SREE KRISHNA SAHASRANAMA STHOTHRAM (FROM GARGA SAMHITHA)

 

ശ്രീകൃഷ്ണസഹസ്രനാമം (ഗർഗസംഹിതാന്തർഗതം)

ഗർഗ ഉവാച .

അഥോഗ്രസേനോ നൃപതിഃ പുത്രസ്യാശാം വിസൃജ്യ ച .
വ്യാസം പപ്രച്ഛ സന്ദേഹം ജ്ഞാത്വാ വിശ്വം മനോമയം .. 1..

ഉഗ്രസേന ഉവാച
ബ്രഹ്മൻ കേന പ്രകാരേണ ഹിത്വാ ച ജഗതഃ സുഖം .
ഭജേത് കൃഷ്ണം പരംബ്രഹ്മ തന്മേ വ്യാഖ്യാതുമർഹസി .. 2..

വ്യാസ ഉവാച .
ത്വദഗ്രേ കഥയിഷ്യാമി സത്യം ഹിതകരം വചഃ .
ഉഗ്രസേന മഹാരാജ ശൃണുഷ്വൈകാഗ്രമാനസഃ .. 3..

സേവനം കുരു രാജേന്ദ്ര രാധാശ്രീകൃഷ്ണയോഃ പരം .
നിത്യം സഹസ്രനാമഭ്യാമുഭയോർഭക്തിതഃ കില .. 4..

സഹസ്രനാമ രാധായാ വിധിർജാനാതി ഭൂപതേ .
ശങ്കരോ നാരദശ്ചൈവ കേചിദ്വൈ ചാസ്മദാദയഃ .. 5..

ഉഗ്രസേന ഉവാച .
രാധികാനാമസാഹസ്രം നാരദാച്ച പുരാ ശ്രുതം .
ഏകാന്തേ ദിവ്യശിബിരേ കുരുക്ഷേത്രേ രവിഗ്രഹേ .. 6..

ന ശ്രുതം നാമസാഹസ്രം കൃഷ്ണസ്യാക്ലിഷ്ടകർമണഃ .
വദ തന്മേ ച കൃപയാ യേന ശ്രേയോഽഹമാപ്നുയാം .. 7..

ഗർഗ ഉവാച .
ശ്രുത്വോഗ്രസേനവചനം വേദവ്യാസോ മഹാമുനിഃ .
പ്രശസ്യ തം പ്രീതമനാഃ പ്രാഹ കൃഷ്ണം വിലോകയൻ .. 8..

വ്യാസ ഉവാച .
ശൃണു രാജൻ പ്രവക്ഷ്യാമി സഹസ്രം നാമ സുന്ദരം .
പുരാ സ്വധാമ്നി രാധായൈ കൃഷ്ണേനാനേന നിർമിതം .. 9..

ശ്രീഭഗവാനുവാച .
ഇദം രഹസ്യം കില ഗോപനീയം ദത്തേ ച ഹാനിഃ സതതം ഭവേദ്ധി .
മോക്ഷപ്രദം സർവസുഖപ്രദം ശം പരം പരാർഥം പുരുഷാർഥദം ച .. 10..

രൂപം ച മേ കൃഷ്ണസഹസ്രനാമ പഠേത്തു മദ്രൂപ ഇവ പ്രസിദ്ധഃ .
ദാതവ്യമേവം ന ശഠായ കുത്ര ന ദാംഭികായോപദിശേത് കദാപി .. 11..

ദാതവ്യമേവം കരുണാവൃതായ ഗുർവംഘ്രിഭക്തിപ്രപരായണായ .
ശ്രീകൃഷ്ണഭക്തായ സതാം പരായ തഥാ മദക്രോധവിവർജിതായ .. 12..
-------------------------------------------------------------------------------
ഓം അസ്യ ശ്രീകൃഷ്ണസഹസ്രനാമസ്തോത്രമന്ത്രസ്യ നാരായണഋഷിഃ .
ഭുജംഗപ്രയാതം ഛന്ദഃ .  ശ്രീകൃഷ്ണചന്ദ്രോ ദേവതാ .
വാസുദേവോ ബീജം .  ശ്രീരാധാ ശക്തിഃ . മന്മഥഃ കീലകം .
ശ്രീപൂർണബ്രഹ്മകൃഷ്ണചന്ദ്രഭക്തിജന്മഫലപ്രാപ്തയേ ജപേ വിനിയോഗഃ ..
--------------------------------------------------------------------------------
അഥ ധ്യാനം . (ഭുജംഗപ്രയാതം)
ശിഖിമുകുടവിശേഷം നീലപദ്മാംഗദേശം
     വിധുമുഖകൃതകേശം കൗസ്തുഭാപീതവേശം .
മധുരരവകലേശം ശം ഭജേ ഭ്രാതൃശേഷം
     വ്രജജനവനിതേശം മാധവം രാധികേശം .. 13..

ഇതി ധ്യാനം ..
-----------------------------------------------------------------------------------------------
ഓം ഹരിർദേവകീനന്ദനഃ കംസഹന്താ പരാത്മാ ച പീതാംബരഃ പൂർണദേവഃ .
രമേശസ്തു കൃഷ്ണഃ പരേശഃ പുരാണഃ സുരേശോഽച്യുതോ വാസുദേവശ്ച ദേവഃ .. 14..

ധരാഭാരഹർതാ കൃതീ രാധികേശഃ പരോ ഭൂവരോ ദിവ്യഗോലോകനാഥഃ .
സുദാമ്നസ്തഥാ രാധികാശാപഹേതുർഘൃണീ മാനിനീമാനദോ ദിവ്യലോകഃ .. 15..

ലസദ്ഗോപവേഷോ ഹ്യജോ രാധികാത്മാ ചലത്കുണ്ഡലഃ കുന്തലീ കുന്തലസ്രക് .
രഥസ്ഥഃ കദാ രാധയാ ദിവ്യരത്നഃ സുധാസൗധഭൂചാരണോ ദിവ്യവാസാഃ .. 16..

