കാമദേവസ്തോത്രം (രമാദേവീകൃതം )
ഓം ഹ്രാം ഹ്രീം ഹ്രൂം ।
ഓം നമോ ഭഗവതേ ഹൃഷീകേശായ
സർവഗുണവിശേഷൈർവിലക്ഷിതാത്മനേ ।
ആകൂതീനാം ചിത്തീനാം ചേതസാം വിശേഷാണാം ചാധിപതയേ ।
ഷോഡശകലായ ഛന്ദോമയായ അന്നമയായ അമൃതമയായ
സർവമയായ സഹസേ ഓജസേ ബലായ കാന്തായ കാമായ നമസ്തേ ।
ഉഭയത്ര ഭൂയാത് ॥ 18 ॥
സ്ത്രിയോ വ്രതൈസ്ത്വാ ഹൃഷീകേശ്വരം സ്വതോ
ഹ്യാരാധ്യ ലോകേ പതിമാശാസതേഽന്യം ।
താസാം ന തേ വൈ പരിപാന്ത്യപത്യം
പ്രിയം ധനായൂംഷി യതോഽസ്വതന്ത്രാഃ ॥ 19 ॥
സ വൈ പതിഃ സ്യാദകുതോഭയഃ സ്വയം
സമന്തതഃ പാതി ഭയാതുരം ജനം ।
സ ഏക ഏവേതരഥാ മിഥോ ഭയം
നൈവാത്മലാഭാദധി മന്യതേ പരം ॥ 20 ॥
യാ തസ്യ തേ പാദസരോരുഹാർഹണം
നികാമയേത്സാഖിലകാമലമ്പടാ ।
തദേവ രാസീപ്സിതമീപ്സിതോഽർചിതോ
യദ്ഭഗ്നയാച്ഞാ ഭഗവൻ പ്രതപ്യതേ ॥ 21 ॥
മത്പ്രാപ്തയേഽജേശ സുരാസുരാദയഃ
തപ്യന്ത ഉഗ്രം തപ ഐന്ദ്രിയേ ധിയഃ ।
ഋതേ ഭവത്പാദപരായണാന്ന മാം
വിന്ദന്ത്യഹം ത്വദ്ധൃദയാ യതോഽജിത ॥ 22 ॥
സ ത്വം മമാപ്യച്യുത ശീർഷ്ണി വന്ദിതം
കരാംബുജം യത്ത്വദധായി സാത്വതാം ।
ബിഭർഷി മാം ലക്ഷ്മ വരേണ്യ മായയാ
ക ഈശ്വരസ്യേഹിതമൂഹിതും വിഭുഃ ॥ 23 ॥
ഇതി ശ്രീമദ്ഭാഗവതമഹാപുരാണേ പഞ്ചമസ്കന്ധേ അഷ്ടാദശാധ്യായാന്തർഗതം
രമാദേവീകൃതം കാമദേവസ്തോത്രം സമാപ്തം ॥
No comments:
Post a Comment