്രം
കൈർജീവ്യതേ ഹി കുപിതാന്തകദർശനേന .. 4.13..

ദേവി പ്രസീദ പരമാ ഭവതീ ഭവായ
സദ്യോ വിനാശയസി കോപവതീ കുലാനി .
വിജ്ഞാതമേതദധുനൈവ യദസ്തമേത-
ന്നീതം ബലം സുവിപുലം മഹിഷാസുരസ്യ .. 4.14..

തേ സമ്മതാ ജനപദേഷു ധനാനി തേഷാം
തേഷാം യശാംസി ന ച സീദതി ബന്ധുവർഗഃ .
ധന്യാസ്ത ഏവ നിഭൃതാത്മജഭൃത്യദാരാ
യേഷാം സദാഭ്യുദയദാ ഭവതീ പ്രസന്നാ .. 4.15..

ധർമ്യാണി ദേവി സകലാനി സദൈവ കർമാ-
ണ്യത്യാദൃതഃ പ്രതിദിനം സുകൃതീ കരോതി .
സ്വർഗം പ്രയാതി ച തതോ ഭവതീ പ്രസാദാ-
ല്ലോകത്രയേഽപി ഫലദാ നനു ദേവി തേന .. 4.16..

ദുർഗേ സ്മൃതാ ഹരസി ഭീതിമശേഷജന്തോഃ
സ്വസ്ഥൈഃ സ്മൃതാ മതിമതീവ ശുഭാം ദദാസി .
ദാരിദ്ര്യദുഃഖഭയഹാരിണി കാ ത്വദന്യാ
സർവോപകാരകരണായ സദാർദ്രചിത്താ .. 4.17..

ഏഭിർഹതൈർജഗദുപൈതി സുഖം തഥൈതേ
കുർവന്തു നാമ നരകായ ചിരായ പാപം .
സംഗ്രാമമൃത്യുമധിഗമ്യ ദിവം പ്രയാന്തു
മത്വേതി നൂനമഹിതാന്വിനിഹംസി ദേവി .. 4.18..

ദൃഷ്ട്വൈവ കിം ന ഭവതീ പ്രകരോതി ഭസ്മ
സർവാസുരാനരിഷു യത്പ്രഹിണോഷി ശസ്ത്രം .
ലോകാൻപ്രയാന്തു രിപവോഽപി ഹി ശസ്ത്രപൂതാ
ഇത്ഥം മതിർഭവതി തേഷ്വഹിതേഷുസാധ്വീ .. 4.19..

ഖഡ്ഗപ്രഭാനികരവിസ്ഫുരണൈസ്തഥോഗ്രൈഃ
ശൂലാഗ്രകാന്തിനിവഹേന ദൃശോഽസുരാണാം .
യന്നാഗതാ വിലയമംശുമദിന്ദുഖണ്ഡ-
യോഗ്യാനനം തവ വിലോകയതാം തദേതത് .. 4.20..

ദുർവൃത്തവൃത്തശമനം തവ ദേവി ശീലം
രൂപം തഥൈതദവിചിന്ത്യമതുല്യമന്യൈഃ .
വീര്യം ച ഹന്തൃ ഹൃതദേവപരാക്രമാണാം
വൈരിഷ്വപി പ്രകടിതൈവ ദയാ ത്വയേത്ഥം .. 4.21..

കേനോപമാ ഭവതു തേഽസ്യ പരാക്രമസ്യ
രൂപം ച ശത്രുഭയകാര്യതിഹാരി കുത്ര .
ചിത്തേ കൃപാ സമരനിഷ്ഠുരതാ ച ദൃഷ്ടാ
ത്വയ്യേവ ദേവി വരദേ ഭുവനത്രയേഽപി .. 4.22..

ത്രൈലോക്യമേതദഖിലം രിപുനാശനേന
ത്രാതം ത്വയാ സമരമൂർധനി തേഽപി ഹത്വാ .
നീതാ ദിവം രിപുഗണാ ഭയമപ്യപാസ്തം
അസ്മാകമുന്മദസുരാരിഭവം നമസ്തേ .. 4.23..

ശൂലേന പാഹി നോ ദേവി പാഹി ഖഡ്ഗേന ചാംബികേ .
ഘണ്ടാസ്വനേന നഃ പാഹി ചാപജ്യാനിഃസ്വനേന ച .. 4.24..

പ്രാച്യാം രക്ഷ പ്രതീച്യാം ച ചണ്ഡികേ രക്ഷ ദക്ഷിണേ .
ഭ്രാമണേനാത്മശൂലസ്യ ഉത്തരസ്യാം തഥേശ്വരി .. 4.25..

സൗമ്യാനി യാനി രൂപാണി ത്രൈലോക്യേ വിചരന്തി തേ .
യാനി ചാത്യന്തഘോരാണി തൈ രക്ഷാസ്മാംസ്തഥാ ഭുവം .. 4.26..

ഖഡ്ഗശൂലഗദാദീനി യാനി ചാസ്ത്രാനി തേഽമ്ബികേ .
കരപല്ലവസംഗീനി തൈരസ്മാന്രക്ഷ സർവതഃ .. 4.27..

        ഋഷിരുവാച .. 4.28..

ഏവം സ്തുതാ സുരൈർദിവ്യൈഃ കുസുമൈർനന്ദനോദ്ഭവൈഃ .
അർചിതാ ജഗതാം ധാത്രീ തഥാ ഗന്ധാനുലേപനൈഃ .. 4.29..

ഭക്ത്യാ സമസ്തൈസ്ത്രിദശൈർദിവ്യൈർധൂപൈഃ സുധൂപിതാ .
പ്രാഹ പ്രസാദസുമുഖീ സമസ്താൻ പ്രണതാൻ സുരാൻ .. 4.30..

        ദേവ്യുവാച .. 4.31..

വ്രിയതാം ത്രിദശാഃ സർവേ യദസ്മത്തോഽഭിവാഞ്ഛിതം .. 4.32..

        ദേവാ ഊചുഃ .. 4.33..

ഭഗവത്യാ കൃതം സർവം ന കിഞ്ചിദവശിഷ്യതേ .. 4.34..

യദയം നിഹതഃ ശത്രുരസ്മാകം മഹിഷാസുരഃ .
യദി ചാപി വരോ ദേയസ്ത്വയാസ്മാകം മഹേശ്വരി .. 4.35..

സംസ്മൃതാ സംസ്മൃതാ ത്വം നോ ഹിംസേഥാഃ പരമാപദഃ .
യശ്ച മർത്യഃ സ്തവൈരേഭിസ്ത്വാം സ്തോഷ്യത്യമലാനനേ .. 4.36..

തസ്യ വിത്തർദ്ധിവിഭവൈർധനദാരാദിസമ്പദാം .
വൃദ്ധയേഽസ്മത്പ്രസന്നാ ത്വം ഭവേഥാഃ സർവദാംബികേ .. 4.37..

        ഋഷിരുവാച .. 4.38..

ഇതി പ്രസാദിതാ ദേവൈർജഗതോഽർഥേ തഥാത്മനഃ .
തഥേത്യുക്ത്വാ ഭദ്രകാലീ ബഭൂവാന്തർഹിതാ നൃപ .. 4.39..

ഇത്യേതത്കഥിതം ഭൂപ സംഭൂതാ സാ യഥാ പുരാ .
ദേവീ ദേവശരീരേഭ്യോ ജഗത്ത്രയഹിതൈഷിണീ .. 4.40..

പുനശ്ച ഗൗരീദേഹാത്സാ സമുദ്ഭൂതാ യഥാഭവത് .
വധായ ദുഷ്ടദൈത്യാനാം തഥാ ശുംഭനിശുംഭയോഃ .. 4.41..

രക്ഷണായ ച ലോകാനാം ദേവാനാമുപകാരിണീ .
തച്ഛൃണുഷ്വ മയാഖ്യാതം യഥാവത്കഥയാമി തേ .. 4.42..

. ഹ്രീം ഓം .

.. സ്വസ്തി ശ്രീമാർകണ്ഡേയപുരാണേ സാവർണികേ മന്വന്തരേ
ദേവീമാഹാത്മ്യേ ശക്രാദിസ്തുതിർനാമ ചതുർഥോഽധ്യായഃ .. 4..

ഉവാച 5, അർധശ്ലോകൗ 2, ശ്ലോകാഃ 35, ഏവമാദിതഃ .. 259..

.. 5. ദേവ്യാ ദൂതസംവാദോ നാമ പഞ്ചമോഽധ്യായഃ ..
വിനിയോഗഃ
അസ്യ ശ്രീ ഉത്തരചരിത്രസ്യ രുദ്ര ഋഷിഃ .
ശ്രീമഹാസരസ്വതീ ദേവതാ .
അനുഷ്ടുപ് ഛന്ദഃ . ഭീമാ ശക്തിഃ . ഭ്രാമരീ ബീജം .
സൂര്യസ്തത്ത്വം .
സാമവേദഃ സ്വരൂപം . ശ്രീമഹാസരസ്വതീപ്രീത്യർഥേ
ഉത്തരചരിത്രപാഠേ വിനിയോഗഃ .

. ധ്യാനം .
ഘണ്ടാശൂലഹലാനി ശംഖമുസലേ ചക്രം ധനുഃ സായകം
        ഹസ്താബ്ജൈർദധതീം ഘനാന്തവിലസച്ഛീതാംശുതുല്യപ്രഭാം .
ഗൗരീദേഹസമുദ്ഭവാം ത്രിജഗതാമാധാരഭൂതാം മഹാ-
        പൂർവാമത്ര സരസ്വതീമനുഭജേ ശുംഭാദിദൈത്യാർദിനീം ..

ഓം ക്ലീം ഋഷിരുവാച .. 5.1..

പുരാ ശുംഭനിശുംഭാഭ്യാമസുരാഭ്യാം ശചീപതേഃ .
ത്രൈലോക്യം യജ്ഞഭാഗാശ്ച ഹൃതാ മദബലാശ്രയാത് .. 5.2..

താവേവ സൂര്യതാം തദ്വദധികാരം തഥൈന്ദവം .
കൗബേരമഥ യാമ്യം ച ചക്രാതേ വരുണസ്യ ച .. 5.3..

താവേവ പവനർദ്ധിം ച ചക്രതുർവഹ്നികർമ ച .
തതോ ദേവാ വിനിർധൂതാ ഭ്രഷ്ടരാജ്യാഃ പരാജിതാഃ .. 5.4..

ഹൃതാധികാരാസ്ത്രിദശാസ്താഭ്യാം സർവേ നിരാകൃതാഃ .
മഹാസുരാഭ്യാം താം ദേവീം സംസ്മരന്ത്യപരാജിതാം .. 5.5..

തയാസ്മാകം വരോ ദത്തോ യഥാപത്സു സ്മൃതാഖിലാഃ .
ഭവതാം നാശയിഷ്യാമി തത്ക്ഷണാത്പരമാപദഃ .. 5.6..

ഇതി കൃത്വാ മതിം ദേവാ ഹിമവന്തം നഗേശ്വരം .
ജഗ്മുസ്തത്ര തതോ ദേവീം വിഷ്ണുമായാം പ്രതുഷ്ടുവുഃ .. 5.7..

ദേവാ ഊചുഃ .. 5.8..

നമോ ദേവ്യൈ മഹാദേവ്യൈ ശിവായൈ സതതം നമഃ .
നമഃ പ്രകൃത്യൈ ഭദ്രായൈ നിയതാഃ പ്രണതാഃ സ്മ താം .. 5.9..

രൗദ്രായൈ നമോ നിത്യായൈ ഗൗര്യൈ ധാത്ര്യൈ നമോ നമഃ .
ജ്യോത്സ്നായൈ ചേന്ദുരൂപിണ്യൈ സുഖായൈ സതതം നമഃ .. 5.10..

കല്യാണ്യൈ പ്രണതാം വൃദ്ധ്യൈ സിദ്ധ്യൈ കുർമോ നമോ നമഃ .
നൈരൃത്യൈ ഭൂഭൃതാം ലക്ഷ്മ്യൈ ശർവാണ്യൈ തേ നമോ നമഃ .. 5.11..

ദുർഗായൈ ദുർഗപാരായൈ സാരായൈ സർവകാരിണ്യൈ .
ഖ്യാത്യൈ തഥൈവ കൃഷ്ണായൈ ധൂമ്രായൈ സതതം നമഃ .. 5.12..

അതിസൗമ്യാതിരൗദ്രായൈ നതാസ്തസ്യൈ നമോ നമഃ .
നമോ ജഗത്പ്രതിഷ്ഠായൈ ദേവ്യൈ കൃത്യൈ നമോ നമഃ .. 5.13..

യാ ദേവീ സർവഭൂതേഷു വിഷ്ണുമായേതി ശബ്ദിതാ .
നമസ്തസ്യൈ നമസ്തസ്യൈ നമസ്തസ്യൈ നമോ നമഃ .. 5.14-16..

യാ ദേവീ സർവഭൂതേഷു ചേതനേത്യഭിധീയതേ .
നമസ്തസ്യൈ നമസ്തസ്യൈ നമസ്തസ്യൈ നമോ നമഃ .. 5.17-19..

യാ ദേവീ സർവഭൂതേഷു ബുദ്ധിരൂപേണ സംസ്ഥിതാ .
നമസ്തസ്യൈ നമസ്തസ്യൈ നമസ്തസ്യൈ നമോ നമഃ .. 5.20-22..

യാ ദേവീ സർവഭൂതേഷു നിദ്രാരൂപേണ സംസ്ഥിതാ .
നമസ്തസ്യൈ നമസ്തസ്യൈ നമസ്തസ്യൈ നമോ നമഃ .. 5.23-25..

യാ ദേവീ സർവഭൂതേഷു ക്ഷുധാരൂപേണ സംസ്ഥിതാ .
നമസ്തസ്യൈ നമസ്തസ്യൈ നമസ്തസ്യൈ നമോ നമഃ .. 5.26-28..

യാ ദേവീ സർവഭൂതേഷു ഛായാരൂപേണ സംസ്ഥിതാ .
നമസ്തസ്യൈ നമസ്തസ്യൈ നമസ്തസ്യൈ നമോ നമഃ .. 5.29-31..

യാ ദേവീ സർവഭൂതേഷു ശക്തിരൂപേണ സംസ്ഥിതാ .
നമസ്തസ്യൈ നമസ്തസ്യൈ നമസ്തസ്യൈ നമോ നമഃ .. 5.32-34..

യാ ദേവീ സർവഭൂതേഷു തൃഷ്ണാരൂപേണ സംസ്ഥിതാ .
നമസ്തസ്യൈ നമസ്തസ്യൈ നമസ്തസ്യൈ നമോ നമഃ .. 5.35-37..

