MADANAGOPALA STHOTHRAM - 1

 

 ശ്രീമദനഗോപാലസ്തോത്രം 

ഈശ്വര ഉവാച-
ശൃണു ദേവി പ്രവക്ഷ്യാമി രഹസ്യം ഭുവനേശ്വരി .
തവൈവ പൗരുഷം രൂപം ഗോപികാനയനാമൃതം .. 1..

സദാ നിഷേവിതം രാഗാദ്ഭവദ്വിരഹഭീരുഭിഃ .
സത്യഭാമാദിരൂപാഭിർമായാമൂർതിഭിരഷ്ടഭിഃ .. 2..

ഖ്യാതം മദനഗോപാലസഞ്ജ്ഞയാ ഭുവനത്രയേ .
തസ്യ ധ്യാനം പ്രവക്ഷ്യാമി സർവപാപപ്രണാശനം .. 3..

സർവമോഹമയം സർവസമ്പത്പ്രദമനുത്തമം .
അണിമാദിമഹൈശ്വര്യപ്രദമായുഃപ്രവർധനം .. 4..

      സൗഭാഗ്യദായകം നൄണാം സ്ത്രീണാം ചൈവ വിശേഷതഃ .
കിമത്ര ബഹുനോക്തേന ധ്യാനേനാനേന ഭാമിനി .
      യദ്യദിച്ഛതി തത്സർവം നരഃ പ്രാപ്നോത്യസംശയഃ .. 5..

ശ്രീമദ്ബാലാർകസങ്കാശം പദ്മരാഗമണിപ്രഭം .
ബന്ധൂകബന്ധുരാലോകസന്ധ്യാരാഗാരുണദ്യുതിം .. 6..

മകുടാനേകമാണിക്യപ്രഭാപല്ലവിതാംബരം .
കിരീടോപാന്തവിന്യസ്തബർഹിബർഹാവതംസകം .. 7..

കസ്തൂരീതിലകാക്രാന്തകമനീയാലകസ്ഥലം .
നിസ്തലസ്ഥൂലമാണിക്യചാരുമൗക്തികമണ്ഡലം .. 8..

ദന്താംശുകുസുമാശ്ലിഷ്ടചിബുകോദ്ദേശശോഭിതം .
ശശാങ്കബിംബാലങ്കാരശ്ലാഘാതങ്കകരാനനം .. 9..

അനർധരത്നഗ്രൈവേയവിലസത്കംബുകന്ധരം .
ഉദംശുമൗക്തികൈർഹാരൈർവൈജയന്ത്യാ ച മാലയാ .. 10..

ശ്രീവത്സകൗസ്തുഭാഭ്യാം ച പരിഷ്കൃതഭുജാന്തരം .
ഛത്രം പുഷ്പം ശരം പദ്മം സൃണിം ശംഖേക്ഷുകാർമുകേ .. 11..

ഗദാം പാശം ച മുരലീം ബിഭ്രാണം മോഹനാകൃതിം .
നിമ്നനാഭിം രോമരാജീവിലസത്പല്ലവോദരം .. 12..

വിസങ്കടകടീദേശവാചാലമണിമേഖലം .
സ്പുരത്സൗദാമനീഛായാദായാദകനകാംബരം .. 13..

മണിമഞ്ജീരകിരണകിഞ്ജൽകിതപദാംബുജം .
ശാണോല്ലീഢമണിശ്രേണിരമ്യാംഘ്രിനഖമണ്ഡലം .. 14..

ആപാദകണ്ഠമായുക്തഭൂഷാശതമനോഹരം .
കല്പകാനോകഹാരാമമഹിതേ മണിമണ്ഡപേ .. 15..

ചിന്താമണിമഹാപീഠമധ്യേ ഹേമസരോരുഹേ .
കർണികാപരിസന്ദീപ്തശ്രീമഞ്ചക്രാസനേ ശുഭേ .. 16..

തിഷ്ഠന്തം ദേവദേവേശം ത്രിഭംഗീലലിതാകൃതിം .
വാമാംസശിഖരോപാന്തവ്യാലോലമണികുണ്ഡലം .. 17..

ആകുഞ്ചിതഭ്രുവം കിഞ്ചിത്കുഞ്ചിതാധരപല്ലവം .
ഗാനാമൃതരസാസ്വാദനിഷ്പന്ദനിഖിലേന്ദ്രിയൈഃ .. 18..

ഉപാസ്യമാനമാനന്ദാത് സദാരൈർദിവിഷദ്വരൈഃ .
സൗരദുന്ദുഭിനിർഘോഷൈർമുക്തപ്രസവവൃഷ്ടിഭിഃ .. 19..

      ധ്യായേന്മദനഗോപാലം മന്ത്രീ ശുചിരലങ്കൃതം .
(യഃ) പഠേന്മദനഗോപാലധ്യാനസ്തോത്രം സമാഹിതഃ .
      സർവാൻ കാമാനവാപ്നോതി ദുർലഭാനപ്യയത്നതഃ .. 20..

ഇതി ശ്രീമദനഗോപാലസ്തോത്രം സമ്പൂർണം .