SREE RAJAGOPALASTHAVAM

 

 ശ്രീരാജഗോപാലസ്തവഃ 
ശ്രീരാജഗോപാലമുഖാരവിന്ദം
      വന്ദാമഹേ മോഹനമിന്ദിരായാഃ .
യദീയസന്ദർശനനന്ദിതാനാം
      ന മുക്തിലാഭോദിതമോദവാഞ്ഛാ .. 1..

വാഞ്ഛാധികാനേകപുമർഥദാന-
      ദക്ഷോത്പലോല്ലാസികടാക്ഷവീക്ഷം .
ശ്രീരാജഗോപാലമുഖാമൃതാംശും
      പശ്യേമ ശശ്വദ്ഭവതാപനുത്യൈ .. 2..

നുതം ശ്രുതീനാം തതിഭിസ്തതാഭി-
      സ്തഥാനവിച്ഛിന്നമിയത്തയാപി .
ശ്രീരാജഗോപാല തവാനുഭാവ-
      മജ്ഞഃ കഥം സ്തോതുമലം ഭവാമി .. 3..

ഭവന്തി ലോകാഃ സകലാ വിചിത്രാ-
      സ്ത്വദേകദേശാശ്ചിദചിദ്വിശിഷ്ട .
ശ്രീരാജഗോപാല തവ സ്വരൂപം
      തതോ വിചിത്ര പ്രവദന്തി സന്തഃ .. 4..

സന്തസ്തുവന്തീശ തവാനുഭാവം
      അന്ത(ര്മു)സ്സുഖാഃ സന്തതയുക്തചിത്താഃ .
താപത്രയാർതോ വിഷയാനുവൃത്ത-
      ചിത്തഃ കഥം സ്തോതുമഹം പ്രവൃത്തഃ .. 5..

പ്രവൃത്ത ഏവ സ്വയമേവ വക്തും
      പാദാംബുജദ്വന്ദ്വസമാശ്രിതാനാം .
വിസ്രംഭസമ്പദ്വിരഹാദിഹാഹം
      ത്വാം രക്ഷ രക്ഷേതി കദർഥയാമി .. 6..

തദർഥനാവിരഹതസ്ത്വയി രക്ഷിതവ്യേ
     തഥാപി പന്നഗശയന പ്രപന്നൈഃ .
തദർഥതത്തത്പുരുഷാർഥദാന-
     ഗുണപ്രദാനേന ഹിതായസി ത്വം .. 7..

ത്വമേക ഏവാസി പരം നിധാന-
      മധ്യക്ഷിതം ഭക്തിഭരാജിതാക്ഷൈഃ .
വിശ്വേശ ശശ്വദ്ബഹുശഃ സ്മൃതീനാം
      വിശ്രാന്തിഭൂമിശ്ച തഥാ ശ്രുതീനാം .. 8..

ശ്രുതിസ്തു സത്ത്വോത്തരശാസ്ത്രമാസീത്
      ഭവാംശ്ച സത്ചൈകഗുണഃ പുരാണഃ .
ഏവം സ്ഥിതേ ത്വത്ര കഥം നുതഃ സ്യാ
      ആകർഷണം ചൈവ ബലാദ്ധടേദ .. 9..

തത്ത്വപ്രകാശോ വിശയം ശ്രുതീനാം
      വിഷ്വങ്മുഖീനാമബഹുശ്രുതേഭ്യഃ .
``വേദൈശ്ച സർവൈരഹമേവ വേദ്യഃ''
       ഇത്യേവകാരേണ നിരാചകർഥ .. 10..

ചകർഥ ഗീതാം യദി വത്സല ത്വം
      ത്വമേവ വിഷ്ണുര്യദി കൃഷ്ണരൂപഃ .
ഗീതാ ച മാനം യദി തത്ത്വസിദ്ധൗ
      കുതോഽന്യതോഽസ്മത്പദവാച്യതാ സ്യാത് .. 11..

സ്യാദ്ധി പ്രമാണം ഭഗവന്നചാല്യം
      നാമ്നാം സഹസ്രം ബഹുഭിഃ കിമന്യൈഃ .
ജഗത്പ്രഭും ദേവമിതി പ്രകൃത്യ
      ത്വമേവമിത്യസ്യ കൃതോത്തരത്വാത് .. 12..