യാ ദേവീ സർവഭൂതേഷു ക്ഷാന്തിരൂപേണ സംസ്ഥിതാ .
നമസ്തസ്യൈ നമസ്തസ്യൈ നമസ്തസ്യൈ നമോ നമഃ .. 5.38-40..

യാ ദേവീ സർവഭൂതേഷു ജാതിരൂപേണ സംസ്ഥിതാ .
നമസ്തസ്യൈ നമസ്തസ്യൈ നമസ്തസ്യൈ നമോ നമഃ .. 5.41-43..

യാ ദേവീ സർവഭൂതേഷു ലജ്ജാരൂപേണ സംസ്ഥിതാ .
നമസ്തസ്യൈ നമസ്തസ്യൈ നമസ്തസ്യൈ നമോ നമഃ .. 5.44-46..

യാ ദേവീ സർവഭൂതേഷു ശാന്തിരൂപേണ സംസ്ഥിതാ .
നമസ്തസ്യൈ നമസ്തസ്യൈ നമസ്തസ്യൈ നമോ നമഃ .. 5.47-49..

യാ ദേവീ സർവഭൂതേഷു ശ്രദ്ധാരൂപേണ സംസ്ഥിതാ .
നമസ്തസ്യൈ നമസ്തസ്യൈ നമസ്തസ്യൈ നമോ നമഃ .. 5.50-52..

യാ ദേവീ സർവഭൂതേഷു കാന്തിരൂപേണ സംസ്ഥിതാ .
നമസ്തസ്യൈ നമസ്തസ്യൈ നമസ്തസ്യൈ നമോ നമഃ .. 5.53-55..

യാ ദേവീ സർവഭൂതേഷു ലക്ഷ്മീരൂപേണ സംസ്ഥിതാ .
നമസ്തസ്യൈ നമസ്തസ്യൈ നമസ്തസ്യൈ നമോ നമഃ .. 5.56-58..

യാ ദേവീ സർവഭൂതേഷു വൃത്തിരൂപേണ സംസ്ഥിതാ .
നമസ്തസ്യൈ നമസ്തസ്യൈ നമസ്തസ്യൈ നമോ നമഃ .. 5.59-61..

യാ ദേവീ സർവഭൂതേഷു സ്മൃതിരൂപേണ സംസ്ഥിതാ .
നമസ്തസ്യൈ നമസ്തസ്യൈ നമസ്തസ്യൈ നമോ നമഃ .. 5.62-64..

യാ ദേവീ സർവഭൂതേഷു ദയാരൂപേണ സംസ്ഥിതാ .
നമസ്തസ്യൈ നമസ്തസ്യൈ നമസ്തസ്യൈ നമോ നമഃ .. 5.65-67..

യാ ദേവീ സർവഭൂതേഷു തുഷ്ടിരൂപേണ സംസ്ഥിതാ .
നമസ്തസ്യൈ നമസ്തസ്യൈ നമസ്തസ്യൈ നമോ നമഃ .. 5.68-70..

യാ ദേവീ സർവഭൂതേഷു മാതൃരൂപേണ സംസ്ഥിതാ .
നമസ്തസ്യൈ നമസ്തസ്യൈ നമസ്തസ്യൈ നമോ നമഃ .. 5.71-73..

യാ ദേവീ സർവഭൂതേഷു ഭ്രാന്തിരൂപേണ സംസ്ഥിതാ .
നമസ്തസ്യൈ നമസ്തസ്യൈ നമസ്തസ്യൈ നമോ നമഃ .. 5.74-76..

ഇന്ദ്രിയാണാമധിഷ്ഠാത്രീ ഭൂതാനാം ചാഖിലേഷു യാ .
ഭൂതേഷു സതതം തസ്യൈ വ്യാപ്ത്യൈ ദേവ്യൈ നമോ നമഃ .. 5.77..

ചിതിരൂപേണ യാ കൃത്സ്നമേതദ് വ്യാപ്യ സ്ഥിതാ ജഗത് .
നമസ്തസ്യൈ നമസ്തസ്യൈ നമസ്തസ്യൈ നമോ നമഃ .. 5.78-80..

സ്തുതാ സുരൈഃ പൂർവമഭീഷ്ടസംശ്രയാ-
ത്തഥാ സുരേന്ദ്രേണ ദിനേഷു സേവിതാ .
കരോതു സാ നഃ ശുഭഹേതുരീശ്വരീ
ശുഭാനി ഭദ്രാണ്യഭിഹന്തു ചാപദഃ .. 5.81..

യാ സാമ്പ്രതം ചോദ്ധതദൈത്യതാപിതൈ-
രസ്മാഭിരീശാ ച സുരൈർനമസ്യതേ .
യാ ച സ്മൃതാ തത്ക്ഷണമേവ ഹന്തി നഃ
സർവാപദോ ഭക്തിവിനമ്രമൂർതിഭിഃ .. 5.82..

ഋഷിരുവാച .. 5.83..

ഏവം സ്തവാഭിയുക്താനാം ദേവാനാം തത്ര പാർവതീ .
സ്നാതുമഭ്യായയൗ തോയേ ജാഹ്നവ്യാ നൃപനന്ദന .. 5.84..

സാബ്രവീത്താൻ സുരാൻ സുഭ്രൂർഭവദ്ഭിഃ സ്തൂയതേഽത്ര കാ .
ശരീരകോശതശ്ചാസ്യാഃ സമുദ്ഭൂതാബ്രവീച്ഛിവാ .. 5.85..

സ്തോത്രം മമൈതത്ക്രിയതേ ശുംഭദൈത്യനിരാകൃതൈഃ .
ദേവൈഃ സമേതൈഃ സമരേ നിശുംഭേന പരാജിതൈഃ .. 5.86..

ശരീരകോശാദ്യത്തസ്യാഃ പാർവത്യാ നിഃസൃതാംബികാ .
കൗശികീതി സമസ്തേഷു തതോ ലോകേഷു ഗീയതേ .. 5.87..

തസ്യാം വിനിർഗതായാം തു കൃഷ്ണാഭൂത്സാപി പാർവതീ .
കാലികേതി സമാഖ്യാതാ ഹിമാചലകൃതാശ്രയാ .. 5.88..

തതോഽമ്ബികാം പരം രൂപം ബിഭ്രാണാം സുമനോഹരം .
ദദർശ ചണ്ഡോ മുണ്ഡശ്ച ഭൃത്യൗ ശുംഭനിശുംഭയോഃ .. 5.89..

താഭ്യാം ശുംഭായ ചാഖ്യാതാ സാതീവ സുമനോഹരാ .
കാപ്യാസ്തേ സ്ത്രീ മഹാരാജ ഭാസയന്തീ ഹിമാചലം .. 5.90..

നൈവ താദൃക് ക്വചിദ്രൂപം ദൃഷ്ടം കേനചിദുത്തമം .
ജ്ഞായതാം കാപ്യസൗ ദേവീ ഗൃഹ്യതാം ചാസുരേശ്വര .. 5.91..

സ്ത്രീരത്നമതിചാർവംഗീ ദ്യോതയന്തീ ദിശസ്ത്വിഷാ .
സാ തു തിഷ്ഠതി ദൈത്യേന്ദ്ര താം ഭവാൻ ദ്രഷ്ടുമർഹതി .. 5.92..

യാനി രത്നാനി മണയോ ഗജാശ്വാദീനി വൈ പ്രഭോ .
ത്രൈലോക്യേ തു സമസ്താനി സാമ്പ്രതം ഭാന്തി തേ ഗൃഹേ .. 5.93..

ഐരാവതഃ സമാനീതോ ഗജരത്നം പുരന്ദരാത് .
പാരിജാതതരുശ്ചായം തഥൈവോച്ചൈഃശ്രവാ ഹയഃ .. 5.94..

വിമാനം ഹംസസംയുക്തമേതത്തിഷ്ഠതി തേഽങ്ഗണേ .
രത്നഭൂതമിഹാനീതം യദാസീദ്വേധസോഽദ്ഭുതം .. 5.95..

നിധിരേഷ മഹാപദ്മഃ സമാനീതോ ധനേശ്വരാത് .
കിഞ്ജൽകിനീം ദദൗ ചാബ്ധിർമാലാമമ്ലാനപങ്കജാം .. 5.96..

ഛത്രം തേ വാരുണം ഗേഹേ കാഞ്ചനസ്രാവി തിഷ്ഠതി .
തഥായം സ്യന്ദനവരോ യഃ പുരാസീത്പ്രജാപതേഃ .. 5.97..

മൃത്യോരുത്ക്രാന്തിദാ നാമ ശക്തിരീശ ത്വയാ ഹൃതാ .
പാശഃ സലിലരാജസ്യ ഭ്രാതുസ്തവ പരിഗ്രഹേ .. 5.98..

നിശുംഭസ്യാബ്ധിജാതാശ്ച സമസ്താ രത്നജാതയഃ .
വഹ്നിരപി ദദൗ തുഭ്യമഗ്നിശൗചേ ച വാസസീ .. 5.99..

ഏവം ദൈത്യേന്ദ്ര രത്നാനി സമസ്താന്യാഹൃതാനി തേ .
സ്ത്രീരത്നമേഷാ കല്യാണീ ത്വയാ കസ്മാന്ന ഗൃഹ്യതേ .. 5.100..

ഋഷിരുവാച .. 5.101..

നിശമ്യേതി വചഃ ശുംഭഃ സ തദാ ചണ്ഡമുണ്ഡയോഃ .
പ്രേഷയാമാസ സുഗ്രീവം ദൂതം ദേവ്യാ മഹാസുരം .. 5.102..

ഇതി ചേതി ച വക്തവ്യാ സാ ഗത്വാ വചനാന്മമ .
യഥാ ചാഭ്യേതി സമ്പ്രീത്യാ തഥാ കാര്യം ത്വയാ ലഘു .. 5.103..

സ തത്ര ഗത്വാ യത്രാസ്തേ ശൈലോദ്ദേശേഽതിശോഭനേ .
താം ച ദേവീം തതഃ പ്രാഹ ശ്ലക്ഷ്ണം മധുരയാ ഗിരാ .. 5.104..

ദൂത ഉവാച .. 5.105..

ദേവി ദൈത്യേശ്വരഃ ശുംഭസ്ത്രൈലോക്യേ പരമേശ്വരഃ .
ദൂതോഽഹം പ്രേഷിതസ്തേന ത്വത്സകാശമിഹാഗതഃ .. 5.106..

അവ്യാഹതാജ്ഞഃ സർവാസു യഃ സദാ ദേവയോനിഷു .
നിർജിതാഖിലദൈത്യാരിഃ സ യദാഹ ശൃണുഷ്വ തത് .. 5.107..

മമ ത്രൈലോക്യമഖിലം മമ ദേവാ വശാനുഗാഃ .
യജ്ഞഭാഗാനഹം സർവാനുപാശ്നാമി പൃഥക് പൃഥക് .. 5.108..

ത്രൈലോക്യേ വരരത്നാനി മമ വശ്യാന്യശേഷതഃ .
തഥൈവ ഗജരത്നം ച ഹൃതം ദേവേന്ദ്രവാഹനം .. 5.109..

ക്ഷീരോദമഥനോദ്ഭൂതമശ്വരത്നം മമാമരൈഃ .
ഉച്ചൈഃശ്രവസസഞ്ജ്ഞം തത്പ്രണിപത്യ സമർപിതം .. 5.110..

യാനി ചാന്യാനി ദേവേഷു ഗന്ധർവേഷൂരഗേഷു ച .
രത്നഭൂതാനി ഭൂതാനി താനി മയ്യേവ ശോഭനേ .. 5.111..

സ്ത്രീരത്നഭൂതാം ത്വാം ദേവി ലോകേ മന്യാമഹേ വയം .
സാ ത്വമസ്മാനുപാഗച്ഛ യതോ രത്നഭുജോ വയം .. 5.112..

മാം വാ മമാനുജം വാപി നിശുംഭമുരുവിക്രമം .
ഭജ ത്വം ചഞ്ചലാപാംഗി രത്നഭൂതാസി വൈ യതഃ .. 5.113..

പരമൈശ്വര്യമതുലം പ്രാപ്സ്യസേ മത്പരിഗ്രഹാത് .
ഏതദ്ബുദ്ധ്യാ സമാലോച്യ മത്പരിഗ്രഹതാം വ്രജ .. 5.114..

ഋഷിരുവാച .. 5.115..

ഇത്യുക്താ സാ തദാ ദേവീ ഗംഭീരാന്തഃസ്മിതാ ജഗൗ .
ദുർഗാ ഭഗവതീ ഭദ്രാ യയേദം ധാര്യതേ ജഗത് .. 5.116..

ദേവ്യുവാച .. 5.117..

സത്യമുക്തം ത്വയാ നാത്ര മിഥ്യാ കിഞ്ചിത്ത്വയോദിതം .
ത്രൈലോക്യാധിപതിഃ ശുംഭോ നിശുംഭശ്ചാപി താദൃശഃ .. 5.118..

കിം ത്വത്ര യത്പ്രതിജ്ഞാതം മിഥ്യാ തത്ക്രിയതേ കഥം .
ശ്രൂയതാമല്പബുദ്ധിത്വാത്പ്രതിജ്ഞാ യാ കൃതാ പുരാ .. 5.119..

യോ മാം ജയതി സംഗ്രാമേ യോ മേ ദർപം വ്യപോഹതി .
യോ മേ പ്രതിബലോ ലോകേ സ മേ ഭർതാ ഭവിഷ്യതി .. 5.120..

തദാഗച്ഛതു ശുംഭോഽത്ര നിശുംഭോ വാ മഹാബലഃ .
മാം ജിത്വാ കിം ചിരേണാത്ര പാണിം ഗൃഹ്ണാതു മേ ലഘു .. 5.121..

ദൂത ഉവാച .. 5.122..

അവലിപ്താസി മൈവം ത്വം ദേവി ബ്രൂഹി മമാഗ്രതഃ .
ത്രൈലോക്യേ കഃ പുമാംസ്തിഷ്ഠേദഗ്രേ ശുംഭനിശുംഭയോഃ .. 5.123..

അന്യേഷാമപി ദൈത്യാനാം സർവേ ദേവാ ന വൈ യുധി .
തിഷ്ഠന്തി സമ്മുഖേ ദേവി കിം പുനഃ സ്ത്രീ ത്വമേകികാ .. 5.124..

ഇന്ദ്രാദ്യാഃ സകലാ ദേവാസ്തസ്ഥുര്യേഷാം ന സംയുഗേ .
ശുംഭാദീനാം കഥം തേഷാം സ്ത്രീ പ്രയാസ്യസി സമ്മുഖം .. 5.125..