കദാ വൃന്ദകാരണ്യചാരീ സ്വലോകേ മഹാരത്നസിംഹാസനസ്ഥഃ പ്രശാന്തഃ .
മഹാഹംസഭൈ(?)ശ്ചാമരൈർവീജ്യമാനശ്ചലച്ഛത്രമുക്താവലീശോഭമാനഃ .. 17..

സുഖീ കോടികന്ദർപലീലാഭിരാമഃ ക്വണന്നൂപുരാലഽഗ്കൃതാംഘ്രിഃ ശുഭാംഘ്രിഃ .
സുജാനുശ്ച രംഭാശുഭോരുഃ കൃശാംഗഃ പ്രതാപീ ഭുശുണ്ഡാസുദോർദണ്ഡഖണ്ഡഃ .. 18..

ജപാപുഷ്പഹസ്തശ്ച ശാതോദരശ്രീർമഹാപദ്മവക്ഷസ്ഥലശ്ചന്ദ്രഹാസഃ .
ലസത്കുന്ദദന്തശ്ച ബിംബാധരശ്രീഃ ശരത്പദ്മനേത്രഃ കിരീടോജ്ജ്വലാഭഃ .. 19..

സഖീകോടിഭിർവർതമാനോ നികുഞ്ജേ പ്രിയാരാധയാ രാസസക്തോ നവാംഗഃ .
ധരാബ്രഹ്മരുദ്രാദിഭിഃ പ്രാർഥിതഃ സദ്ധരാഭാരദൂരീകൃതാർഥം പ്രജാതഃ .. 20..

യദുർദേവകീസൗഖ്യദോ ബന്ധനച്ഛിത് സശേഷോ വിഭുര്യോഗമായീ ച വിഷ്ണുഃ .
വ്രജേ നന്ദപുത്രോ യശോദാസുതാഖ്യോ മഹാസൗഖ്യദോ ബാലരൂപഃ ശുഭാംഗഃ .. 21..

തഥാ പൂതനാമോക്ഷദഃ ശ്യാമരൂപോ ദയാലുസ്ത്വനോഭഞ്ജനഃ പല്ലവാംഘ്രിഃ .
തൃണാവർതസംഹാരകാരീ ച ഗോപോ യശോദായശോ വിശ്വരൂപപ്രദർശീ .. 22..

തഥാ ഗർഗദിഷ്ടശ്ച ഭാഗ്യോദയശ്രീഃ ലസദ്ബാലകേലിഃസരാമഃ സുവാചഃ .
ക്വണന്നൂപുരൈഃ ശബ്ദയുഗ്രിംഗമാണസ്തഥാ ജാനുഹസ്തൈർവ്രജേശാംഗണേ വാ .. 23..

ദധിസ്പൃക്ച ഹൈയംഗവീദുഗ്ധഭോക്താ ദധിസ്തേയകൃദ്ദുഗ്ധഭുഗ്ഭാണ്ഡഭേത്താ .
മൃദം ഭുക്തവാൻ ഗോപജോ വിശ്വരൂപഃ പ്രചണ്ഡാംശുചണ്ഡപ്രഭാമണ്ഡിതാംഗഃ .. 24..

യശോദാകരൈർവർധനം പ്രാപ്ത ആദ്യോ മണിഗ്രീവമുക്തിപ്രദോ ദാമബദ്ധഃ .
കദാ നൃത്യമാനോ വ്രജേ ഗോപികാഭിഃ കദാ നന്ദസന്നന്ദകൈർലാല്യമാനഃ .. 25..

കദാ ഗോപനന്ദാങ്കഗോപാലരൂപീ കലിന്ദാംഗജാകൂലഗോ വർതമാനഃ .
ഘനൈർമാരുതൈശ്ച്ഛന്നഭാണ്ഡീരദേശേ ഗൃഹീതോ വരോ രാധയാ നന്ദഹസ്താത് .. 26..

നികുഞ്ജേ ച ഗോലോകലോകാഗതേഽപി മഹാരത്നസംഘൈഃ കദംബാവൃതേഽപി .
തദാ ബ്രഹ്മണാ രാധികാസദ്വിവാഹേ പ്രതിഷ്ഠാം ഗതഃ പൂജിതഃ സാമമന്ത്രൈഃ .. 27..

രസീ രാസയുങ്മാലതീനാം വനേഽപി പ്രിയാരാധയാഽഽരാധിതാർഥോ രമേശഃ .
                 variation  പ്രിയാരാധയാ രാധികാർഥം
ധരാനാഥ ആനന്ദദഃ ശ്രീനികേതോ വനേശോ ധനീ സുന്ദരോ ഗോപികേശഃ .. 28..

കദാ രാധയാ പ്രാപിതോ നന്ദഗേഹേ യശോദാകരൈർലാലിതോ മന്ദഹാസഃ .
ഭയീ ക്വാപി വൃന്ദാരകാരണ്യവാസീ മഹാമന്ദിരേ വാസകൃദ്ദേവപൂജ്യഃ .. 29..

വനേ വത്സചാരീ മഹാവത്സഹാരീ ബകാരിഃ സുരൈഃ പൂജിതോഽഘാരിനാമാ .
വനേ വത്സകൃദ്ഗോപകൃദ്ഗോപവേഷഃ കദാ ബ്രഹ്മണാ സംസ്തുതഃ പദ്മനാഭഃ .. 30..

വിഹാരീ തഥാ താലഭുഗ്ധേനുകാരിഃ സദാ രക്ഷകോ ഗോവിഷാർഥിപ്രണാശീ .
കലിന്ദാംഗജാകൂലഗഃ കാലിയസ്യ ദമീ നൃത്യകാരീ ഫണേഷ്വപ്രസിദ്ധഃ .. 31..

സലീലഃ ശമീ ജ്ഞാനദഃ കാമപൂരസ്തഥാ ഗോപയുഗ്ഗോപ ആനന്ദകാരീ .
സ്ഥിരീഹ്യഗ്നിഭുക്പാലകോ ബാലലീലഃ സുരാഗശ്ച വംശീധരഃ പുഷ്പശീലഃ .. 32..