ദത്തോത്തരോ വിഷ്ണുപുരാണരത്ന-
      ഗതൈർവചോഭിർവിചികിത്സിതാംശഃ .
വിഷ്ണോഃ സകാശാദിതി യാന്യവോചം
      സാമാന്യതഃ പ്രശ്നമുപര്യസക്തം .. 13..

അസക്തചിത്തൈഃ പരതത്ത്വവിദ്യാ-
      നിഷ്ഠൈരനുഷ്ഠാനപരൈരനേകൈഃ .
നാനാദിശാസ്ഥൈഃ പരതത്ത്വരൂപം
      വ്യചാര്യഹോ വിഷ്ണുപുരാണമാനൈഃ .. 14..

മാനേഷു യാ യത്പ്രതികൂലിതാർഥാ
      സാ ന സ്മൃതിഃ ശസ്യത ഇത്യുദീർണാ .
മനുസ്മൃതിഃ കർമസമർച്യമാഹ
      നാരായണം ത്വാം പുരുഷം പരം ച .. 15..

ചകാസ്തി യത്സൂത്രസമൂഹ ഏവം
      സർവാത്മന്നാ തത്ത്വബുഭുത്സുസേവ്യഃ .
യോഽസൗ മഹാഭാരതവേദമാദൗ
      നാരായണസ്യൈവ കഥാം ജഗാദ .. 16..

ദയാലുനാലോഡ്യ സമസ്തശാസ്ത്രം
      നാരായണധ്യേയതമത്വമുക്ത്വാ .
ഭുജം സമൃദ്ധൃത്യ മുനീന്ദ്രവൃന്ദേ
      ത്രിഃ സത്യമിത്യാഹ സമാനമേയേ .. 17..

യേ ത്വന്യദേവാഭ്യധികത്വമൂചുഃ
      കേചിത് പ്രബന്ധാഃ പ്രതി കല്പ മാന്യാഃ .
രജസ്തമഃസ്പൃഷ്ടചതുർമുഖേന
      സമീരിതാ ഇത്യവധീരിതാസ്തേ .. 18..

തേനേഹ മാനാനി വിചാര്യ സമ്യക്
      പ്രാമാണികാഃ സത്ത്വഗുണോത്തരാസ്ത്വാം .
ശ്രീരാജഗോപാല പരം പുമാംസം
      വദന്തി സന്തോ ജഗദേകഹേതും .. 19..

ഹേതുത്വമന്യത്ര കഥം ഘടേത
      സംവർതസിന്ധൗ സകലേ വിലീനേ .
കൃത്സ്നൈഃ സിസൃക്ഷാകൃതയോഗനിദ്രേ
      ത്വയി പ്രമാണൈരഭിധീയമാനേ .. 20..

നേതസ്ത്വദീയാഖിലകാരണത്വേ-
      നാതഃ പരം മാനമവേക്ഷണീയം .
യന്നാരശബ്ദാഭിഹിതേഷു മുഖ്യ-
      സ്ത്വന്നാഭിപദ്മാദുദ്ഭൂത സ്വയംഭൂഃ .. 21..

ഭൂദേവഗുപ്ത്യൈ യദവാതരസ്ത്വം
      സഞ്ജായമാനോ ബഹുധാദിദേവ .
തേനൈവ കേചിത്തവ ഭൂമ്ന്യസീമ്നി
      സിദ്ധാന്തതാമാനശിരേ സശങ്കാഃ .. 22..

ശങ്കാ കൃതാ വാ യദജോ ഭവന്ന-
      പ്യാത്മേച്ഛയൈവാവതരാമി ജന്മ .
കർമാവിദിത്യം മമ വേത്തുരേവ
      ജന്മാപി ന സ്യാദിതി ഗായസി ത്വം .. 23..

ത്വദീയകല്യാണഗുണാകരത്വം
    ശ്രുതം രമേശാ വിബുധൈഃ ചലന്തി കേചിത് .
ക്വചിത് നിരോധം പ്രവദന്തി ചാന്യേ
    തത്തോ വിചിത്രം തവ വൈഭവം ഹി .. 24..

