SRI CHANDIKA STHUTHI

 

 ശ്രീചണ്ഡികാസ്തുതിഃ 
വിവിക്തതര-ഗോമതീ-ജഠര-മധ്യ-സിദ്ധാശ്രമാം
      പുരോഗത-സരോവര-സ്ഫുരദഗാധ-പാഥശ്ഛടാം  .
വിശാല-തലതുംഗ-ഭൂലുലിത-നിംബമൂലാലയാം
      ഭജാമി ഭയഖണ്ഡികാം സപദി ചണ്ഡികാമംബികാം .. 1..

ന ലക്ഷ്യ-ഘടനാശ്രയാം ന ച  വിശേഷ-വേശ്മാവഹാം
      ഘടാനുകൃതി-ഗോമതീ-വഹന-ഭാവ്യമാനാസ്പദാം  .
നമജ്ജന-മനോരഥാരചന-ചാരു-ചിന്താമണിം
      ഭജാമി ഭയഖണ്ഡികാം സപദി ചണ്ഡികാമംബികാം .. 2..

നിരന്തര-സമുല്ലസത്കമല-കീർണ-പാഥോജിനീ-
      പ്രതാന-ഘനസമ്പദാ കമപി സമ്മദം തന്വതീം .
ത്രികോണ-സരസീമയീം, പരിണതിം പുരോ ബിഭ്രതീം,
      ഭജാമി ഭയഖണ്ഡികാം സപദി ചണ്ഡികാമംബികാം .. 3..

അനുഗ്രഹ-രസച്ഛടാമിവ സരഃശ്രിയം യാന്തികേ
      വികാസയതി, പദ്മിനീദല-സഹസ്രസന്ദാനിതാം .
പ്രതിക്ഷണ-സമുന്മിഷത്പ്രമദ-മേദുരാം താമഹം,
      ഭജാമി ഭയഖണ്ഡികാം സപദി ചണ്ഡികാമംബികാം .. 4..

പ്രചണ്ഡയതി വിക്രമം, ഝടിതി ഖണ്ഡയത്യാപദഃ
      സുമണ്ഡയതി വാക്കലാം, സദസി ദണ്ഡയത്യുദ്ധതാൻ .
കരണ്ഡയതി രോദസീ, ഗുണ-സമൃദ്ധിഭിര്യാ ഹി താം
      ഭജാമി ഭയഖണ്ഡികാം സപദി ചണ്ഡികാമംബികാം .. 5..

ശ്രുതാഽഭിലഷിതാ, മതാ, സുകലിതാ, സമഭ്യർചിതാ
      സുധാ-പൃഷത-വർഷിഭിർനവനവൈർവചോഭിഃ സ്തുതാ  .
ജയായ ഖലു കല്പതേ  ബഹുവിധാദൃതാ, താമഹം
      ഭജാമി ഭയഖണ്ഡികാം സപദി ചണ്ഡികാമംബികാം .. 6..

ഇതസ്തത ഉദിത്വര-വ്രതതിനദ്ധ-വൃക്ഷാവലീ-
      ലുലദ്വിഹഗ-മണ്ഡലീ-മധുരരാവ-സംസേവിതാം  .
സ്ഖലത്കുസുമ-സൗരഭ-പ്രസര-പൂര്യമാണാശ്രമാം
      ഭജാമി ഭയഖണ്ഡികാം സപദി ചണ്ഡികാമംബികാം .. 7..

ദ്വിഷത്കുല-കൃപാണികാം, കുടിലകാല-വിധ്വംസികാം,
      വിപദ്വന-കുഠാരികാം, ത്രിവിധ-ദുഃഖ-നിർവാസികാം  .
കൃപാകുസുമ-വാടികാം, പ്രണത-ഭാരതീ-ഭാസികാം,
      ഭജാമി ഭയഖണ്ഡികാം സപദി ചണ്ഡികാമംബികാം .. 8..

ബ്രഹ്മാണ്ഡാധിക-ദേഹാപി ഗോമതീ-തീര-ചങ്ക്രമാ .
ജയായ ഭജതാം ഭൂയാച്ചണ്ഡികാ ചണ്ഡ-വിക്രമാ .. 9..

ഇതി ദുർഗാപ്രസാദദ്വിവേദീവിരചിതാ ചണ്ഡികാസ്തുതിഃ സമാപ്താ .