സാ ത്വം ഗച്ഛ മയൈവോക്താ പാർശ്വം ശുംഭനിശുംഭയോഃ .
കേശാകർഷണനിർധൂതഗൗരവാ മാ ഗമിഷ്യസി .. 5.126..

ദേവ്യുവാച .. 5.127..

ഏവമേതദ് ബലീ ശുംഭോ നിശുംഭശ്ചാപിതാദൃശഃ .
കിം കരോമി പ്രതിജ്ഞാ മേ യദനാലോചിതാ പുരാ .. 5.128..

സ ത്വം ഗച്ഛ മയോക്തം തേ യദേതത്സർവമാദൃതഃ .
തദാചക്ഷ്വാസുരേന്ദ്രായ സ ച യുക്തം കരോതു യത് .. 5.129..

.. സ്വസ്തി ശ്രീമാർകണ്ഡേയപുരാണേ സാവർണികേ മന്വന്തരേ ദേവീമാഹാത്മ്യേ
ദേവ്യാ ദൂതസംവാദോ നാമ പഞ്ചമോഽധ്യായഃ .. 5..

ഉവാച 9, ത്രിപാന്മന്ത്രാഃ 66, ശ്ലോകാഃ 54, ഏവമാദിതഃ .. 388..

.. 6. ശുംഭനിശുംഭസേനാനീധൂമ്രലോചനവധോ നാമ ഷഷ്ഠോഽധ്യായഃ ..
. ധ്യാനം .
ഓം നാഗാധീശ്വരവിഷ്ടരാം ഫണിഫണോത്തംസോരു രത്നാവലീ-
        ഭാസ്വദ്ദേഹലതാം ദിവാകരനിഭാം നേത്രത്രയോദ്ഭാസിതാം .
മാലാകുംഭകപാലനീരജകരാം ചന്ദ്രാർധചൂഡാം പരാം
        സർവജ്ഞേശ്വരഭൈരവാംഗനിലയാം പദ്മാവതീം ചിന്തയേ ..

ഓം ഋഷിരുവാച .. 6.1..

ഇത്യാകർണ്യ വചോ ദേവ്യാഃ സ ദൂതോഽമർഷപൂരിതഃ .
സമാചഷ്ട സമാഗമ്യ ദൈത്യരാജായ വിസ്തരാത് .. 6.2..

തസ്യ ദൂതസ്യ തദ്വാക്യമാകർണ്യാസുരരാട് തതഃ .
സക്രോധഃ പ്രാഹ ദൈത്യാനാമധിപം ധൂമ്രലോചനം .. 6.3..

ഹേ ധൂമ്രലോചനാശു ത്വം സ്വസൈന്യപരിവാരിതഃ .
താമാനയ ബലാദ്ദുഷ്ടാം കേശാകർഷണവിഹ്വലാം .. 6.4..

തത്പരിത്രാണദഃ കശ്ചിദ്യദി വോത്തിഷ്ഠതേഽപരഃ .
സ ഹന്തവ്യോഽമരോ വാപി യക്ഷോ ഗന്ധർവ ഏവ വാ .. 6.5..

ഋഷിരുവാച .. 6.6..

തേനാജ്ഞപ്തസ്തതഃ ശീഘ്രം സ ദൈത്യോ ധൂമ്രലോചനഃ .
വൃതഃ ഷഷ്ട്യാ സഹസ്രാണാമസുരാണാം ദ്രുതം യയൗ .. 6.7..

സ ദൃഷ്ട്വാ താം തതോ ദേവീം തുഹിനാചലസംസ്ഥിതാം .
ജഗാദോച്ചൈഃ പ്രയാഹീതി മൂലം ശുംഭനിശുംഭയോഃ .. 6.8..

ന ചേത്പ്രീത്യാദ്യ ഭവതീ മദ്ഭർതാരമുപൈഷ്യതി .
തതോ ബലാന്നയാമ്യേഷ കേശാകർഷണവിഹ്വലാം .. 6.9..

ദേവ്യുവാച .. 6.10..

ദൈത്യേശ്വരേണ പ്രഹിതോ ബലവാൻബലസംവൃതഃ .
ബലാന്നയസി മാമേവം തതഃ കിം തേ കരോമ്യഹം .. 6.11..

ഋഷിരുവാച .. 6.12..

ഇത്യുക്തഃ സോഽഭ്യധാവത്താമസുരോ ധൂമ്രലോചനഃ .
ഹുങ്കാരേണൈവ തം ഭസ്മ സാ ചകാരാംബികാ തദാ .. 6.13..

അഥ ക്രുദ്ധം മഹാസൈന്യമസുരാണാം തഥാംബികാ .
വവർഷ സായകൈസ്തീക്ഷ്ണൈസ്തഥാ ശക്തിപരശ്വധൈഃ .. 6.14..

തതോ ധുതസടഃ കോപാത്കൃത്വാ നാദം സുഭൈരവം .
പപാതാസുരസേനായാം സിംഹോ ദേവ്യാഃ സ്വവാഹനഃ .. 6.15..

കാംശ്ചിത്കരപ്രഹാരേണ ദൈത്യാനാസ്യേന ചാപരാൻ .
ആക്രാന്ത്യാ ചാധരേണാന്യാൻ ജഘാന സ മഹാസുരാൻ .. 6.16..

കേഷാഞ്ചിത്പാടയാമാസ നഖൈഃ കോഷ്ഠാനി കേസരീ .
തഥാ തലപ്രഹാരേണ ശിരാംസി കൃതവാൻപൃഥക് .. 6.17..

വിച്ഛിന്നബാഹുശിരസഃ കൃതാസ്തേന തഥാപരേ .
പപൗ ച രുധിരം കോഷ്ഠാദന്യേഷാം ധുതകേസരഃ .. 6.18..

ക്ഷണേന തദ്ബലം സർവം ക്ഷയം നീതം മഹാത്മനാ .
തേന കേസരിണാ ദേവ്യാ വാഹനേനാതികോപിനാ .. 6.19..

ശ്രുത്വാ തമസുരം ദേവ്യാ നിഹതം ധൂമ്രലോചനം .
ബലം ച ക്ഷയിതം കൃത്സ്നം ദേവീകേസരിണാ തതഃ .. 6.20..

ചുകോപ ദൈത്യാധിപതിഃ ശുംഭഃ പ്രസ്ഫുരിതാധരഃ .
ആജ്ഞാപയാമാസ ച തൗ ചണ്ഡമുണ്ഡൗ മഹാസുരൗ .. 6.21..

ഹേ ചണ്ഡ ഹേ മുണ്ഡ ബലൈർബഹുഭിഃ പരിവാരിതൗ .
തത്ര ഗച്ഛത ഗത്വാ ച സാ സമാനീയതാം ലഘു .. 6.22..

കേശേഷ്വാകൃഷ്യ ബദ്ധ്വാ വാ യദി വഃ സംശയോ യുധി .
തദാശേഷായുധൈഃ സർവൈരസുരൈർവിനിഹന്യതാം .. 6.23..

തസ്യാം ഹതായാം ദുഷ്ടായാം സിംഹേ ച വിനിപാതിതേ .
ശീഘ്രമാഗമ്യതാം ബദ്ധ്വാ ഗൃഹീത്വാ താമഥാംബികാം .. 6.24..

.. സ്വസ്തി ശ്രീമാർകണ്ഡേയപുരാണേ സാവർണികേ മന്വന്തരേ ദേവീമാഹാത്മ്യേ
ശുംഭനിശുംഭസേനാനീധൂമ്രലോചനവധോ നാമ ഷഷ്ഠോഽധ്യായഃ .. 6..

ഉവാച 4, ശ്ലോകാഃ 24, ഏവമാദിതഃ .. 412..

.. 7. ചണ്ഡമുണ്ഡവധോ നാമ സപ്തമോഽധ്യായഃ ..
. ധ്യാനം .
ഓം ധ്യായേയം രത്നപീഠേ ശുകകലപഠിതം ശൃണ്വതീം ശ്യാമലാംഗീം
        ന്യസ്തൈകാംഘ്രിം സരോജേ ശശിശകലധരാം വല്ലകീം വാദയന്തീം .
കൽഹാരാബദ്ധമാലാം നിയമിതവിലസച്ചോലികാം രത്നവസ്ത്രാം
        മാതംഗീ ശങ്കപാത്രാം മധുരമധുമദാം ചിത്രകോദ്ഭാസിഭാലാം ..

ഓം ഋഷിരുവാച .. 7.1..

ആജ്ഞപ്താസ്തേ തതോ ദൈത്യാശ്ചണ്ഡമുണ്ഡപുരോഗമാഃ .
ചതുരംഗബലോപേതാ യയുരഭ്യുദ്യതായുധാഃ .. 7.2..

ദദൃശുസ്തേ തതോ ദേവീമീഷദ്ധാസാം വ്യവസ്ഥിതാം .
സിംഹസ്യോപരി ശൈലേന്ദ്രശൃംഗേ മഹതി കാഞ്ചനേ .. 7.3..

തേ ദൃഷ്ട്വാ താം സമാദാതുമുദ്യമം ചക്രുരുദ്യതാഃ .
ആകൃഷ്ടചാപാസിധരാസ്തഥാന്യേ തത്സമീപഗാഃ .. 7.4..

തതഃ കോപം ചകാരോച്ചൈരംബികാ താനരീൻപ്രതി .
കോപേന ചാസ്യാ വദനം മഷീവർണമഭൂത്തദാ .. 7.5..

ഭ്രുകുടീകുടിലാത്തസ്യാ ലലാടഫലകാദ്ദ്രുതം .
കാലീ കരാലവദനാ വിനിഷ്ക്രാന്താസിപാശിനീ .. 7.6..

വിചിത്രഖട്വാംഗധരാ നരമാലാവിഭൂഷണാ .
ദ്വീപിചർമപരീധാനാ ശുഷ്കമാംസാതിഭൈരവാ .. 7.7..

അതിവിസ്താരവദനാ ജിഹ്വാലലനഭീഷണാ .
നിമഗ്നാരക്തനയനാ നാദാപൂരിതദിങ്മുഖാ .. 7.8..

സാ വേഗേനാഭിപതിതാ ഘാതയന്തീ മഹാസുരാൻ .
സൈന്യേ തത്ര സുരാരീണാമഭക്ഷയത തദ്ബലം .. 7.9..

പാർഷ്ണിഗ്രാഹാങ്കുശഗ്രാഹയോധഘണ്ടാസമന്വിതാൻ .
സമാദായൈകഹസ്തേന മുഖേ ചിക്ഷേപ വാരണാൻ .. 7.10..

തഥൈവ യോധം തുരഗൈ രഥം സാരഥിനാ സഹ .
നിക്ഷിപ്യ വക്ത്രേ ദശനൈശ്ചർവയന്ത്യതിഭൈരവം .. 7.11..

ഏകം ജഗ്രാഹ കേശേഷു ഗ്രീവായാമഥ ചാപരം .
പാദേനാക്രമ്യ ചൈവാന്യമുരസാന്യമപോഥയത് .. 7.12..

തൈർമുക്താനി ച ശസ്ത്രാണി മഹാസ്ത്രാണി തഥാസുരൈഃ .
മുഖേന ജഗ്രാഹ രുഷാ ദശനൈർമഥിതാന്യപി .. 7.13..

ബലിനാം തദ്ബലം സർവമസുരാണാം ദുരാത്മനാം .
മമർദാഭക്ഷയച്ചാന്യാനന്യാംശ്ചാതാഡയത്തദാ .. 7.14..

അസിനാ നിഹതാഃ കേചിത്കേചിത്ഖട്വാംഗതാഡിതാഃ .
ജഗ്മുർവിനാശമസുരാ ദന്താഗ്രാഭിഹതാസ്തഥാ .. 7.15..

ക്ഷണേന തദ്ബലം സർവമസുരാണാം നിപാതിതം .
ദൃഷ്ട്വാ ചണ്ഡോഽഭിദുദ്രാവ താം കാലീമതിഭീഷണാം .. 7.16..

ശരവർഷൈർമഹാഭീമൈർഭീമാക്ഷീം താം മഹാസുരഃ .
ഛാദയാമാസ ചക്രൈശ്ച മുണ്ഡഃ ക്ഷിപ്തൈഃ സഹസ്രശഃ .. 7.17..

താനി ചക്രാണ്യനേകാനി വിശമാനാനി തന്മുഖം .
ബഭുര്യഥാർകബിംബാനി സുബഹൂനി ഘനോദരം .. 7.18..

തതോ ജഹാസാതിരുഷാ ഭീമം ഭൈരവനാദിനീ .
കാലീ കരാലവദനാ ദുർദർശദശനോജ്ജ്വലാ .. 7.19..

ഉത്ഥായ ച മഹാസിംഹം ദേവീ ചണ്ഡമധാവത .
ഗൃഹീത്വാ ചാസ്യ കേശേഷു ശിരസ്തേനാസിനാച്ഛിനത് .. 7.20..

അഥ മുണ്ഡോഽഭ്യധാവത്താം ദൃഷ്ട്വാ ചണ്ഡം നിപാതിതം .
തമപ്യപാതയദ്ഭൂമൗ സാ ഖഡ്ഗാഭിഹതം രുഷാ .. 7.21..

ഹതശേഷം തതഃ സൈന്യം ദൃഷ്ട്വാ ചണ്ഡം നിപാതിതം .
മുണ്ഡം ച സുമഹാവീര്യം ദിശോ ഭേജേ ഭയാതുരം .. 7.22..

ശിരശ്ചണ്ഡസ്യ കാലീ ച ഗൃഹീത്വാ മുണ്ഡമേവ ച .
പ്രാഹ പ്രചണ്ഡാട്ടഹാസമിശ്രമഭ്യേത്യ ചണ്ഡികാം .. 7.23..

മയാ തവാത്രോപഹൃതൗ ചണ്ഡമുണ്ഡൗ മഹാപശൂ .
യുദ്ധയജ്ഞേ സ്വയം ശുംഭം നിശുംഭം ച ഹനിഷ്യസി .. 7.24..

ഋഷിരുവാച .. 7.25..

താവാനീതൗ തതോ ദൃഷ്ട്വാ ചണ്ഡമുണ്ഡൗ മഹാസുരൗ .
ഉവാച കാലീം കല്യാണീ ലലിതം ചണ്ഡികാ വചഃ .. 7.26..

യസ്മാച്ചണ്ഡം ച മുണ്ഡം ച ഗൃഹീത്വാ ത്വമുപാഗതാ .
ചാമുണ്ഡേതി തതോ ലോകേ ഖ്യാതാ ദേവീ ഭവിഷ്യസി .. 7.27..