കശ്ചിത് കുതർക്കൈഃ കലുഷീകൃതസ്യാ-
      പ്രത്യക്ഷമുഖ്യാഖിലമാനവേദ്യം .
കൃത്സ്നം ച മിഥ്യേത്യഭിധായ മേയം
      യേ നിർവിശേഷം ച വദന്തി വേധം .. 25..

വേദ്യം സദക്ഷൈരപി നിർവികല്പ
      ഇദന്തയാസക്തിമുപൈതി ലിംഗം .
വ്യാപ്തിം പുരസ്കൃത്യ തഥോപമാനം
      സാമ്യം ച മേയം ഗമയത്യദൃഷ്ടം .. 26..

ദൃഷ്ടാ ഹി ശബ്ദസ്യ ച ശക്തിധർമ-
      പുരസ്കൃതിർലക്ഷണയാ പദാനി .
സർവാണ്യപി സ്വാർഥവിബോധകാനീ-
      ത്യുദീരണം ഹൈ പരിഹാസയോഗ്യം .. 27..

യോഗ്യേ ച ശബ്ദേ പരികല്പ്യ ശക്തി-
      മന്യത്ര സർവത്ര പദേ പദജ്ഞാഃ .
സംബന്ധയുക്തേഽനുപപത്തിമേവ
      ദൃഷ്ടാ ശ്രയന്തീശ്വരലക്ഷണം ച .. 28..

ചഞ്ചത്പ്രകൃത്യർഥമുപര്യുദഞ്ചത്
      സ്വപ്രത്യയാർഥത്വവിശേഷവാചാം .
ചയഃ പദാനാം നിജതത്തദർഥ-
      ഭേദോദിതാകാങ്ക്ഷകമന്വിയായ .. 29..

യാത്യേവമർഥാനുസൃതിം വിഹായ
      സംബന്ധസിദ്ധാവപി ലക്ഷണാം ച .
അലക്ഷിതേ ലക്ഷണയാഭിധേയേ
      പര്യായഭാവം വദ വാക്യജാതം .. 30..

തന്മുച്യതാം വാചകതാപ്രകാര-
      വിചാരണാ ബ്രഹ്മ സലക്ഷണം ച .
ജന്മാദിനാ കിം നു വിശേഷ്യമിഷ്ട-
      മുതോപലക്ഷ്യം സഗുണം ദ്വിധാപി .. 31..

പിനദ്ധമേകേന വിശേഷണേന
      ഗൃഹാദി കാകാദ്യുപലക്ഷണീയം .
അതോ ബൃഹത്ത്വാദിവിശിഷ്ടമേവ
      ബ്രഹ്മോപലക്ഷ്യം ന തു നിർവിശേഷം .. 32..

വിശേഷമാലംബ്യ മനോഽപ്യുപാസ്തൗ
      പ്രവർതതേ ധ്യേയഗതം ഹി കഞ്ചിത് .
തഥൈവ വിദ്യാശ്ച പരാ ഗൃണന്തി
      തതോ ഭവദ്ഭവ്യഗുണാ ന മിഥ്യാ .. 33..

മിഥ്യാഗുണോപാസനതോ യദി സ്യാത്
      ഉപാസനാനിർവചനീയതത്ത്വേ .
ഹൈ ശുക്തിരൂപ്യാധിഗമാദ്ഭവേയുഃ
      സമാധിഭാജോ ഭുവി സർവ ഏവ .. 34..

ഏവം ഭഗോ ശ്രേഷ്ഠഗുണാനുബദ്ധം
      ത്വാം നിർഗുണം ഹേയഗുണൈരശൂന്യം .
ശ്രുത്യാം വദന്ത്യാം ത്രിതയാവിരോധാത്
      സാമാന്യതോ യോഽപി വിശേഷസക്തഃ .. 35..

സക്തോ ഗുണൈർഹേയഗുണൈരസക്തോ
      ഭവാൻ രമേശോഭയലിംഗയുക്തഃ .
അദ്രേശ്യമവ്യക്തമിതി പ്രവാദ്യ
      പ്രത്യക്ഷിതാർഥാതിവിലക്ഷണത്വാത് .. 36..

ത്വമേവ ജീവം പ്രലപന്ത്യഭേദ-
      വാദാദവിദ്യാന്ധമുപാധിഭിന്നം .
പ്രകാശമാത്രസ്യ സതസ്തിരോധിഃ
      സ്വരൂപനാശാദിഭയാന്നിരസ്യഃ .. 37..