പ്രലംബപ്രഭാനാശകോ ഗൗരവർണോ ബലോ രോഹിണീജശ്ച രാമശ്ച ശേഷഃ .
ബലീ പദ്മനേത്രശ്ച കൃഷ്ണാഗ്രജശ്ച ധരേശഃ ഫണീശസ്തു നീലാംബരാഭഃ .. 33..

മഹാസൗഖ്യദോ ഹ്യഗ്നിഹാരോ വ്രജേശഃ ശരദ്ഗ്രീഷ്മവർഷാകരഃ കൃഷ്ണവർണഃ .
വ്രജേ ഗോപികാപൂജിതശ്ചീരഹർതാ കദംബേ സ്ഥിതശ്ചീരദഃ സുന്ദരീശഃ .. 34..

ക്ഷുധാനാശകൃദ്യജ്ഞപത്നീമനഃസ്പൃക്കൃപാകാരകഃ കേലികർതാവനീശഃ .
വ്രജേ ശക്രയാഗപ്രണാശീ മിതാശീ ശുനാസീരമോഹപ്രദോ ബാലരൂപീ .. 35..

ഗിരേഃ പൂജകോ നന്ദപുത്രോ ഹ്യഗധ്രഃ കൃപാകൃച്ച ഗോവർധനോദ്ധാരിനാമാ .
തഥാ വാതവർഷാഹരോ രക്ഷകശ്ച വ്രജാധീശഗോപാംഗനാശങ്കിതഃ സൻ .. 36..

അഗേന്ദ്രോപരി ശക്രപൂജ്യഃ സ്തുതഃ പ്രാങ്മൃഷാശിക്ഷകോ ദേവഗോവിന്ദനാമാ .
വ്രജാധീശരക്ഷാകരഃ പാശിപൂജ്യോഽനുജൈർഗോപജൈർദിവ്യവൈകുണ്ഠദർശീ .. 37..

ചലച്ചാരുവംശീക്വണഃ കാമിനീശോ വ്രജേ കാമീനീമോഹദഃ കാമരൂപഃ .
രസാക്തോ രസീ രാസകൃദ്രാധികേശോ മഹാമോഹദോ മാനിനീമാനഹാരീ .. 38..

വിഹാരീ വരോ മാനഹൃദ്രാധികാംഗോ ധരാദ്വീപഗഃ ഖണ്ഡചാരീ വനസ്ഥഃ .
പ്രിയോ ഹ്യഷ്ടവക്രർഷിദ്രഷ്ടാ സരാധോ മഹാമോക്ഷദഃ പദ്മഹാരീ പ്രിയാർഥഃ .. 39..

വടസ്ഥഃ സുരശ്ചന്ദനാക്തഃ പ്രസക്തോ വ്രജം ഹ്യാഗതോ രാധയാ മോഹിനീഷു .
മഹാമോഹകൃദ്ഗോപികാഗീതകീർതീ രസസ്ഥഃ പടീ ദുഃഖിതാകാമിനീശഃ .. 40..

വനേ ഗോപികാത്യാഗകൃത്പാദചിഹ്നപ്രദർശീ കലാകാരകഃ കാമമോഹീ .
വശീ ഗോപികാമധ്യഗഃ പേശവാചഃ പ്രിയാപ്രീതികൃദ്രാസരക്തഃ കലേശഃ .. 41..

രസാരക്തചിത്തോ ഹ്യനന്തസ്വരൂപഃ സ്രജാ സംവൃതോ വല്ലവീമധ്യസംസ്ഥഃ .
സുബാഹുഃ സുപാദഃ സുവേശഃ സുകേശോ വ്രജേശഃ സഖാ വല്ലഭേശഃ സുദേശഃ .. 42..

ക്വണത്കിങ്കിണീജാലഭൃന്നൂപുരാഢ്യോ ലസത്കങ്കണോ ഹ്യംഗദീ ഹാരഭാരഃ .
കിരീടീ ചലത്കുണ്ഡലശ്ചാംഗുലീയസ്ഫുരത്കൗസ്തുഭോ മാലതീമണ്ഡിതാംഗഃ .. 43..

മഹാനൃത്യകൃദ്രാസരംഗഃ കലാഢ്യശ്ചലദ്ധാരഭോ ഭാമിനീനൃത്യയുക്തഃ .
കലിന്ദാംഗജാകേലികൃത്കുങ്കുമശ്രീഃ സുരൈർനായികാനായകൈർഗീയമാനഃ .. 44..

സുഖാഢ്യസ്തു രാധാപതിഃ പൂർണബോധഃ കടാക്ഷസ്മിതീവൽഗിതഭ്രൂവിലാസഃ .
സുരമ്യോഽലിഭിഃ കുന്തലാലോലകേശഃ സ്ഫുരദ്ബർഹകുന്ദസ്രജാ ചാരുവേഷഃ .. 45..

മഹാസർപതോ നന്ദരക്ഷാപരാംഘ്രിഃ സദാ മോക്ഷദഃ ശംഖചൂഡപ്രണാശീ .
                    variation  മഹാമോക്ഷദഃ
പ്രജാരക്ഷകോ ഗോപികാഗീയമാനഃ കകുദ്മിപ്രണാശപ്രയാസഃ സുരേജ്യഃ .. 46..

കലിഃ ക്രോധകൃത്കംസമന്ത്രോപദേഷ്ടാ തഥാക്രൂരമന്ത്രോപദേശീ സുരാർഥഃ .
ബലീ കേശിഹാ പുഷ്പവർഷോഽമലശ്രീസ്തഥാ നാരദാദ്ദർശിതോ വ്യോമഹന്താ .. 47..

തഥാക്രൂരസേവാപരഃ സർവദർശീ വ്രജേ ഗോപികാമോഹദഃ കൂലവർതീ .
സതീരാധികാബോധദഃ സ്വപ്നകർതാ വിലാസീ മഹാമോഹനാശീ സ്വബോധഃ .. 48..

വ്രജേ ശാപതസ്ത്യക്തരാധാസകാശോ മഹാമോഹദാവാഗ്നിദഗ്ധാപതിശ്ച .
സഖീബന്ധനാന്മോഹിതാക്രൂര ആരാത്സഖീകങ്കണൈസ്താഡിതാക്രൂരരക്ഷീ .. 49..