.. സ്വസ്തി ശ്രീമാർകണ്ഡേയപുരാണേ സാവർണികേ മന്വന്തരേ ദേവീമാഹാത്മ്യേ
ചണ്ഡമുണ്ഡവധോ നാമ സപ്തമോഽധ്യായഃ .. 7..

ഉവാച 2, ശ്ലോകാഃ 25, ഏവമാദിതഃ .. 439..

.. 8. രക്തബീജവധോ നാമാഷ്ടമോഽധ്യായഃ ..
. ധ്യാനം .
ഓം അരുണാം കരുണാതരംഗിതാക്ഷീം
        ധൃതപാശാങ്കുശബാണാചാപഹസ്താം .
അണിമാദിഭിരാവൃതാം മയൂഖൈ-
        രഹമിത്യേവ വിഭാവയേ ഭവാനീം ..

ഓം ഋഷിരുവാച .. 8.1..

ചണ്ഡേ ച നിഹതേ ദൈത്യേ മുണ്ഡേ ച വിനിപാതിതേ .
ബഹുലേഷു ച സൈന്യേഷു ക്ഷയിതേഷ്വസുരേശ്വരഃ .. 8.2..

തതഃ കോപപരാധീനചേതാഃ ശുംഭഃ പ്രതാപവാൻ .
ഉദ്യോഗം സർവസൈന്യാനാം ദൈത്യാനാമാദിദേശ ഹ .. 8.3..

അദ്യ സർവബലൈർദൈത്യാഃ ഷഡശീതിരുദായുധാഃ .
കംബൂനാം ചതുരശീതിർനിര്യാന്തു സ്വബലൈർവൃതാഃ .. 8.4..

കോടിവീര്യാണി പഞ്ചാശദസുരാണാം കുലാനി വൈ .
ശതം കുലാനി ധൗമ്രാണാം നിർഗച്ഛന്തു മമാജ്ഞയാ .. 8.5..

കാലകാ ദൗർഹൃദാ മൗർവാഃ കാലികേയാസ്തഥാസുരാഃ .
യുദ്ധായ സജ്ജാ നിര്യാന്തു ആജ്ഞയാ ത്വരിതാ മമ .. 8.6..

ഇത്യാജ്ഞാപ്യാസുരപതിഃ ശുംഭോ ഭൈരവശാസനഃ .
നിർജഗാമ മഹാസൈന്യസഹസ്രൈർബഹുഭിർവൃതഃ .. 8.7..

ആയാന്തം ചണ്ഡികാ ദൃഷ്ട്വാ തത്സൈന്യമതിഭീഷണം .
ജ്യാസ്വനൈഃ പൂരയാമാസ ധരണീഗഗനാന്തരം .. 8.8..

തതഃ സിംഹോ മഹാനാദമതീവ കൃതവാന്നൃപ .
ഘണ്ടാസ്വനേന താന്നാദാനംബികാ ചോപബൃംഹയത് .. 8.9..

ധനുർജ്യാസിംഹഘണ്ടാനാം നാദാപൂരിതദിങ്മുഖാ .
നിനാദൈർഭീഷണൈഃ കാലീ ജിഗ്യേ വിസ്താരിതാനനാ .. 8.10..

തം നിനാദമുപശ്രുത്യ ദൈത്യസൈന്യൈശ്ചതുർദിശം .
ദേവീ സിംഹസ്തഥാ കാലീ സരോഷൈഃ പരിവാരിതാഃ .. 8.11..

ഏതസ്മിന്നന്തരേ ഭൂപ വിനാശായ സുരദ്വിഷാം .
ഭവായാമരസിംഹാനാമതിവീര്യബലാന്വിതാഃ .. 8.12..

ബ്രഹ്മേശഗുഹവിഷ്ണൂനാം തഥേന്ദ്രസ്യ ച ശക്തയഃ .
ശരീരേഭ്യോ വിനിഷ്ക്രമ്യ തദ്രൂപൈശ്ചണ്ഡികാം യയുഃ .. 8.13..

യസ്യ ദേവസ്യ യദ്രൂപം യഥാ ഭൂഷണവാഹനം .
തദ്വദേവ ഹി തച്ഛക്തിരസുരാന്യോദ്ധുമായയൗ .. 8.14..

ഹംസയുക്തവിമാനാഗ്രേ സാക്ഷസൂത്രകമണ്ഡലുഃ .
ആയാതാ ബ്രഹ്മണഃ ശക്തിർബ്രഹ്മാണീത്യഭിധീയതേ .. 8.15..

മാഹേശ്വരീ വൃഷാരൂഢാ ത്രിശൂലവരധാരിണീ .
മഹാഹിവലയാ പ്രാപ്താ ചന്ദ്രരേഖാവിഭൂഷണാ .. 8.16..

കൗമാരീ ശക്തിഹസ്താ ച മയൂരവരവാഹനാ .
യോദ്ധുമഭ്യായയൗ ദൈത്യാനംബികാ ഗുഹരൂപിണീ .. 8.17..

തഥൈവ വൈഷ്ണവീ ശക്തിർഗരുഡോപരി സംസ്ഥിതാ .
ശംഖചക്രഗദാശാർങ്ഗഖഡ്ഗഹസ്താഭ്യുപായയൗ .. 8.18..

യജ്ഞവാരാഹമതുലം രൂപം യാ ബിഭ്രതോ ഹരേഃ .
ശക്തിഃ സാപ്യായയൗ തത്ര വാരാഹീം ബിഭ്രതീ തനും .. 8.19..

നാരസിംഹീ നൃസിംഹസ്യ ബിഭ്രതീ സദൃശം വപുഃ .
പ്രാപ്താ തത്ര സടാക്ഷേപക്ഷിപ്തനക്ഷത്രസംഹതിഃ .. 8.20..

വജ്രഹസ്താ തഥൈവൈന്ദ്രീ ഗജരാജോപരി സ്ഥിതാ .
പ്രാപ്താ സഹസ്രനയനാ യഥാ ശക്രസ്തഥൈവ സാ .. 8.21..

തതഃ പരിവൃതസ്താഭിരീശാനോ ദേവശക്തിഭിഃ .
ഹന്യന്താമസുരാഃ ശീഘ്രം മമ പ്രീത്യാഹ ചണ്ഡികാം .. 8.22..

തതോ ദേവീശരീരാത്തു വിനിഷ്ക്രാന്താതിഭീഷണാ .
ചണ്ഡികാ ശക്തിരത്യുഗ്രാ ശിവാശതനിനാദിനീ .. 8.23..

സാ ചാഹ ധൂമ്രജടിലമീശാനമപരാജിതാ .
ദൂത ത്വം ഗച്ഛ ഭഗവൻ പാർശ്വം ശുംഭനിശുംഭയോഃ .. 8.24..

ബ്രൂഹി ശുംഭം നിശുംഭം ച ദാനവാവതിഗർവിതൗ .
യേ ചാന്യേ ദാനവാസ്തത്ര യുദ്ധായ സമുപസ്ഥിതാഃ .. 8.25..

ത്രൈലോക്യമിന്ദ്രോ ലഭതാം ദേവാഃ സന്തു ഹവിർഭുജഃ .
യൂയം പ്രയാത പാതാലം യദി ജീവിതുമിച്ഛഥ .. 8.26..

ബലാവലേപാദഥ ചേദ്ഭവന്തോ യുദ്ധകാങ്ക്ഷിണഃ .
തദാഗച്ഛത തൃപ്യന്തു മച്ഛിവാഃ പിശിതേന വഃ .. 8.27..

യതോ നിയുക്തോ ദൗത്യേന തയാ ദേവ്യാ ശിവഃ സ്വയം .
ശിവദൂതീതി ലോകേഽസ്മിംസ്തതഃ സാ ഖ്യാതിമാഗതാ .. 8.28..

തേഽപി ശ്രുത്വാ വചോ ദേവ്യാഃ ശർവാഖ്യാതം മഹാസുരാഃ .
അമർഷാപൂരിതാ ജഗ്മുര്യത്ര കാത്യായനീ സ്ഥിതാ .. 8.29..

തതഃ പ്രഥമമേവാഗ്രേ ശരശക്ത്യൃഷ്ടിവൃഷ്ടിഭിഃ .
വവർഷുരുദ്ധതാമർഷാസ്താം ദേവീമമരാരയഃ .. 8.30..

സാ ച താൻ പ്രഹിതാൻ ബാണാഞ്ഛൂലശക്തിപരശ്വധാൻ .
ചിച്ഛേദ ലീലയാധ്മാതധനുർമുക്തൈർമഹേഷുഭിഃ .. 8.31..

തസ്യാഗ്രതസ്തഥാ കാലീ ശൂലപാതവിദാരിതാൻ .
ഖട്വാംഗപോഥിതാംശ്ചാരീൻകുർവതീ വ്യചരത്തദാ .. 8.32..

കമണ്ഡലുജലാക്ഷേപഹതവീര്യാൻ ഹതൗജസഃ .
ബ്രഹ്മാണീ ചാകരോച്ഛത്രൂന്യേന യേന സ്മ ധാവതി .. 8.33..

മാഹേശ്വരീ ത്രിശൂലേന തഥാ ചക്രേണ വൈഷ്ണവീ .
ദൈത്യാഞ്ജഘാന കൗമാരീ തഥാ ശക്ത്യാതികോപനാ .. 8.34..

ഐന്ദ്രീ കുലിശപാതേന ശതശോ ദൈത്യദാനവാഃ .
പേതുർവിദാരിതാഃ പൃഥ്വ്യാം രുധിരൗഘപ്രവർഷിണഃ .. 8.35..

തുണ്ഡപ്രഹാരവിധ്വസ്താ ദംഷ്ട്രാഗ്രക്ഷതവക്ഷസഃ .
വാരാഹമൂർത്യാ ന്യപതംശ്ചക്രേണ ച വിദാരിതാഃ .. 8.36..

നഖൈർവിദാരിതാംശ്ചാന്യാൻ ഭക്ഷയന്തീ മഹാസുരാൻ .
നാരസിംഹീ ചചാരാജൗ നാദാപൂർണദിഗംബരാ .. 8.37..

ചണ്ഡാട്ടഹാസൈരസുരാഃ ശിവദൂത്യഭിദൂഷിതാഃ .
പേതുഃ പൃഥിവ്യാം പതിതാംസ്താംശ്ചഖാദാഥ സാ തദാ .. 8.38..

ഇതി മാതൃഗണം ക്രുദ്ധം മർദയന്തം മഹാസുരാൻ .
ദൃഷ്ട്വാഭ്യുപായൈർവിവിധൈർനേശുർദേവാരിസൈനികാഃ .. 8.39..

പലായനപരാന്ദൃഷ്ട്വാ ദൈത്യാന്മാതൃഗണാർദിതാൻ .
യോദ്ധുമഭ്യായയൗ ക്രുദ്ധോ രക്തബീജോ മഹാസുരഃ .. 8.40..

രക്തബിന്ദുര്യദാ ഭൂമൗ പതത്യസ്യ ശരീരതഃ .
സമുത്പതതി മേദിന്യാം തത്പ്രമാണോ മഹാസുരഃ .. 8.41..

യുയുധേ സ ഗദാപാണിരിന്ദ്രശക്ത്യാ മഹാസുരഃ .
തതശ്ചൈന്ദ്രീ സ്വവജ്രേണ രക്തബീജമതാഡയത് .. 8.42..

കുലിശേനാഹതസ്യാശു ബഹു സുസ്രാവ ശോണിതം .
സമുത്തസ്ഥുസ്തതോ യോധാസ്തദ്രൂപാസ്തത്പരാക്രമാഃ .. 8.43..

യാവന്തഃ പതിതാസ്തസ്യ ശരീരാദ്രക്തബിന്ദവഃ .
താവന്തഃ പുരുഷാ ജാതാസ്തദ്വീര്യബലവിക്രമാഃ .. 8.44..

തേ ചാപി യുയുധുസ്തത്ര പുരുഷാ രക്തസംഭവാഃ .
സമം മാതൃഭിരത്യുഗ്രശസ്ത്രപാതാതിഭീഷണം .. 8.45..

പുനശ്ച വജ്രപാതേന ക്ഷതമസ്യ ശിരോ യദാ .
വവാഹ രക്തം പുരുഷാസ്തതോ ജാതാഃ സഹസ്രശഃ .. 8.46..

വൈഷ്ണവീ സമരേ ചൈനം ചക്രേണാഭിജഘാന ഹ .
ഗദയാ താഡയാമാസ ഐന്ദ്രീ തമസുരേശ്വരം .. 8.47..

വൈഷ്ണവീചക്രഭിന്നസ്യ രുധിരസ്രാവസംഭവൈഃ .
സഹസ്രശോ ജഗദ്വ്യാപ്തം തത്പ്രമാണൈർമഹാസുരൈഃ .. 8.48..

ശക്ത്യാ ജഘാന കൗമാരീ വാരാഹീ ച തഥാസിനാ .
മാഹേശ്വരീ ത്രിശൂലേന രക്തബീജം മഹാസുരം .. 8.49..

സ ചാപി ഗദയാ ദൈത്യഃ സർവാ ഏവാഹനത് പൃഥക് .
മാതൄഃ കോപസമാവിഷ്ടോ രക്തബീജോ മഹാസുരഃ .. 8.50..

തസ്യാഹതസ്യ ബഹുധാ ശക്തിശൂലാദിഭിർഭുവി .
പപാത യോ വൈ രക്തൗഘസ്തേനാസഞ്ഛതശോഽസുരാഃ .. 8.51..

തൈശ്ചാസുരാസൃക്സംഭൂതൈരസുരൈഃ സകലം ജഗത് .
വ്യാപ്തമാസീത്തതോ ദേവാ ഭയമാജഗ്മുരുത്തമം .. 8.52..

താൻ വിഷണ്ണാൻ സുരാൻ ദൃഷ്ട്വാ ചണ്ഡികാ പ്രാഹസത്വരം .
ഉവാച കാലീം ചാമുണ്ഡേ വിസ്തീർണം വദനം കുരു .. 8.53..

മച്ഛസ്ത്രപാതസംഭൂതാൻ രക്തബിന്ദൂൻ മഹാസുരാൻ .
രക്തബിന്ദോഃ പ്രതീച്ഛ ത്വം വക്ത്രേണാനേന വേഗിനാ .. 8.54..

ഭക്ഷയന്തീ ചര രണേ തദുത്പന്നാന്മഹാസുരാൻ .
ഏവമേഷ ക്ഷയം ദൈത്യഃ ക്ഷേണരക്തോ ഗമിഷ്യതി .. 8.55..