സ്യാദപ്യവച്ഛിന്നമുപാധിപക്ഷേ
      ബ്രഹ്മാനവച്ഛിന്നമതോ ദ്വയം ച .
അയുക്തമേതച്ചിദചിച്ഛരീര-
      സ്ത്വമേക ഏവാസി വിഭൂതിമാംശ്ച .. 38..

ചമത്കൃതിഃ സാ കില ദർശനീയാ
      യന്മായിനോഽസത്യഗിരൈവ സർവം .
സമർഥയന്തേ വ്യവഹാരസത്യം
      ഹൈ ശുക്തിരൂപ്യം ച തതഃ കിമാസീത് .. 39..

ആസീരഹേയോ ഭഗവംസ്ത്വമുക്തഃ
      പരാശരാദ്യൈഃ പരതത്ത്വവിദ്ഭിഃ .
᳚സമസ്തകല്യാണഗുണാത്മകോഽസൗ᳚
       ഇത്യാദിഭിർവാക്യശതൈർഗുണാഢ്യഃ .. 40..

ആഢ്യോ വിഭൂത്യാ പരയാ ഗുണൈശ്ച
      ലക്ഷ്മീമഹീഭ്യാമഭിസേവ്യമാനഃ .
പാദാരവിന്ദാനതസൂരിവൃന്ദ
      ചക്രാദിദിവ്യായുധചൂഥധാരീ .. 41..

രിരക്ഷിഷാസക്തമനോമനോജ്ഞ-
      വപുഃ കിരീടാദിമനൂ പുരാന്തൈഃ .
വിഭൂഷണൈർഭൂഷിത ഈശ ശേഷം
      വൈകുണ്ഠലോകേ ത്വമലങ്കരോഷി .. 42..

കരോഷി ദുഗ്ധാംബുനിധൗ രമേശ
      ശേഷേ ശയാലുഃ സനകാദിസേവ്യഃ .
താപത്രയോപപ്ലവതപ്തചിത്ത-
      ചതുർമുഖാഭ്യർഥനയാവതാരാൻ .. 43..

അവാതരസ്ത്വം പ്രഥമം വിധീശ-
      മധ്യേ സ്വയം വിഷ്ണുസമാഹ യൈശ്ച .
വിവിധരൂപൈഃ സകലം ജഗത് ത്വം
      തനോഷി രക്ഷാം വിബുധേന്ദ്രസേവ്യ .. 44..

രക്ഷൻ ഹി വേദാപഹൃതേർവിരിഞ്ചി
      ഭവാൻ മഹാപാതകതസ്ത്രിണേത്രം .
പ്രദ്യുമ്നസങ്കർഷണരൂപതസ്തൗ
      കൃത്യേഷ്വധിഷ്ഠായ കരോതി ശക്തൗ .. 45..

ശക്തിഃ കുതഃ സ്യാത് ത്രിദിവാധിരാജ്യേ
      പുരന്ദരസ്യ ത്വമുപേന്ദ്രരൂപഃ .
സാചിവ്യകാരീ യദി തസ്യ നാസി
      നാസീരരക്ഷാകരണൈകദക്ഷഃ .. 46..

ക്ഷയാർണവേ ദേവ ചരാചരാണി
      സർവാണി നാപി പ്രണിധായ ധൃത്വാ .
ദംഷ്ട്രൈകദേശേന മനോജ്ഞമീനോ
      മനോസ്തനോഷി സ്മ ഹിതോപദേശം .. 47..

ശം സാധുബന്ധോ മഥനേ പയോധേഃ
      സുധാർഥമഭ്യർഥനയാ സുരാണാം .
പൃഷ്ഠപ്രദേശോദ്ധൃതമന്ഥശൈലഃ
      കൂർമസ്വരൂപഃ സമധാഃ സുധാജം .. 48..


ജന്തൂനിമഗ്നാൻ പ്രലയാംബുരാശൗ
     വിലോക്യ ലോകേശ മഹാവരാഹഃ .
ഭൂത്വാ പുനസ്താൻ ഭൂരിദയോദ്ദധാര
     ധരാം സ്വദംഷ്ട്രാമുഖതഃ സഖേലം .. 49..