രഥസ്ഥോ വ്രജേ രാധയാ കൃഷ്ണചന്ദ്രഃ സുഗുപ്തോ ഗമീ ഗോപകൈശ്ചാരുലീലഃ .
ജലേഽക്രൂരസന്ദർശിതോ ദിവ്യരൂപോ ദിദൃക്ഷുഃ പുരീമോഹിനീചിത്തമോഹീ .. 50..

തഥാ രംഗകാരപ്രണാശീ സുവസ്ത്രഃസ്രജീ വായകപ്രീതികൃന്മാലിപൂജ്യഃ .
മഹാകീർതിദശ്ചാപി കുബ്ജാവിനോദീ സ്ഫുരച്ചണ്ഡകോദണ്ഡരുഗ്ണപ്രചണ്ഡഃ .. 51..

ഭടാർതിപ്രദഃ കംസദുഃസ്വപ്നകാരീ മഹാമല്ലവേഷഃ കരീന്ദ്രപ്രഹാരീ .
മഹാമാത്യഹാ രംഗഭൂമിപ്രവേശീ രസാഢ്യോ യശഃസ്പൃഗ്ബലീ വാക്പടുശ്രീഃ .. 52..

മഹാമല്ലഹാ യുദ്ധകൃത്സ്ത്രീവചോഽർഥീ ധരാനായകഃ കംസഹന്താ യദുഃപ്രാക് .
സദാ പൂജിതോ ഹ്യുഗ്രസേനപ്രസിദ്ധോ ധരാരാജ്യദോ യാദവൈർമണ്ഡിതാംഗഃ .. 53..

ഗുരോഃ പുത്രദോ ബ്രഹ്മവിദ്ബ്രഹ്മപാഠീ മഹാശംഖഹാ ദണ്ഡധൃക്പൂജ്യ ഏവ .
വ്രജേ ഹ്യുദ്ധവപ്രേഷിതോ ഗോപമോഹീ യശോദാഘൃണീ ഗോപികാജ്ഞാനദേശീ .. 54..

സദാ സ്നേഹകൃത്കുബ്ജയാ പൂജിതാംഗസ്തഥാക്രൂരഗേഹംഗമീ മന്ത്രവേത്താ .
തഥാ പാണ്ഡവപ്രേഷിതാക്രൂര ഏവ സുഖീ സർവദർശീ നൃപാനന്ദകാരീ .. 55..

മഹാക്ഷൗഹിണീഹാ ജരാസന്ധമാനീ നൃപോ ദ്വാരകാകാരകോ മോക്ഷകർതാ .
രണീ സാർവഭൗമസ്തുതോ ജ്ഞാനദാതാ ജരാസന്ധസങ്കല്പകൃദ്ധാവദംഘ്രിഃ .. 56..

നഗാദുത്പതദ്ദ്വാരികാമധ്യവർതീ തഥാ രേവതീഭൂഷണസ്താലചിഹ്നഃ .
യദൂ രുക്മിണീഹാരകശ്ചൈദ്യവേദ്യസ്തഥാ രുക്മിരൂപപ്രണാശീ സുഖാശീ .. 57..

അനന്തശ്ച മാരശ്ച കാർഷ്ണിശ്ച കാമോ മനോജസ്തഥാ ശംബരാരീ രതീശഃ .
രഥീ മന്മഥോ മീനകേതുഃ ശരീ ച സ്മരോ ദർപകോ മാനഹാ പഞ്ചബാണഃ .. 58..

പ്രിയഃ സത്യഭാമാപതിര്യാദവേശോഽഥ സത്രാജിതപ്രേമപൂരഃ പ്രഹാസഃ .
മഹാരത്നദോ ജാംബവദ്യുദ്ധകാരീ മഹാചക്രധൃക്ഖഡ്ഗധൃഗ്രാമസന്ധിഃ .. 59..

വിഹാരസ്ഥിതഃ പാണ്ഡവപ്രേമകാരീ കലിന്ദാംഗജാമോഹനഃ ഖാണ്ഡവാർഥീ .
സഖാ ഫാൽഗുനപ്രീതികൃന്നഗ്രകർതാ തഥാ മിത്രവിന്ദാപതിഃ ക്രീഡനാർഥീ .. 60..

നൃപപ്രേമകൃദ്ഗോജിതഃ സപ്തരൂപോഽഥ സത്യാപതിഃ പാരിബർഹീ യഥേഷ്ടഃ .
നൃപൈഃ സംവൃതശ്ചാപി ഭദ്രാപതിസ്തു വിലാസീ മധോർമാനിനീശോ ജനേശഃ .. 61..

ശുനാസീരമോഹാവൃതഃ സത്സഭാര്യഃ സതാർക്ഷ്യോ മുരാരിഃ പുരീസംഘഭേത്താ .
സുവീരഃശിരഃഖണ്ഡനോ ദൈത്യനാശീ ശരീ ഭൗമഹാ ചണ്ഡവേഗഃ പ്രവീരഃ .. 62..

ധരാസംസ്തുതഃ കുണ്ഡലച്ഛത്രഹർതാ മഹാരത്നയുഗ് രാജകന്യാഭിരാമഃ .
ശചീപൂജിതഃ ശക്രജിന്മാനഹർതാ തഥാ പാരിജാതാപഹാരീ രമേശഃ .. 63..

ഗൃഹീ ചാമരൈഃ ശോഭിതോ ഭീഷ്മകന്യാപതിർഹാസ്യകൃന്മാനിനീമാനകാരീ .
തഥാ രുക്മിണീവാക്പടുഃ പ്രേമഗേഹഃ സതീമോഹനഃ കാമദേവാപരശ്രീഃ .. 64..

സുദേഷ്ണഃ സുചാരുസ്തഥാ ചാരുദേഷ്ണോഽപരശ്ചാരുദേഹോ ബലീ ചാരുഗുപ്തഃ .
സുതീ ഭദ്രചാരുസ്തഥാ ചാരുചന്ദ്രോ വിചാരുശ്ച ചാരൂ രഥീ പുത്രരൂപഃ .. 65..