ഭക്ഷ്യമാണാസ്ത്വയാ ചോഗ്രാ ന ചോത്പത്സ്യന്തി ചാപരേ .
ഇത്യുക്ത്വാ താം തതോ ദേവീ ശൂലേനാഭിജഘാന തം .. 8.56..

മുഖേന കാലീ ജഗൃഹേ രക്തബീജസ്യ ശോണിതം .
തതോഽസാവാജഘാനാഥ ഗദയാ തത്ര ചണ്ഡികാം .. 8.57..

ന ചാസ്യാ വേദനാം ചക്രേ ഗദാപാതോഽല്പികാമപി .
തസ്യാഹതസ്യ ദേഹാത്തു ബഹു സുസ്രാവ ശോണിതം .. 8.58..

യതസ്തതസ്തദ്വക്ത്രേണ ചാമുണ്ഡാ സമ്പ്രതീച്ഛതി .
മുഖേ സമുദ്ഗതാ യേഽസ്യാ രക്തപാതാന്മഹാസുരാഃ .. 8.59..

താംശ്ചഖാദാഥ ചാമുണ്ഡാ പപൗ തസ്യ ച ശോണിതം .
ദേവീ ശൂലേന വജ്രേണ ബാണൈരസിഭിരൃഷ്ടിഭിഃ .. 8.60..

ജഘാന രക്തബീജം തം ചാമുണ്ഡാപീതശോണിതം .
സ പപാത മഹീപൃഷ്ഠേ ശസ്ത്രസംഘസമാഹതഃ .. 8.61..

നീരക്തശ്ച മഹീപാല രക്തബീജോ മഹാസുരഃ .
തതസ്തേ ഹർഷമതുലമവാപുസ്ത്രിദശാ നൃപ .. 8.62..

തേഷാം മാതൃഗണോ ജാതോ നനർതാസൃങ്മദോദ്ധതഃ .. 8.63..

.. സ്വസ്തി ശ്രീമാർകണ്ഡേയപുരാണേ സാവർണികേ മന്വന്തരേ ദേവീമാഹാത്മ്യേ
രക്തബീജവധോ നാമാഷ്ടമോഽധ്യായഃ .. 8..

ഉവാച 1, അർധശ്ലോകഃ 1, ശ്ലോകാഃ 61, ഏവമാദിതഃ .. 502..

.. 9. നിശുംഭവധോ നാമ നവമോഽധ്യായഃ ..
. ധ്യാനം .
ഓം ബന്ധൂകകാഞ്ചനനിഭം രുചിരാക്ഷമാലാം
        പാശാങ്കുശൗ ച വരദാം നിജബാഹുദണ്ഡൈഃ .
ബിഭ്രാണമിന്ദുശകലാഭരണം ത്രിനേത്ര-
        മർധാംബികേശമനിശം വപുരാശ്രയാമി ..

ഓം രാജോവാച .. 9.1..

വിചിത്രമിദമാഖ്യാതം ഭഗവൻ ഭവതാ മമ .
ദേവ്യാശ്ചരിതമാഹാത്മ്യം രക്തബീജവധാശ്രിതം .. 9.2..

ഭൂയശ്ചേച്ഛാമ്യഹം ശ്രോതും രക്തബീജേ നിപാതിതേ .
ചകാര ശുംഭോ യത്കർമ നിശുംഭശ്ചാതികോപനഃ .. 9.3..

ഋഷിരുവാച .. 9.4..

ചകാര കോപമതുലം രക്തബീജേ നിപാതിതേ .
ശുംഭാസുരോ നിശുംഭശ്ച ഹതേഷ്വന്യേഷു ചാഹവേ .. 9.5..

ഹന്യമാനം മഹാസൈന്യം വിലോക്യാമർഷമുദ്വഹൻ .
അഭ്യധാവന്നിശുംഭോഽഥ മുഖ്യയാസുരസേനയാ .. 9.6..

തസ്യാഗ്രതസ്തഥാ പൃഷ്ഠേ പാർശ്വയോശ്ച മഹാസുരാഃ .
സന്ദഷ്ടൗഷ്ഠപുടാഃ ക്രുദ്ധാ ഹന്തും ദേവീമുപായയുഃ .. 9.7..

ആജഗാമ മഹാവീര്യഃ ശുംഭോഽപി സ്വബലൈർവൃതഃ .
നിഹന്തും ചണ്ഡികാം കോപാത്കൃത്വാ യുദ്ധം തു മാതൃഭിഃ .. 9.8..

തതോ യുദ്ധമതീവാസീദ്ദേവ്യാ ശുംഭനിശുംഭയോഃ .
ശരവർഷമതീവോഗ്രം മേഘയോരിവ വർഷതോഃ .. 9.9..

ചിച്ഛേദാസ്താഞ്ഛരാംസ്താഭ്യാം ചണ്ഡികാ സ്വശരോത്കരൈഃ .
താഡയാമാസ ചാംഗേഷു ശസ്ത്രൗഘൈരസുരേശ്വരൗ .. 9.10..

നിശുംഭോ നിശിതം ഖഡ്ഗം ചർമ ചാദായ സുപ്രഭം .
അതാഡയന്മൂർധ്നി സിംഹം ദേവ്യാ വാഹനമുത്തമം .. 9.11..

താഡിതേ വാഹനേ ദേവീ ക്ഷുരപ്രേണാസിമുത്തമം .
നിശുംഭസ്യാശു ചിച്ഛേദ ചർമ ചാപ്യഷ്ടചന്ദ്രകം .. 9.12..

ഛിന്നേ ചർമണി ഖഡ്ഗേ ച ശക്തിം ചിക്ഷേപ സോഽസുരഃ .
താമപ്യസ്യ ദ്വിധാ ചക്രേ ചക്രേണാഭിമുഖാഗതാം .. 9.13..

കോപാധ്മാതോ നിശുംഭോഽഥ ശൂലം ജഗ്രാഹ ദാനവഃ .
ആയാതം മുഷ്ടിപാതേന ദേവീ തച്ചാപ്യചൂർണയത് .. 9.14..

ആവിദ്യാഥ ഗദാം സോഽപി ചിക്ഷേപ ചണ്ഡികാം പ്രതി .
സാപി ദേവ്യാസ് ത്രിശൂലേന ഭിന്നാ ഭസ്മത്വമാഗതാ .. 9.15..

തതഃ പരശുഹസ്തം തമായാന്തം ദൈത്യപുംഗവം .
ആഹത്യ ദേവീ ബാണൗഘൈരപാതയത ഭൂതലേ .. 9.16..

തസ്മിന്നിപതിതേ ഭൂമൗ നിശുംഭേ ഭീമവിക്രമേ .
ഭ്രാതര്യതീവ സങ്ക്രുദ്ധഃ പ്രയയൗ ഹന്തുമംബികാം .. 9.17..

സ രഥസ്ഥസ്തഥാത്യുച്ചൈർഗൃഹീതപരമായുധൈഃ .
ഭുജൈരഷ്ടാഭിരതുലൈർവ്യാപ്യാശേഷം ബഭൗ നഭഃ .. 9.18..

തമായാന്തം സമാലോക്യ ദേവീ ശംഖമവാദയത് .
ജ്യാശബ്ദം ചാപി ധനുഷശ്ചകാരാതീവ ദുഃസഹം .. 9.19..

പൂരയാമാസ കകുഭോ നിജഘണ്ടാസ്വനേന ച .
സമസ്തദൈത്യസൈന്യാനാം തേജോവധവിധായിനാ .. 9.20..

തതഃ സിംഹോ മഹാനാദൈസ്ത്യാജിതേഭമഹാമദൈഃ .
പൂരയാമാസ ഗഗനം ഗാം തഥൈവ ദിശോ ദശ .. 9.21..

തതഃ കാലീ സമുത്പത്യ ഗഗനം ക്ഷ്മാമതാഡയത് .
കരാഭ്യാം തന്നിനാദേന പ്രാക്സ്വനാസ്തേ തിരോഹിതാഃ .. 9.22..

അട്ടാട്ടഹാസമശിവം ശിവദൂതീ ചകാര ഹ .
വൈഃ ശബ്ദൈരസുരാസ്ത്രേസുഃ ശുംഭഃ കോപം പരം യയൗ .. 9.23..

ദുരാത്മംസ്തിഷ്ഠ തിഷ്ഠേതി വ്യാജഹാരാംബികാ യദാ .
തദാ ജയേത്യഭിഹിതം ദേവൈരാകാശസംസ്ഥിതൈഃ .. 9.24..

ശുംഭേനാഗത്യ യാ ശക്തിർമുക്താ ജ്വാലാതിഭീഷണാ .
ആയാന്തീ വഹ്നികൂടാഭാ സാ നിരസ്താ മഹോൽകയാ .. 9.25..

സിംഹനാദേന ശുംഭസ്യ വ്യാപ്തം ലോകത്രയാന്തരം .
നിർഘാതനിഃസ്വനോ ഘോരോ ജിതവാനവനീപതേ .. 9.26..

ശുംഭമുക്താഞ്ഛരാന്ദേവീ ശുംഭസ്തത്പ്രഹിതാഞ്ഛരാൻ .
ചിച്ഛേദ സ്വശരൈരുഗ്രൈഃ ശതശോഽഥ സഹസ്രശഃ .. 9.27..

തതഃ സാ ചണ്ഡികാ ക്രുദ്ധാ ശൂലേനാഭിജഘാന തം .
സ തദാഭിഹതോ ഭൂമൗ മൂർച്ഛിതോ നിപപാത ഹ .. 9.28..

തതോ നിശുംഭഃ സമ്പ്രാപ്യ ചേതനാമാത്തകാർമുകഃ .
ആജഘാന ശരൈർദേവീം കാലീം കേസരിണം തഥാ .. 9.29..

പുനശ്ച കൃത്വാ ബാഹൂനാമയുതം ദനുജേശ്വരഃ .
ചക്രായുധേന ദിതിജശ്ഛാദയാമാസ ചണ്ഡികാം .. 9.30..

തതോ ഭഗവതീ ക്രുദ്ധാ ദുർഗാ ദുർഗാർതിനാശിനീ .
ചിച്ഛേദ ദേവീ ചക്രാണി സ്വശരൈഃ സായകാംശ്ച താൻ .. 9.31..

തതോ നിശുംഭോ വേഗേന ഗദാമാദായ ചണ്ഡികാം .
അഭ്യധാവത വൈ ഹന്തും ദൈത്യസൈന്യസമാവൃതഃ .. 9.32..

തസ്യാപതത ഏവാശു ഗദാം ചിച്ഛേദ ചണ്ഡികാ .
ഖഡ്ഗേന ശിതധാരേണ സ ച ശൂലം സമാദദേ .. 9.33..

ശൂലഹസ്തം സമായാന്തം നിശുംഭമമരാർദനം .
ഹൃദി വിവ്യാധ ശൂലേന വേഗാവിദ്ധേന ചണ്ഡികാ .. 9.34..

ഭിന്നസ്യ തസ്യ ശൂലേന ഹൃദയാന്നിഃസൃതോഽപരഃ .
മഹാബലോ മഹാവീര്യസ്തിഷ്ഠേതി പുരുഷോ വദൻ .. 9.35..

തസ്യ നിഷ്ക്രാമതോ ദേവീ പ്രഹസ്യ സ്വനവത്തതഃ .
ശിരശ്ചിച്ഛേദ ഖഡ്ഗേന തതോഽസാവപതദ്ഭുവി .. 9.36..

തതഃ സിംഹശ്ചഖാദോഗ്രദംഷ്ട്രാക്ഷുണ്ണശിരോധരാൻ .
അസുരാംസ്താംസ്തഥാ കാലീ ശിവദൂതീ തഥാപരാൻ .. 9.37..

കൗമാരീശക്തിനിർഭിന്നാഃ കേചിന്നേശുർമഹാസുരാഃ .
ബ്രഹ്മാണീമന്ത്രപൂതേന തോയേനാന്യേ നിരാകൃതാഃ .. 9.38..

മാഹേശ്വരീത്രിശൂലേന ഭിന്നാഃ പേതുസ്തഥാപരേ .
വാരാഹീതുണ്ഡഘാതേന കേചിച്ചൂർണീകൃതാ ഭുവി .. 9.39..

ഖണ്ഡം ഖണ്ഡം ച ചക്രേണ വൈഷ്ണവ്യാ ദാനവാഃ കൃതാഃ .
വജ്രേണ ചൈന്ദ്രീഹസ്താഗ്രവിമുക്തേന തഥാപരേ .. 9.40..

കേചിദ്വിനേശുരസുരാഃ കേചിന്നഷ്ടാ മഹാഹവാത് .
ഭക്ഷിതാശ്ചാപരേ കാലീശിവദൂതീമൃഗാധിപൈഃ .. 9.41..

.. സ്വസ്തി ശ്രീമാർകണ്ഡേയപുരാണേ സാവർണികേ മന്വന്തരേ ദേവീമാഹാത്മ്യേ
നിശുംഭവധോ നാമ നവമോഽധ്യായഃ .. 9..

ഉവാച 2, അർധശ്ലോകാഃ 39, ശ്ലോകാഃ 41, ഏവമാദിതഃ .. 543..

.. 10. ശുംഭവധോ നാമ ദശമോഽധ്യായഃ ..
. ധ്യാനം .
ഓം ഉത്തപ്തഹേമരുചിരാം രവിചന്ദ്രവഹ്നി-
        നേത്രാം ധനുശ്ശരയുതാങ്കുശപാശശൂലം .
രമ്യൈർഭുജൈശ്ച ദധതീം ശിവശക്തിരൂപാം 
        കാമേശ്വരീം ഹൃദി ഭജാമി ധൃതേന്ദുലേഖാം ..

ഓം ഋഷിരുവാച .. 10.1..

നിശുംഭം നിഹതം ദൃഷ്ട്വാ ഭ്രാതരം പ്രാണസമ്മിതം .
ഹന്യമാനം ബലം ചൈവ ശുംഭഃ ക്രുദ്ധോഽബ്രവീദ്വചഃ .. 10.2..

ബലാവലേപദുഷ്ടേ ത്വം മാ ദുർഗേ ഗർവമാവഹ .
അന്യാസാം ബലമാശ്രിത്യ യുദ്ധ്യസേ ചാതിമാനിനീ .. 10.3..

ദേവ്യുവാച .. 10.4..

ഏകൈവാഹം ജഗത്യത്ര ദ്വിതീയാ കാ മമാപരാ .
പശ്യൈതാ ദുഷ്ട മയ്യേവ വിശന്ത്യോ മദ്വിഭൂതയഃ .. 10.5..