ഖേലഗ്നവൽഗത്സടമട്ടഹാസ-
      സ്ഫുടദ്വിഷന്നിഷ്ഠുരധൃഷ്ടഭാവഃ .
സൈംഹ വ്യധാത് സംഹനനം മഹത്തേ
      പ്രഹ്ലാദമന്വർഥസമാഹ്വയം ഹി .. 50..

ഹിതം വിതന്വൻ ദ്വിഷതേ ഹി യാച്ഞാം
      വിധായ വേധഃകരധൗതപാദഃ .
പാദാംബുജസ്യന്ദിമരന്ദധാരാ-
      ശങ്കാദഗംഗാമകരോസ്ത്രിലോക്യൈ .. 51..

ലോകക്ഷയോദ്യുക്ത ലിപ്തകൃത്സ്ന-
      ക്ഷത്രക്ഷയായ സൃജോ ജകൃത്യാം .
പരശ്വഥാഗ്നൗ രുധിരഹ്രദേ ച
      കൃതാഹുതിഃ കല്പിതതർപണസ്ത്വം .. 52..

ത്വമീശവംശം മിഹിരസ്യ സീതാ-
      മനോ മുനീനാമുടജാടവിം ച .
ക്രമേണ സുഗ്രീവവിഭീഷണർദ്ധി-
      മലഞ്ചകർഥാദികവേർവചാംസി .. 53..

സിതായുതക്ഷീരതുലാ ലലാസ
      ഹലാസ്ത്രഹേലാനവമഞ്ജരീഭിഃ .
ലീലാലതാ സാ കില മാധവസ്യ
      സമേധിതാ ഗോപവിലാസിനീഭിഃ .. 54..

ഭിന്നാഞ്ജനശ്യാമതനും മനോജ്ഞം
      സശംഖചക്രാഗ്രചതുർഭുജാഢ്യമ്മ് .
പീതാംബരം കൗസ്തുഭഭൂഷിതം ത്വാം
      തുഷ്ടാവ ദേവക്യവലോക്യ സൂനും .. 55..

സ്തുവന്നമൻ സ്വം വസുദേവ ആത്മ-
      ജാതം പരം ത്വാമഭിവീക്ഷ്യ സാക്ഷാത് .
സംസാരനിസ്താരമയാചമാനഃ
      കംസാദഹിംസാം തവ യാചതേ സ്മ .. 56..

സ്മരന്തി സന്തോഽപ്യനഘം ഭവന്തം
      സ്വസ്രീയമാത്മാന്തകരം നിശമ്യ .
കംസോ നിഹന്തും ചകമേഽനഘം ത്വ-
      മഘാതയശ്രിത്രമിദം സ്വസാരം .. 57..

സാരം സ്വകം ദർശയിതും യദീഹ
      ഹന്തും ദ്വിഷന്തം യദി വാഭിലാഷഃ .
പീതസ്തനായാസ്തവ പൂതനായാ
      വയോവിധേർനാഥ പരം വിരുദ്ധം .. 58..

വിരുദ്ധചിത്തഃ ശകടാസുരസ്തേ
      പാദാരവിന്ദദ്വയഭംഗ്മിമാര .
നിരന്തരപ്രീതികൃതോ മുകുന്ദ-
      പദാരവിന്ദം മൃതിമൃഗ്യമാസീത് .. 59..

ആസീത്തൃണാവർതസമുത്ഥചക്ര-
      വാത്യാസമുത്ഥാപിതമസ്യ വീക്ഷ്യ .
കണ്ഠം ഗൃഹീത്വാഥ നിഹത്യ മഹ്യാം
      ശിശും ശയാലും ജനനീ സശങ്കാ .. 60..

ശങ്കാ യശോദാഹൃദയോദിതാപി
      സാ ജൃംഭമാണേ വദനാരവിന്ദേ .
പ്രദർശ്യ വിശ്വം വിശദ വിചിത്രം
      ന ചിത്രമത്രേതി നിരാകൃതാഭൂത് .. 61..