സുഭാനുഃ പ്രഭാനുസ്തഥാ ചന്ദ്രഭാനുർബൃഹദ്ഭാനുരേവാഷ്ടഭാനുശ്ച സാംബഃ .
സുമിത്രഃ ക്രതുശ്ചിത്രകേതുസ്തു വീരോഽശ്വസേനോ വൃഷശ്ചിത്രഗുശ്ചന്ദ്രബിംബഃ .. 66..

വിശങ്കുർവസുശ്ച ശ്രുതോ ഭദ്ര ഏകഃ സുബാഹുർവൃഷഃ പൂർണമാസസ്തു സോമഃ .
വരഃ ശാന്തിരേവ പ്രഘോഷോഽഥ സിംഹോ ബലോ ഹ്യൂർധ്വഗോവർധനോന്നാദ ഏവ .. 67..

മഹാശോ വൃകഃ പാവനോ വഹ്നിമിത്രഃ ക്ഷുധിർഹർഷകശ്ചാനിലോഽമിത്രജിച്ച .
സുഭദ്രോ ജയഃ സത്യകോ വാമ ആയുര്യദുഃ കോടിശഃ പുത്രപൗത്രപ്രസിദ്ധഃ .. 68..

ഹലീ ദണ്ഡധൃഗ്രുക്മിഹാ ചാനിരുദ്ധസ്തഥാ രാജഭിർഹാസ്യഗോ ദ്യൂതകർതാ .
മധുർബ്രഹ്മസൂർബാണപുത്രീപതിശ്ച മഹാസുന്ദരഃ കാമപുത്രോ ബലീശഃ .. 69..

മഹാദൈത്യസംഗ്രാമകൃദ്യാദവേശഃ പുരീഭഞ്ജനോ ഭൂതസന്ത്രാസകാരീ .
മൃധീ രുദ്രജിദ്രുദ്രമോഹീ മൃധാർഥീ തഥാ സ്കന്ദജിത്കൂപകർണപ്രഹാരീ .. 70..

ധനുർഭഞ്ജനോ ബാണമാനപ്രഹാരീ ജ്വരോത്പത്തികൃത്സംസ്തുതസ്തു ജ്വരേണ .
ഭുജാച്ഛേദകൃദ്ബാണസന്ത്രാസകർതാ മൃഡപ്രസ്തുതോ യുദ്ധകൃദ്ഭൂമിഭർതാ .. 71..

നൃഗം മുക്തിദോ ജ്ഞാനദോ യാദവാനാം രഥസ്ഥോ വ്രജപ്രേമപോ ഗോപമുഖ്യഃ .
മഹാസുന്ദരീക്രീഡിതഃ പുഷ്പമാലീ കലിന്ദാംഗജാഭേദനഃ സീരപാണിഃ .. 72..

മഹാദംഭിഹാ പൗണ്ഡ്രമാനപ്രഹാരോ ശിരശ്ഛേദകഃ കാശിരാജപ്രണാശീ .
മഹാക്ഷൗഹിണീധ്വംസകൃച്ചക്രഹസ്തഃ പുരീദീപകോ രാക്ഷസീനാശകർതാ .. 73..

അനന്തോ മഹീധ്രഃ ഫണീ വാനരാരിഃ സ്ഫുരദ്ഗൗരവർണോ മഹാപദ്മനേത്രഃ .
കുരുഗ്രാമതിര്യഗ്ഗതോ ഗൗരവാർഥഃ സ്തുതഃ കൗരവൈഃ പാരിബർഹീ സസാംബഃ .. 74..

മഹാവൈഭവീ ദ്വാരകേശോ ഹ്യനേകശ്ചലന്നാരദഃ ശ്രീപ്രഭാദർശകസ്തു .
മഹർഷിസ്തുതോ ബ്രഹ്മദേവഃ പുരാണഃ സദാ ഷോഡശസ്ത്രീസഹസ്രസ്ഥിതശ്ച .. 75....

ഗൃഹീ ലോകരക്ഷാപരോ ലോകരീതിഃ പ്രഭുർഹ്യുഗ്രസേനാവൃതോ ദുർഗയുക്തഃ .
തഥാ രാജദൂതസ്തുതോ ബന്ധഭേത്താ സ്ഥിതോ നാരദപ്രസ്തുതഃ പാണ്ഡവാർഥീ .. 76..

നൃപൈർമന്ത്രകൃത് ഹ്യുദ്ധവപ്രീതിപൂർണോ വൃതഃ പുത്രപൗത്രൈഃ കുരുഗ്രാമഗന്താ .
ഘൃണീ ധർമരാജസ്തുതോ ഭീമയുക്തഃ പരാനന്ദദോ മന്ത്രകൃദ്ധർമജേന .. 77..

ദിശാജിദ്ബലീ രാജസൂയാർഥകാരീ ജരാസന്ധഹാ ഭീമസേനസ്വരൂപഃ .
തഥാ വിപ്രരൂപോ ഗദായുദ്ധകർതാ കൃപാലുർമഹാബന്ധനച്ഛേദകാരീ .. 78..

നൃപൈഃ സംസ്തുതോ ഹ്യാഗതോ ധർമഗേഹം ദ്വിജൈഃ സംവൃതോ യജ്ഞസംഭാരകർതാ .
ജനൈഃ പൂജിതശ്ചൈദ്യദുർവാക്ക്ഷമശ്ച മഹാമോഹദോഽരേഃ ശിരശ്ച്ഛേദകാരീ .. 79..

മഹായജ്ഞശോഭാകരശ്ചക്രവർതീ നൃപാനന്ദകാരീ വിഹാരീ സുഹാരീ .
സഭാസംവൃതോ മാനഹൃത്കൗരവസ്യ തഥാ ശാല്വസംഹാരകോ യാനഹന്താ .. 80..

സഭോജശ്ച വൃഷ്ണിർമധുഃശൂരസേനോ ദശാർഹോ യദുർഹ്യന്ധകോ ലോകജിച്ച .
ദ്യുമന്മാനഹാ വർമധൃഗ്ദിവ്യശസ്ത്രീ സ്വബോധഃ സദാ രക്ഷകോ ദൈത്യഹന്താ .. 81..