തതഃ സമസ്താസ്താ ദേവ്യോ ബ്രഹ്മാണീപ്രമുഖാ ലയം .
തസ്യാ ദേവ്യാസ്തനൗ ജഗ്മുരേകൈവാസീത്തദാംബികാ .. 10.6..

ദേവ്യുവാച .. 10.7..

അഹം വിഭൂത്യാ ബഹുഭിരിഹ രൂപൈര്യദാസ്ഥിതാ .
തത്സംഹൃതം മയൈകൈവ തിഷ്ഠാമ്യാജൗ സ്ഥിരോ ഭവ .. 10.8..

ഋഷിരുവാച .. 10.9..

തതഃ പ്രവവൃതേ യുദ്ധം ദേവ്യാഃ ശുംഭസ്യ ചോഭയോഃ .
പശ്യതാം സർവദേവാനാമസുരാണാം ച ദാരുണം .. 10.10..

ശരവർഷൈഃ ശിതൈഃ ശസ്ത്രൈസ്തഥാ ചാസ്ത്രൈഃ സുദാരുണൈഃ .
തയോര്യുദ്ധമഭൂദ്ഭൂയഃ സർവലോകഭയങ്കരം .. 10.11..

ദിവ്യാന്യസ്ത്രാണി ശതശോ മുമുചേ യാന്യഥാംബികാ .
ബഭഞ്ജ താനി ദൈത്യേന്ദ്രസ്തത്പ്രതീഘാതകർതൃഭിഃ .. 10.12..

മുക്താനി തേന ചാസ്ത്രാണി ദിവ്യാനി പരമേശ്വരീ .
ബഭഞ്ജ ലീലയൈവോഗ്രഹുങ്കാരോച്ചാരണാദിഭിഃ .. 10.13..

തതഃ ശരശതൈർദേവീമാച്ഛാദയത സോഽസുരഃ .
സാപി തത്കുപിതാ ദേവീ ധനുശ്ചിച്ഛേദ ചേഷുഭിഃ .. 10.14..

ഛിന്നേ ധനുഷി ദൈത്യേന്ദ്രസ്തഥാ ശക്തിമഥാദദേ .
ചിച്ഛേദ ദേവീ ചക്രേണ താമപ്യസ്യ കരേ സ്ഥിതാം .. 10.15..

തതഃ ഖഡ്ഗമുപാദായ ശതചന്ദ്രം ച ഭാനുമത് .
അഭ്യധാ വത താം ദേവീം ദൈത്യാനാമധിപേശ്വരഃ .. 10.16..

തസ്യാപതത ഏവാശു ഖഡ്ഗം ചിച്ഛേദ ചണ്ഡികാ .
ധനുർമുക്തൈഃ ശിതൈർബാണൈശ്ചർമ ചാർകകരാമലം .
അശ്വാംശ്ച പാതയാമാസ രഥം സാരഥിനാ സഹ .. 10.17..

ഹതാശ്വഃ സ തദാ ദൈത്യശ്ഛിന്നധന്വാ വിസാരഥിഃ .
ജഗ്രാഹ മുദ്ഗരം ഘോരമംബികാനിധനോദ്യതഃ .. 10.18..

ചിച്ഛേദാപതതസ്തസ്യ മുദ്ഗരം നിശിതൈഃ ശരൈഃ .
തഥാപി സോഽഭ്യധാവത്താം മുഷ്ടിമുദ്യമ്യ വേഗവാൻ .. 10.19..

സ മുഷ്ടിം പാതയാമാസ ഹൃദയേ ദൈത്യപുംഗവഃ .
ദേവ്യാസ്തം ചാപി സാ ദേവീ തലേനോരസ്യതാഡയത് .. 10.20..

തലപ്രഹാരാഭിഹതോ നിപപാത മഹീതലേ .
സ ദൈത്യരാജഃ സഹസാ പുനരേവ തഥോത്ഥിതഃ .. 10.21..

ഉത്പത്യ ച പ്രഗൃഹ്യോച്ചൈർദേവീം ഗഗനമാസ്ഥിതഃ .
തത്രാപി സാ നിരാധാരാ യുയുധേ തേന ചണ്ഡികാ .. 10.22..

നിയുദ്ധം ഖേ തദാ ദൈത്യശ്ചണ്ഡികാ ച പരസ്പരം .
ചക്രതുഃ പ്രഥമം സിദ്ധമുനിവിസ്മയകാരകം .. 10.23..

തതോ നിയുദ്ധം സുചിരം കൃത്വാ തേനാംബികാ സഹ .
ഉത്പാട്യ ഭ്രാമയാമാസ ചിക്ഷേപ ധരണീതലേ .. 10.24..

സ ക്ഷിപ്തോ ധരണീം പ്രാപ്യ മുഷ്ടിമുദ്യമ്യ വേഗവാൻ .
അഭ്യധാവത ദുഷ്ടാത്മാ ചണ്ഡികാനിധനേച്ഛയാ .. 10.25..

തമായാന്തം തതോ ദേവീ സർവദൈത്യജനേശ്വരം .
ജഗത്യാം പാതയാമാസ ഭിത്ത്വാ ശൂലേന വക്ഷസി .. 10.26..

സ ഗതാസുഃ പപാതോർവ്യാം ദേവീ ശൂലാഗ്രവിക്ഷതഃ .
ചാലയൻ സകലാം പൃഥ്വീം സാബ്ധിദ്വീപാം സപർവതാം .. 10.27..

തതഃ പ്രസന്നമഖിലം ഹതേ തസ്മിൻ ദുരാത്മനി .
ജഗത്സ്വാസ്ഥ്യമതീവാപ നിർമലം ചാഭവന്നഭഃ .. 10.28..

ഉത്പാതമേഘാഃ സോൽകാ യേ പ്രാഗാസംസ്തേ ശമം യയുഃ .
സരിതോ മാർഗവാഹിന്യസ്തഥാസംസ്തത്ര പാതിതേ .. 10.29..

തതോ ദേവഗണാഃ സർവേ ഹർഷനിർഭരമാനസാഃ .
ബഭൂവുർനിഹതേ തസ്മിൻ ഗന്ധർവാ ലലിതം ജഗുഃ .. 10.30..

അവാദയംസ്തഥൈവാന്യേ നനൃതുശ്ചാപ്സരോഗണാഃ .
വവുഃ പുണ്യാസ്തഥാ വാതാഃ സുപ്രഭോഽഭൂദ്ദിവാകരഃ .. 10.31..

ജജ്വലുശ്ചാഗ്നയഃ ശാന്താഃ ശാന്താ ദിഗ്ജനിതസ്വനാഃ .. 10.32..

.. സ്വസ്തി ശ്രീമാർകണ്ഡേയപുരാണേ സാവർണികേ മന്വന്തരേ
ദേവീമാഹാത്മ്യേ ശുംഭവധോ നാമ ദശമോഽധ്യായഃ .. 10..

.. നാരായണീസ്തുതിർനാമൈകാദശോഽധ്യായഃ ..
. ധ്യാനം .
ഓം ബാലരവിദ്യുതിമിന്ദുകിരീടാം തുംഗകുചാം നയനത്രയയുക്താം .
സ്മേരമുഖീം വരദാങ്കുശപാശാഭീതികരാം പ്രഭജേ ഭുവനേശീം ..

ഓം ഋഷിരുവാച .. 11.1..

ദേവ്യാ ഹതേ തത്ര മഹാസുരേന്ദ്രേ
        സേന്ദ്രാഃ സുരാ വഹ്നിപുരോഗമാസ്താം .
കാത്യായനീം തുഷ്ടുവുരിഷ്ടലാഭാദ്
        വികാശിവക്ത്രാബ്ജവികാശിതാശാഃ .. 11.2..

ദേവി പ്രപന്നാർതിഹരേ പ്രസീദ
        പ്രസീദ മാതർജഗതോഽഖിലസ്യ .
പ്രസീദ വിശ്വേശ്വരി പാഹി വിശ്വം
        ത്വമീശ്വരീ ദേവി ചരാചരസ്യ .. 11.3..

ആധാരഭൂതാ ജഗതസ്ത്വമേകാ
        മഹീസ്വരൂപേണ യതഃ സ്ഥിതാസി .
അപാം സ്വരൂപസ്ഥിതയാ ത്വയൈത-
        ദാപ്യായതേ കൃത്സ്നമലംഘ്യവീര്യേ .. 11.4..

ത്വം വൈഷ്ണവീശക്തിരനന്തവീര്യാ
        വിശ്വസ്യ ബീജം പരമാസി മായാ .
സമ്മോഹിതം ദേവി സമസ്തമേതത്
        ത്വം വൈ പ്രസന്നാ ഭുവി മുക്തിഹേതുഃ .. 11.5..

വിദ്യാഃ സമസ്താസ്തവ ദേവി ഭേദാഃ
        സ്ത്രിയഃ സമസ്താഃ സകലാ ജഗത്സു .
ത്വയൈകയാ പൂരിതമംബയൈതത്
        കാ തേ സ്തുതിഃ സ്തവ്യപരാപരോക്തിഃ .. 11.6..

സർവഭൂതാ യദാ ദേവീ ഭുക്തിമുക്തിപ്രദായിനീ .
ത്വം സ്തുതാ സ്തുതയേ കാ വാ ഭവന്തു പരമോക്തയഃ .. 11.7..

സർവസ്യ ബുദ്ധിരൂപേണ ജനസ്യ ഹൃദി സംസ്ഥിതേ .
സ്വർഗാപവർഗദേ ദേവി നാരായണി നമോഽസ്തു തേ .. 11.8..

കലാകാഷ്ഠാദിരൂപേണ പരിണാമപ്രദായിനി .
വിശ്വസ്യോപരതൗ ശക്തേ നാരായണി നമോഽസ്തു തേ .. 11.9..

സർവമംഗലമാംഗല്യേ ശിവേ സർവാർഥസാധികേ .
ശരണ്യേ ത്ര്യംബകേ ഗൗരി നാരായണി നമോഽസ്തു തേ .. 11.10..

സൃഷ്ടിസ്ഥിതിവിനാശാനാം ശക്തിഭൂതേ സനാതനി .
ഗുണാശ്രയേ ഗുണമയേ നാരായണി നമോഽസ്തു തേ .. 11.11..

ശരണാഗതദീനാർതപരിത്രാണപരായണേ .
സർവസ്യാർതിഹരേ ദേവി നാരായണി നമോഽസ്തു തേ .. 11.12..

ഹംസയുക്തവിമാനസ്ഥേ ബ്രഹ്മാണീരൂപധാരിണി .
കൗശാംഭഃക്ഷരികേ ദേവി നാരായണി നമോഽസ്തു തേ .. 11.13..

ത്രിശൂലചന്ദ്രാഹിധരേ മഹാവൃഷഭവാഹിനി .
മാഹേശ്വരീസ്വരൂപേണ നാരായണി നമോഽസ്തുതേ .. 11.14..

മയൂരകുക്കുടവൃതേ മഹാശക്തിധരേഽനഘേ .
കൗമാരീരൂപസംസ്ഥാനേ നാരായണി നമോഽസ്തു തേ .. 11.15..

ശംഖചക്രഗദാശാർങ്ഗഗൃഹീതപരമായുധേ .
പ്രസീദ വൈഷ്ണവീരൂപേ നാരായണി നമോഽസ്തു തേ .. 11.16..

ഗൃഹീതോഗ്രമഹാചക്രേ ദംഷ്ട്രോദ്ധൃതവസുന്ധരേ .
വരാഹരൂപിണി ശിവേ നാരായണി നമോഽസ്തു തേ .. 11.17..

നൃസിംഹരൂപേണോഗ്രേണ ഹന്തും ദൈത്യാൻ കൃതോദ്യമേ .
ത്രൈലോക്യത്രാണസഹിതേ നാരായണി നമോഽസ്തു തേ .. 11.18..

കിരീടിനി മഹാവജ്രേ സഹസ്രനയനോജ്ജ്വലേ .
വൃത്രപ്രാണഹരേ ചൈന്ദ്രി നാരായണി നമോഽസ്തു തേ .. 11.19..

ശിവദൂതീസ്വരൂപേണ ഹതദൈത്യമഹാബലേ .
ഘോരരൂപേ മഹാരാവേ നാരായണി നമോഽസ്തു തേ .. 11.20..

ദംഷ്ട്രാകരാലവദനേ ശിരോമാലാവിഭൂഷണേ .
ചാമുണ്ഡേ മുണ്ഡമഥനേ നാരായണി നമോഽസ്തു തേ .. 11.21..

ലക്ഷ്മി ലജ്ജേ മഹാവിദ്യേ ശ്രദ്ധേ പുഷ്ടി സ്വധേ ധ്രുവേ .
മഹാരാത്രി മഹാമായേ നാരായണി നമോഽസ്തു തേ .. 11.22..

മേധേ സരസ്വതി വരേ ഭൂതി ബാഭ്രവി താമസി .
നിയതേ ത്വം പ്രസീദേശേ നാരായണി നമോഽസ്തുതേ .. 11.23..

സർവസ്വരൂപേ സർവേശേ സർവശക്തിസമന്വിതേ .
ഭയേഭ്യസ്ത്രാഹി നോ ദേവി ദുർഗേ ദേവി നമോഽസ്തു തേ .. 11.24..

ഏതത്തേ വദനം സൗമ്യം ലോചനത്രയഭൂഷിതം .
പാതു നഃ സർവഭൂതേഭ്യഃ കാത്യായനി നമോഽസ്തു തേ .. 11.25..

ജ്വാലാകരാലമത്യുഗ്രമശേഷാസുരസൂദനം .
ത്രിശൂലം പാതു നോ ഭീതേർഭദ്രകാലി നമോഽസ്തു തേ .. 11.26..

ഹിനസ്തി ദൈത്യതേജാംസി സ്വനേനാപൂര്യ യാ ജഗത് .
സാ ഘണ്ടാ പാതു നോ ദേവി പാപേഭ്യോ നഃ സുതാനിവ .. 11.27..

അസുരാസൃഗ്വസാപങ്കചർചിതസ്തേ കരോജ്ജ്വലഃ .
ശുഭായ ഖഡ്ഗോ ഭവതു ചണ്ഡികേ ത്വാം നതാ വയം .. 11.28..

രോഗാനശേഷാനപഹംസി തുഷ്ടാ
        രുഷ്ടാ തു കാമാൻ സകലാനഭീഷ്ടാൻ .
ത്വാമാശ്രിതാനാം ന വിപന്നരാണാം
        ത്വാമാശ്രിതാ ഹ്യാശ്രയതാം പ്രയാന്തി .. 11.29..

ഏതത്കൃതം യത്കദനം ത്വയാദ്യ
        ധർമദ്വിഷാം ദേവി മഹാസുരാണാം .
രൂപൈരനേകൈർബഹുധാത്മമൂർതിം
        കൃത്വാംബികേ തത്പ്രകരോതി കാന്യാ .. 11.30..