ഭൂമൗ മമാംഘ്രിദ്വിതയാശ്രിതാനാം
      സ്വകർമനാശേന ന കർമബന്ധഃ .
ന കർമനൈരർഥ്യമപി പ്രസജ്യേ-
      തേതി സ്വയം താശപാശബദ്ധഃ .. 62..

ബദ്ധസ്ത്വമസ്താശ്രിതകർമബന്ധ
      ഹൈയംഗവീനാപഹൃതിം വിധായ .
ശാപാദദാഃ മോചനമർജുനാഭ്യാ-
      മുലൂഖലാകർഷണലീലയൈവ .. 63..

ന ബദ്ധരൂപോ ന ച ദുഃഖരൂപഃ
കഥം തഥാപ്യർജുനനാശഹേതു-
      ഭൂതാം വ്യതാനീരതിബാലലീലാം .. 64..

ലാസ്യം സുരസ്യം നവനീതമോഷ-
      രോഷോപശാന്ത്യൈ വ്രജസുന്ദരീണാം .
പുരഃ കരസ്ഥേ നവനീത ഭാണ്ഡേ
      വ്യധാ യഥാ താ ഹൃഷിതാ ഭവേയുഃ .. 65..

യുതോഽപ്രജേനേശ സമഗ്രബാല-
      ലീലാരസൗഘാന രസികോപസേവ്യാൻ .
ദേവക്യലഭ്യാൻ കലഭപ്രഗൽഭ
      സദാ യശോദാസുലഭാൻ വ്യതാനീഃ .. 66..

നീതം ത്വയാ ദുഗ്ധമുഖം യദൃദ്ധിം
      നന്ദവ്രജേ നന്ദിതഗോകുലേന .
ശ്രീരാജഗോപാല സബാലലീലം
      സ്തേയേന തത്സർവമഹാര്യനൂനം .. 67..

നൂനം മിഥോ ഗോപവധൂമനോഽപി
      മനോഹരത്വം നവനീതചോരഃ .
മോഹാജ്ജവേനാപജഹർഥ തേന
      നാതാനി താഭിസ്ത്വയി രോഷലേശഃ .. 68..

ശസ്തേ ത്വയാ വത്സല വത്സദൈത്യേ
      ത്വത്പാലിതാൻ ബാല വിലാസകാലേ .
വത്സാൻ വിശങ്കേ ത്രിദശാസ്ത്വദീയാ-
      വതാരചാരിത്രസരൂപരൂപാൻ .. 69..

പാതും ഗവാം വൃന്ദമഥ പ്രവൃത്തോ
      വൃന്ദാവനാന്തേ യദുനന്ദന ത്വം .
വേണുക്വണേനേവ വിധായ തൃപ്തിം
      നിവർതയാമാസിഥ ചിത്രചര്യ .. 70..

യദാ ഭവാൻ ഭാവുകവേണുനാദാ-
      ദുന്മാദയാമാസ തദാ ത്വദാദി .
ജഡാജഡാത്മത്വവിഭാഗശൂന്യ-
      മഹോ ബഭൂവാഖിലമന്യദേവ .. 71..

ദേവേശ താദൃങ്മുരലീനിനാദ-
      സോന്മാദചിത്താ വ്രജസുന്ദരാംഗ്യഃ .
ത്യക്താന്യയോഗാസ്ത്വയി സാനുരാഗാ
      ബഭൂ വുരിത്യത്ര വിചിത്രതാ കാ .. 72..

കാന്തസ്മിതാലങ്കൃതവക്ത്രചന്ദ്ര-
      സംഗക്വണദ്വേണുകനത്കരാബ്ജം .
വ്യത്യസ്തപാദാംബുജമംബുജാക്ഷ
      ഭവദ്വപുർഭക്തജനോപജീവ്യം .. 73..

വ്യക്തോക്തിഭംഗീ മുരലീ സഖീ തേ
      ഘോഷാംഗനാനാം കൃതചിത്തമോഹാ .
ശൃംഗാരലീലാരസചാരുരാസ-
      വിലാസസാചിവ്യകരീ കിലാസീത് .. 74..

സീദത്സു സർവേഷു വിഷാഗ്നിമിശ്ര
      കൃഷ്ണാപയഃപാനവശാത് കിശോരഃ .
ഭവാനഭീഃ കാലിയമസ്തരത്ന-
      രുച്യർചിതാംഘ്രിഃ പ്രണനർത ചിത്രം .. 75..