തഥാ ദന്തവക്ത്രപ്രണാശീ ഗദാധൃഗ്ജഗത്തീർഥയാത്രാകരഃ പദ്മഹാരഃ .
കുശീ സൂതഹന്താ കൃപാകൃത്സ്മൃതീശോഽമലോ ബല്വലാംഗപ്രഭാഖണ്ഡകാരീ .. 82..

തഥാ ഭീമദുര്യോധനജ്ഞാനദാതാപരോ രോഹിണീസൗഖ്യദോ രേവതീശഃ .
മഹാദാനകൃദ്വിപ്രദാരിദ്ര്യഹാ ച സദാ പ്രേമയുക് ശ്രീസുദാമ്നഃ സഹായഃ .. 83..

തഥാ ഭാർഗവക്ഷേത്രഗന്താ സരാമോഽഥ സൂര്യോപരാഗശ്രുതഃ സർവദർശീ .
മഹാസേനയാ ചാസ്ഥിതഃ സ്നാനയുക്തോ മഹാദാനകൃന്മിത്രസമ്മേലനാർഥീ .. 84..

തഥാ പാണ്ഡവപ്രീതിദഃ കുന്തിജാർഥീ വിശാലാക്ഷമോഹപ്രദഃ ശാന്തിദശ്ച .
വടേ രാധികാരാധനോ ഗോപികാഭിഃ സഖീകോടിഭീ രാധികാപ്രാണനാഥഃ .. 85..

സഖീമോഹദാവാഗ്നിഹാ വൈഭവേശഃ സ്ഫുരത്കോടികന്ദർപലീലാവിശേഷഃ .
സഖീരാധികാദുഃഖനാശീ വിലാസീ സഖീമധ്യഗഃ ശാപഹാ മാധവീശഃ .. 86..

ശതം വർഷവിക്ഷേപഹൃന്നന്ദപുത്രസ്തഥാ നന്ദവക്ഷോഗതഃ ശീതലാംഗഃ .
യശോദാശുചഃ സ്നാനകൃക്ദ്ദുഃഖഹന്താ സദാഗോപികാനേത്രലഗ്നോ വ്രജേശഃ .. 87..

സ്തുതോ ദേവകീരോഹിണീഭ്യാം സുരേന്ദ്രോ രഹോ ഗോപികാജ്ഞാനദോ മാനദശ്ച .
തഥാ സംസ്തുതഃ പട്ടരാജ്ഞീഭിരാരാദ്ധനീ ലക്ഷ്മണാപ്രാണനാഥഃ സദാ ഹി  .. 88..

ത്രിഭിഃ ഷോഡശസ്ത്രീസഹസ്രസ്തുതാംഗഃ ശുകോ വ്യാസദേവഃ സുമന്തുഃ സിതശ്ച .
ഭരദ്വാജകോ ഗൗതമോ ഹ്യാസുരിഃ സദ്വസിഷ്ഠഃ ശതാനന്ദ ആദ്യഃ സരാമഃ .. 89..

മുനിഃ പർവതോ നാരദോ ധൗമ്യ ഇന്ദ്രോഽസിതോഽത്രിർവിഭാണ്ഡഃ പ്രചേതാഃ കൃപശ്ച .
കുമാരഃ സനന്ദസ്തഥാ യാജ്ഞവൽക്യഃ ഋഭുർഹ്യംഗിരാ ദേവലഃ ശ്രീമൃകണ്ഡഃ .. 90..

മരീചീ ക്രതുശ്ചൗർവകോ ലോമശശ്ച പുലസ്ത്യോ ഭൃഗുർബ്രഹ്മരാതോ വസിഷ്ഠഃ .
നരശ്ചാപി നാരായണോ ദത്ത ഏവ തഥാ പാണിനിഃ പിംഗലോ ഭാഷ്യകാരഃ .. 91..

സകാത്യായനോ വിപ്രപാതഞ്ജലിശ്ചാഥ ഗർഗോ ഗുരുർഗീഷ്പതിർഗൗതമീശഃ .
മുനിർജാജലിഃ കശ്യപോ ഗാലവശ്ച ദ്വിജഃ സൗഭരിശ്ചർഷ്യശൃംഗശ്ച കണ്വഃ .. 92..

ദ്വിതശ്ചൈകതശ്ചാപി ജാതൂദ്ഭവശ്ച ഘനഃ കർദമസ്യാത്മജഃ കർദമശ്ച .
തഥാ ഭാർഗവഃ കൗത്സകശ്ചാരുണസ്തു ശുചിഃ പിപ്പലാദോ മൃകണ്ഡസ്യ പുത്രഃ .. 93..

സപൈലഃസ്തഥാ ജൈമിനിഃ സത്സുമന്തുർവരോ ഗാംഗലഃ സ്ഫോടഗേഹഃ ഫലാദഃ .
സദാ പൂജിതോ ബ്രാഹ്മണഃ സർവരൂപീ മുനീശോ മഹാമോഹനാശോഽമരഃ പ്രാക് .. 94..

മുനീശസ്തുതഃ ശൗരിവിജ്ഞാനദാതാ മഹായജ്ഞകൃച്ചാഭൃതസ്നാനപൂജ്യഃ .
സദാ ദക്ഷിണാദോ നൃപൈഃ പാരിബർഹീ വ്രജാനന്ദദോ ദ്വാരികാഗേഹദർശീ .. 95..

മഹാജ്ഞാനദോ ദേവകീപുത്രദശ്ചാസുരൈഃ പൂജിതോ ഹീന്ദ്രസേനാദൃതശ്ച .
സദാ ഫാൽഗുനപ്രീതികൃത് സത്സുഭദ്രാവിവാഹേ ദ്വിപാശ്വപ്രദോ മാനയാനഃ .. 96..

