SREE MADANAGOPALA STHOTHRAM

 

 ശ്രീമദനഗോപാലസ്തോത്രം 


വനഭുവി രവികന്യാസ്വച്ഛകച്ഛാലിപാലി
ധ്വനിയുതവരതീർഥദ്വാദശാദിത്യകുഞ്ജേ .
സകനകമണിവേദീമധ്യമധ്യാധിരൂഢഃ
സ്ഫുരതി മദനപൂർവഃ കോഽപി ഗോപാല ഏഷഃ .. 1..

സുഭഗനവശിഖണ്ഡഭ്രാജദുഷ്ണീഷഹാരാ-
ങ്ഗദവലയസമുദ്രാധ്വാനമഞ്ജീരരമ്യഃ .
വസനഘുസൃണചർചാമല്ലികോല്ലാസിതാംഗഃ
സ്ഫുരതി മദനപൂർവഃ കോഽപി ഗോപാല ഏഷഃ .. 2..

കടികൃതവരഭംഗന്യസ്തജംഘാന്യജംഘഃ
കരയുഗധൃതവംശീം ന്യസ്തബിംബാധരാഗ്രേ .
സുമധുരമതിതിര്യഗ്ഗ്രീവയാ വാദയംസ്താം
സ്ഫുരതി മദനപൂർവഃ കോഽപി ഗോപാല ഏഷഃ .. 3..

വിധികൃതവിധുസൃഷ്ടിവ്യർഥതാകാരിവക്ത്ര
ദ്യുതിലവഹൃതരാധാസ്ഥൂലമാനാന്ധകാരഃ .
സ്മിതലപിതമധൂല്യോന്മാദിതൈതദ്ധൃഷീകഃ
സ്ഫുരതി മദനപൂർവഃ കോഽപി ഗോപാല ഏഷഃ .. 4..

ശരദുദിതസരോജവ്രാതവിത്രാസിനേത്രഽ-
ന്ചലകുടിലകടാക്ഷൈർമന്ദരോഡ്ഡണ്ഡചാലൈഃ .
ഝടിതി മഥിതരാധാസ്വാന്തദുഗ്ധാർണവാന്തഃ
സ്ഫുരതി മദനപൂർവഃ കോഽപി ഗോപാല ഏഷഃ .. 5..

കുടിലചടുലചില്ലീവല്ലിലാസ്യേന ലബ്ധ
പ്രഥിതസകലസാധ്വീധർമരത്നപ്രസാദഃ .
തിലകവദലികേന ധ്വസ്തകാമേഷുചാപഃ
സ്ഫുരതി മദനപൂർവഃ കോഽപി ഗോപാല ഏഷഃ .. 6..

ശുകയുവവരചഞ്ചുപ്രാംശുനാസാംശുസിന്ധൗ
ജനിതകുലവധൂടീദൃഷ്ടിമത്സ്യീവിഹാരഃ .
സ്മിതലവയുതരാധാജല്പമന്ത്രോന്മദാന്തഃ
സ്ഫുരതി മദനപൂർവഃ കോഽപി ഗോപാല ഏഷഃ .. 7..

വികസദധരബന്ധൂകാന്തരുഡ്ഡീയ ഗന്ധൈഃ
പതിതമുപ വിധർതും രാധികാചിത്തഭൃംഗം .
ദശനരുചിഗുണാഗ്രേ ദത്തതത്സീധുചാരഃ
സ്ഫുരതി മദനപൂർവഃ കോഽപി ഗോപാല ഏഷഃ .. 8..

ശ്രവണമദനകന്ദപ്രേക്ഷണോഡ്ഡീനരാധാ
ധൃതിവിഭവവിഹംഗേ ന്യസ്തനേത്രാന്തബാണഃ .
അലകമധുപദത്തദ്യോതമാധ്വീകസത്രഃ
സ്ഫുരതി മദനപൂർവഃ കോഽപി ഗോപാല ഏഷഃ .. 9..

പരിമലരുചിപാലീശാലിഗാന്ധർവികോദ്യ-
ന്മുഖകമലമധൂലീപാനമത്തദ്വിരേഫഃ .
മുകുരജയികപോലേ മൃഗ്യതാചുംബബിംബഃ
സ്ഫുരതി മദനപൂർവഃ കോഽപി ഗോപാല ഏഷഃ .. 10..

മകരമുഖസദൃക്ഷസ്വർണവർണാവതംസ
പ്രചലനഹൃതരാധാസർവശാരീരധർമഃ .
തദതിചലദൃഗന്തസ്വസ്ഥവംശേ ധൃതാക്ഷഃ
സ്ഫുരതി മദനപൂർവഃ കോഽപി ഗോപാല ഏഷഃ .. 11..