വിദ്യാസു ശാസ്ത്രേഷു വിവേകദീപേ-
        ഷ്വാദ്യേഷു വാക്യേഷു ച കാ ത്വദന്യാ .
മമത്വഗർതേഽതിമഹാന്ധകാരേ
        വിഭ്രാമയത്യേതദതീവ വിശ്വം .. 11.31..

രക്ഷാംസി യത്രോഗ്രവിഷാശ്ച നാഗാ
        യത്രാരയോ ദസ്യുബലാനി യത്ര .
ദാവാനലോ യത്ര തഥാബ്ധിമധ്യേ
        തത്ര സ്ഥിതാ ത്വം പരിപാസി വിശ്വം .. 11.32..

വിശ്വേശ്വരി ത്വം പരിപാസി വിശ്വം
        വിശ്വാത്മികാ ധാരയസീഹ വിശ്വം .
വിശ്വേശവന്ദ്യാ ഭവതീ ഭവന്തി
        വിശ്വാശ്രയാ യേ ത്വയി ഭക്തിനമ്രാഃ .. 11.33..

ദേവി പ്രസീദ പരിപാലയ നോഽരിഭീതേ-
        ര്നിത്യം യഥാസുരവധാദധുനൈവ സദ്യഃ .
പാപാനി സർവജഗതാം പ്രശമം നയാശു
        ഉത്പാതപാകജനിതാംശ്ച മഹോപസർഗാൻ .. 11.34..

പ്രണതാനാം പ്രസീദ ത്വം ദേവി വിശ്വാർതിഹാരിണി .
ത്രൈലോക്യവാസിനാമീഡ്യേ ലോകാനാം വരദാ ഭവ .. 11.35..

ദേവ്യുവാച .. 11.36..

വരദാഹം സുരഗണാ വരം യന്മനസേച്ഛഥ .
തം വൃണുധ്വം പ്രയച്ഛാമി ജഗതാമുപകാരകം .. 11.37..

ദേവാ ഊചുഃ .. 11.38..

സർവാബാധാപ്രശമനം ത്രൈലോക്യസ്യാഖിലേശ്വരി .
ഏവമേവ ത്വയാ കാര്യമസ്മദ്വൈരിവിനാശനം .. 11.39..

ദേവ്യുവാച .. 11.40..

വൈവസ്വതേഽന്തരേ പ്രാപ്തേ അഷ്ടാവിംശതിമേ യുഗേ .
ശുംഭോ നിശുംഭശ്ചൈവാന്യാവുത്പത്സ്യേതേ മഹാസുരൗ .. 11.41..

നന്ദഗോപഗൃഹേ ജാതാ യശോദാഗർഭസംഭവാ .
തതസ്തൗ നാശയിഷ്യാമി വിന്ധ്യാചലനിവാസിനീ .. 11.42..

പുനരപ്യതിരൗദ്രേണ രൂപേണ പൃഥിവീതലേ .
അവതീര്യ ഹനിഷ്യാമി വൈപ്രചിത്താംശ്ച ദാനവാൻ .. 11.43..

ഭക്ഷയന്ത്യാശ്ച താനുഗ്രാൻ വൈപ്രചിത്താൻ മഹാസുരാൻ .
രക്താ ദന്താ ഭവിഷ്യന്തി ദാഡിമീകുസുമോപമാഃ .. 11.44..

തതോ മാം ദേവതാഃ സ്വർഗേ മർത്യലോകേ ച മാനവാഃ .
സ്തുവന്തോ വ്യാഹരിഷ്യന്തി സതതം രക്തദന്തികാം .. 11.45..

ഭൂയശ്ച ശതവാർഷിക്യാമനാവൃഷ്ട്യാമനംഭസി .
മുനിഭിഃ സംസ്മൃതാ ഭൂമൗ സംഭവിഷ്യാമ്യയോനിജാ .. 11.46..

തതഃ ശതേന നേത്രാണാം നിരീക്ഷിഷ്യാമ്യഹം മുനീൻ .
കീർതയിഷ്യന്തി മനുജാഃ ശതാക്ഷീമിതി മാം തതഃ .. 11.47..

തതോഽഹമഖിലം ലോകമാത്മദേഹസമുദ്ഭവൈഃ .
ഭരിഷ്യാമി സുരാഃ ശാകൈരാവൃഷ്ടേഃ പ്രാണധാരകൈഃ .. 11.48..

ശാകംഭരീതി വിഖ്യാതിം തദാ യാസ്യാമ്യഹം ഭുവി .
തത്രൈവ ച വധിഷ്യാമി ദുർഗമാഖ്യം മഹാസുരം .. 11.49..

ദുർഗാദേവീതി വിഖ്യാതം തന്മേ നാമ ഭവിഷ്യതി .
പുനശ്ചാഹം യദാ ഭീമം രൂപം കൃത്വാ ഹിമാചലേ .. 11.50..

രക്ഷാംസി ഭക്ഷയിഷ്യാമി മുനീനാം ത്രാണകാരണാത് .
തദാ മാം മുനയഃ സർവേ സ്തോഷ്യന്ത്യാനമ്രമൂർതയഃ .. 11.51..

ഭീമാദേവീതി വിഖ്യാതം തന്മേ നാമ ഭവിഷ്യതി .
യദാരുണാഖ്യസ്ത്രൈലോക്യേ മഹാബാധാം കരിഷ്യതി .. 11.52..

തദാഹം ഭ്രാമരം രൂപം കൃത്വാസംഖ്യേയഷട്പദം .
ത്രൈലോക്യസ്യ ഹിതാർഥായ വധിഷ്യാമി മഹാസുരം .. 11.53..

ഭ്രാമരീതി ച മാം ലോകാസ്തദാ സ്തോഷ്യന്തി സർവതഃ .
ഇത്ഥം യദാ യദാ ബാധാ ദാനവോത്ഥാ ഭവിഷ്യതി .. 11.54..

തദാ തദാവതീര്യാഹം കരിഷ്യാമ്യരിസങ്ക്ഷയം .. 11.55..

.. സ്വസ്തി ശ്രീമാർകണ്ഡേയപുരാണേ സാവർണികേ മന്വന്തരേ ദേവീമാഹാത്മ്യേ
നാരായണീസ്തുതിർനാമൈകാദശോഽധ്യായഃ .. 11..

ഉവാച 4, അർധശ്ലോകഃ 1, ശ്ലോകാഃ 50, ഏവമാദിതഃ .. 630..

.. 12. ഭഗവതീ വാക്യം ദ്വാദശോഽധ്യായഃ ..
. ധ്യാനം .
ഓം വിദ്യുദ്ധാമസമപ്രഭാം മൃഗപതിസ്കന്ധസ്ഥിതാം ഭീഷണാം
        കന്യാഭിഃ കരവാളഖേടവിലസധസ്താഭിരാസേവിതാം .
ഹസ്തൈശ്ചക്രഗദാസിഖേടവിശിഖാംശ്ചാപം ഗുണം തർജനീം 
        ബിഭ്രാണാമനലാത്മികാം ശശിധരാം ദുർഗാം ത്രിനേത്രാം ഭജേ ..

ഓം ദേവ്യുവാച .. 12.1..

ഏഭിഃ സ്തവൈശ്ച മാം നിത്യം സ്തോഷ്യതേ യഃ സമാഹിതഃ .
തസ്യാഹം സകലാം ബാധാം ശമയിഷ്യാമ്യസംശയം .. 12.2..

മധുകൈടഭനാശം ച മഹിഷാസുരഘാതനം .
കീർതയിഷ്യന്തി യേ തദ്വദ്വധം ശുംഭനിശുംഭയോഃ .. 12.3..

അഷ്ടമ്യാം ച ചതുർദശ്യാം നവമ്യാം ചൈകചേതസഃ .
ശ്രോഷ്യന്തി ചൈവ യേ ഭക്ത്യാ മമ മാഹാത്മ്യമുത്തമം .. 12.4..

ന തേഷാം ദുഷ്കൃതം കിഞ്ചിദ്ദുഷ്കൃതോത്ഥാ ന ചാപദഃ .
ഭവിഷ്യതി ന ദാരിദ്ര്യം ന ചൈവേഷ്ടവിയോജനം .. 12.5..

ശത്രുഭ്യോ ന ഭയം തസ്യ ദസ്യുതോ വാ ന രാജതഃ .
ന ശസ്ത്രാനലതോയൗഘാത് കദാചിത് സംഭവിഷ്യതി .. 12.6..

തസ്മാന്മമൈതന്മാഹാത്മ്യം പഠിതവ്യം സമാഹിതൈഃ .
ശ്രോതവ്യം ച സദാ ഭക്ത്യാ പരം സ്വസ്ത്യയനം മഹത് .. 12.7..

ഉപസർഗാനശേഷാംസ്തു മഹാമാരീസമുദ്ഭവാൻ .
തഥാ ത്രിവിധമുത്പാതം മാഹാത്മ്യം ശമയേന്മമ .. 12.8..

യത്രൈതത്പഠ്യതേ സമ്യങ്നിത്യമായതനേ മമ .
സദാ ന തദ്വിമോക്ഷ്യാമി സാന്നിധ്യം തത്ര മേ സ്ഥിതം .. 12.9..

ബലിപ്രദാനേ പൂജായാമഗ്നികാര്യേ മഹോത്സവേ .
സർവം മമൈതന്മാഹാത്മ്യം ഉച്ചാര്യം ശ്രാവ്യമേവ ച .. 12.10..

ജാനതാജാനതാ വാപി ബലിപൂജാം യഥാ കൃതാം .
പ്രതീക്ഷിഷ്യാമ്യഹം പ്രീത്യാ വഹ്നിഹോമം തഥാകൃതം .. 12.11..

ശരത്കാലേ മഹാപൂജാ ക്രിയതേ യാ ച വാർഷികീ .
തസ്യാം മമൈതന്മാഹാത്മ്യം ശ്രുത്വാ ഭക്തിസമന്വിതഃ .. 12.12..

സർവാബാധാവിനിർമുക്തോ ധനധാന്യസമന്വിതഃ .
മനുഷ്യോ മത്പ്രസാദേന ഭവിഷ്യതി ന സംശയഃ .. 12.13..

ശ്രുത്വാ മമൈതന്മാഹാത്മ്യം തഥാ ചോത്പത്തയഃ ശുഭാഃ .
പരാക്രമം ച യുദ്ധേഷു ജായതേ നിർഭയഃ പുമാൻ .. 12.14..

രിപവഃ സങ്ക്ഷയം യാന്തി കല്യാണം ചോപപദ്യതേ .
നന്ദതേ ച കുലം പുംസാം മാഹാത്മ്യം മമ ശൃണ്വതാം .. 12.15..

ശാന്തികർമണി സർവത്ര തഥാ ദുഃസ്വപ്നദർശനേ .
ഗ്രഹപീഡാസു ചോഗ്രാസു മാഹാത്മ്യം ശൃണുയാന്മമ .. 12.16..

ഉപസർഗാഃ ശമം യാന്തി ഗ്രഹപീഡാശ്ച ദാരുണാഃ .
ദുഃസ്വപ്നം ച നൃഭിർദൃഷ്ടം സുസ്വപ്നമുപജായതേ .. 12.17..

ബാലഗ്രഹാഭിഭൂതാനാം ബാലാനാം ശാന്തികാരകം .
സംഘാതഭേദേ ച നൃണാം മൈത്രീകരണമുത്തമം .. 12.18..

ദുർവൃത്താനാമശേഷാണാം ബലഹാനികരം പരം .
രക്ഷോഭൂതപിശാചാനാം പഠനാദേവ നാശനം .. 12.19..

സർവം മമൈതന്മാഹാത്മ്യം മമ സന്നിധികാരകം .
പശുപുഷ്പാർഘ്യധൂപൈശ്ച ഗന്ധദീപൈസ്തഥോത്തമൈഃ .. 12.20..

വിപ്രാണാം ഭോജനൈർഹോമൈഃ പ്രോക്ഷണീയൈരഹർനിശം .
അന്യൈശ്ച വിവിധൈർഭോഗൈഃ പ്രദാനൈർവത്സരേണ യാ .. 12.21..

പ്രീതിർമേ ക്രിയതേ സാസ്മിൻ സകൃദുച്ചരിതേ ശ്രുതേ .
ശ്രുതം ഹരതി പാപാനി തഥാരോഗ്യം പ്രയച്ഛതി .. 12.22..

രക്ഷാം കരോതി ഭൂതേഭ്യോ ജന്മനാം കീർതനം മമ .
യുദ്ധേഷു ചരിതം യന്മേ ദുഷ്ടദൈത്യനിബർഹണം .. 12.23..

തസ്മിഞ്ഛ്രുതേ വൈരികൃതം ഭയം പുംസാം ന ജായതേ .
യുഷ്മാഭിഃ സ്തുതയോ യാശ്ച യാശ്ച ബ്രഹ്മർഷിഭിഃ കൃതാഃ .. 12.24..

ബ്രഹ്മണാ ച കൃതാസ്താസ്തു പ്രയച്ഛന്തു ശുഭാം മതിം .
അരണ്യേ പ്രാന്തരേ വാപി ദാവാഗ്നിപരിവാരിതഃ .. 12.25..

ദസ്യുഭിർവാ വൃതഃ ശൂന്യേ ഗൃഹീതോ വാപി ശത്രുഭിഃ .
സിംഹവ്യാഘ്രാനുയാതോ വാ വനേ വാ വനഹസ്തിഭിഃ .. 12.26..

രാജ്ഞാ ക്രുദ്ധേന ചാജ്ഞപ്തോ വധ്യോ ബന്ധഗതോഽപി വാ .
ആഘൂർണിതോ വാ വാതേന സ്ഥിതഃ പോതേ മഹാർണവേ .. 12.27..

പതത്സു ചാപി ശസ്ത്രേഷു സംഗ്രാമേ ഭൃശദാരുണേ .
സർവാബാധാസു ഘോരാസു വേദനാഭ്യർദിതോഽപി വാ .. 12.28..

സ്മരൻ മമൈതച്ചരിതം നരോ മുച്യേത സങ്കടാത് .
മമ പ്രഭാവാത്സിംഹാദ്യാ ദസ്യവോ വൈരിണസ്തഥാ .. 12.29..

ദൂരാദേവ പലായന്തേ സ്മരതശ്ചരിതം മമ .. 12.30..

ഋഷിരുവാച .. 12.31..

ഇത്യുക്ത്വാ സാ ഭഗവതീ ചണ്ഡികാ ചണ്ഡവിക്രമാ .. 12.32..