ഭുവം ദർശകോ മൈഥിലേന പ്രയുക്തോ ദ്വിജേനാശു രാജ്ഞാസ്ഥിതോ ബ്രാഹ്മണൈശ്ച .
കൃതീ മൈഥിലേ ലോകവേദോപദേശീ സദാവേദവാക്യൈഃ സ്തുതഃ ശേഷശായീ .. 97..

പരീക്ഷാവൃതോ ബ്രാഹ്മണൈശ്ചാമരേഷു ഭൃഗുപ്രാർഥിതോ ദൈത്യഹാ ചേശരക്ഷീ .
സഖാ ചാർജുനസ്യാപി മാനപ്രഹാരീ തഥാ വിപ്രപുത്രപ്രദോ ധാമഗന്താ .. 98..

വിഹാരസ്ഥിതോ മാധവീഭിഃ കലാംഗോ മഹാമോഹദാവാഗ്നിദഗ്ധാഭിരാമഃ .
യദുർഹ്യുഗ്രസേനോ നൃപോഽക്രൂര ഏവ തഥാ ചോദ്ധവഃ ശൂരസേനശ്ച ശൂരഃ .. 99..

ഹൃദീകശ്ച സത്രാജിതശ്ചാപ്രമേയോ ഗദഃ സാരണഃ സാത്യകിർദേവഭാഗഃ .
തഥാ മാനസഃ സഞ്ജയഃ ശ്യാമകശ്ച വൃകോ വത്സകോ ദേവകോ ഭദ്രസേനഃ .. 100..

നൃപോഽജാതശത്രുർജയോ മാദ്രിപുത്രോഽഥ ഭീമഃ കൃപോ ബുദ്ധിചക്ഷുശ്ച പാണ്ഡുഃ .
തഥാ ശന്തനുർദേവബാഹ്ലീക ഏവാഥ ഭൂരിശ്രവാശ്ചിത്രവീര്യോ വിചിത്രഃ .. 101..

ശലശ്ചാപി ദുര്യോധനഃ കർണ ഏവ സുഭദ്രാസുതോ വിഷ്ണുരാതഃ പ്രസിദ്ധഃ .
സജന്മേജയഃ പാണ്ഡവഃ കൗരവശ്ച തഥാ സർവതേജാ ഹരിഃ സർവരൂപീ .. 102..

വ്രജം ഹ്യാഗതോ രാധയാ പൂർണദേവോ വരോ രാസലീലാപരോ ദിവ്യരൂപീ .
രഥസ്ഥോ നവദ്വീപഖണ്ഡപ്രദർശീ മഹാമാനദോ ഗോപജോ വിശ്വരൂപഃ .. 103..

സനന്ദശ്ച നന്ദോ വൃഷോ വല്ലഭേശഃ സുദാമാർജുനഃ സൗബലസ്തോക ഏവ .
സകൃഷ്ണോ ശുകഃ സദ്വിശാലർഷഭാഖ്യഃ സുതേജസ്വികഃ കൃഷ്ണമിത്രോ വരൂഥഃ .. 104..

കുശേശോ വനേശസ്തു വൃന്ദാവനേശസ്തഥാ മഥുരേശാധിപോ ഗോകുലേശഃ .
സദാ ഗോഗണോ ഗോപതിർഗോപികേശോഽഥ ഗോവർധനോ ഗോപതിഃ കന്യകേശഃ .. 105..

അനാദിസ്തു ചാത്മാ ഹരിഃ പൂരുഷശ്ച പരോ നിർഗുണോ ജ്യോതിരൂപോ നിരീഹഃ .
സദാ നിർവികാരഃ പ്രപഞ്ചാത് പരശ്ച സസത്യസ്തു പൂർണഃ പരേശസ്തു സൂക്ഷ്മഃ .. 106.. സമത്യ ??
ദ്വാരകായാം തഥാ ചാശ്വമേധസ്യ കർതാ നൃപേണാപി പൗത്രേണ ഭൂഭാരഹർതാ .
പുനഃ ശ്രീവ്രജേ രാസരംഗസ്യ കർതാ ഹരീ രാധയാ ഗോപികാനാം ച ഭർതാ .. 107..

സദൈകസ്ത്വനേകഃ പ്രഭാപൂരിതാംഗസ്തഥാ യോഗമായാകരഃ കാലജിച്ച .
സുദൃഷ്ടിർമഹത്തത്ത്വരൂപഃ പ്രജാതഃ സകൂടസ്ഥ ആദ്യാങ്കുരോ വൃക്ഷരൂപഃ .. 108..

വികാരസ്ഥിതശ്ച ഹ്യഹങ്കാര ഏവ സവൈകാരികസ്തൈജസസ്താമസശ്ച .
മനോ ദിക്സമീരസ്സ്തു സൂര്യഃ പ്രചേതോഽശ്വിവഹ്നിശ്ച ശക്രോ ഹ്യുപേന്ദ്രസ്തു മിത്രഃ .. 109..

ശ്രുതിസ്ത്വക്ച ദൃഗ്ഘ്രാണജിഹ്വാഗിരശ്ച ഭുജാമേഢ്രകഃ പായുരംഘ്രിഃ സചേഷ്ടഃ .
ധരാവ്യോമവാർമാരുതശ്ചൈവ തേജോഽഥ രൂപം രസോ ഗന്ധശബ്ദസ്പൃശശ്ച .. 110..

സചിത്തശ്ച ബുദ്ധിർവിരാട് കാലരൂപസ്തഥാ വാസുദേവോ ജഗത്കൃദ്ധതാംഗഃ .
തഥാണ്ഡേ ശയാനഃ സശേഷഃ സഹസ്രസ്വരൂപോ രമാനാഥ ആദ്യോഽവതാരഃ .. 111..

സദാ സർഗകൃത്പദ്മജഃ കർമകർതാ തഥാ നാഭിപദ്മോദ്ഭവോ ദിവ്യവർണഃ .
കവിർലോകകൃത്കാലകൃത്സൂര്യരൂപോ നിമേഷോ ഭവോ വത്സരാന്തോ മഹീയാൻ .. 112..