ഹരിമണികൃതശംഖശ്ലാഘിതോല്ലംഘിലേഖാ
ത്രയരുചിവൃതകണ്ഠസ്യോപകണ്ഠേ മണീന്ദ്രം .
ദധദിഹ പരിരബ്ധും രാധികാം ബിംബിതാം ച
സ്ഫുരതി മദനപൂർവഃ കോഽപി ഗോപാല ഏഷഃ .. 12..

കുവലയകൃതവക്ഷസ്തല്പമുച്ചം ദധാനഃ
ശ്രമവിലുലിതരാധാസ്വാപനായൈവ നവ്യം .
ഭുജയുഗമപി ദിവ്യം തത്പ്രകാണ്ഡോപധാനം
സ്ഫുരതി മദനപൂർവഃ കോഽപി ഗോപാല ഏഷഃ .. 13..

രുചിരജഠരപത്രേ ചിത്രനാഭീതടോദ്യ-
ത്തനുരുഹതതിനാമ്നീം ബല്ലവീവൃന്ദഭുക്ത്യൈ .
സ്മരനൃപതിസമുദ്രസ്വാക്ഷരാലീം ദധാനഃ
സ്ഫുരതി മദനപൂർവഃ കോഽപി ഗോപാല ഏഷഃ .. 14..

യുവതിഹൃദലസേഭപ്രൗഢബന്ധായ കാമ
സ്ഥപിതചിതരസോരുസ്തംഭജൃംഭാഭിരാമഃ .
മരകതകടജൈത്രഫുല്ലജാനുപ്രസന്നഃ
സ്ഫുരതി മദനപൂർവഃ കോഽപി ഗോപാല ഏഷഃ .. 15..

പ്രണയനവമധൂനാം പാനമാത്രൈകഗത്യാ
സകലകരണജീവ്യം രാധികാമത്തഭൃംഗ്യാഃ .
അരുണചരണകഞ്ജദ്വന്ദ്വമുല്ലാസ്യ പശ്യ-
ന്സ്ഫുരതി മദനപൂർവഃ കോഽപി ഗോപാല ഏഷഃ .. 16..

അതുലവിലസദംഗശ്രേണിവിന്യാസഭംഗ്യാ
ഗ്ലപിതമദനകോടിസ്ഫാരസൗന്ദര്യകീർതിഃ .
ബലലവഹതമത്താപാരപാരീന്ദ്രദർപഃ
സ്ഫുരതി മദനപൂർവഃ കോഽപി ഗോപാല ഏഷഃ .. 17..

തരണിദുഹിതൃകച്ഛേ സ്വച്ഛപാഥോദധാമാ
സമുദിതനവകാമാഭിരരാമാവലീണാം .
തഡിദതിരുചിബാഹുസ്ഫുർജദംസോഽതിജൃംഭ-
ന്സ്ഫുരതി മദനപൂർവഃ കോഽപി ഗോപാല ഏഷഃ .. 18..

നവതരുണിമഭട്ടാചാര്യവര്യേണ ശാസ്ത്രം
മനസിജമുനി കൢപ്തം ന്യായമധ്യാപിതാഭിഃ .
നവനവയുവതീഭിർബിഭ്രദുദ്ഗ്രാഹമസ്മി-
ന്സ്ഫുരതി മദനപൂർവഃ കോഽപി ഗോപാല ഏഷഃ .. 19..

രതിമതിരചയന്ത്യാ രാധികാനർമകാന്ത്യാ
സ്ഥഗിതവചനദർപഃ സ്ഫാരിതാന്യപ്രസംഗഃ .
ഖരമതിലലിതാസ്യേ കിഞ്ചിദഞ്ചത്സ്മിതാക്ഷഃ
സ്ഫുരതി മദനപൂർവഃ കോഽപി ഗോപാല ഏഷഃ .. 20..

സവിധരമിതരാധഃ സാഗ്രജസ്നിഗ്ധരൂപ
പ്രണയരുചിരചന്ദ്രഃ കുഞ്ജഖേലാവിതന്ദ്രഃ .
രചിതജനചകോരപ്രേമപീയൂഷവർഷഃ
സ്ഫുരതി മദനപൂർവഃ കോഽപി ഗോപാല ഏഷഃ .. 21..

മദനവലിതഗോപാലസ്യ യഃ സ്തോത്രമേത-
ത്പഠതി സുമതിരുദ്യദ്ദൈന്യവന്യാഭിഷിക്തഃ .
സ ഖലു വിഷയരാഗം സൗരിഭാഗം വിഹായ
പ്രതിജനി ലഭതേ തത്പാദകഞ്ജാനുരാഗം .. 22..

ഇതി ശ്രീരഘുനാഥദാസഗോസ്വാമിവിരചിതസ്തവാവല്യാം
ശ്രീമദനഗോപാലസ്തോത്രം സമ്പൂർണം .