ത്രാതസ്ത്വസൗ കേശവശേഷിതോഽപി
      ശേഷത്വസമ്പദ്ഭവനം ബഭൂവ .
നൃത്യത്വദീയാംഘ്രിയുഗാങ്കനേന
      നിത്യപ്രസക്തസ്വഫണാസഹസ്ത്രഃ .. 76..

സഹസ്രസംഖ്യൈഃ സപയോഭിരഹ്നി
      സഹ സ്വചിത്താനുവിധായികൃത്യൈഃ .
ഗോപാലബാലൈര്യമുനാവനാന്തേ
      തദീയദാരൈർവ്യഹരദ്രജന്യാം .. 77..

ന്യായ്യം കിമേതദ്രജകന്യകാസു
      സരോവിഹാരൈകപരാസു രാജൻ .
ഗൃഹീതതീരസ്ഥദുകൂലക സ്മ
      കുന്ദസ്ഥിതഃ പ്രാർഥയസേഽഞ്ജലിം താഃ .. 78..

താഭിഃ കൃതശ്ചൈകകരാഞ്ജലിസ്ത്വം
      കാര്യാന്തരാസക്തകരാന്തരാഭിഃ .
അകാര്യമേവാകഥയോ വിധിജ്ഞ
      വിരോധഗന്ധോഽത്ര കഥം വിധീനാം .. 79..

നാന്യച്ചരിത്രം ഭവതോഽതിചിത്രം
      യത്സത്പവർഷോഽപി ച സപ്തവർഷാത് .
ദീനാനി ദീനാനി ഗവാം കുലാനി
      ലീലോദ്ധൃതാദ്രിഃ സമപാലയസ്ത്വം .. 80..

ത്വദീയസങ്കല്പലനേന ദേവ
      രക്ഷാ യദി സ്ഥാവരജംഗമാനാം .
മഹീഘ്രമുദ്ധൃത്യ ഭുജേന വർഷാത്
      ഗോഗോപരക്ഷാ രചിതാ നു ചിത്രാ .. 81..

ത്രാതും ത്വയി സ്വാനചിരാദരാതീൻ
      നിരാചികീർഷത്യപി കംസകർണേ .
ജജാപ വൃന്ദാവനവാസിനം ത്വാം
      ത്വരാന്വിതസ്തസ്യ വധേ സുരർഷിഃ .. 82..

സുരർഷിവൃന്ദൈരപി ചിന്ത്യമാനം
      പാദാരവിന്ദം തവ നന്ദസൂനോ .
ബ്രഹ്മാ മുനീന്ദ്രൈരപി ദുർലഭം തത്
      സ്ഥിരത്രസാനാം സുലഭം ബഭൂവ .. 83..

വധായ കംസസ്യ രഥാധിരൂഢേ
      വിഹായ ഗോപീം മധുരാം യഥാസൗ .
അക്രൂരദത്തൈഃ പഥി വാക്യപുഷ്പൈഃ
      സംസ്തുയമാനഃ നിരണായി ഭോഗഃ .. 84..

ഗച്ഛംശ്ച വീഥ്യാം മഥുരാവധൂഭിഃ
      കുബ്ജാംഗവൈരൂപ്യനിരാകൃതിജ്ഞഃ .
ബാലഃ കിലായം വസുദേവസൂ നു-
      രിതി സ്മരസ്മേരമുദീക്ഷ്യസേ സ്മ .. 85..

സ്മൃതത്വദീയാഖിലബാലലീലൗ
      ജഗത്പിതരത്വം പിതരൗ വിമുച്യ .
ബന്ദ്ധാദ്വ്യധാഃ കംസകൃതാ സ്വരൂപ-
      സാക്ഷാത്കൃതിപ്രീതിയുതൗ നിതാന്തം .. 86..

നിതാന്തതാന്താം ശിശുപാലപാപ-
      പ്രസക്തിവാർതാശ്രവണേന കൃഷ്ണ .
ത്വാം രുക്മിണീം രുക്മസമാനശോഭാ-
      മാഹൃത്യ ഹൃദ്യാമകൃഥാഃ കൃതാർഥാം .. 87..