പശ്യതാം സർവദേവാനാം തത്രൈവാന്തരധീയത .
തേഽപി ദേവാ നിരാതങ്കാഃ സ്വാധികാരാന്യഥാ പുരാ .. 12.33..

യജ്ഞഭാഗഭുജഃ സർവേ ചക്രുർവിനിഹതാരയഃ .
ദൈത്യാശ്ച ദേവ്യാ നിഹതേ ശുംഭേ ദേവരിപൗ യുധി .. 12.34..

ജഗദ്വിധ്വംസകേ തസ്മിൻ മഹോഗ്രേഽതുലവിക്രമേ .
നിശുംഭേ ച മഹാവീര്യേ ശേഷാഃ പാതാലമായയുഃ .. 12.35..

ഏവം ഭഗവതീ ദേവീ സാ നിത്യാപി പുനഃ പുനഃ .
സംഭൂയ കുരുതേ ഭൂപ ജഗതഃ പരിപാലനം .. 12.36..

തയൈതന്മോഹ്യതേ വിശ്വം സൈവ വിശ്വം പ്രസൂയതേ .
സാ യാചിതാ ച വിജ്ഞാനം തുഷ്ടാ ഋദ്ധിം പ്രയച്ഛതി .. 12.37..

വ്യാപ്തം തയൈതത്സകലം ബ്രഹ്മാണ്ഡം മനുജേശ്വര .
മഹാദേവ്യാ മഹാകാലീ മഹാമാരീസ്വരൂപയാ .. 12.38..

സൈവ കാലേ മഹാമാരീ സൈവ സൃഷ്ടിർഭവത്യജാ .
സ്ഥിതിം കരോതി ഭൂതാനാം സൈവ കാലേ സനാതനീ .. 12.39..

ഭവകാലേ നൃണാം സൈവ ലക്ഷ്മീർവൃദ്ധിപ്രദാ ഗൃഹേ .
സൈവാഭാവേ തഥാലക്ഷ്മീർവിനാശായോപജായതേ .. 12.40..

സ്തുതാ സമ്പൂജിതാ പുഷ്പൈർഗന്ധധൂപാദിഭിസ്തഥാ .
ദദാതി വിത്തം പുത്രാംശ്ച മതിം ധർമേ ഗതിം ശുഭാം .. 12.41..

.. സ്വസ്തി ശ്രീമാർകണ്ഡേയപുരാണേ സാവർണികേ മന്വന്തരേ ദേവീമാഹാത്മ്യേ
ഭഗവതീ വാക്യം ദ്വാദശോഽധ്യായഃ .. 12..

ഉവാച 2, അർധശ്ലോകൗ 2, ശ്ലോകാഃ 37, ഏവമാദിതഃ .. 671..

.. 13. സുരഥവൈശ്യയോർവരപ്രദാനം നാമ ത്രയോദശോഽധ്യായഃ ..
. ധ്യാനം .
ഓം ബാലാർകമണ്ഡലാഭാസാം ചതുർബാഹും ത്രിലോചനാം .
പാശാങ്കുശവരാഭീതിർധാരയന്തീം ശിവാം ഭജേ ..

ഓം ഋഷിരുവാച .. 13.1..

ഏതത്തേ കഥിതം ഭൂപ ദേവീമാഹാത്മ്യമുത്തമം .
ഏവം പ്രഭാവാ സാ ദേവീ യയേദം ധാര്യതേ ജഗത് .. 13.2..

വിദ്യാ തഥൈവ ക്രിയതേ ഭഗവദ്വിഷ്ണുമായയാ .
തയാ ത്വമേഷ വൈശ്യശ്ച തഥൈവാന്യേ വിവേകിനഃ .. 13.3..

മോഹ്യന്തേ മോഹിതാശ്ചൈവ മോഹമേഷ്യന്തി ചാപരേ .
താമുപൈഹി മഹാരാജ ശരണം പരമേശ്വരീം .. 13.4..

ആരാധിതാ സൈവ നൃണാം ഭോഗസ്വർഗാപവർഗദാ .. 13.5..

മാർകണ്ഡേയ ഉവാച .. 13.6..

ഇതി തസ്യ വചഃ ശ്രുത്വാ സുരഥഃ സ നരാധിപഃ .. 13.7..

പ്രണിപത്യ മഹാഭാഗം തമൃഷിം സംശിതവ്രതം .
നിർവിണ്ണോഽതിമമത്വേന രാജ്യാപഹരണേന ച .. 13.8..

ജഗാമ സദ്യസ്തപസേ സ ച വൈശ്യോ മഹാമുനേ .
സന്ദർശനാർഥമംബായാ നദീപുലിനമാസ്ഥിതഃ .. 13.9..

സ ച വൈശ്യസ്തപസ്തേപേ ദേവീസൂക്തം പരം ജപൻ .
തൗ തസ്മിൻ പുലിനേ ദേവ്യാഃ കൃത്വാ മൂർതിം മഹീമയീം .. 13.10..

അർഹണാം ചക്രതുസ്തസ്യാഃ പുഷ്പധൂപാഗ്നിതർപണൈഃ .
നിരാഹാരൗ യതാത്മാനൗ തന്മനസ്കൗ സമാഹിതൗ .. 13.11..

ദദതുസ്തൗ ബലിം ചൈവ നിജഗാത്രാസൃഗുക്ഷിതം .
ഏവം സമാരാധയതോസ്ത്രിഭിർവർഷൈര്യതാത്മനോഃ .. 13.12..

പരിതുഷ്ടാ ജഗദ്ധാത്രീ പ്രത്യക്ഷം പ്രാഹ ചണ്ഡികാ .. 13.13..

ദേവ്യുവാച .. 13.14..

യത്പ്രാർഥ്യതേ ത്വയാ ഭൂപ ത്വയാ ച കുലനന്ദന .
മത്തസ്തത്പ്രാപ്യതാം സർവം പരിതുഷ്ടാ ദദാമിതേ .. 13.15..

മാർകണ്ഡേയ ഉവാച .. 13.16..

തതോ വവ്രേ നൃപോ രാജ്യമവിഭ്രംശ്യന്യജന്മനി .
അത്രൈവ ച നിജം രാജ്യം ഹതശത്രുബലം ബലാത് .. 13.17..

സോഽപി വൈശ്യസ്തതോ ജ്ഞാനം വവ്രേ നിർവിണ്ണമാനസഃ .
മമേത്യഹമിതി പ്രാജ്ഞഃ സംഗവിച്യുതികാരകം .. 13.18..

ദേവ്യുവാച .. 13.19..

സ്വല്പൈരഹോഭിർനൃപതേ സ്വം രാജ്യം പ്രാപ്സ്യതേ ഭവാൻ .. 13.20..

ഹത്വാ രിപൂനസ്ഖലിതം തവ തത്ര ഭവിഷ്യതി .. 13.21..

മൃതശ്ച ഭൂയഃ സമ്പ്രാപ്യ ജന്മ ദേവാദ്വിവസ്വതഃ .. 13.22..

സാവർണികോ മനുർനാമ ഭവാൻഭുവി ഭവിഷ്യതി .. 13.23..

വൈശ്യവര്യ ത്വയാ യശ്ച വരോഽസ്മത്തോഽഭിവാഞ്ഛിതഃ .. 13.24..

തം പ്രയച്ഛാമി സംസിദ്ധ്യൈ തവ ജ്ഞാനം ഭവിഷ്യതി .. 13.25..

മാർകണ്ഡേയ ഉവാച .. 13.26..

ഇതി ദത്ത്വാ തയോർദേവീ യഥാഭിലഷിതം വരം .. 13.27..

ബഭൂവാന്തർഹിതാ സദ്യോ ഭക്ത്യാ താഭ്യാമഭിഷ്ടുതാ .
ഏവം ദേവ്യാ വരം ലബ്ധ്വാ സുരഥഃ ക്ഷത്രിയർഷഭഃ .. 13.28..

സൂര്യാജ്ജന്മ സമാസാദ്യ സാവർണിർഭവിതാ മനുഃ .. 13.29..

ഏവം ദേവ്യാ വരം ലബ്ധ്വാ സുരഥഃ ക്ഷത്രിയർഷഭഃ .
സൂര്യാജ്ജന്മ സമാസാദ്യ സാവർണിർഭവിതാ മനുഃ .. ക്ലീം ഓം ..

.. സ്വസ്തി ശ്രീമാർകണ്ഡേയപുരാണേ സാവർണികേ മന്വന്തരേ ദേവീമാഹാത്മ്യേ
സുരഥവൈശ്യയോർവരപ്രദാനം നാമ ത്രയോദശോഽധ്യായഃ .. 13..

ഉവാച 6, അർധശ്ലോകാഃ 11, ശ്ലോകാഃ 12, ഏവമാദിതഃ .. 700..

സമസ്താ ഉവാചമന്ത്രാഃ 57, അർധശ്ലോകാഃ 42, ശ്ലോകാഃ 535, അവദാനാനി 66 ..

.. ശ്രീസപ്തശതീദേവീമാഹാത്മ്യം സമാപ്തം ..

.. ഓം തത് സത് ഓം ..

.. അഥ അപരാധക്ഷമാപണസ്തോത്രം ..
ഓം അപരാധശതം കൃത്വാ ജഗദംബേതി ചോച്ചരേത് .
യാം ഗതിം സമവാപ്നോതി ന താം ബ്രഹ്മാദയഃ സുരാഃ .. 1..

സാപരാധോഽസ്മി ശരണം പ്രാപ്തസ്ത്വാം ജഗദംബികേ .
ഇദാനീമനുകമ്പ്യോഽഹം യഥേച്ഛസി തഥാ കുരു .. 2..

അജ്ഞാനാദ്വിസ്മൃതേർഭ്രാന്ത്യാ യന്ന്യൂനമധികം കൃതം .
തത്സർവം ക്ഷമ്യതാം ദേവി പ്രസീദ പരമേശ്വരി .. 3..

കാമേശ്വരി ജഗന്മാതഃ സച്ചിദാനന്ദവിഗ്രഹേ .
ഗൃഹാണാർചാമിമാം പ്രീത്യാ പ്രസീദ പരമേശ്വരി .. 4..

സർവരൂപമയീ ദേവീ സർവം ദേവീമയം ജഗത് .
അതോഽഹം വിശ്വരൂപാം ത്വാം നമാമി പരമേശ്വരീം .. 5..

യദക്ഷരം പരിഭ്രഷ്ടം മാത്രാഹീനഞ്ച യദ്ഭവേത് .
പൂർണം ഭവതു തത് സർവം ത്വത്പ്രസാദാന്മഹേശ്വരി .. 6..

യദത്ര പാഠേ ജഗദംബികേ മയാ
        വിസർഗബിന്ദ്വക്ഷരഹീനമീരിതം .
തദസ്തു സമ്പൂർണതമം പ്രസാദതഃ
        സങ്കല്പസിദ്ധിശ്ച സദൈവ ജായതാം .. 7..

യന്മാത്രാബിന്ദുബിന്ദുദ്വിതയപദപദദ്വന്ദ്വവർണാദിഹീനം
        ഭക്ത്യാഭക്ത്യാനുപൂർവം പ്രസഭകൃതിവശാത് വ്യക്തമവ്യക്തമംബ .
മോഹാദജ്ഞാനതോ വാ പഠിതമപഠിതം സാമ്പ്രതം തേ സ്തവേഽസ്മിൻ
        തത് സർവം സാംഗമാസ്താം ഭഗവതി വരദേ ത്വത്പ്രസാദാത് പ്രസീദ .. 8..

പ്രസീദ ഭഗവത്യംബ പ്രസീദ ഭക്തവത്സലേ .
പ്രസാദം കുരു മേ ദേവി ദുർഗേ ദേവി നമോഽസ്തു തേ .. 9..

        .. ഇതി അപരാധക്ഷമാപണസ്തോത്രം സമാപ്തം ..

.. അഥ ദേവീസൂക്തം ..
ഓം അഹം രുദ്രേഭിർവസുഭിശ്ചരാമ്യഹ-
        മാദിത്യൈരുത വിശ്വദേവൈഃ .
അഹം മിത്രാവരുണോഭാ ബിഭർമ്യഹ-
        മിന്ദ്രാഗ്നീ അഹമശ്വിനോഭാ .. 1..

അഹം സോമമാഹനസം ബിഭർമ്യഹം
        ത്വഷ്ടാരമുത പൂഷണം ഭഗം .
അഹം ദധാമി ദ്രവിണം ഹവിഷ്മതേ
        സുപ്രാവ്യേ യജമാനായ സുന്വതേ .. 2..

അഹം രാഷ്ട്രീ സംഗമനീ വസൂനാം
        ചികിതുഷീ പ്രഥമാ യജ്ഞിയാനാം .
താം മാ ദേവാ വ്യദധുഃ പുരുത്രാ
        ഭൂരിസ്ഥാത്രാം ഭൂര്യാവേശയന്തീം .. 3..

മയാ സോ അന്നമത്തി യോ വിപശ്യതി
        യഃ പ്രാണിതി യ ഈം ശൃണോത്യുക്തം .
അമന്തവോ മാം ത ഉപക്ഷിയന്തി
        ശ്രുധി ശ്രുത ശ്രദ്ധിവം തേ വദാമി .. 4..

അഹമേവ സ്വയമിദം വദാമി ജുഷ്ടം
        ദേവേഭിരുത മാനുഷേഭിഃ .
യം കാമയേ തം തമുഗ്രം കൃണോമി
        തം ബ്രഹ്മാണം തമൃഷിം തം സുമേധാം .. 5..

അഹം രുദ്രായ ധനുരാ തനോമി
        ബ്രഹ്മദ്വിഷേ ശരവേ ഹന്തവാ ഉ .
അഹം ജനായ സമദം കൃണോമ്യഹം
        ദ്യാവാപൃഥിവീ ആ വിവേശ .. 6..

അഹം സുവേ പിതരമസ്യ മൂർധൻ
        മമ യോനിരപ്സ്വന്തഃ സമുദ്രേ .
തതോ വി തിഷ്ഠേ ഭുവനാനു വിശ്വോ-
        താമൂം ദ്യാം വർഷ്മണോപ സ്പൃശാമി .. 7..

അഹമേവ വാത ഇവ പ്ര വാമ്യാ-
        രഭമാണാ ഭുവനാനി വിശ്വാ .
പരോ ദിവാ പര ഏനാ പൃഥിവ്യൈ-
        താവതീ മഹിനാ സം ബഭൂവ .. 8..

   .. ഇതി ഋഗ്വേദോക്തം ദേവീസൂക്തം സമാപ്തം ..

        .. ഓം തത് സത് ഓം ..