തിഥിർവാരനക്ഷത്രയോഗാശ്ച  ലഗ്നോഽഥ മാസോ ഘടീ ച ക്ഷണഃ കാഷ്ഠികാ ച .
മുഹൂർതസ്തു യാമോ ഗ്രഹാ യാമിനീ ച ദിനം ചർക്ഷമാലാഗതോ ദേവപുത്രഃ .. 113..

കൃതോ ദ്വാപരസ്തു ത്രിതസ്തത്കലിസ്തു സഹസ്രം യുഗസ്തത്ര  മന്വന്തരശ്ച .
ലയഃ പാലനം സത്കൃതിസ്തത്പരാർധം സദോത്പത്തികൃദ്ദ്വ്യക്ഷരോ ബ്രഹ്മരൂപഃ .. 114..

തഥാ രുദ്രസർഗസ്തു കൗമാരസർഗോ മുനേഃ സർഗകൃദ്ദേവകൃത്പ്രാകൃതസ്തു .
ശ്രുതിസ്തു സ്മൃതിഃ സ്തോത്രമേവം പുരാണം ധനുർവേദ ഇജ്യാഥ ഗാന്ധർവവേദഃ .. 115..

വിധാതാ ച നാരായണഃ സത്കുമാരോ വരാഹസ്തഥാ നാരദോ ധർമപുത്രഃ .
മുനിഃ കർദമസ്യാത്മജോ ദത്ത ഏവ സയജ്ഞോഽമരോ നാഭിജഃ ശ്രീപൃഥുശ്ച .. 116..

സുമത്സ്യശ്ച കൂർമശ്ച ധന്വന്തരിശ്ച തഥാ മോഹിനീ നാരസിംഹഃ പ്രതാപീ .
ദ്വിജോ വാമനോ രേണുകാപുത്രരൂപോ മുനിർവ്യാസദേവഃ ശ്രുതിസ്തോത്രകർതാ .. 117..

ധനുർവേദഭാഗ്രാമചന്ദ്രാവതാരഃ സസീതാപതിർഭാരഹൃദ്രാവണാരിഃ .
നൃപഃ സേതുകൃദ്വാനരേന്ദ്രപ്രഹാരീ മഹായജ്ഞകൃദ്രാഘവേന്ദ്രഃ പ്രചണ്ഡഃ .. 118..

ബലഃ കൃഷ്ണചന്ദ്രസ്തു കൽകിഃ കലേശസ്തു ബുദ്ധഃ പ്രസിദ്ധസ്തു
ഹംസഃസ്തഥാശ്വഃ .
ഋഷീന്ദ്രോഽജിതോ ദേവവൈകുണ്ഠനാഥോ ഹ്യമൂർതിശ്ച മന്വന്തരസ്യാവതാരഃ .. 119..

ഗജോദ്ധാരണഃ ശ്രീമനുർബ്രഹ്മപുത്രോ നൃപേന്ദ്രസ്തു ദുഷ്യന്തജോ ദാനശീലഃ .
സദ്ദൃഷ്ടഃ ശ്രുതോ ഭൂത ഏവം ഭവിഷ്യദ്ഭവത്സ്ഥാവരോ ജംഗമോഽല്പം മഹച്ച .. 120..


---------------------------------------------------------------------------------------------------------------
ഇതി ശ്രീഭുജംഗപ്രയാതേന ചോക്തം ഹരേ രാധികേശസ്യ നാമ്നാം സഹസ്രം .
പഠേദ്ഭക്തിയുക്തോ ദ്വിജഃ സർവദാ ഹി കൃതാർഥോ ഭവേത്കൃഷ്ണചന്ദ്രസ്വരൂപഃ .. 121..

മഹാപാപരാശിം ഭിനത്തി ശ്രുതം യത്സദാ വൈഷ്ണവാനാം പ്രിയം മംഗലം ച .
ഇദം രാസരാകാദിനേ ചാശ്വിനസ്യ തഥാ കൃഷ്ണജന്മാഷ്ടമീമധ്യ ഏവ .. 122..

തഥാ ചൈത്രമാസസ്യ രാകാദിനേ വാഥ ഭാദ്രേ ച രാധാഷ്ടമീ സദ്ദിനേ വാ .
പഠേദ്ഭക്തിയുക്തസ്ത്വിദം പൂജയിത്വാ ചതുർധാ സുമുക്തിം തനോതി പ്രശസ്തഃ .. 123..

പഠേത്കൃഷ്ണപുര്യാം ച വൃന്ദാവനേ വാ വ്രജേ ഗോകുലേ വാപി വംശീവടേ വാ .
വടേ വാക്ഷയേ വാ തടേ സൂര്യപുത്ര്യാഃ സ ഭക്തോഽഥ ഗോലോകധാമ പ്രയാതി .. 124..

ഭജേദ്ഭക്തിഭാവാച്ച സർവത്രഭൂമൗ ഹരിം കുത്ര ചാനേന ഗേഹേ വനേ വാ .
ജഹാതി ക്ഷണം നോ ഹരിസ്തം ച ഭക്തം സുവശ്യോ ഭവേന്മാധവഃ കൃഷ്ണചന്ദ്രഃ .. 125..

സദാ ഗോപനീയം സദാ ഗോപനീയം സദാ ഗോപനീയം പ്രയത്നേന ഭക്തൈഃ .
പ്രകാശ്യം ന നാമ്നാം സഹസ്രം ഹരേശ്ച ന ദാതവ്യമേവം കദാ ലമ്പടായ .. 126..

ഇദം പുസ്തകം യത്ര ഗേഹേഽപി തിഷ്ഠേദ്വസേദ്രാധികാനാഥ ആദ്യസ്തു തത്ര .
തഥാ ഷഡ്ഗുണാഃ സിദ്ധയോ ദ്വാദശാപി ഗുണൈസ്ത്രിംശദ്ഭിർലക്ഷണൈസ്തു പ്രയാന്തി .. 127..

ഇതി ശ്രീമദ്ഗർഗസംഹിതായാം അശ്വമേധഖണ്ഡേ ശ്രീകൃഷ്ണസഹസ്രനാമവർണനം
നാമൈകോനഷഷ്ടിതമോഽധ്യായഃ .. ദശമഖണ്ഡേ അധ്യായ 59..