അർഥാദമർത്യാധിപതേരമിത്രാൻ
      സംഹർതുമുദ്യുക്തമനാ മനാക് ത്വം .
സത്യാനുരോധാദകരോന്മുരാരേ
      പുരം സുരാവാസമപാരിജാതം .. 88..

തം ത്വാം ഭജന്തഃ ശരണം ശരണ്യം
      രണേഷു പാർഥാത്ര ഭവത് കൃതാർഥാഃ .
പാഞ്ചാലപുത്രീപരിഭൂതിധൂതി-
      പ്രവീണനാമസ്മരണപ്രഭാവാ .. 89..

ഭാവാഹിതത്വന്മഹിമപ്രരോഹാ
      ഭർതുഃ ശുകവ്യാസപരാശരാദ്യാഃ .
ശ്രീരാജഗോപാല തവാഖിലാസു
      ലീലാസു കൂലങ്കഷവാഗ്വിലാസാഃ .. 90..

വിലാസവത്യംസകസവ്യഹസ്തം
      സ്മേരാനനാബ്ജം കമനീയകായം .
കരാന്തരേണാദൃതകേലിയഷ്ടി-
      മഭീഷ്ടദം ത്വാം ശരണം ഭജേയം .. 91..

ജയം യദീദം കലികാലഖേലദ്
      ദുർവൃത്തജാതം തവ കൽകിമൂർത്യാ
അദ്യൈവ സദ്യാചനയാനവദ്യ
      തഥാ യതേഥാഃ സ്വജനാവനായ .. 92..

യദേവ ദേവാത്ര പരത്ര ചാപി
      ഹിതം സതാം ചാനുമതം ഹിതജ്ഞ .
തന്മേ തവാംഘ്രീ ശരണം ഗതായ
      രമ്യം രമാധീശ വിധേഹി സമ്യക് .. 93..

സമീച്യസമ്യക്ത്വധിയാ വിമുഗ്ധോ
      സമീചി സമ്യക്ത്വധിയാ ച നാഥ .
കഥം ത്വഹം മേ ഹിതമേതദേവ .
      തദേവ ദേഹീത്യപി യാചിതാഹേ .. 94..

ഹേ ദേവ ഭോഗീശഖഗേശമുഖ്യൈ-
      ര്ദിവ്യൈർദിവാരാത്രവിഭാഗശൂന്യം .
സംസേവ്യമാനം തവ പാദപദ്മ-
      യുഗം കദാഹം കരവാണി സാക്ഷാത് .. 95..

ക്ഷാന്തിഃ ക്ഷമാനാഥ മദീയദോഷ-
      ലാഭാദലഭ്യാദഖിലേഽപി ലോകേ .
അതീവ സൗഹിത്യമുപേത്യ മുക്തിം
      ബദ്ധാത് സ്വതന്ത്രാന്മമ സംവിധത്താം .. 96..

താമേവ ദേവീം ശരണം പ്രപദ്യേ
      ദധാമ ഹേതും മഹതീം ത്വദീയാം .
യാസീത് സ്വയം സംസൃതിചകവാത്യാ-
      ഭ്രമാതിദുഃഖ്യജ്ജനജീവനായ .. 97..

യത്സത്സു വാത്സല്യമിതി പ്രസിദ്ധം
      ത്വദീയകല്യാണഗുണേഷു രത്നം .
തദേവ പൂർവോത്തരദോഷരാശീ
      ഉപേക്ഷ്യ രക്ഷേദിതി നിശ്ചയോ മേ .. 98..

മേധാ ദൃഢാ മാധവ തേ പരത്വേഽ-
      പ്യപായതായാം യദുപേയതായാം .
പരീക്ഷ്യ രക്ഷ ത്രിതയം തദേതത്
      സമഗ്രമാഗോഽന്യദുപേക്ഷണാർഹം .. 99..

അർഹദ്ഭിരംഘ്ര്യോർഭവതോഽർപിതം മാം
      സഹാസ്മദീയേന ദയാർദ്രചിത്ത .
ശ്രീരാജഗോപാല തഥാ വിധേഹി
      യഥാ ഭവേയം ഭൃതകിങ്കരശ്രീഃ .. 100..

ഇതി ശ്രീരാജഗോപാലസ്തവഃ സമ്പൂർണഃ .